Kat-sa-deu le Zung-le-za (Can-Khat Thuanthucawn)

Kat-sa-deu le Zung-le-za

CANGTUPAWL

Pa Thang

Lal Luai

Thluaite (Pa Thang ih fanu)

Pu Lian

Thiamte (Thluaite ih rualpi)

(Amai' inn mileng pindan ah Pa Thang,Pu Lian le Thiamte  an to ih, tisa an in rero. Pa Thang ih fanu Thluaite cu tthim thawn thil a tthi rero. Cu lai ah Lal Luai a rung lut)

Pa Thang: Ehei, Lal Luai, rung leng hnik law. Ziang poi na nei maw? Maw, na pawpi ram fan men ha? Tulai teh ziangha na tuah thei ttheu?

Lal Luai: (Tohkham pakhat ih vung to phah in)E, ka buai thei nasa. Vahtawih le tawihvah ka thleithlak rero.

Pu Lian: Vahsuah le suahvah khal na kop cih thotho an lo tivek?

Thiamte: Cuvek, nupi hawl tla'n pinu na tong pang dah kei?

Thluaite: Lal Luai, an lo sehsol tum a si kha. Anmai' nupi ttih thu ah an lo luhpi zik sokhaw.

Lal Luai: A si ngai hi. Asinan pacang pakhat in a rel si lawm; "Nupi ttih hi mai' thu si hlah khaw, a har ngaingai," a ti si lawm.

Pa Thang: Ngai in, tu tiangtiang nupi na nei hrih lo ih, a ci ah na zuat aw tum mawsi?

Thiamte: A kelte'n vanram thlen sal a tum a si hmang ding.

Thluaite: Lal Luai, nupi nei lohli ngai aw, thil-hlun retnak inn lam ah tla an lo ret ngai dah kei aw….

Pu Lian : Nupi tong lo in pinu a ton pang a phang tla a si ngai kei cu maw…..

Lal Luai: Nan ti men! Tulai falai pawl hi cu maw, a fel pawl an fai lo i, a fai pawl an fel lo lala fawn. Nupi felfai ngah ding cu a ol lo si lawm.

Thluaite: Nangmah khal ttikal sawmsarih cuai khat fang na si ve tho kha!

Pa Thang: Ehei! Uico sa cuai thawn a lo tahtthim ual. Sinan mipa hi cun nupi kan qul tuk cin hi cun uico saruh hawl in kan hawl tho ngai.

Thiamte: Nupi felfai na duh ahcun 'puuk se him ih him' pawl khi va khawlhfai awla si mei.

Pu Lian: A fai cia khal felter a theih tho si lawm. Nuncan ziaza cu thleng theih an ti kha. Tulai ahcun hmel hman an thleng rero a si si.

Lal Luai: Nupi ding hi cu ruah tam poh le'n ruahsannak a hlo ttheu.

Thluaite: Ruahsannak ah ruah si lo in lungto tla na san rero kei.

Thiamte: Ruahsannak timi hi ruahpi sannak bawm tinak a si lo. Na ruah mi thu sannak bawm tinak sawn si lawm.

Pa Thang: Cuti khal a si cuang zik lo. Ttongfang pakhat cun ken thei mi sullam tampi a nei tla a si thei si lawm.

Pu Lian: Ttong thuhla lam ka zir lo ih, ka theihzawng a si lo aw.

Lal Luai: E, Pu Lian, tulai kan Chin calai khawvel ah tla cun a thiam lo lo an lar sawn an ti ho khaw.

Thiamte : Cuvek a um thei ding maw? Malte tal thiam lo tivek an lar thei ka zum lo.

Pa Thang : Si hlah. Thiam mumal lo, maltakte lawng thei ih ttong pawr kengkeng pawl khi mipi in mi thiam ah an ruat ih an ngaisang tla a si thei si lawm.

Thluaite : Cuti a si ahcun a ca lam ngan tam hnak in, mipi tonkhawmawknak hmun ih thu rel tam theitu si a hlawk sawn ding a si cu!

Pu Lian: Hlanlai ih Khawthim San an rak timi ahkhan hivek hi a rak thleng ve. Tu ahcun kum thawng khat lai a rei zo. Asinan khami san lai ih thil vek kha tui san ah Chinmi in kan tong lai thotho a bang.

Lal Luai: Mak ka ti ve ngai. Khawthim San ahkhan calai kutsuak ngaingai hnak in thuhla nepnawi pawl sawn kha thupi sawn ah an rak ruat. Calai kutsuak taktak neitu hnak in a rel lam ih ti thei pawl sawn kha an rak ngaisang. Mi thiam si hran lemlo khal tlawng phun sang an kai hnuhnu cun an rak rinsan kengkeng an ti kha.

Thiamte: A si ahcun lar duh sawn pawl le miphun hrangih ttuan taktak kan thleidan thiam a ttul a si cu!

Pa Thang: Cumi khal cu thil thupi zet a si ko. Khatlam ah, miphun hrangih ttuan taktak fawn, lar thotho fawn tivek tla an um ahcun kan hmuh sual lo a poimawh ding.

