Nimthlakau Larry ih Thuanthu Roling

Nimthlakau Larry ih Thuanthu Roling

Meithal thawi' sualawknak lam ih turu Wild Bill Hickok le Wyatt Earp pawl ih thu cu na thei zo ding. Asinan hmun tinkim ih mi ttha lo pawl thinlung ah ttihphannak nasa sawn thlentertu hmin dang pakhat ka lo sim ding.

Nimthlakau Larry a si.

Kei cu Brimstone timi khawpi tenau pakhat mi ka si. Kan khua ih ah Larry ra thleng in, Cottonmouth Saloon ih a luh ni kha ka hngilh thei dah lo ding. Dawr sungah ke-kar kau zet thawn a lut turto ih, dawrkiltu zoh phah in a hni-no.

"Lemo ti no khat, zangfahte'n."

Cutawk hmun ih minung lu um hmuahhmuah cu amai' lam an her thluh.

Cumi laifang ah Larry ih dunglam ih umtu cu Crooked Curt a si. Curt cu rannung rutu misualbur lak ih tel ve a si. An misualbur cun kan khua cu ttihphannak thawn in khatter ttheu. An hotu cu raltho sualral zet Evil-Eye McNeevil a si.

Curt cu ralthopawl tidan kelte'n mithmai thim remrem in a um. Larry cu dunglam a hoi ih hni-no phah in, "Na mittlang khumsuk dan cu picang lawlaw si, pupa," tiah a bia.

"Cumi cu na hrangah ziang poi?" tiah Curt cun a hro.

"Si ngai," tiah Larry cun a sawn, "Ka rehter thei men ding."

"Rehter na tumdan cu hmuh ka hiar nasa!"

Midang hmuahhmuah cu kan kiang thluh lohli. Dawrkiltu khal thilzuarnak donsang phen ah a kun. Larry le Curt cu ke-kar hra veve hrawng an sip. An kut cu a tiar aw cia. Larry cu a hni-no ringring lai.

Curt a cangvai hmaisa. Asinan a meithalbawm ihsin meithal a dirsuak man fangfang. Larry in a tinh ih a kap zo.

Ziu!

Meithal puak awn a um lo. Cerek khal a um lo. Curt ih awm laifang, a thinlung zawn ah tleu fatakte pakhat a lut zukzi. Cu vial.

Curt cu a ding lai. A mitpawl cu mangbangnak ruangah an phaw keke. Cu thluh in a meithal a thlak. A hmaivun cuar thluh ko in a hung hni. Larry a va pan lohli ih, a kut a va pawk.

"Mikhualpa, ka lo thei ngah cu ka lungawi vanpi a tia! Keima'n nan in mi man ka kuan thluh ding. Mi hmuahhmuah in lemonade ti run zem thluh hai uh!"

* * *

Evil-Eye McNeevil le a rualpi ralthopawl in Crooked Curt a nun a tuah ttha zo ti an theih tikah, an kedil sawh in an turcai ciamco.

Raltho timi cu hnih-no hnak in thih-hlo ding a si hrimhrim!

Evil-Eye ih milai hmuahhmuah cun cangvaih an man ttiattia zo. Asinan an zatei' cangvaih sian a si hrih lo. Ziangahtile a thaisun ah Dismal Dan, Devilish Dick, le Dreadful Dave timipawl Brimstone khua ah an ra lut. Mi-aa vak in an ra kiauraak ih sualral zet in meithal an kap puak rero. Tukvirhpawl an siatdarh, mipipawl an ttekdarh.

Cumi thluh ah Nimthlakau Larry a rung lang. Nimthlakau Larry cun cupawl ih thiltuah cu a dawn cuang lo. A hnih-no khal a cawl cuang lo. Cui' raltho pathum cu tleu fatakte pathum in a kap men. An thinlung zawn ciah ah a ngah hai.

Larry ih a kah ruangah ralthopawl cu lei ah an ril. Ziangmi in a ngah ruangah an tlu ti an thei lo. An mang a bang zet. Cu thluh in an hung tho ih an kiangkap an zoh.

"Unaupawl, thil kan siatsuah ruri a va bang ve," tiah Dismal Dan in a sim.

