Tibur

Tibur

Chinmi hi tibur thawn a țhen aw thei lo mi kan rak si dah. Riahsiat ninghan can ih hnemawknak khal ah tibur an tul aw țheu. 

Mizoram ih Sailo lal in Pu Con Bik an rung tlawn țum ah Pu Con Bik tibur tultu ding ah fala mawi zet an run hruai dah. Fala hmel țha ih tibur vun tulh cu di a riam cuang. 

"Tibur tulhawk" hi țihzahawknak sang bik pakhat ah a tel kan ti thei. 

Mirang in Mizoram a do tikah, Pu Con Bik in Mirang rak bawm lo ding in an rung dil. A bawm asile Mirang an do neh lo an phang. Pu Con Bik khal in Mirang ka rak bawm lo ding a ti ih, a bawm lo taktak. 

Pu Con Bik le Mirang ralbawi an tonawk țum ah Mirang pawl in upatnak ah zu an inter. Pu Con Bik khal in, "Kei khal in ka zu ka lo tul hai ding," a ti ih tibur a tulh hai. 

Mirang pawl cu an ri ciamco ih, "Con Bik, na zu cu a va mak ve," an ti. Dolh lo ding ti kha Pu Con Bik in a sim lo ih, an rak dolh thluh cu maw! 😆

Tibur hi kuakpi (a taw ah umthawl fate um mi kuak) an fawp mi ihsin an tuah tlangpi. Asinan tibur al țha deuh ding cun kuak khu tam deuh ih ciah a țul tikah, mai' hmawm cop tete hrang lawng a daih. 

Innsang mipum tam deuh simaw, tibur heh deuh simaw hrang ahcun kaa ih fawp mi tibur lawng cu a mal deuh. 

Curuangah tidai tha hmang in tibur tuahtu an rak um. Tidai kha kuak an fawpter a si bik. Tibur zuar duh hrangah a remcang zet.

Hivek hi Zo Dihai kan um lai, phun khat ka kai lai, lawng ah ka rak hmu. 

Kum 6 fang ka rak si tikah ka mitthlam ah a fiang thei tuk nawn lo. Curuangah internet ah ka hawl sal ih, ka hmu fiang thlang. 😁

#ThinharHnemtu

#ChinNunphung 

#RamZuunNgai

Mikei Hi An Um Taktak Maw?

Mikei Hi An Um Taktak Maw? 🤔 

Mikei timi țongfang hi "minung" le "Keipi" (pawpi) timi țongfang pahnih kom ihsin a ra mi a si hmang. A tican cu minung si fawn, keipi (pawpi) si fawn, tinak a si. 

Lal Ruang ih thuanthu ah mikei (Kei Cal) thawn an rualpiawk thu le Lal Ruang tei' unau mikei khua ih an tlawn thu kan hmu thei. Minung le Mikei hi an rak um khawm nasa. 

"Kei Ti In Nu" thuanthu khal ah minung pangai vek ih um can nei, mikei si can nei kan hmu thei. 

"Mikei Tlangval le Milai Fala" thuanthu khal a um. 

Hlawn Dawh Thang tla kha khual lam hla tlawn a duh can ah pawpi ah a cang ih a veivak mai țheu. 

Tu khal ah Parte khua ah Mikei tikhur a um lai. 

Kawl khal in mikei thuanthu hi an nei ve. A hramthok ahcun Shan thuanthu deuh a si. Tu ih Sagaing ramțhen, Hkamti peng, Htamanthi khua khi "Mikei" khua a rak si. 

Shan hrin ci khat a si mi Htaman miphun pawl cu pawpi ah an cang thei ih, sa an deh țheu. Himi an thiamnak hi miphun dang hnenah thleng lo ding in an kilhim ih, anmai' miphun lawng an zirh aw vivo. 

Ramsa an deh duh tikah, hramlak ah mi pahnih an feh ih pakhat cu thingkung parah a kai. A dang pakhat in a hnipuan a hlit thluh ih a hnipuan kha thingkung parih kaitu in a rak keng. 

Thingkung parih kaitu cu pawpi ih deh banlonak hmun sangpi ah a um a țul. A rualpi pawpi ih a can lai, pawpi thinlung a ken lai ah a deh pang lonak ding ah a si. 

Cu thluh in hnipuan hlittu a rualpi cu a daibilin ih pawpi var ah a cang. A țhen cu ciarbek ah an ciahawk hnu ah pawpi ih cang tla an um. 

Pawpi ih a can hnu in sa a va deh. A deh mi sa thawn a ra kir sal tikah thingkung parih um a rualpi in a hnipuan kha a hmai ah a vun thlak. Cutikah minung a si kha a mang sal ih pawpi ihsin minung ah a hung cang. Cuti'n ram an tawi țheu. 

A rualpi in a rak tlun san ih a hnipuan petu an um lo, asilole, hramlak ah a hlo ih a rualpi umnak a hawl hmuh thei nawn lo pang asile a san sung in pawpi ah a cang lan ta. 

Minung dinhmun hnakin pawpi ih can tikah khualtlawn veivah can ah feh cak a theih, hriamnam țul lo in sa a thah theih ruangah an hrangah a remcang ti a si. 

Cui' minung ihsi pawpi ih cang mi kha ထမန်ကျား an ti ih cumi ihsin Kawl țong သမန်းကျား timi a ra suak. 

Kawl cun သမန်းကျား thuanthu tla tampi an ngan ih, zuknung khal ah an cang țheu.

Leitlun ih Biaknak Cindan Maksak pawl (1)

Leitlun ih Biaknak Cindan Maksak pawl (1)

India ram, Maharashtra ramkulh, Sholapur pengpi ih Baba Umer Durga timi Muslim temple ah kum 1-2 hrawng a si mi nauhak pawl cu pii 50 hrawng a sannak ihsin an thlak țheu.

Thlaring zet ih a tla mi nauhak cu hnuai ihsin pacang rual in puan thawn an rak dong țheu.

Kan dunglam kum 500 lole 700 hrawng ihsin cutawk hmun ih minung pawl cun hivek hi an tuah ringring.

Muslim nu le pa siseh, Hindu nu le pa in siseh, an fate cu temple ihsin an thlakter țheu.

Hiti ih an tuah ruangah nauhak cun an innsang hrangah harhdamnak le neihnunnak a thlenter ding ih thluak țha le mi vannei ah a hung cang ding tiah an zum.

2009 kum ah nauhak an thlak lai video cu hmun tampi ah a darh ih nauhak canvo humhimtu pawl in nasa zet in an dokalh.

Curuangah India cozah ih nauhak canvo kiltu committee in khapnak thupek a suah.

Tualsung palik pawl cun 2010 ihsin nauhak thlak an hmuh nawn lo thu an sim nan, palik thlen tamlonak khawte lam ahcun an tuah lai tiah thuthang țhenkhat cun an ngan.

Ref: AP, NYT, Telegraph

Zung-nau-um Tacik Thuhla

Zung-nau-um Tacik Thuhla

Sex hi duhdawtnak a si lo. Duhdawtnak hi sex a si fawn lo. Duhdawt lo khal in sex hman a theih. Duhdawt aw cing in sex hman lo a theih fawn.