Thluaite: Minung hi kum sawm ruk kiangkap thlen cun lar duhnak a luartuk thlang an ti.

Pu Lian: Ehei! I va kap fuh durdo ve. Asinan kei cu ka lar thei cuang lo a si hi.

Lal Luai: Pu Lian, tu hi lar theidan ding kan rel rero laifang a si hi. Ca thupi ngan a ttul lo. Ca ttukttak tete ngan awla, biaknaklam ah taimak suah zet vek in lang aw ter awla, mipi tonkhawmawknak ah thu rel tam theibik si tum awla, cu cun Chin mipi cun an lo uar lo thei lo a si mei.

Thluaite: Biaknak lam na vun rel ruangah thil pakhat ka mangsuak. Tulai ahhin biaknaklam hmang ih sumpai hawl an tam vivo an ti ngai kha.

Thiamte: Himi cu hlanlai khal ah a rak um cia ringring ko. Biaknaklam hmang ih sumpai an ngah ruangah mi tthenkhat tla cu milian maktara ah an suak si lawm.

Pa Thang: Kan kiangnai ih thuthangttha phuangtu tthenkhat khal hi kum hnih-thum an veivah hnu cun an pum a dop, inn thar an sak, mawttawsaikal tthattha an mawng durdo mei a si khi.

Lal Luai: Hivek hi cu maw! Pathian in a thlawsuah tla a si ko ding.

Pu Lian: Pathian in a thlawsuah khal cu a si thei ko. Asinan mipipawl ih pek mi paisa an ngah. A petu mipipawl khal khan an pek tam ruangah an kawhhran ih hmaihngal tla an rak duh ve men thei. Ekhai…..hivek ruat kawi vivo cun, thuhla hi a maimom inn-raang thluh zik.

Thiamte: Hivek kan rel hi mi tla in an thei pang kei. Hremhmun sangka kiltu cazin ah in telh cih ding ho khaw.

Thluaite: Mipi mawlmang pawl hi cu maw! Mi pakhat hi vei tampi an piangtharter, vei tampi an pianghlunter. Hnipuan men bang in a hlun le thar an thleithlak rero si lawm.

Pa Thang: Asinan mipipawl ih hmuhdan timi hi a thupi zet. Mipi hmuhdan hi hman ttangkai thiam ahcun cawmawknak tlak, milian si theinak tlak a si ringring.

Lal Luai: Si tuk lam! Rampi hrilawknak ih a tling mi palaipawl tla khi mipi hmuhdan le duhdan ruangah mi thupi ih hung cang an si si. Asinan rampi palai tam zet cu mi thupi si lo in 'mi thu pi' ah an cang sal ttheu.

Pu Lian: Ekhai! Nan thuhla fehpi dan cu O le Aw buainak vek a si si. Khui kan thleng ti hman nan thei nawn sawm? Zianghman thei hnai lo ih tlokribak men nan tam sawn. Nannih vek in nan buaipi tam ahcun nan thuhla a tartahak ve ding.

Thiamte: Aih, kei cu zapi luangrualnak ding a si ahcun misenpi duhdan thlun ka huam si lawm.

Thluaite: Kei cu ka hmuhdan hi hnuaidawrte'n si ka rel ttheu.

Lal Luai: Nan awkam cu leilung hnuailam tiang lutter in cangcel le zubui thawn lengtlangter khal uhla, nan thinlung cu thlapi parah hro a suang rero thotho.

Pa Thang: Si e, pacang kan ttang zo ta cengmang, mai' thu tthin dualdo ding a si pi. Sapi in a neh a thihpi an ti kha.

Pu Lian: Tulai ahcun a ttuldan vek ih mai' thu qhin ngam khal hi mi ropi pawl tidan a si ve tho hokhaw.

Thiamte: Um hrih hnik uh! Lal Luai ih nupi neih ding thu ihsin O le Aw lamlam ah kan thleng.

Thluaite: Thu pakhat rel len nan phur vualvo cih ttheu ih curuangah nan rel mi thu nan tlansan ol tuk ttheu si lawm.

Pu Lian: Si ngai. Hrilawknak a nai tinte'n ramkhellam nan rel, hrilawknak a cem in Pathian thu nan rel, rel ding dang nan theih nawn lo hnu ah calai thu nan rel. Nan kat-sa-deu le zung-le-za tuk aw.

Lal Luai: Nupi ding ahhin fala hnahkhat hi a duh-um nan, tulai ah fala hnahkhat neih ngah ding hi a ol lo cuh!

Pa Thang: Si tho. Tulai falapawl cu far kung vek in hnah fatak tete tampi an nei siarsiar an ti ttheu.

Thluaite: Falapawl hnahkhat si lo ding ih tuahtu cu nanmah mipapawl thotho lo ziang. Uico bang in nanmai' luak nan ei sal rero ih cucu si ko.

Thiamte: Fala hnahkhat na duh fawn, falapawl na rinsan lo ahcun lengleh nei lawlaw men aw. Thin a hahdam bik an ti.