"Zohman an tuahmawhawk lo ka beisei," tiah Devilish Dick in a sim ve.

"Hipawl hi tuah ttha sal ding in hnattuan thok cih sehla a ttha sawn ding," tiah Dreadful Dave a run ttong ve.

Cumi hnu cun tukvirhpawl tuah tthat salnak ah, le a ngai paihtu hmuahhmuah hnenih ngaidam dilnak ah a tang lai mi nipawl cu an hmang. Cui hlei ah, lamzin ih hnawm hmuahhmuah khal an sar fai thluh bet.

* * *

Evil-Eye McNeevil cun a milai ttangkaibik pathum a sungral lala. A thin a ling zet. Curuangah thil siava zet pakhatkhat tuah ding in a ruatcat.

A thaisun ah Stinky Steve le Sickening Sid cu Phunpihuap Sumkhawlnak le Cawinak 79-nak ah meithal keng in an lut. An hmai an tuam nan, an rim ihsin zo an si ti cu mi hmuahhmuah in an thei.

"Nan kut thlir thluh uh," tiah Stinky Steve in a auh hai.

"Nan paisa retnak ih paisa um hmuahhmuah in ra pe thluh uh," tiah Sickening Sid in thu a pe.

Paisa dippawl khai phah in sangka ih an suah zawng ah, hahdam zet in ra feh Nimthlakau Larry an hmu. Larry cun a ke-kar khal a muangter cuang lo. Cui' misualpawl ih zaang ah a kap cih men. An thinlung zawn a ngah ciah fawn.

Raltho pahnih cu mangbang zet in an zoh aw.

"Cawkhaltu taima pawl ih paisa ruk cu a ningzah thlak zet a bang e," tiah Stinky Steve a hun ttong.

"An nun hi retheihter bet ka paih nawn lo," tiah Sickening Sid in a sim ve.

An meithal an phelh, paisa kiltui' hnenah a kir sal ih, paisa retnak dippawl cu an pe sal.

"Himi paisapawl hi tu ihsin him ding in run kil uh," tiah Sickening Sid cun a sim hai.

Cu thluh in an paisabawm an phorh ih hmin cazin an khum cih ve.

* * *

Cumi cu Evil-Eye McNeevil ih tuar theinak netkhawt a thleng. A taktak ih phosuahawk a cu thlang.

A thaisun siimlam deuh ah Larry cu Cottonmouth Saloon ah lemonade ti a in. Culai ah Evil-Eye cu sangkapawl sirh ong in a rung lut ih, Larry a va pan cih.

"Keimah hi Evil-Eye McNeevil ka si."

"Hello, Evil-Eye!" tiah Larry cun hni-no siamsiam phah in a rak bia. "Lemonade ti no khat ka lo do thei pei maw?"

"Himi khua cu kan pahnih hrang ahcun a tum tawk lo."

"Aw, thei ve hlah maw," tiah Larry in a sawn. "Ka hrang ahcun a kau tawk pam a bang ka rak ti men."

"Okey-Dokey Corral kiang ihsin ka rak lo hngak ding."

Cu thluh in Evil-Eye cu a suak sal cih.

Larry cun a lemonade ti cu a in thluh ta ih, Lamzin Pibik zawh in feh. Evil-Eye cun a rak hngak. Asinan Evil-Eye cu amah lawng a si lo. A khatlam khatlam ah Raunchy Ralph, Grimy Greg, Creepy Cal, Moldy Mike, Lousy Luke le Gruesome Gus pawl an ding hai. An lak ah nel um mithmai keng pakhat hman an um lo.

"Veivahnak hrangah ni nuam zet a si ual!" tiah Larry cun a hei auh hai.

"Phorh," tiah Evil-Eye cu a ttong.

Brimstone khaw mi kan zate'n ziang a cang ding ti hmuh duh ah Lamzin Pibik kiang ah kan ding tlar thluh. Larry cu a hni-no ringring lai. Asinan Larry rori hman in cui' ralthopawl cu an zate cun a kap thlu thluh man lo ding ti kan thei.

Cumi ttheh ciah ah Cottonmouth Saloon ihsin aw pakhat a ra thang. "Larry bawmnak mallai na duh maw?"