Mipa cun lo hua cing in sex a lo hmanpi thei thotho. Curuangah fimvarte'n um aw. Sex thawn mipa pakhat na kaih tang tum ahcun a netnak ah na hlawhsam leh ding. Sex na pek ruangah a lo duhdawt ding ih na ruah mi cu mah le mah bumawknak men a si. Duhdawtnak diktak cun hranhram ih sex hmang ding in a lo nor lo ding.

A lo duhdawt lotu mipa cu sex ruangah a thinlung a thleng aw cuang lo ding. Na duhdawtzia langternak ih sex a lo dil ahcun na taksa a hmang men tinak a si. Sex ruangih a lo kop ahcun sex țha sawn a ton tikah a lo tanta leh ding. A 'sex sal' (sex slave) ih na tuahawk kha thil atthlak a si.

Duhdawtnak cun na ning a lo zakter lo ding ih, na dinhmun a lo nepter fawn lo ding. Sex thawn mipa na rak lei sual pang a si ahcun, tu hi nan pehparawknak lungphum tuah țhat sal can a si. Sex hmanpi na nom ruang lawng ih a lo țhi a si ahcun nan nupa karlak hrangah buainak nasa zet a um leh ding.

A lo țhitnak san cu a lo duhdawt ruangah, a lo upat ruangah, a thinlung, a ruahnak le a thlarau thawn sihcih thluh mi nan si ti a pom hnget ruangah, le a tang lai mi a nun cu nangmah thawn hman tlang a duh ruangah si sawn seh.

By Christopher Maxwell

Falam Thlatang

Falam Thlatang

Falam ahhin Tlanglo veng le Dawrhlun veng ah ka rak um dah. Tlanglo veng hi thli a tam ruangah a dai zet ih, Dawrhlun cu ni a ngah mal ruangah a dai zet.

Cumi ruangah himi veng hnih hi a dai bik ka tinak cu a si lo. Veng dang pawl khal in an umnak veng a daihnak san puhmawh an nei ko ding.

Tlanglo veng ih kan um lai ahcun Awmpui va ih tidai kan hmang tam bik. Falam tidai har dan cu mi tam zet cun kan thei ko ding. Kannih vek nunhar pawl umnak veng tla cu ti pipe ih a ra mi tidai lawng cun nun a theih lo.

Tlunta zin sak, Awmpui va hna lam ih a thiang mi tidai kan khai, tak kholh ding can ah a hmun ah kan kholh.

(An neinung tiah kan rak ruah mi Pu Thawng Luai Mang te hman Awmpui va ih tidai an hmang ve... thu belhsah.)

Tak kan kholhnak hmun hi mirang thingkung le partiam kung sang pipi an um ih ni a tlang dah lo. Sundir rori hman ah khua a vang țha thei ceu.

Cun, Tlanglo ih kan inn kan zuar hnu ah Dawrhlun ah inn hlang (sang) in kan um. Cutawk ahcun tidai kan ngah țha deuh. Asinan tak kholhnak hmun cu ni a tlang dah lo mi hmun thotho a si.

"Bual-inn nan nei lo maw?" ti hlah uh. Kannih vek pawl hrangah bual-inn neih ding cu a hla tuk. Coka le ihnak lawng um mi inn khann hman, zangfahtu an um ruangah, a ba a thlar in kan hlang thei fangfang.

Cuti'n, thlatang a rung thleng ih, sum a zing ciaici. Faizong an par ih Falam cu a mawi zet.

Asinan tak kholh ding can ahcun lung a rethei ko. Tak kholh ding hi rawl ul thlacamnak thawn țanlak a țul zikte ti tluk a si. 😁

"Ziangah ti hlum nan suang lo?" na ti ding maw?

Khawzaang, Congțhe le Laizo lam ihsi an hun zuar mi thing tan fatak tete thawn a nung mi kan si. Rawl vei khat suan ah thingtan li tlun hman awi lo, meiling tum deuh a tang asile tidai thawn ciah mit ding.

Cuti'n kan nung cing hman in tlawnginn ih paisa khuan ding kan pek thei lo can a um. Rahsin buh, hangbo le anthur lawng suan ding kan neih tlangpi ruangah kan nung thei fang. Sa cang deuh tla cu vei khat suang sehla, zarh khat sung rawl suannak kan nei nawn zik lo.

Lekțhik teh? Kannih nauhak lai ahcun, phiang kum vei khat lawng ngah lawmam cu a si lo deuh ding ti fangfang si ko khah.

Ziang a si khalle, minung cu tak kholh lo in um rei a țhat lo ruangah lo theih lo ih kholh a si ko.

Vankau tidai le Dawrhlun tidai hi a dai ti men in a daih ka ti lo. A keu in mi an keu, a cik in mi an cik rori.

Tak kan kholhnak hmun ah ni a ngah fawn lo.

Curuangah, hnipuan hlit lohli, taksa ciar țheh ding in ti kan tawih aw lohli ih...... suai..suai..suai... ni a tlannak hmun ah. 😂

Ni a tlannak hmun ah bal kan ngin, ti tawihawk leuhleuh kan hreh ruangah vei khat ih fai țheh ding rori'n kan ngin aw.

Cu thluh ah .......suai....suai....suai.... tidai umnak ah. 😂

Cuti'n kan tleuh aw fai ih, kan duhtawk mai țheu.

Si ko. Falam cu thlatang ah mero an zam, faizong an par, harhdamnak hrangah a țha zet mi nikhua a si. Puai tete kan feh, ZTC Fun Fete tla kan hngakhlap thei zet.

Asinan, ti hlum suang thei lo kannih vek pawl ih hrang ahcun tak kholh ding can cu bai lo sawngen kul (ol lo, thlacam țul) si. 😃

Zuk: Piang Piang

A Liamral Thotho Ding

A Liamral Thotho Ding

Persian, Hebru le Turkey ram pawl ah tuihlan kum 1000 lai ihsin a hmin a rak thang zet mi thuanthu pakhat a um. Unau thuanthu theih hman a bang aw lo ti a si vekin, an rel dan khal danglamnak a um cio nan, a thupi bik a si mi "A Liamral Thotho Ding" (This Shall Too Pass) timi ttongkam thuhla ahcun an bangrep thluh.

Thuanthu pakhat kan zoh pei.

Mi pakhat hi caurau zet ih khual a tlawn vivonak ah khawte pakhat ah a va thleng. Thlen-inn a hawl tikah khawsung mipi cun, "Kannih cu kan rethei tuk ih, kan inn khal an bi tuk. Sakir timi pa ih hnenah va riak aw," tiah an rak sim.

Khualtlawngpa cun Sakir ih thuhla a zingzoi tikah, Sakir cu loram kaupi neitu le cutawk hmunram ih mi neinung bik a si thu a thei. Neihnun lam ih Sakir dottu cu Haddad timi lothlopa thotho a si.

Khualtlawngpa cu Sakir tei' innsang in ttha zet in an rak mikhual. Sakir tei' innsang cu mi ttha le tirhsiang zet an rak si.

Khualtlawngpa cun Sakir tei' inn ihsi a fehsuah zawng ah, "Hivek ih na neihnun ruangah Sersiamtui' parah lungawithu sim ding na si," tiah Sakir a sim. Cutikah Sakir cun, "Thil zianghman an ttunghmun lo. A cancan ahcun na zoh mi le na hmuh mi hi an bangrep lo. Himi khal a liamral thotho ding," tiah a sawn.