Pu Lian: Pa tling le nu tling hi zat um khawm vialvial rori in, mi pakhat nupi ding ta rori kan buaipi. A hawl hmu thei cuang fawn lo. Mangbang thlak tak a si.

Pa Thang: Si ngai. Lehhnu ah buaipi leh sehla a ttha sawn ding. Tui ttum cu calai tthansohter dan ding thuhla lam tla rel sehla a ttha ding.

Thiamte: Mitu ah mallai cu kan rel zo kha. Calai hmang ih lar thei dan khal kan rel zo! Asinan calai hi ziang a si ti hman theifiang mumal lo ih calai thuhla rak buaipi tivek cu a ningzah thlak tuk hokhaw.

Thluaite: Lar duh pawl cun calai taktak hnakin O le Aw an buaipi sawn an ti kha. Mipi tonkhawmawknak ah mithmai sen tengteng in an el aw ciamco ttheu an ti.

Lal Luai: Calai theory tivek, nunthuleng, biazai, thuanthucawn tivek calai taktak buaipitu pawl cu mi-ngai sa-ngai ah ret an hlawh lo. Zianghman thei hnai lo in O le Aw ih ttang ttengtteng pawl sawn kha mipi in calai misa zet ah an ruat an ti ngai.

Pu Lian: E, um hrih hnik uh! O le Aw buainak hi calai buainak a si sawn lo maw? Nunthuleng, biazai, thuanthucawn tivek cu phuahcop thuhla men an si si. Ca thupi teh an si lem mawsi?

Thluaite: Cutin a si lo, ka Pu Lian. O le Aw tivek cu calai kutsuak thawi' khaikhin cun a thupi lo tuk. Ziangtin ngan khal sehla kan theithiam thotho. Ngandan ttha sawn hawl ah an buai ruri men. Miphun pakhat ih a sungril thlarau ziangvek a si timi tarlangtu cu thuanthucawn, biazai, nunthuleng tivek sawn si lawm.

Pa Thang: Rual len uh, leitlun miphun fimvar pawl in teh ziangvek pawl hi ha calai an ti?

Thiamte: Phun Hrek ihsin Phunsangtlawng cem net tiang ih zir mi lakah calai kutsuak kan timi biazai, thuanthucawn, nunthuleng tivek hi a tambik. Khamipawl kha kan nunphung le anka an finkhawmawknak hmun an si ruangah a si. Leitlun miphun fimvar pawl khal in calai kutsuak pawl hi an sunsakbik mi an si.

Thluaite: O le Aw buainak kan timi khal hi a ol zawng in kan rel ttheu ruangah a si. A taktak ahcun cafangkom remsalnak ti'n simaw, cafangkom kalhmang tuahqhatsalnak tivek in simaw kawh ding sawn a si. Leitlun ah mai' miphun ih hman mi cafangkom kalhmang tuahqhatsalnak neitu miphun tampi an um.

Lal Luai: A dik nasa. Cafangkom kalhmang tuahtthatsalnak ahhin miphun tthenkhat cu an hlawhsam. A hlawhsam nasabik cu Mirangpawl hi an si ding. Asinan miphun tthenkhat cu an hlawhtling ve ko.

Pu Lian: Cuvek ruri the khuilam ta ha nan va theih? Ka lung hmuah nan ti hnok thluh. Hitivek a si ahcun kannih vek cu calai khawvel ah hmunram kan co thei ngai ding sawm?

Pa Thang: Calai khawvel ih mai' hmunram a hloh ding phang ah mithiampawl ih fehpi dan rak dokalh hrim tla an um thei ngai ding a si hi.

Thiamte: Um thei tuk lam! Asinan calai khawvel ih hmunram co lo khal ah, biaknaklam, senpi nun tuahqhatnak lam tivek le hmun dangdang ah quan a theih thotho si lawm. Thil sunglawi an si ve thotho ko. Thiam hnai lo ih calai buaipi hnak cun mai' thiamnak le ttuan theinak zawn ih rak lut kha mi pitling tidan sawn a si.

Lal Luai: Si e. Savom cu Sia a si lo ruangah a dinhmun a nep cuang lo. Banhla tla hi kawlhra a si lo ruangah a man a nep cuang lo. Mah le si dan ih um thiam kha a thupi sawn.

Pa Thang: Calai mi le sa si hi uar a um ve fawn si lawm. Zianghman thiam lo khal in calai mi le sa dinhmun ih lar a theih thotho nan ti kha.

Pu Lian: Asinan zianghman thiam hnai lo ih lar cu kan thih hnu ah kan tu le fa in in run zahpi leh ding ti phan a um hokhaw Pa Thang. Tui' kan calai buainak hman ah ka qang ta zozo, ka thih tiang tal cu ka fehpi duhdan hi lal seh tivek ih ttang ttentto an um an ti. Asinan cupawl khal miphun siatsuahtu an si ve thotho tiah ka ruat.

Thluaite: Miphun siatsuahtu ci khat an si ve ko. Lungruallonak an thlenter ruangah mipi kan ttangrual thei lo.