"Poi cuang lem hlah e!" tiah Larry cun a auh kir.

Cottonmouth Saloon ihsin Crooked Curt a ra suak. A dung ihsin Dismal Dan, Devilish Dick, Dreadful Dave, Stinky Steve, le Sickening Sid pawl an ra suak ve. Larry ih kiang ah an ra ding thluh.

"Hello, Evil-Eye!" tiah Curt in a hei auh.

"Phansantupawl," tiah Evil-Eye in a rak auh kir ve.

"Phorh uh," tiah Larry cun hni-no phah in a sim hai.

Evil-Eye le a milaipawl in an meithal an phorh. Asinan Larry le a rualpipawl cu mit-tthep karte'n an rang deuh. An meithalpawl ihsin tleu fatakte pasarih a suak. Raltho paruk pawl ih na-theih-nak-zawn ahkhan an kap ngah.

"Huhui!" tiah Evil-Eye cu a au. Thli lakah a meithal a kap.

Ziu!

Meithal puak awn a um lo. Cerek khal a suak lo. Tleu fatakte pakhat lawng a suak.

"A si le khah, rual le pawl!" tiah Larry cu a au. "Himi khua hi tu rori ah kumkhaw daih in thenfai uh si!"

Zohman kan relh man hlan ah, Larry le Evil-Eye le midangpawl cun an meithalpawl thawn in tinh thluh. Hmun tinkim ah tleu fatakte pawl an zuang. Zohman an luat lo – mipa, nunau, nauhak ti lo in tleu fatakte in a ngah thluh.

Khami ttum tluk ih mipi lungawi aipuang na hmu dah lo ding! Pakhat le pakhat kan pan aw. Kan kut kan kai aw ih, kan pom aw. Cu thluh ah thlungdar tumthiampawl in an thlungdar an phorh ih kan laam thluh hai. Lamzin Pibik cun nomawknak puai tuahnak ah a cang – cumi ni sunvu le zan tiang in.

Ka dam sung ah khami ni tluk ih lemonade ti in tam a hlawh ni ka hmu dah lo.

* * *

Kan awn-au a celcel ruangah, ni a liam zawng ih Larry a feh liam ve lai khal mi malte lawng in kan hmu ngah. Khuitawk a pan ti ka rel thei lo. Tu ah ziang a tuah ti khal ka rel thei lo.

Asinan thinlung cu a hmuitinh ringring lai ding ti ka tiam ngam.

Ziu!

Sirhsan: The Legend of Lightning Larry told by Aaron Shepard

Tirhfakpa Giant

Tirhfakpa Giant

Siimlam tlawng ttum hnu tinte'n nauhakpawl cu Giant ih hmuan ah an feh ih an lek ttheu.

Giant ih hmuan cu a kau in a nuam zet. Hrampi hring nemte pawl an um. Hrampipawl par ahcun a khattawk in pangpar mawi pawl cu arsi vek in an par hai. Hmuan ahcun vaisunhlu kung hleihnih khal an um ih, tthaltir a thlen tinte'n rong pawl le var no mawi zet thawn an par ttheu. Culen thlatang a rung thlen tikah an rah ttheu. Thingkungpawl par ahcun vatepawl an fu ih aw thlum zet thawn hla an sak ttheu. Vatepawl ih hlasak awn cu ngai a nuam tuk ruangah nauhakpawl tla an lek lai cawl in vatepawl hlasak awn an ngai ttheu. "Hitawk ahhin kan nuam aw tuk!" tiah aipuang zet in an au ttheu.

Ni khat cu Gaint a ra tlung. Giant cu a rualpi mi ttihnung zet Cornish hnen a va tlawn hnu ih ra tlung a si. A rualpi Cornish hnenah kum sarih sung a va tlawng. Kum sarih a um hnu cun a rel ding mi thuhla hmuahhmuah a rel thluh. Ziangahtile a ttong ding mi pawl cu bikhiah cia an si ruangah a si. Cutin amai' inn ah a ra tlung. A inn a ra thlen tikah a hmuan ih lek rero nauhakpawl a hmu.

"Hinah ziang nan tuah?" tiah aw bultawi zet thawn a auh hai tikah, nauhakpawl cu an tlan.