Sakir tei' inn ihsi a fehsuah hnu ah khualtlawngpa cun Sakir ih ttongkam cu a ruat rero. Kum malte a rei tikah khualtlawngpa cu Sakir tei' umnak ah a ra thleng sal. Sakir a hngilh hrih lo ruangah va ton a tum. Khawsung mipi hnenih Sakir thuhla a suh tikah, "Mi rethei zet ah a cang zo, tu ahcun Haddad ih hlawhfa a ttuan," tiah an sim.

Curuangah khualtlawngpa cu Haddad ih loram ah a va feh ih, Sakir a va hawl. Sakir cu hnipuan sia a rak hruh ih, a kum khal a tar hmel cuang. Kan dunglam kum thum ih tilik ruangah Sakir ih loram an siat thluh ih, Haddad ih hlawhfa ttuan ttul dinhmun ah a cang.

Asinan Sakir in khualtlawngpa cu a rak mikhual thotho. Inn siate ah an lut ih, Sakir ih neih mi rawl maltakte cu an ei tlang.

Khualtlawngpa cun Sakir hnen ihsi a fehsuah zawng ah, Sakir ih vanduainak ruangah a thin a nom lo zet thu a sim. Cutikah Sakir cun, "Na lungngai hlah. Cingkeng ringring aw, himi khal a liamral leh thotho ding," tiah a sim.

Kum sarih a rei hnu ah khualtlawngpa cu Sakir tei' khua ah a va thleng lala. Cutikah kan dunglam kum malte ah Haddad cu a thi ih, a hlawhfa rinum Sakir hnenah a neihsiah hmuahhmuah a tanta thu a thei. Tu ahcun Sakir cun loram kaupi le ranrual tampi a nei ih, an sehvel ih mi neinung bik a si sal zo.

Khualtlawngpa in Sakir a ton tikah, a dinhmun a rak tthat sal cu a lungawizia a sim. Cutikah Sakir cun, "Himi khal a liamral thotho ding," tiah a sawn.

Tawkfang a rei hnu ah khualtlawngpa in Sakir cu a ra hawl sal. Cutikah khawsung mipi in tlangpawng pakhat an kawhhmuh. Cui tlangpawng ahcun Sakir ih thlan a um. A thlanlung ahcun, "Himi khal a liamral thotho ding," tiah an ngan.

Khualtlawngpa cun, "Thih hnu ah teh ziangmi si pei liamral lai ding?" tiah a ruat rero.

Asinan a hmai kum ah Sakir ih thlan vehvai ding ih a ra kir sal tikah tlangpawng le Sakir ih thlan cu an rak um nawn lo. Tilik ruangah Sakir cu a ruak umnak hman zawt theih nawn lo in a liamral ta.

Cumi can ah an ram siangpahrang in thupek pakhat a suah. A beidon can ih ruahsannak petu ding, le a lungawi tuk can ah uangthuang luar tuk lo ding ih tuahtu ding zunghruk tuahsak ding ih thupek a si. Asinan zohman in cuvek zunghruk cu an tuah thei lo.

A tuah theitu ding an hawl rero hnu ah siangpahrang ih siahhlawh pawl cun khualtlawngpa cu an tong ih, thu an ron. Cutikah khualtlawngpa cun siangpahrang ih zunghruk parah ca tawite a ngan.

Cumi cu siangpahrang an va pek tikah siangpahrang in zunghruk parih ngan mi "Himi khal a liamral thotho ding," timi cangan cu a hmu ih a lung a kim ngaingai.

Na riahsiat beidon can ah, "Himi khal a liamral thotho ding," timi hin a lo hnem ding, ruahsannak thar a lo pe ding ih, na lungawi aipuan can ah uangthuang lo ding in a lo kilkhawi ding.

Ref: Quora

Nu le Pa le Tu le Fa

Nu le Pa le Tu le Fa

"We think our fathers fools, so wise we grow,
Our wiser sons, no doubt, will think us so."

A tlun ih bezai hi kum zabi 18 lai ih English bezaipu ropi bik Alexander Pope ih ngan mi a si. Mi tam sawn theih olsam ding cun, Alexander Pope cu kan ram phun hra English zirlaibu ih 'The Quiet Life' ngantu kha a si. ' The Quiet Life' hi kum 14 a si lai ih a ngan mi a si ih amah cun 'Solitude' (Mahtei' Um) ti'n hmin a rak pe.

A tlun ih tarlang mi bezai khi a pianhmang (ruang-am) lam ih thlir cun Heroic Couplet tiah an ko. Couplet timi cu a țelh aw mi iambic sum-nga catlang pahnih canghlawm (a stanza of two iambic pentameter lines rhyming together) a si.

Awfang niam (unstressed syllable) pakhat in awfang sang (stressed syllable) pakhat a thlun mi kop khat kha 'iamb khat lole iambic monometer' tiah an ko (mono=pakhat, di=pahnih, tri=pathum, tetra=pali, penta=panga). Țhimnak ah 'zawngțah' timi ah 'zawng' ih awsuak a niam ih 'țah' khi a awsuak a sang.

Curuangah 'iambic pentameter' cu awfang niam le awfang sang thleithlak aw vei nga a um mi bezai catlang pakhat tinak a si.

We #think our #fa-thers #fools, so #wise we #grow,
Our #wi-ser #sons, no #doubt, will #think us #so.
(Sharp retnak zawn khi awfang sang an si. Awfang le țongfang theih rawi lo ding. An bangawklonak cu 'fathers' le 'wiser' ah an lang).

Heroic Couplet timi cu English bezai khaipa Chaucer in nasa zet in a rak hman thok mi bezai canghlawm (stanza) a si ih, John Dryden le Alexander Pope in leitlun calai kutsuak ropi bik a si mi, Greek bezaipu Homer ih epic bezai Iliad le Odessey, Latin bezaipu Virgil ih epic Aeneid bezai pawl English ih an leh tikah himi couplet hi an rak hmang. Epic bezai cu pacang țha le ralhrang pawl thuhla a tam ruangah 'Heroic Couplet' an run ti.

Lehhnu ahcun ziangvek thuhla an run ngan khalle, iambic pentameter catlang pahnih a si ding, a țelh aw ding (rhymed) ih, catlang pahnih ah thuhla pakhat a cem ahcun Heroic Couplet tiah an ko thluh.

Cun, a tican le thuhla a herhkual dan lam in kan zoh asile himi bezai hi Epigram a si. Epigram timi cu mi ziaunak, hnihsuak si fawn thungai si fawn thuhla, numsimnak le thuhla phunphun kha mawi zet ih herhkual mi, vei tampi ahcun mei nei deuh țongkam hman hrim mi, tivek khi a si.

A bezai ih tican cu țong tluangtlam in kan rel asile: kan pa le pawl cu mi aa an si, kannih cu fimvar zet in kan țhanglian, tiah kan ruat. Kannih hnakih a fimvar sawn mi kan fapa pawl khal in cutin in ruat ve ding ti cu rinhlelh ding a um lo.

A hleice in, suakthuan/tleirawl hung si thok ihsin nu le pa, pi le pu pawl cu san an man lo tuk, an khuahlan tuk, tulai thil um dan an kai thiam lo, kannih cun kan hmu thiam in kan theithiam tuk nan, annih cu an buhsah tuk ti in kan ruat țheu.

Suakthuan in hivek in upa pawl an hmu timi hi thu dik a rak si, a si lai ih, a si vivo lai ding fawn.