Thiamte: Sehal mei bul in amah lawng mei bul neih a zahpi ruangah a rualpipawl khal an mei tan bul ve ding in a forh hai timi thuanthu in mangsuakter.

Pa Thang: Khatlam ahcun, kanmah lala khal hi zawng in a taw caak a hmu lo ih, a rualpi taw caak a hnihsan an timi vek ah kan cang lala thei hokhaw.

Thiamte: Kei cu calai thuhla kherkher ahcun taw caak lo pawl ka si ve cu ka zum.

Thluaite: Kei khal mi tamsawn hnak cun ka taw caak a dem deuh ko ding.

Lal Luai: E, kei tla cu tawk caak lo lawlaw ah ka ruat aw lam si lawm.

Pa Thang: Um hrih hnik uh! Mah porhawk le sakhi ngal ah ziang kop hlah an ti kha.

Pu Lian: Tulai ahcun mah le mah a awmtawk ih porhawk phah thiam hi an lar duh sawn, an hlawhtling duh sawn titu tla an um.

Thiamte: Tu tiangtiang ah porhtu kan nei mumal fawn lo, kanmah le kanmah tal kan porhawk lo cun thin a hahdam thei lo si lawm.

Thluaite: Tulai ahcun khami thufim kha 'Mah porhawk le zukneng cawn' ti'n an thleng zo an ti.

Lal Luai: Mah le mah umkhawm caan tal ih kan porhawk lo cun, porhawknak ding remcang a mal em si lawm.

Pu Lian: Ehei! Khua kan thim zik a si si. Zanriah ei tla kan khelh lo pang kei. Khuiha, tlunzai rel uh si.

Pa Thang: Kan rawl lo do zik sehla, nan tam deuh ih kan khop awm si lo. Nan tlun hrih poh si kei cu.

Lal Luai: Si ngai, Zote in "riak ding tla kan si lo ahcun, ttiak thlang uh si" a rak ti bang in kan ttiak kei cu.

Thluaite: Asile, zanriah ei thaw, mangttha uh la maw.

Thiamte: Awle. Nannih tla.

Pa maw Fa? (Can-Khat Thuanthucawn)

Can-Khat Thuanthucawn

(One-Act Play)

Pa maw Fa?

Cangtu pawl:

Thangte Pa – Kawhhran upa

Thangte Nu

Thangte

Mawite Nu

Mawite – Fasawn Paitu

Langh Khatnak

(Scene I)

(Mileng pindan ah Thangte Pa in Thangte a kawk. Thangte Pa cu bawngbi sau dum, kor var le hngawngvet (nectie) a hruh ih, Thangte cu Jean bawngpi khuk pop le sport-shirt a hruh. Thangte ih sam cu gel thawn tung fiarfiar ih tuah mi a si.)

Thangte Pa      : Nu le pai’ taw hlip hmang, panghel mang mit tok na si hi. Khuilam thli siava ham’ na va hawp ngah kherkher!!!

Thangte           : Pa, in ngaithiam aw, ka ti sual pang.

Thangte Pa      : Ziangtin e? Ka ti sual pang e? Na aat a sosang tuk aw. A phul in na phul burhbo a si hi. (Nectie hngawngrek thlah dor deuh phah in) Kho sia lawng hlon kel, fa sia hlon kel si hlah ti thu ruangih ka lo zawiawi mi fang na si hi thei aw. Thluak thawl si thulungkhen nei si, lungruh si, aat sah si, iauiau rero. Fapa nikhua lo, cia-dawk dang kaw kau ka rak lo neih hi cuh…..mmmm…. rem tthat sal len theih ta hlah. Zoi’ cil pet rialruah siava ha maw hivek tuah duhnak thinlung nei ding ih lo toih fawi diodio thluhtu? Ka ti pang na hei ti lai sapbai. Ruat hlenghhlengh ta hen! Mi’ fanu sum-ui pum par ah zo saw ti pang thilthu ih va bok dah? A cang thei lo. A si lamlam lo. Si thei khal a si hrimhrim lo. Na tum hrimhrim ti a fiang. Cuvek ta rori na buaipi duhawk ah vokpa til zuat ah va cang ta hen! San na tlai lo tuk aw!

Thangte           : Ih maw, Pa, kan duh aw veve tho i, relrem dan ding lam…..