"Ka hmuan cu keimai' hmuan a si," tiah Giant cu a au, "zokhal in ka hmuan a si ti an thei thluh. Keimah siar lo cu ka hmuan ah zohman leh ka siang lo ding," a ti. Curuangah a hmuan kulhnak ah hruang sangpi a tuah ih theihternak ca a tar.

HMUAN IH LUTTU CU

DAN TAT A SI DING

Giant cu mi tirhfak zet a si.

Nauhak zangfakza pawl cu lehnak ding an nei nawn lo. Lamzin parah leh an tum. Asinan lamzin cu leivut a tamtuk ih lungto hak an khat thluh fawn. Curuangah lamzin ih leh cu an paih lo. An ca zir an ttheh tikah hmuan kulhnak sangpi kiang ahcun an feh ttheu ih, a sunglam ih hmuan a mawizia an rel ttheu.

"Khitawk ahcun kan nuam aw tuk," tiah pakhat le pakhat an sim aw.

Cumi ttheh cun Tthaltir a ra thleng ih ram pumpi ah pangpar mawi zetzet le vate pawl an ra suak. Asinan Tirhfakpa Giant ih hmuan ahcun Thlatang a si lai. Nauhakpawl an um lo ruangah vatepawl khal in hla an sak paih lo ih, thingkungpawl khal in par ding an hngilh. Pangpar mawi zet cunparsuak ding in hrampi lenglam ih a lu a hun tun sohtikah theihternak ca a hmu ih nauhakpawl hrangih a riah a siat tuk ruangah leilung hnuai ah kir sal in, a itthat sal. Giant ih hmuan sungah a nuam aw mi cu Vur le Daitla lawng an si. "Himi hmuan hi Tthaltir in a hngilh zo," tiah an aukio; "curuangah hitawk ah kum pum in kan um ding," an ti. Vur in hrampipawl cu a kortlunthuah var tumpi thawn a khuh thluh ih, Daitla in thingkung hmuahhmuah var ding in rong a hnih thluh. Saklam Thli khal an hnenih ra ding in an sawm ih a ra. Saklam thli cu hmul tampi in a tuam ih, hmuan sung hmuntin ah sunvute'n a hukraak rero ttheu. Meikhu suahnak zim khal a hran thlak. Saklam Thli cun, "Hitawk hi hmun duhnung zet a si hi," tiah a sim, "ra leng ding in Rial khal kan sawm a ttul," a ti. Curuangah Rial khal a ra ve. Ni tinte'n inn tlunkhuh lungphengpawl par ah nazi pathum sung a aukio ttheu. Inn tlunkhuh lungpheng tamsawn an kuai thluh tiang in a tur ciamco ttheu. Cu thluh in a tlan cak thei tawk ih tlan in hmuan cu a fang kual ciamco ttheu fawn. Rial cu hnipuan rong uk a hruh ih, a thaw cu vurkhal vek a si.

"Ziangruangah Tthaltir hi a ra thleng lohli lo ti ka theithiam lo," tiah Tirhfakpa Giant cun, tukvirh ih a to lai ah,dai in a tlak var thluh mi a hmuan zoh phah in a ttong, "nikhua thleng aw sehla ka beisei."

Asinan Tthaltir cu a ra thleng dah lo ih, Tthal khal a ra thleng cuang lo. Thlatangtir cun hmuan dang hmuahhmuah ih um mi thingkungpawl ah sui thingthei pawl a rahter. Asinan Giant ih hmuan ahcun zianghman a rahter lo. "Giant cu a tirhfak tuk," tiah Thlatangtir in a sim. Cutin Giant ih hmuan cu Thlatang a tuar ringring ih, Saklam Thli, Rial, Vur le Daitla pawl cu thingkung parah an khir an zuang rero men.