Asinan cui suakthuan pawl khal an hung țhanglian vivo ding ih, nupi fanau an hun neih tikah annih hnakih fim sawn ah a ruatawtu an fa le pawl in, ka pa le pawl cu san an man lo tuk, thil um dan an kai ban nawn lo, an aa thluh, an ti ve lala ding.

Cui thil herkual rero mi, ngaih um lo zet cu Alexander Pope in mawi zet in bezai ah a canter mi a si.

Cule, English thufim pakhat ah, "Santa Claus (Christmas Putar) hi a rak um taktak lo ti na theihfiang ciah ahcun nangmah kha Santa Claus țuantu ding na si zo," timi a um.

Suakthuan dinhmun, mah le mah rinsanawknak le fimawkternak a hung reh vivo ih leitlun thil um dan kan theihthiam vivo cin cun, "Aw, ka pa ih țong kha a rak dik sawn a si hi. Ka nu ih rel mi kha a rak țha sawn ngai," ti'n hmuhfiangawknak le sirawknak kan sarsuak kop.

Cumi ciah ihsi cun, "Hmmm.... tu cun leitlun thil um dan hi ka thei thok thlang. Upa sutron thiam ding, mino herhawi khal thiam ding a rak si," tiah kan ti țheu.

Asinan, kan kiangkap kan vun zoh tikah aa in ti ememtu kan fa le nau an rak um hliarhli ve zo țheu.

😊😊😉😉

Mah le Mah Cekfelawk Hmaisa A Țha

Mah le Mah Cekfelawk Hmaisa A Țha

Nupa tuak thar pakhat hi veng dang pakhat ah inn dang an tlei. Vei khat, zing thiang nuam zet ih thawhhlam an ei lai ah nupi in an venghnen fala pakhat hnipuan a pho rero lai a hmu.

Cule a pasal hnenah, "Zoh hman, kan venghnen fala khi, a hnipuan sawp mi an fai lo. Hnipuan sawp a thiam lo si ding," a ti. A pasal cun a hei zoh ve lawk nan zianghman țong lo in a um.

Cutin nupi cun an venghnen fala ih hnipuan sawp mi a hmuh tinte'n an fai țhat lo thu, hnipuan sawp a thiam lo thu a rel ringring.

Cuti'n thla khat hrawng a liam hnu vei khat cu nupi in a pasal hnenah, "Ra zoh hman. Kan venghnen fala khi hnipuan sawp fai dan a thiam thlang a si khi," tiah a sim.

Cutikah pasal cun, "Duat Boih, kan tukvirh thlalang pawl ah leivut an kai ih an ngeu thlengthlinak thla khat hrawng a si thlang. Tuizing cu can awl ka nei remcang ih ka rawt fai hai sokhaw," tiah a sim.

Ref: "The Young Couple"
Paradise
www.yoyarlay.com

Thuzilzuang ih Hmual

Thuzilzuang ih Hmual

Kan nauhak lai ih an rel ttheu mi cepoh pakhat a um. Pakhat pa hi Cinmual veng ah a vawih a thawh. Cumi kha veng khat hnu veng khat ah an rel sawng vivo ih, Pathangkhan veng a thlen ahcun, “Cinmual ah pakhat pa in a ek a thlau,” tiah a cang, ti a si.

Thuanthu dang pakhat kan zoh pei.

Ni khat cu leilehnak ihsi ra tlungtu caw pakhat hi caw-inn ah a it sialsial. Sunvu ih hna a ttuan ruangah a cau tuk ih, a thaw thawt khal a harsa zet.

Culai ah uico pakhat a kiang ah a ra. Caw cun, “Ka cau tuk e rual Uico, thaisun ni khat te tal cu cawl sehla ka duh tuk,” tiah a harsatnak a rak sim.

Uico cu hmun dang ah a feh ih, phar kel ih um zawhte hnenah, “Hei, Zawh Sia, mitu ah caw hnenah ka feh. A cau tuk ih thaisun tal cu cawlh a beisei. Kan pu hin a sor dan a luar tuk deuh si a,” a va ti.

Zawhte khal in Me thawn an tonawk tikah, “U Me, U Caw cu kan pu ih ttuanter mi hnattuan a tam tuk tiah a phunzai rero. Ni khat cawlh a duh ih, thaisun cu hnattuan a tum lo,” tiah a sim.

Me le Ar an tonawk tikah, “Caw in kan pu hrangih hnattuan ka paih nawn lo a ti. A ttuanter mi a tam tuk ti’n a phunzai. Caw dang parah teh kan pu hi a zaidam deuh pei maw ka thei lo,” tiah Me in a sim.

Ar in vok hnenah, “Caw in kan pu hrangah hna ka ttuan nawn lo ding a ti. Pu dang ka hawl ding a ti. Taktak ahcun kan pu hi caw parah a siava tuk. Hnattuan bang thlak le borhbah hi zatzat a ttuanter hi ka mang a bang. Cu bet ah fungfek in a thawi rero bet fawn,” tiah a va sim lala.

Zanriah ei cu ah an pi in vok rawl a pek tikah vok in, “Ka pi, sim ding ka lo nei. Tu hrawng hi caw in thu dang a ruat. Nun va sim hnik aw. Nan hna ka ttuan nawn lo ding a ti sokhaw. Hna nan ttuanter mi a tam tuk tiah a phunzai. Hmun dang ah ka feh ding a ti rero kha,” tiah a rak hek.

Zanriah ei lai ah inntek nu in vok hnen ihsi a theih mi cu a pasal a sim. “Caw in a lo phatsan. Pu dang hawl ka duh a ti. Phatsanawknak hi cu ngaidam ding a si lo. Ziangti’n na tuah ding?”

A pasal cun, “Phatsantu cu nungdam ih ret ding a si lo,” tiah thinheng zet in a sawn.

Cuti’n hnattuan a taima zet mi caw pakhat cu thuzilzuang ruangah thah a tuar.

Mi tampi cu thu kan rel tikah a si dan vek ciahciah ih rel lo in, betbang mi neih kan hmang ttheu. Cumi kha a relsawngtu in an bet sal lala. Cumi in thil ttha lo tampi a suahter thei.

Cun, na buainak kha mi tinkim hnenah va rel hlah. Na hrangah thil ttha lo ah a cang thei.

Cun, midang ih rel mi thu kha olte’n zum mai fawn hlah.


Sirhsan: Nine Nine Sanay ih “Ziangti’n Caw A Thi?”

Pathian Ringhlel Hlah

Pathian Ringhlel Hlah

Zankhua a thim bepbep tuk lawmam ruangah zianghman hmuh a theih lo lawlaw. Thlapi le arsi khal khawdur sah zet in a khuh hlo.

Culai ah pacing pakhat hi tlang zim ah a kaiso. Tlang zim a thlen zawng ah a ke a tawlh ih thli lak ah cak zet in a tla zurzo. A mit in zianghman a hmu thei fawn lo ih a thin a phang zet.

Thinphang zet ih a tlak lai ahcun a dam sung ih a tuah mi thil ttha le sia pawl a thinlung ah an rung lang zutzo. Culai fang ah a tai ih a ttawn mi hridai in a tai cu na zet in a rek thutthi. Tlang par kaitu pawl in tlak pang can ih ralrinnak ah an ttawnawk mi hridai a rak ttawnawk ruangah a van a ttha.