Thangte Pa      : (Vak vuatvo phah in) Nang ih rel mi duhdawtnak vek men kha rinrah tlak ah maw na ruah? Ai…ai….ai…ttong zuatzo sapbai aw hlah. Kotka ih ra vak ttheu fala pawl na biak zurzo dan, na melh zukzo dan, le nap el hruanhro dan pawl hi ka theih lo ah maw na ruah? Nang in na hngawng tlun lawng ih na ret mi thlemnak ttongkam kha awm nem, zaang nem, lung nem nunau hrang ahcun nun pumhlum pekawknak tlak siter thei ding ih na zuam rero si, ziah’hha a lo el rero ke. Mi’ fanu khuaikhem ding ta rori na ngaihtuahawk ah ‘ruat na hrat cun lamzin a um’ an ti si. Na thei ta kei cu. ‘Cangh sual nei ttheu fa, a tuartu nu le pa’ timi kan hluan a si hi. Kawhhran upa fa ka si hi ti ih ralrinnak cang thiam ta lo. Sawn na raih mi len nuhmei zonzai fanu sapbai. Thahrum cak lo hmuhsuam hmang maw na rak si? Farah rethei pawl ih rothil mankhung cu an zah-umnak a si ti na thei lo maw! Zahumnak neilotu cun sumpai tal a neih a ttul ti teh na thei maw? Cakhiarnak lawng cokthotu duhdawtnak cu hringnun eittettu hrik sia a si ti ka lo sim ttheu si. Ziangtin ha maw….zing tin zan tin nun kan lo sim ttheu cing in na thahri khawh kilvennak cang na thiam cuang lo?

(Hmun phiah keng phah, hnattuan hnipuan thawn Thangte Nu a rung lut)

Thangte Nu     : Pa, na awki tthum deuh aw. Venghnen mithmai kan hmu ngam nawn lo dah pang kei.

Thangte Pa      : A poi lo, a thupi lo. Mualpi mual hra kan pho zo a si si. Hihnak ih mualpho teh a um nawn cuang ding sawm? Tu ahcun mizakip ih cil pet tuar rero ding ti lo cu hmabak kan nei nawn na he!

Thangte           : Pa, mualpho lo ding in nupi ah in tthitsak mai awla.

Thangte Pa      : A ttul lamlam lo. Nunau ler thak, nun tlaranh le sihhnip, taksa thap ih pasal hawl tivek kan inn ahhin ra lut hlah she. Kan kotkhen khal ra dai duado hlah she. Ka thlarau in cuvek rimra a ngaih hmurhmo lo. Sumpai a ngainat ruang khal ah a si kha. Sawn pai man ziangzat ha kan lo pek ding ti va sut aw. Cu cu si mai!

Thangte           : Si lo, Pa, nupi ding ah ka duh taktak si lawm.

Thangte Nu     : Si e, cu cu a remcang ngai………………

Thangte Pa      : Aih..aih..aih, nannih nufa the hi thu thup nan rak nei ziar a si lo maw! Nan hmaivun hnuai ahkhan ziangvek thuhla ttawih se rimnam ha nan thuh? Innsang pabik ka um hi, ka thuthu. Feh zang, (Thangte khih phah in) va sut lohli aw. Kan kuan cawk lo ding tiang an rak ngenawk lo ahcun kan tthi lo ding. Naisai!! Annih tthakual ve kha ka duh lamlam lo. Ziangahha…..

Thangte           : Si lo, Pa……

Thangte Pa      : Feh zang men aw ka ti (Pangpar retnak dawng la phah in) ka lo su sutsi ding hokhaw!

(Thangte a suak)

Thangte Pa      : Umlaw…vansang tiril kan tok a si hi. Sumpai kuan mai sehla thil feh tluang mei ding kha maw…… Ee, khuihnik (Thange Nui’ lam hoi in, a mehtok in a khih ih) nang the hi na fapa ziangvek thu loilo ha na rak sim? Nu le pai’ hmai ih belmang tat hmang pa thawn ziang lungrualnak ha nan rak tuah? Innnsang tthansohnak tokpherhtu ah na ttang tum a va bang em. Na fapa in sawn a raih mi nu hin minung paziat a kuai thlu zo ding ti the na thei maw si? Ka thinhengnak thalfang ihsin ziangvek ralthuam thawn ha humhimawk na tum? Vun rel hnik e,….rak ngai keng.

Thangte Nu     : Pa, na thinhengnak nemh dai deuh hnik aw. Innsang pabik na si kha. Thinsau suah awla ka duh. Thil hi a ttha zawng tei’ feh thei ding in kan ruat a ttul sokhaw. Kei cun (thawpi suah phah in) kan tthitsak mei hi a ttha ka ti. Mipa dang cu a rak kuai thlu lemlo ding e. Curuangah……

Thangte Pa      : Lamlam..lamlam….. Ka thinhengnak hi a duh len a so in so seh. A duh len khu hluahhlo seh. Ka sup lamlam lo ding. Kan tthitsak lamlam lo ding. Na duh len bawngbi le kor cu va tthitsak aw. Hi nu cu si hlah she. Mo fel, mo ttha, ….mo zah-um, fanu fapa ttha hring theitu ding ti lo cu kan tthi lo ding.

Thangte Nu     : Cuti cun nunau lam dinhmun kha a lainat um si lawm. Keimah tla nunau ka si ve i, cu lo hman ah kanmah tla….

Thangte Pa      : Dinhmun….. an duhnak hmunhmun ah va ding hai khal sehla ziangha poinak um? A taksa hman kilkhawi thei lo nunau cun pasal fanau a kilkhawi thei hrilhro zik lo. An dil zat paisa kan pek hnuhnu nang ih rak zangfah le lainat khal a ttul tthakual lo e a.