Zing khat cu ihkhun parah tthanghoi ih a ih lai ah Giant cun awnmawi duhnungza a thei. A awn a mawi tuk ruangah Siangpahrang ih awnmawi tumthiampawl a inn kiang ihsin an feh a si ding tiah a ruat. Asinan zirziak va fatakte pakhat, a tukvirh lenglam ih hlasak awn sawn a rak si. Asinan a hmuan ih vate hlasak awn a theihlonak a reituk thlang ruangah a hrang ahcun leitlun ih awnmawi mawibik vekah a cang. Cuti'n vate in hla a sak tikah a tlunlam ih lam rero Rial cu a cawl. Saklam Thli khal a hukraak a cawl ih, a tukvirhpi ihsin rimhmui thaw zet pakhat a rung lut. Giant cun 'A netkhawt ahcun Tthaltir a ra thleng thlang a si hi,' tiah a ruat ih, a ihkhun ihsin a khirsuak hnu ah a lenglam a va zoh.

Ziang a hmu?

Thlirmual mawibik miangmo a va hmu. A hmuan hauhruang ong fatakte ihsin nauhakpawl cu bokvak in an rung lut ih, thingkung hngettekpawl parah an rung to hai. A hmuh thei mi thingkung hmuahhmuah ah nauhakte pakhat cio an um thluh. Thingkungpawl cun an hnenih nauhakpawl an ra thlen sal ruangah an lung a awi tuk. Curuangah an parpawl thawn an khuh mawi aw hai ih, an kutpawl cu nem diahdote'n nauhakpawl ih lu tlun ah an vai hai. Vatepawl khal an zuang kual rero ih lungawi aipuang in an ai hai. Pangparpawl khal hrampi hring lenglam an hun zoh so ih, aipuang in an hni. Thlirmual duhnungza a si. Asinan hmuan kil khat te ahcun Thlatang a si lai. Cutawk zawn cu hmuan ih a hlatbiknak kil zawn a si ih, cunah cun nauhak pa te pakhat a ding. Nauhak cu a te tuk lai ih thingkung hnge ah a kai thei lo. Curuangah ningna zet ih ttap phah in a vak kual rero. A umnak ih thingkung zangfakza khal vur le daitla in an khuh lai ih, Saklam thli khal a tlun ah hrang in a hukraak rero lai. Thingkung cun, "Hung kai aw, nauhak te!" ti phah in a hngettekpawl cu a tlintawk ih niambik tiang in a vun kurter. Asinan nauhak cu a te tuk lawmam ih a kai thei lo.

Cumi a hmuh tikah Giant ih thinlung cu a zupral. "Ka va rak tirhfak lawmam ve aw," tiah amahte'n a ttong; "tu ahcun ziangruangah Tthaltir a ra thleng lo ti ka thei thlang. Nauhak zangfakza khi thingkung par ah ka va hlangkai ding ih, hauhruang khal ka tthiatbal ding. Tuihnu cun ka hmuan hi nauhakpawl ih lehnak hmun si kumkhua seh," a ti. A rak tuah mi thil ruangah a riah a se ngaingai.

Cuti'n inn hnuaita pindan ah dimte'n a vung ttum ih awn lo te'n inn hmai sangkapi a on hnu ah hmuan ah a va feh. Asinan nauhakpawl in Giant an hmuh tikah an ttih ih an tlan. Cutikah hmuan ahcun Thlatang a ra thleng sal lala. Nauhak pa te lawng a tlan lo. Ziangahtile a mit ih mitthli an khah thluh ruangah Giant a rat kha a hmu thei lo. Curuangah Giant cun a dunglam ihsin a pom ih dimte'n a kut ah cawi in thingkung parah a hlangkai. Cuvete'n thingkung cu a parsuak cih ih, vatepawl tla a par ah ra fu in hla an ra sak hai. Cule, nauhak pa te cun a kut pahnih a pharh ih Giant ih hngawng kuah phah in, Giant cu a hnam. Cumi an hmuh tikah nauhak dang pawl in Giant cu a sualral nawn lo ti an thei ih, an ra tlan kir sal hai. Nauhakpawl an rat vete'n Tthaltir khal a ra thleng cih ve. Giant cun, "Tu ahcun nanmai' hmuan a si thlang, nauhak te pawl," tiah a sim hai. Cumi hnu ah hreitlung tumpi a la ih a hmuan hauhruang cu a cek tlu. Cumi ni sun nazi hleihnih ih mipipawl bazar an feh tikah, an hmuh dah mi hmuahhmuah lakih hmuan mawibik sungah Giant cu nauhakpawl thawn an lek rero ti an hmu.