Cutin, thli lak ah a thlai aw. Awn reh reprep lak ahcun beidong zet in, “Bawipa, i bawm hram aw,” tiah thla a cam.

Vei le khat ah van ihsin, “Ziang ka lo tuahsak na duh?” timi aw ring zet a rung thang.

“I run aw, Bawipa.”

“Ka lo run thei na zum taktak maw?”

“Zum tuk e.”

“Asile, na ttawnawknak hridai kha sat cat aw.”

Cu thluh cun, awn-au a reh reprep. Cu pa cun reipi thu a ruat hnu ah hridai cu sat cat lo ding in thutluknak a tuah. A sat cat pang asile a tla vivo ding ih, a thih a phang.

A thaisun ih runsuaktu pawl an va thlen tikah, cu pa cu vur dai lak ah khong ttheuttheu in a rak thi zo. A kut in hridai cu hnget zet in a pawk lai fawn. Asinan leilung ihsin pii khat lawng sannak hmun ah a thlai aw mi a rak si.

Hridai in a hmuhsak mi cu minung ih kan thazang le tuah theinak kha a si. Mi tampi cun Pathian hnakin kanmah minung thazang le tuah theinak kha kan rinsan sawn pang ttheu.

Pathian hi ringhlel dah hrimhrim hlah.

Hram: 1000 English Stories.

Miphun hrang Țuan ahhin

Miphun hrang Țuan ahhin. . .

Vei khat cu ruahpi a sur nasa tuk ruangah Amerika ram, Los Angeles tiva a lian.

Culai ah TV ah Cakkhai Thuthang (Breaking News) pakhat an run langter. Meiphaltu pawl (firefighters),  palik pawl le media palai minung 100 hrawng an rung lang. Tidai ih fen mi uico pakhat runsuah an tum rero mi a si.

Ruahpi le thli nasa zet lakah tilian in cak zet in uico cu a fen. Cumi cu helicopter par ihsin hridai thawn a thlai aw mi meiphaltu pakhat in sur thawn awk a tum rero. A rak zohtu minung thawng tampi cun uico le meiphaltui' nunnak himdam ding in thinlungte'n thla an cam cio.

Nazi hrek hrawng a rei hnu lawng ah uico cu a awk ngah thei. Cuti'n uico cu a dir ih a pom zawng ah, uico thinphang le țih tuk cun a rak keu riangri. Uico cu a tum ci a si fawn. Meiphaltui' na tuar ai awn cu TV hman in a theih theih.

A tlun ih thuneitu in radio ihsin, "A lo keu mi na tuar thei lo ahcun thlah mai aw," a ti. Meiphaltu cun, "Nazi hrek rei harsa zet ih kan zuamnak a taw ih thawh sal ka duh lo," a ti. Helicopter in thli lakih a dirh lai ahcun, uico thawn an talbuai. Uico cun vei thumli lai a keu bet. A hmai keu ngah lo ding in a kut a keuter. A rak thlirtu pawl ih thin cu phuduk phuduk ti'n a thir.

A netnak ahcun uico cu helicopter parah a thleng.

A lehhnu zarh khat ah meiphaltu sunlawihnak puai an tuah. Khawpi uktu tiang in an ra tel.

Cutawk ah thuthang palai pakhat in, "Ziangruangah nangmah lo keu rerotu uico cu na runsuak?" tiah a sut. Cutikah meiphaltu cun, "Uico cun mi keu hi a hnațuan a si ih, kei cun runsuah kha ka hnațuan a si. Uico in a hna a țuan ih, kei khal in ka hna ka țuan a si ko," tiah a sawn.

Miphun hrangih hna na țuan tikah, mipi lakah miphun hrangih țuantu ti'n na hmin a lar deuh vete'n, anmai hrangih na țuannak ah lungawi sawn lo in, na tlaksamnak hawl ih lo relse rerotu tampi an um mai ding.

Minung lak ahhin mah bawmtu, mai' hrangih țuantu rori an ke rak phelh țeuți tumtu, awkam sia barh tum țengțengtu, an tlaksamnak hawl ih nam thlak tumtu, rak keu tumtu uico thinlung keng hi an um ringring. 

Asinan, dung ah sip hrimhrim hlah. Uico in amai' hnațuan a țuan ding ih, nang khal in na hnațuan na țuan ding. Dung ah na sip asile uico in a lo neh tinak a si ding ih, nangmah lawng si lo in na miphun khal in a tlak niam phah ding.

Sirhsan: Ko Htwe ih post mi 'Uico hnațuan le minung hnațuan'.

Nuncan Ziaza

Nuncan Ziaza

Mi neinung zet pakhat in a fapa ih nuncan ttha lo remtthatu ding ah mithiam pakhat a ruai. Mithiam cun milian fapa cu hmuan ah a veivahpi.  Hmun pakhat an thlen tikah mithiam cun thingfa keuh pekte pakhat a phawiter. Milian fapa cun thingfa cu ol-aite’n a phawi cih mai.

Cu thluh ah, mithiam cun a tum deuh mi thingfa a phawiter bet. Milian fapa cun tha ttang deuh in a phawi. Cuti’n a tum deuh sawn mi a phawiter vivo. A netnak ah, a rah thei zo mi kawlthei kung tum deuh pakhat a phawiter. Milian fapa cun a thazang hmuahhmuah suah in a phawi nan a phawi thei lo.

Cutikah mithiam cun, “Nuncan ziaza ttha lo khal khavek kha an si. Minung khal kan no lai can ahcun kan nuncan hi remtthat a olsam. Asinan kan upat hnu cun a ol nawn lo. Cun, zongsang hrih lo mi nuncan ziaza cu a hram a hnget tuk lo mi thingfa vek an si ih, bansan an ol deuh. Asinan zongsang zo mi nuncan ziaza cu a hram a hnget zo mi thingkung vek an si ih, bansan an ol nawn lo,” tiah a sim.

Ka rualpa hlasakthiam (a hmin rel sehla cun, nan thei cio ko ding) in hnihsuak sainak ah, “Nuncan tla cu zingpit thleng si lawm. Tuizan ah kuva ka ei ding ih, thaizing ah ka ei nawn lo ding. Cuvial si ko,” a rak ti dah. Asinan zongsang zo mi thil hi cu, “Tu vei khat te, himi te lawng,” ti’n tuah peh vivo an si tlangpi.

Curuangah no lai le zongsang hlan ah nuncan ziaza ttha hi zir a rak ttha bik.

Sirhsan: 1000 English Stories ih “The Wise Old Man.”

Hnipuan

Hnipuan

Vei khat lai ahhin sakhawlam puithiam mifim pakhat a rak um. Bible thawn a pehpar mi hmuahhmuah cu a thiam thluh deuhthaw a si ko. Asinan a rethei zet ih inn khal a nei lo. Zirnak ih a can a hman thluh ruangah ei ding tthittha khal a nei lo. A hnipuan khal an ttet hniaphniap thluh.

Curuangah mifim cun midang hnenah ei ding rawl a dil hai ttheu. Asinan a hnipuan ttet hniaphniap an hmuh tikah mi-aa ah an ruat ih, “Tlan aw,” tiah an rak dawi ttheu.  Cuti’n ni tampi sung ei ding nei lo in a um.

