Sulhnu Fangtu
(A cemnak)
Kan lo zin țek ih ka pial hnu rei lo te ah, ka hmai ah mi feh um vekin ka thei ih ka ding thutthi lala. Khua a thim thlang nan cumi tiang ahcun torchlight ka vang lo. Ziangahtile mai lo zin hi cu kan thei tuk ih, zan hman ah khawthim lak ah kan feh men țheu.
Ka ngaih țha nawn lo cia thawn, ka hmai ah mi feh um vekih ka theih ruangah ka zal ih torchlight ka phorh ih ka hmailam zawn ka tlet. Zianghman ka hmu lo.
Cui' thok cun torchlight vang in ka feh. Vainim le fangngai (Laifang) rul lak ihsin kan thlam a lang ziknak ka thlen ah ka hmai ah minung um vekin ka thei lala ih hmailam ka tlet lohli. Thli a hrang lo nan, zin kap ih fangngai le vainim hnah cu daitu nei bang in malte an hnin selhso.
Ka hmul an tho suarso ih ka khawsik sem an bol surso. Ka ding lawk ih thu ka ruat. Pathian fa ka si ih, ningțih ka nei lo ka ti cing in ziangruangah khawsia vek men ruangah ka ning a țih tum, ti'n thinlung pacan ka vun cuh. Ziangvek khawsia khal in Pathian cu an țih ruangah Pathian hmin ka sal cun in naih ngam lo ding ti ka zum. Curuangah thinlungte'n thlacam phah in Pathian hmin ka hlam ih thlam cu ka va pan.
Tu ahcun khua a thim tuk zo ih kan thlam khal dum muammi lawng in a lang. Torchlight in thlam cu ka tlet hmaisa. A sunglam mallai tiang a lang. A lang cin cu amah kel a si.
Asinan thlam ih vung luh ding cu ziangtin simaw ka hreh ciamco. A sungah mi pakhatkhat a um vek rori khin ka thei. Thlam ihsi cil phui ban deuhthaw ah ka ding cuarci lawk. Thlam sungah i siatsuah theitu an um lo ti ka thei keukeu nan vung luh ding cu ka hupphurh thotho. Hivek fang ahhin zumnak mal le mal lo a thupi zet a si hmang, Pathian hmin sal ih thlacam phah cu ka rak hngilh man zo.
Pacan cuh ih, "Ehem," ti'n ka khuh hrim. Cu thluh ah nuamnaite'n thlam cu ka pan ih thlam sung ka tlet theinak cin cu lang ding in ka tlet vivo. Thlam sung ahcun zianghman a rak um lo. Asinan thlam sung ka vung lut ciah cu ka tha a khur, ka kai a hang ih, ka thlanhri an pawt ciamco. Thlam ban pawk in malte ka ding lawk ih, cu thluh ah tappi kiangah ka va to sutsi.
Sun ih meisa ka duah ta mi ka thai lohli ih meisa ka muah. Asinan ka muah alh lohli thei lo. Thinghnge le thinghawng ro ka thlak bet. Asinan alh duh cuang lo’n a khu tampi a suak luailo rero men. A mak ka tinak san cu thinghnge le thinghawng pawl cu a ro ttha mi an si nan, tidai ih ciarter mi vek in an khu un-o. Ka thin le ham kai aw lo ah bible siar ka tum mi khal cu ka rak hngilh verver.
Cuti ih meisa ka semnak le meikhu ka hipnak ah ka thaw a pit zik ih thli thiang deuh hawp ding in ka lu ka hun tun rual ah tapsak ah minung pakhat a rak to ti ka hmu. Ka thin a thir tuk ih dung ah ka sip vukvi. Cuvete’n ka hmuh mi cu a hlo cih sal. Asinan cui’ mittthep kar te ka hmuh mi cu zo a si ti fiang zet in ka theithiam man. Ziangahtile ka theih tuk mi minung a rak si.