Nauhakpawl cu sunvute'n an lek hai ih, siimlam ah Giant mangttha ding in an ra hai. An ra thlen tikah Giant in, "Khuiah si nan rualpi fatakte, thingkung parih ka hlankai mi kha," tiah a rak sut hai. Cumi nauhak te cu amah hnamtu a si ruangah Giant cun a duhdawt bik.

Nauhakpawl cun, "Kan thei lo, a feh zo," tiah an sawn.

Gaint cun, "Thaisun ah ra tengteng ding in rak sim uh maw," tiah a cah hai. Asinan nauhakpawl cun khuitawk ah a um ti an theih lo thu, le an hmuh dah mi a si lo thu an sim tikah, Giant cu a riah a se ngaingai.

Siimlam tlawng ttum hnu tinte'n nauhakpawl cu an ra ih Giant thawn an lek tlang ttheu. Asinan Giant in a duhdawt mi nauhak pa te cu hmuh ding a um nawn lo. Giant cu nauhak hmuahhmuah parah a ttha zet. Asinan a rualpi hmaisabik nauhak fatakte cu hmuh sal ih, biak tla a duh lai thotho. "Ziangtin ka hmu sal thei pei!" tiah a ttong ttheu.

Kum tampi a liam ih, Giant cu a tar zet thlang. A ttawnttai zet thlang fawn. Leh tla a lek thei nawn lo. A tohkham tumpi parah to in nauhakpawl ih lek lai a zoh ttheu ih a hmuan khal a suang zet. "Pangpar mawi tampi ka nei, asinan nauhakpawl hi pangpar hmuahhmuah lakih a mawibik mi an si," tiah a sim.

Thlatang caan zingpit vei khat cu a hnipuan a hruh lai ah a tukvirh lenglam a hei zoh phah. Tu ahcun Thlatang tla a hua nawn lo, ziangahtile Tthaltir a itthat mi men a si ih, pangpar pawl an cawlh hahdam caan a si ti a theithiam zo.

Vei le khat ah mangbangza a hmu. A mit nuai phah in a zoh, zoh leuhleuh rero. Hmuhnak mangbangza taktak a si. Hmuan kil hlabik ah pangpar var duhnungza ih khuh thluh mi thingkung pakhat a um. Sui hlir a si mi a hngettekpawl ihsin ngun rah pawl an thlai aw. Cumi hnuai ahcun a duhdawt mi nauhak te cu a ding.

    

Giant cu lungawi emem in hnuaita pindan ah a suk ih, hmuan ah a tlan phei cih. Hrampi par ihsin zamrang zet in a va tlan hnu ah, nauhak ih kiang a va thleng. A va thlen nai tikah a mithmai cu thinhengnak thawn a hung sen thluh. Cuihnuah, "Zosi lo tuahmawh ngamtu?" tiah a sut. Ziangahtile nauhak ih kut zaphak khatlam veve ah tlawngkhen ih khennak hriamhma an um ih, a ke khatlam veve khal ah tlawngkhen pahnih khennak hriamhma an um thotho.

"Zosi lo tuahmawh ngamtu?" tiah Gaint cun thinheng zet in a sut; "I sim awla ka nam tumpi thawn ka that ding."

"Zohman in in tuahmawh lo," tiah nauhak cun a sawn; "himipawl cu Duhdawtnak hriamhmapawl an si."

"Zomaw lo tuahmawhtu?" tiah Gaint cun a sut bet. Culai ah thil mak danglam zet a parah a rung thleng ih, nauhak te ih hmai ahcun a khuk a bil.

Nauhak cun Gaint cu hnih-no phah in a zoh ih, "Na hmuan ah vei khat i rak lekter siang dah, tuini ahcun keimai hmuan ah na ra thleng ding, ka hmuan cu Paradise a si," tiah a sim.

Cumi ni siimlam ih nauhakpawl an va thlen tikah, Gaint cu thingkung hnuai ah a thi in an va hmu. A taksa pum in pangpar var mawi zet in a rak khuh thluh.

·         The Selfish Gaint by Oscar Wilde