Vei khat cu, ziangtitin simaw, hnipuan thar a ngah. Cui’ a hnipuan thar cu a hruh ih midang hnenah rawl a va dil sal. Cutikah, “Puithiam bawipa, kan inn ah rawl rung ei hram aw,” tiah a thlen hmaisabiknak inn in an rak sawm cih.

Puithiam ih ei ding ah rawl phunkim an tuah. Puithiam cu a to a rem hnu ah, rawl cu a la ih a hnipuan thar cu eiter tum a rero. Cumi an hmuh tikah, “Hnipuan in rawl a ei thei mawsi?” tiah inntekte in an sut. Puithiam cun, “Himi hnipuan thar ruangah tuini ah rawl ei in sawm. Kan dung ni ahcun in dawi tlan. Himi hnipuan ruangah rawl ka ei ngah mi a si ih, an parah ka lung a awi. Curuangah rawl ka peknak a si,” tiah a sim.

Mi tampi cun minung pawl hi an hnipuan zoh in, an dinhmun kan ruat cih mai ttheu. Himi hi a dik thluh ttheu lo. A hleice in thiamnak pakhatkhat nasa zet ih a luhcilhtu mifim le mithiam tampi hi hnipuan lam an ngaihsak lo deuh ttheu.

Khatlam ah, hnipuan felfaitei’ hruh lo ahcun midang pawl in kan dinhmun taktak, kan sinak taktak hnakih niam ah in ruat can a um thei ruangah, kan tuah duh mi kan hlawhsam phah can a um thei.

Curuangah hnipuan hruh dan hi a thupi bik cu a si lo nan, a thupi zet mi cu a si ve.

Sirhsan: Pundit and Rich Man from 1000 English Stories.

Lu Pahnih Neitu Vate Danglam

Lu Pahnih Neitu Vate Danglam

Vei khat lai ahhin lu pahnih a neitu vate danglam zet pakhat a rak um. A lu pakhat cun kehlam a hoi ih, a dang pakhat in vorhlam a hoi. Vate ih lu pahnih cu an rem aw lo ih, thuhla tenau tete hman ah an el aw ringring. Taksa ruangpum pakhat ttawm aw an si nan, doral vekin an um.

Cui vate danglam cu tiva kap ih hmawng kung tumpi pakhat ah a um. Ni khat cu tiva tlun ih a zuan lai ah a kehlam lu in rah sen hahioza a nei mi thingkung mawi zet a hmu. A kehlam lu in cui thingrah cu ei a duh ruangah vate cu cui’ thingkung ahcun a vung fu.

Cu thluh ah vate in thingrah cu a lo ih, a ei thok. Cutikah a vorhlam lu in, “Kei tla malte i tepter ve awla,” tiah a dil. Cutikah kehlam lu in, “Kan pahnih in pumpi pakhat kan ttawm aw ti na thei ko. Curuangah keimah ih ka ei khalle, kan ttawmawk mi pumpi ah a lut thotho ding,” a ti.

“Asinan a rah ih thawtnak kha ka tep ve duh si lawm.”

“Keimah in ka hmuh mi thingrah a si. Curuangah zohman hlawm lo ih ei ding canvo ka nei.”

Vorhlam lu cu a riah a sia ih ttong nawn lo in a um.

Ni malte a rei hnu ah vate cu tiva tlun ah a zuang lala. Culai ah vorhlam lu in sendang rong thingrah mawi zet a hmu. Ei a duh ruangah vate cu cui’ thingkung ah a vung ttum ih a rah cu a lo.

Asinan cui’ thingkung ih rak umtu vate dang pawl in, “Ei hlah aw. Tur nei mi a si. Na thi ding,” tiah ralrinnak an rak pe. Vate ih kehlam lu khal in, “Ei aw hlah. Ei aw hlah,” tiah a rak dawn ve.

Asinan vorhlam lu cun, “Keimai hmuh mi a si ih, ei theinak canvo ka nei,” a ti. Ni malte liam zo ih, kehlam lu in thingrah a rak hlawm lo ruangah, vorhlam lu in phuba a lak tum mi a si.

Cuti’n vorhlam lu cun thingrah sendang cu a ei ih, minute malte a rei tikah, lu pahnih nei vate danglam cu leilung ah tla in a thi.

Innsang ah simaw, pawlkom ah simaw, hnattuan khawmnak ah simaw, a sung ih umtu pawl remawklonak hi siatralnak thlentu a si ttheu.

Hram: 1000 English Stories – The Strange Bird with Two Heads

Paisa ih Manmual

Paisa ih Manmual

Mi neinung zet nupa tuak khat in fapa pakhat lawng an nei. Fapa neihsun a si ruangah an duat zet ih, a nauhak lai ihsin hna khal an ttuater dah lo. Curuangah a zangzel zet.

Asinan an fapa kum 13 a hung kim tikah a pa cu a thin a phang thlang. A thih tikah a neihsiah zate’n a fapa in a run co ding. Tui’ a fapa um dan cu zianghman ttuan lo in a ro a run cen men ding ti’n a hmu. Curuangah a fapa hneah hnattuan ih manmual theihter dan ding a hawl.

A thaisun a fapa tlawng a ra ttum tikah a fapa hnenah, “Valte, tui zan cu na rawl ei man ding hlawh in hna va ttuan aw. Na hlawh mi paisa na rak tlun lo ahcun rawl na ei lo ding,” a ti.

A fapa cun hnattuan a paih lo. Hna a ttuan dah lo ruangah ziang ka ttuan ding ti khal a thei lo. Curuangah ttap phah in, inn dang ih leng mi a nui’ hnenah zual a va ko. A nu in thuhla a rak theih tikah a thin a heng zet. Asinan a pasal ih mizia a thei tuk fawn. A fapa in paisa a tlunpi lo ahcun rawl a ei ngah lo ding ti a thei. Curuangah a fapa cu paisa 2000 a pek.

A fapa cu inn ah a tlung. A pa in, “Hna na ttuan maw?” tiah a rak sut. Anih cun, ka ttuan ti phah in paisa 2000 cu a pa a pe. A pa cun a fapa cu a zoh ih, hnattuannak ihsin a ngah mi a si lo ti a thei. Asian cuvek lam sut lo in, “Na paisa kha tidai sungah hlon aw,” tiah a fial. A fapa khal cun paisa cu tidai sungah a hlon cih mai.

A thaizan khal ah milianpa cun a fapa cu hnattuan ih paisa hlawh ding in a fial lala. Tui’ ttum ahcun milianpai’ nupi cu khaw dang ih sungkhat dam lo vehvai ding in a rak feh. Asinan a fapa cun veng dang ih um mi a nukhatta hnenah paisa a va dil. A nukhatta khal in rawl a ei ngah lo ding ti a theih ruangah zangfah in paisa 2000 a rak pe.

Milianpa cun a fapa a ra tlun tikah, hna a tttuan le ttuan lo a rak sut lala. A fapa khal in a ttuan thu sim in, paisa a hmuh. Tui’ ttum khal ah paisa cu tidai ah hlonter thotho. A fapa khal in a hlon cih lala mai.

A ni thumnak khal ah milianpa cun a fapa cu hnattuan a fial lala. Tui’ ttum cu a fapa a talbuai. A nu a ra tlung hrih lo ih, a nukhatta hnen a va feh tikah inn ah a rak um lo kherkher fawn. Curuangah beidong in zin sir ah a to ih a ttap. Cumi cu lamzin ih feh putar in a hmuh tikah thuhla um dan a sut. Nauhak cun putar hnenah thula um dan a sim.