Thangte Nu     : Nang ih duhzawng tling thluh thei mo ttha cu kan hmuh khawsuak ka zum lo. Kan fapa hi thiamthil mumal nei lo, nu le pai neih cia cen rero man a si fawn. Cu lo khal ah nupi tla nei sehla a zuva a dem phah deuh thei si lawm. Nupi neih a duh thu a lo sim khallen ‘um-e’ na ti duh fawn lo. Nun sim dan ding khal a har phah si lawm.

Thangte Pa      : Zianghman thiam kupkap nei lo, phunsangtlawng hman ttheh thei hlei lo, mak-sa-rang si ko hih. Sinan, a kum a no lai sisi. Nupi neih ttul siak lo.

Thangte Nu     : Kutthiam pakhatkhat zir ding in na nor ngaingai cuang fawn lo si lawm.

Thangte Pa      : Aaa…..nang khal hi, na thu a tam. Kan fa neihsun a si hi. A paih lo cing ih thil zirter rero a ttul lo. Ro co ding a ngah pam si.

Thangte Nu     : Hnattuan neih lo hi sualnak bulhram a si si lawm. Mino thisen cak lai lephei cu hnattuan an neih lo cun nupasinak lam ah an thinlung a feh nasa tuk ttheu tinak lailak ah. Nangmah tla…..

Thangte Pa      : Aih, ziahha kei lamlam! Aa…..tui ttum cu sumpai in kan kuan hrih phot ding.

Thangte Nu     : Kan neither a ttha sawn ding e, Pa.

Thangte Pa      : Rak hrolh aw vettak lo awla si mei. Thupi hlapi a si hi. ‘Nunau thu le sepi ki’ ti a si kha. Rahsuah ttha a nei thei ngaingai lo. Nannih nufa cu rak um men hnik uh. Milaipa khan sawn man an ngen zat run thei tlung sehla si mai. A rem cancan ah keimah sumpai thawn ka va feh ding. Phur rit khal ah ruat tuk duh hlah. Milaipa a ra tlun len nun rak sim awla si mai. Cu cu na ttuanvo, a dang ah rak ther lut aw ve lualo hlah.

Thangte Nu     : Pa, keimah ka feh a ttha sawn ding. Nunau veve cu kan thinlung kan hmu aw deuh ding. Ttongkam mawi na hmang thiam si lo, an thin kan ti na sinsin dah kei.

Thangte Pa      : Nang va feh awla maw? A mak kei cu! Tu hman ah anmai lam ah na tlu lut cia si khawh. Mithli canghnap thawi’ an rak lo ttahhnawh ahcun an duhnaknak ah an lo herh kual rero ta kei cu. An lo bum ngah cun ‘vate bu luah’ in lo ziang na run tlun thluh ding. A ngah lo. Hivek thuhla hi nunau thinlung no pawl ttuanrelnak ding zawn a si lo.

Thangte Nu     : Zangfah an um ti lawng si lo in, a nu in kan innsang thuhla a thei ve thluh fawn si, an ngiau kan ti kiak pang ahcun aw, kanmah hokhaw buai ding.

Thangte Pa      : Akhaikhaikhai! Tawka ihsi funghreu thawh suak lo fangfang nuhmei tei’ sung kha sumpai hmai ah ngoltau ngam ding an siak lo. Khah, kei meeting ka kai ding. Milaipa a ra tlun le sumpai ttul zat rak sut awla, nun rak sim cih aw.

(Thangte Pa a suak, sangka a thlen zawng ah)

Thangte Nu     : A va sut ka zum lo. A beidong thawinak ah zu a va in leh ta kei cu.

Thangte Pa      : (Sangka ihsin) A vas uh lo khalle poi hlah, keimah awm mawi tawk ka ti zatzat ka va pe leh kei si mei.

Langh Hnihnak

(Scene II)

(Mileng pindan ah Mawite le a Nu thu an ruah aw)

Mawite Nu      : Sumpai an neih ruangah mi’ fanu tawhthai an hreh lo si lawm. Tlawngkainak lam ih nan rak tonawk cu a poi tuk aw. Nan thawmvang len ka thei man lo. Rak thei man sehla cun ralrinnak lo pek ding a si nan. Nang velvo len, nufa hnih te lawng kan si hi tinak cang thiam ta lo. Tlangval neih thu khal i sim aw ka lo ti ttheu si. (Inn leng ah mawttaw ra cawl awn a um) Ningzah ah na ruat a si ta kei cu. Farah zonzai kan si ih tlun ah hminsiatnak nei cia innsang thawn kan hnawihnih aw lala zik cu a va si ih, kan van a va duai lawmam ve. Fanu mumal lo neih man ah, na nu ka tar ol thluh ding a si hi. Thinharnak hlir phur in ka dam sung i hmanter ding a si hi.