Ka hmuh mi cu, kan khua ihsin Lairawn lam ih an vaihnak a rei zet zo mi, suakthuan kan si hrawng ihsin kum hnih vei khat hrawng kan khua ih hung tlawng sal ttheutu Pa Vai Hlei Thawm a rak si. Kannih cun Pa Vai ti’n kan ko ttheu. Khua a hung tlun can ah in kom ngaih thei zet ih, a fa le rual kan si nan, ramtawih le ngathliar tivek ah ram kan riak tlang ringring ttheu.
Mak ka ti emem mi cu, a hmel zo a si ti ka hmuh ngah can le ka rak ihthah can karlak ah ziang a thleng timi kha tuini tiang in ka polsuak thei nawn lo. Thlam tappi kiangah ka hmu ih, cumi hnu ah ihkhun ka pan lai ka thei lo nan, mi pakhat lawng tlem ih rua kan phah mi thlam ihkhun ah ka rak itthat ti ka hung tthang hnu lawng ah ka thei.
Ka ihthah lai ahcun mang ka man ih ka mang ah Pa Vai cu kan lo ah a rung feh. Tawngphu le meithal thawn kan thlam zin in a rung suk ih a run khuh awn hrim phahphah. Thlam leng ah ka va suak ih, Pa Vai ka hmuh cun mak ka ti zet. Ka lung khal a awi zet. Cibai aw phah, thlam sungih lut phah in dam le dam lo thu tla kan sut aw ih, “Ziangruangah thlen zan khawthim hnu rori ah i rung pan cih? Poipeng a um pang maw?” tiah helhkam nei deuh in ka rak sut.
Anih cun poipeng dang a um lo thu, kan khua le khaw sung minung pawl a ngai tuk ruangih hung tlawng duak a si thu, a hleice in keimah i ngai zet ruangah a zanzan in, lo tiangtiang ih i rung pan cih mi a si thu i sim. Savom le ngal vek tla an um pang le bawh phah khal ka duh a ti. Ramtawih le ngathliar tla a ngai zet thu, keimai veivahpi a beisei thu pawl tla i ruah rero. Rei zet kan titi tlang hnu ah, “Khuiha, venghnen lo riak dang tla va pal hai ta keng, ka ngai hai tuk aw,” a ti.
Lairawn ihsin na hung thleng ih, kan lo tiang na rung feh hman na bang tuk ding, zan thim hnu ahcun veivak rero lo in, tuizan cu it phot awla, thaizing ah na va vehvai hai ding ka ti rero nan feh a tum thotho. Kan lo taw ah savom le ngal tla bawh a remcang men ding hokhaw ti’n ka thlem bet nan a duh cuang lo. “Seherh mi hi cu seherh zet lai ih ton rori le di a riam cuang si lawm,” a ti ih a tawngphu le meithal cuh in thlam leng ah a suak.
Pa Vai in kan thlam a suahsan vete’n ka hung tthangharh. Zanttim hrawng a si. Thil um dan ruat tikah poimawh pakhatkhat a um ding ti cu ka theithiam mai. A hleice in Pa Vai hin in thih san zo simaw, thih hu sual in a na besia si maw a si ding tiah ka ruat. In thihsan zo asile khawsia pakhatkhat in Pa Vai ih thlarau ah cangawter in i vehvai a si thei ih, a thi hrih lo a si ahcun amai’ thlarau ngaingai tla si men ding ka ti rero.
Mak ka ti zet mi cu a hmel ka hmuh hnu le ka mang ih kan tonawk hnu cun ningttihnak zianghman ka nei nawn lo. Rualpi ttha, duhdawttu ttha pakhat ngai vek rori’n Pa Vai cun ka thinlung i luah. A thuhla ruat lo in ka um thei lo. Zan ih lo sung ka vehvai phah khal ah Pa Vai cu ka kiangah um ve vekin ka thei nan ka ning a ttih riai lo.
Zinglam rit kil ttheh in ka tlung. Tlun zin ah lo feh pawl ka tong hai ih, khaw sung ah thuthang siava a um lo.
Asinan cumi hnu ni thum a rei ah Pa Vai Hlei Thawm in an cennak Lairawn khua pakhat ah mual in liam san timi thuthang kan thei.
A cem.