Cui’ putar cu hotel tumpi neitu a si ih, nauhak ih pai’ rualpi khal a si. Asinan cumi cu nauhak cun a thei lo. Putar cun nauhak cu, “Hotel ah i thlun aw. Hnattuan ka lo pe ding ih, hlawh man khal ka lo pe ding,” a ti. Hotel an thlen tikah coka ih kheng peng aw liailiai pawl a khawlhter ciamco. Cu thluh ah a hnul roter thluh bet. Cu thluh in tidai thawn coka a khawlhfaiter lala.

Nauhak in nazi pahnih sung bang zet ih hna a ttuan hnu ah putar cun paisa 2000 a pe ih a tlunter. Nauhak cu hnattuan dah lo a si ruangah a taksa an na thluh. Paisa 2000 cu a kut ah fektei’ hum in inn ah a tin vurvo.

Inn a thlen tikah a pa in, “Hna na ttuan maw?” tiah a rak sut sal. Anih cun a ttuan thu sim phah in, paisa 2000 khal a hmuh. Cutikah a pa in, “Na paisa kha tidai ah hlon sal aw,” a ti. Asinan nauhak cun, “Ka siang lo,” a ti. A pa in, “Ziangruangah?” ti ih a sut tikah a fapa cun, “Ka taksa zate’n na thluh ko in, thlanhri baksen tla ih ka hlawh mi a si ruangah ka hlon siang lo,” a ti.

Cutikah a pa cun, “Thlanhri baksen tla ih kan hlawhsuah mi paisa cu menna lo ah zohman in kan khawhral siang lo,” tiah a sim.

Cumi zan ihsin milianpa cu thin hahdamte’n a ittthat thei.

Credit- Bamaw Thein Pe

Kalauk 17 le Fapa Pathum

Kalauk 17 le Fapa Pathum

Khuahlan lai ahhin nelrawn kiang ih maurat san mi khawte (deserted village) pakhat ah putar le a fapa pathum an rak um. Putar cun kalauk 17 a nei ih, an pumcawmawknak bik khal a si. Nelrawn ih thil phurhnak hrangah midang in man pe in a kalauk pawl an ra sang ttheu.

Ni khat ah cui’ putar cu a thi. A fapa pathum hrang ah ro a cah mi cu cahnah pakhat ah a ngan ta. Ruakvuinak an ttheh tikah fapa pathum in an pai’ ro ca cu an siar. An neihsiah dang cu bangrante’n hmun thum ah a tthensak hai.

Asinan kalauk 17 cu danglam deuh in a tthen. 17 cu kop kim lo nambat a si ruangah bangrante’n hmun thum ah tthen a theih lo. Cu bet ah ziangti zawng khal in bangrep ciah ih tthen theih lo mi nambat a si fawn.

Putar cun a fapa upa bik in kalauk 17 ih hrek a co ding, fa lai in tthen thum tthen khat a co ding, fapa nauta bik in tthen kua ih tthen khat a co ding, tiah a ngan. Cumi an hmuh tikah fapa pathum cu an mang a bang.

Fapa upa bik ih co ding ah kalauk 17 cu a hrek ciahciah in tthen a theih lo. Fa lai hrang khal ah 17 cu hmun thum ih tthen a theih cuang lo ih, fa nauta bik hrang khal ah 17 cu hmun kua ih tthen a ngah fawn lo.

Ni tampi sung an ruat rero nan, tingaihnak an theih cuang lo ruangah an khaw kiang ih mifim pakhat an va pan. Mifim cun an kalauk 17 cu rak hruai ding in a fial. Cu thluh ah amai kalauk pakhat a bet ih, kalauk zate’n 18 ah an cang.

Fapa upa bik in a hrek co ding a si ruangah kalauk pakua a pe (18/2). Fa lai in tthen thum ih tthen khat co ding a si ruangah paruk a pe (18/3). Fapa nauta bik in tthen kua ih tthen khat co ding a si ruangah pahnih a pe (18/9). Cuti’n fapa upa bik in pakua, fa lai in paruk, fapa nauta bik in pahnih an co ih a zate kom in 17 a si (9+6+2). Cule mifim in amai kalauk pakhat cu a lak sal.

Fimnak timi cu thuhla cinfel dan hawlnak a si. Ziangvek thubuai khal hi cinfelnak an um thluh.

Hram: 1000 English Stories. 

Sabek le Cumkheng ih Thuanthu Thar

Sabek le Cumkheng ih Thuanthu Thar

Kan theih thluh mi thuanthu pakhat cu Sabek le Cumkheng ih tlan zuamawknak thuhla a si. Sabek cu a tlan cak thei thu uang aw zet ih a rel ringring ruangah, Cumkheng in a ning tuk ih tlan zuamawk a va ngiar. Hramlak ramsa hmuahhmuah in an tlan zuamawknak cu an zoh vialvial.

Tlan zuamawk an thok. Sabek cu lamzin ih tawkfang a tlan hnu ah, a cawl lawk ih dunglam a hei zoh. Hla zet ih ra tlan hnemhno rero Cumkheng a hmuh tikah, “Khavek hnulhno in ziangti’n neh thei i tum?” tiah a hei auh. Cu thluh ah, cawlh huahhinak ding can tampi a um lai ti’n, lamzin sir ih hrampi nem parah dok aw tthuahttho phah in a zau ih a itthat.

Cumi sungah Cumkheng cu a feh nerno rero ih tum-rin a va thleng. Cumkheng in a neh ruangah ramsa pawl cu an lung a awi tuk ih nasate’n an au ciamco. An au thawm a rin tuk ruangah Sabek cu a hung tthangharh ih, a va tlan ciamco sal. Asinan Cumkheng in a rak khelh zo.

Himi thuanthu in a zirh duh mi cu, nuamnaite le hmanhmante’n a tlantu cun nehnak a co, timi a si.

Himi cu kan nauhak lai ihsin kan thei thluh. Asinan kan dung rei lo te ahkhan himi thuanthu peh pahnih a rung um.

A Peh Pakhatnak
Sabek cu Cumkheng in a neh ruangah thuhla tampi a ruat ciamco. A tir ahcun nasate’n a zuam nan, hmanhmante’n a zuam lo ih, amahte’n a rinsan aw tuk sual pang, ti a thei. Cuvek thil sual tuah nawn lo ding ih a tiamkamawk hnu ah cumkheng cu tlan zuamawk a sawm sal. Tui ttum ahcun ralringte’n a um ih, tlan zuamawk cu a neh ngaingai.

Himi thuanthu in a zirh duh mi cu, khulrang le hmanhmante’n ttuan hi nuamnai le hmanhmante’n ttuan hnak in a ttha sawn thei, timi a si.

A Peh Pahnihnak
A vei hnihnak ih Sabek a neh lo ruangah Cumkheng cun thu a ruat ciamco ve. Zaran tlan zuamawknak ahcun Sabek cu a neh nawn lo ding ti khal a thei. Curuangah tlan zuamawknak danglam a pol. Cuthluh ah Sabek cu tlan zuamawk a va ngiar sal. Sabek in a rak hnihsan ciamco. Asinan Cumkheng in, “Kan tlan zuamawknak ding hmun le kalhmang cu keimah in ka hril ding,” a ti. Sabek cun ziangvek zawng khal in a ngam tuk ih, a remti mai.