(Inn sung ah Thangte Pa a rung lut, to hman a to hman hlan in)

Thangte Pa      : Mawite tei’ nufa, hi kan mualpho a si si. In ngaithiam uh kan lo ti lo. (Amahte’n tohkham ah a to) In ngaithiam khal kan beisei lo. Ziangkhal asile thil feh liam zo cu kan hnukkir sal thei si lo. Ziangtinha kan relrem thei ding tiah ka ra lo sutron hai a si hi.

Mawite Nu      : Rethei zonzai cing in mi lak ih kan tlantheinak umsun kan zahumnak cu in siatsuahsak zo cu a si hi. Nan fapa thawi’ neihawkter lam teh nan siang maw siang lo saw? Maw, ruahdan dang nan rak nei cia ha?

Thangte Pa      : Mithmai hup in vun rel mei sehla. Kannih lam cun rem nan ti zat sumpai thawn cingfel thei sehla ti kan ruat deuh cu si. Nan nufa hrang khal ah dam sung nun semremtei’ um theinak ding a si tiah kan ruat.

Mawite Nu      : (Thinheng emem in) Cuti leh thotho maw! Ka zum cia tho. Nan cakhiarnak thak kheuhtu men ah ka fanu hman nan tum tinak maw! A va puarthau thlak lawmam ve. Paisa neih ruangih hngal iar-iar tei’ sung nan si tho si. A awm ve ko. Asinan, paisa ih cinfel na tum ahcun va tlung mei aw. Nan fa khal a suahthlak vete’n kan rak lo pe ding hokhaw.

Mawite            : (Thinphang emem in a nui’ liang a pawk ih) Nu, naute cu kan pe lo ding ka lo ti si. Kan pe lo ding. Keimai fa a si si. Hiti kan sinak hi keimai thiam lo khal a tel si. Rethei zonzai khal in ka cawm mei ding. Kan pe lo ding maw, maw, nu!!

(Thangte in sung ah a rung lut)

Thangte           : Pa, paisa pek na rak tum mawsi. Ka nei duh ka lo ti si. Tui ttum cu ka duhdan in thlunsak ko aw.

Thangte Pa      : Upa thurel ah rak tel ve hlah. Ka lo fial lai hman ah feh lo in, tu lamlam ah ziangha na ra ti? Nangmai’ ruangih buai kan si hi na ningzak lo maw? (Mawite tei’ nufa lam hoi phah in) Cu cu, naute tla in pek siang lo ding ahcun naute cawmnak nan harsa zik si, paisa hi cu nan lak a ttul ko ding. (Cabuai parah paisa fun ret phah in) Hi zat hi tui ttum ah rak la lawk auhla naute suah hnu ah a dang cu kan pe aw leh ke.

Mawite Nu      : (Ti hrim awphawi thawn) Nan paisa cu a va tam liailiai ve. Leitlun ah hitluk ih paisa tam a rak um ti hman kannih vek mi rethei tla cun kan theih ual lo. Hivek ruangah maw kawhhran le khawtlang ih thuneihnak a pumhlum ih nan rak dawlh thei. Nan thawhhlawm thawh mi khal hmaisong lo awk a tthat lo tho hi. Mi sisiau le ziaunak hlir sermon ding khal nan awm ko. Paisa hi zatzat in pek ding awk ah nan fasawn pali-nga lai khal kan lo pai sak duh hial kei cu! Asinan, kannih cu a kilkhawi dan tla kan thiam lo pang ding. Nan paisa kha la auhla va tlung mei auh.

Thangte           : Si lo, ka nu, Mawite hi ka nei duh taktak si lawm. Ka pa in a lungkim lo khalle.

Thangte Pa      : Rak ai ve hnuaihni hlah ka ti cu! Tlaklabeu siava men bang i. Na thu a hei tam viau cu a!!

Mawite Nu      : Thangte, na pa kha el duh rero aw hlah. Mi fanu pum par ih bok tthang, a kuan khal kuan tthang a si ih, hivek cu a thiamzawng hokhaw.

Thangte Pa      : Hei, cuvek kha tuvek ih rel ding a si lo hi.

Mawite Nu      : Ziangtikah saw kan rel cuang ding. Nannih tla cun dam sung daih in in mualphoh a si si. Kei tla cu thu um cia men si lawm ka rel. Thangte, na nu le pa an neihawk ah thla thum lai na ti zo ti teh na rak thei maw? Na pa in mi fanu pum par ih bawh man vei li-nga lai a kuan dah ti teh na thei maw? (Thangte Nu a rung lut) Nan nung le cang hi, a hmutui’ ningzahnak hlir. Fa sawn pai man kan kuan ding e, cu e kha e, cu nan ti ngam lai sapbai. Hlohthlau roling tei sung! Vat lung men auh. Nan fa khal kan lo cawmsak ding. Kawhhran upa fa tete….a fel nasa ding hun si ah.

Thangte Nu     : Mawite Nu, na duhtawk in in ziau rero khal awla a awm ko. Relsiat awm khal kan si. Asinan Mawite hi cu kan mo ding ah kan duh hokhaw. Kan mo ah kan nei ding.

Thangte Pa      : (Thinheng sosang emem in) Lamlam. Ka fapa hmai ah mualphonak tlangzim ih in tartui’ fanu maw kan mo ding. Kan nei lo ding. An duh len sumpai hi la hai sehla cu cu si mei. Mai’ taksa hman kil him thei lo sungkua an si ve a si si. Mual kan pho thluh zo ta cengmang! Hihnak ih mualpho bet ding teh um nawn cuang sawm? Kan nei lo ding. Cu cu si mei!

Mawite Nu      : Si e. A dik si lawm. Mai mualpho hmuah cutluk ih tuar na nguaingo cing ih, midang zawn ruat lo hman nan um, mai dinhmun le sinak hman zahpi lo ih hivek tuah ngamtu hman nan um a si si. Kan lo buaiter lo ding. Pathian lawng in kan tlun ah thu tthen seh. Thlarau mi te ti aw veve kan si lo sawm! Va tlung lohli auh. Nan hmel ka hmuh men hman ah ka luak a suak ciacia thawn. Mithi kuang bangih lenglam mawi si, sunglam thu hluahhlo pawl….ten nan um tuk aw!!

Thangte Pa      :  A khai a! Ve su cun. Nunau fafa ih ttongkam siava mi na barh ciamco ve cu! Nangmah hman hi e, ttongkam tlaranh le borhbah thawn lo be sehla na theithiam tawk ciah ta kei cu. Khuilampi, vancungmi bang ih thianghlim ah maw na ruahawk….

Thangte Nu     : Pa, ttong nawn hlah (Thangte Pai’ kut dir phah in) ra aw. Kan tlung ding. Mawite nu, in ngaithiam aw. Innsang khat ah kan canh aw hrimhrim ding. Cu lo cun kanmai ruangah nan mualpho…..

Thangte Pa      : (Thangte Nui’ kaih mi a kut phih thla phah in) Rak um men hnik. Thuhla felfai kan rel hrih lo hi. Innsang pabik ka si hi. Ka thuthu. Annih vek in in rak hmuhsuam ve khanglang sapbai. Khuilam ih sumpai ngaina lo ngaingai bang ih an um cu. (Mawite Nu zoh phah in) Unaunu, nan hloh zo mi zahumnak kha cu ningnatpi rero duh aw hlah. Zahumnak hi cu maw, rinumnak ih a telpit lo cun tlunkhuh nei lo inn vek men hokhaw.  Tu ah nan zahumnak cu na fanu in a rinum lo san zo. Curuangah nan zahumnak ttet belhnak ding paisa hi la men aw.  Nunau zahumnak lephei hi cun rilrawn tuar thei hlah khaw. Ril a rawn taktak cun ihkhun hnuai lam ah a relh ih, ihkhun tlun ah ziang a cang ti a hmu thei nawn ttheu lo. Tolh thluk zo hnu cun, thawh sal khalle taw a bal zo thotho. To cilh lawlaw men ding hokhaw. Paisa tete kongro hun su tuk ah.

Mawte Nu       : In hmuhsuam tuk aw hlah.

Thangte Pa      : Thudik na rel ih, thudik ka rel ve si ko.

(Thangte Nu in Thangte ih hna kiang ah thu a sim)

Mawite Nu      : Nuhmei farah palzut hmang tei’ paisa kha cun kan inn ahcun thu a nei ve lo.

(Thangte in Mawite a hruai ih an inn leng ah an suak)

Thangte Nu     : Pa, a tawk zo. A mawhtu kan si hi. Mual kan pho tuk zo.

Thangte Pa      : Um hrih, hi nu hi sumpai lam Rundamnak Tlang hun thlenpi lawlaw keng.

Mawite Nu      : Hremhmun Sangka a si sawn kei cu!

Thangte Pa      : Mi-aa thu simh ttheu hi cuh. Sumpai in thil a ti theizia hi na thei maw? Nunau par lephei ahcun hna a ttuan thei cuang em. Nunau zovek khal sumpai ih lei theih lo an um lo. Minung hman a lei thei a si cu!

Mawite Nu      : Nang ih hrang ahcun sumpai cu a thupit tete lo’n. Mi fanu na sualpi man kuan a ttul ringring si. Keimah lawng in rak thlemthlu thei lo men na.

Thangte Pa      : Hei, khavek kha nufa hmai ah rel hlah ka lo ti si (khawdang tak hrukhro phah in) khuiahsaw, milai tei’ pahnih the?

Thangte Nu     : (Thinheng emem in) An tlan hlo zo. Tu ah kei khal ka tlan ve ding. Mawite nu sawn na rak raih thei lo ruangih phuba lak duh ah maw paisa ih kuan tteutteu na rak tum? Na ning hman zak lo’n. Tui hlan ka lo ngaidam zozai hman tinak lai ah. Na lawmam tuk aw.

(Thangte nu inn leng ah a suak cih)

Mawite Nu      : Na cem riai e, milaipa. Ka di a va riam sutso em.

Thangte Pa      : Um…. (paisa pawl zial ah a hlon, a cal dom phah in) Kan cem aw. Kan cem aw!

***** A CEM ******