Tlan zuamawk an thok. Sabek cu hmai ah cakpi’n a tlan. Cumkheng cu dunglam hlapi ah a um. An tlan zuamawknak zin hrek an thlen tikah tiva pakhat a rak um. Sabek cu tiva kap ah a ding. Ziangtin khatlam ka feh ding ti a thei lo. Culai ah Cumkheng cu a ra thleng ih, tidai a leuh hnu ah khatlam ah a va kai. A tang lai mi malte a tlan hnu ah tum-rin a va thleng ih, nehnak a co.

Himi thuanthu in a sim duh mi cu, na tlinnak a niam sawn tikah, na ham tthat theinak ding hmun hril thiam aw, timi a si.

Nang khal in himi thuanthu hi na peh bet thei.

Kan Neih mi Ziangtin Kan Hmang?

Kan Neih mi Ziangtin Kan Hmang?

Mi pakhat hi a dam sung in hlawnthil phunphun a hawl ih a khawl vivo. Sui, ngun, lungmankhung dangdang, zungthiam ropi pawl ih tuah mi nam, ceimawi mi thilri phunphun, milem le dawng mawi zetzet pawl a khawlkhawm ciamco. Hmun tin ah a feh ih a hmuh mi thil mankhung phunphun cu a inn ah a tlun. Cui' a thil mankhung pawl cu a ihnak tlun ih tiril (thilri retnak) ah a ret thluh. Ziangahtile zan a ih can khal ah a duh zet mi a thilri pawl thawn naite ih um a duh.

A thilri a tam vivo tikah an rit vivo ih a tiril khal in a din tuk nawn lo. Kiak ding vekin an awn ttutto phahphah. Asinan anih cun thil mankhung tam sinsin a duh ruangah a khawl bet vivo thotho. Thil mankhung lei thei ding khal in nasate'n hna a ttuan ringring.

Asinan a khawl mi thilri pawl cu a hmang dah lo. An mawizia zoh ding khal in hmuh olsam ah a ret lo. Ihkhun tlun ih tiril ah a ret ruangah laksuah sal an har. Thil ttha tuahnak ah hmang sehla cun amah le midang pawl hrangah thil ttha tampi a suahtertu ding thilri an si. Asinan hmang lo in a khawl vivo men.

Zan khat cu a itthat lai ah, a tiril cun a khawl mi thilri khing cu a dawl nawn lo ih a kiak. Cutikah a thilri hmuahhmuah cu a taksa parah an rung tla thluh ih a thih phah.

Himi thuanthu hin kan neih mi kan hmang maw hmang lo, ziangtin kan hmang, ziangvek hrangah kan hmang, timi thu in ruatter. Minung pakhat cio khal in hlawnthil kan nei cio. Cui' hlawnthil cu sui le ngun a si lo tla a si thei. Thiamnak, fimnak le midang zawnruahnak thinlung tivek khal hi hlawnthil thotho an si ve.

Cui' kan neih mi cu hmang lo in kan ret ringring men pang ahcun a poi zet ding. Curuangah nangmai' hrangah siseh, midang hrangah siseh, na neih mi hlawnthil kha tthate'n hmang ttheu aw.

Sirhsan: Better Life Coaching

Na Hmuitin mi Na Thei Maw?

Na Hmuitin mi Na Thei Maw?

Leiram lawnglak kau zet pakhat ah mi pahnih in hna an ttuan. Pakhat cun lei khur a lai rero ih, a dang pakhat in lei khur ahcun lei vawr a silh sal rero.

Cuti ih an ttuan rero kha mi pakhat in a zoh rero ih mak a ti ruangah, "Um hrih hnik uh. Nan hnattuan dan ahhin a dik lo pakhatkhat a um ding. Pakhat in taima zet in lei khur a lai ih, a laihsuah mi lei vawr kha a dang pakhat in khur sungah a silh sal lala. Nan ttuan mi hi ziang a si ti ruat ttha sal hnik uh. Pakhatkhat a dik lo mi a um lo maw?" tiah a sut hai.

Cutikah hnattuantu pahnih cun, "Hotu ih in fial vekin kan tuah mi a si. Ziangah hitin in fial ti kan thei lo nan, ttuanvo hlensuak ding in kan ttuan a si ko," tiah an sawn.

Cutikah a suttu cun, "A cang thei lo deuh e," ti'n thuhla umdan a zingzoi tikah, an hotu cun mi pathum hnenah ttuanvo a rak pe hai ti a hmusuak.

A pakhatnak in lei khur a lai ding.
A pahnihnak in thlaici a thun ding.
A pathumnak in lei vawr a silh sal ding.

A pahnihnak cun hnattuan cawlh lawk a dil ruangah, pakhatnak le pathumnak lawng an um ih, cuti'n an ttuanvo an rak ttuan rero hi a si.

Mi tampi cu hna kan ttuan tikah a tlun ih mi pahnih vek khi kan si ttheu. Ka ttuan mi hi ziang a si, ziangvek thil a suak thei, ziangah hitin ka ttuan tivek ruat lo in, thlahlawh ngahnak ding a si ih ka ttuanvo a si ruangah ka ttuan, ti'n kan ruat ttheu.

Pumcawmnak ih kan ttuan mi a si ih, ttuanvo neh khal a thupit rual in, kan ttuan mi hi ziang a si timi theihfiang ding hi a thupi zet. Ziangahtile tlunlam ih kaiso vivo thei ding cun kan tuah kan ttuan mi hi ziang a si, ziangti'n tuah sehla a hlawk sawn ding, ziangvek tiang ih ttha in kan tuah bet thei tivek pawl theih ve a ttul.

Hram: Pay Khine ih "Wanhtan Ponepyin."

Dinhmun Thlengawk ih Ruat Thiam Cio Sehla Cun

Dinhmun Thlengawk ih Ruat Thiam Cio Sehla Cun

Inn ah mo pakhat kan nei. Anih cu innsang hnațuan ziangkim ih a felfai thluh kan beisei. Asinan mai' mi inn ih mai' sungsuak fa mo a va si cun kek thei dom ih an rak dom kan beisei lala fawn.

Ke ih kan feh lai ah mawțaw khaltu kan camriam ih, mah ih mawțaw kan khalh can ah ke ih fehtu kan camriam lala.

Midang kut hnuai ih hna kan țuan lai ah kan pu cu a siakha, a ti kherkher kan ti. Kanmah hnațuan neitu kan si tikah kan hnațuantu pawl an zangzel ti'n kan phunciar lala.

Mah ih thilri lei lai ahcun dawrneitu in an hlep tam tuk, an duham tuk kan ti. Kanmah ih dawr kan tuah tik ahcun thilri leitu pawl an thu a tam tuk kan ti lala.

Elkalh party (opposition party) an si lai ahcun kil kip in cozah kan faksel. Kanmai' party in cozah a kaih tik ahcun midang in malte in relsiat khal kan duh vak nawn lo.

A taktak ahcun kan zate'n kan dik lo thluh hran lo. Kan dinhmun a bangawk lo ruangah kan ruahdan a bangrep lo mi a si.

Dinhmun thlengawk ih ruat thiam cio sehla cun a feh tluang mai ding.

Ref: wechat
Credit:Sayar Aung Ko Latt