Showing posts with label Hnihsuak. Show all posts
Showing posts with label Hnihsuak. Show all posts

28 April, 2017

Hni Uar-o Aw

1. Ka hmel a siat ruangih ka bei a dong deuh tinte'n ka facebook friend pawl ih profile ka zoh kual ih ka thin a nuam sal ttheu. Ruahsannak in petu mi sunglawi zet nan si :P

2. Rawl dawr ah ka feh ih fala tlangval pawl a kop aw in an rak to khat thluh. Ka phone ka phorh ih phone bia bang in, "Unaupa, hinah na fala in tlangval dang a topi, ra lohli hnik," ti'n ringpi'n ka ttong. Cutikah tonak i kian ding in fala pakua an tlung. :P

3. Pu Hual: Tlangval, ka fanu i dil ding in na ra ih PK na keu, khami kha mi na zah lo tinak a si.
Tlangval: Ka pu, kuak ka fawh can le zu ka in can lawng ah PK ka keu ttheu.
Pu Hual: Zu na in, kuak na fawp tinak maw?
Tlangval: Club ih ka feh can lawng ah si.
Pu Hual: Club na feh betbet maw?
Tlangval: Poi ka ti zet, ka pu. Thawnginn ihsi ka hung suah ihsin club feh hi ka zongsang.
Pu Hual: Aizelaw Pathian! Thawng na rak tla dah bet maw?
Tlangval: A poi nasa, pu. Mi pakhat ka thah ruangah thawng ka rak tla.
Pu Hual: Mi na rak that dah lailai maw?
Tlangval: Ka pu, ka thinheng ka sup thei nawn lo ruangah si. A fanu ka neih ding sianglotu a si ruangah ka thah mi a si.
Pu Hual: Lungawi soparte'n kan lo hmuak. Na zawh mi lamzin a dik. Ka fanu hrangih pasal ding diktak na si. Rung to aw. :P

4. Mai' fanu pasal neihter hmuah duh fawn, a leng ih suahvah siang lo pawl hi ka mang an bang. Internet ihta pasal ding download-ter an tum si pei maw? :P

5. "Na thlen dahlonak hmun ah ka lo fehpi ding," a lo ti ih, na uang aw in na lung a awi zet. Cu thluh ah a umnak khawte ah a lo hruai ih, na mang a bang nawn lai ah, "Duat, kan khua hi na rak thleng dah lo ti aw?" tiah a lo sut. :D

6. Tlangval hmel se pawl cun, "Kei cu mi pakhat parih rinum ringring mi ka si," an ti ttheu. Hril ding dang nei lai bang in :P

7. Nunau pakhat in mipa pakhat a phone.
"Hello, lo ton le lo biak ka duh."
"In thei maw?"
"Thei e. Ka nauhak pawl lakih pakhat ih pa na si."
"Oh, Pathian! Mawite maw na si?"
"Si lo."
"Kimte maw?"
"Si lo."
"Parte maw?"
"Si lo."
"Thluaite maw?"
"Si lo."
"Suite maw?"
"Si lo."
"Sungte maw?"
"Si lo. Na fapa ih sayama ka si. Na thuhla in simtheih ruangah ka lung a awi." :P

Hram: Laughter is the best Medicine.


13 February, 2016

Tlakrawh Dawltui' Cangsualnak

Tlakrawh Dawltu ih Cangsualnak

Na cangsual ve dah maw? Na cangsual a si khalle, hi pai' cangsualnak thawn tahtthim cun a mak lemlo men ding. A hnuai ahhin a tak ih thleng mi thuhla a um. A ningzah thlak tuk ih, a ngantu hin a hmin tarlang ngam lo. Hnattuantu Pawlkom in hnattuannak ih cangsual pang pawl bomnak an pek tikah siseh, thuhla umdan an zingzoi tikah siseh, an cangsual dan a cipciar in an sut ttheu ruangah a thuhla a theihter mi a si. Australia ram ih thleng mi a si.

Duhdawtmi Sayapa:
Cangsualnak thuhla cipciar deuh ih i dil ruangah ca ka lo kuat sal. Ka cangsualnak san le vang cu 'ruahmannak mumal lo' a si tiah ka ruat. Thuhla cipciar i dil mi cu a hnuailam ih ka tarlang mi ahhin a famkim ko ding.

Kei hi tlakrawh dawltu (bricklayer) ka si. Ka cangsual ni ahkhan tlakrawh inn dot ruk ih diphun ah keimahte'n hna ka ttuan. Ka hnattuan ka ttheh tikah hman hlei mi tlakrawh tthenkhat an um ti ka hmu. Lehhnu ih kan tah sal tikah tlakrawh komkhawm cu pound 500 luan deuh ih rit a si. Cui' tlakrawh pawl cu ka kut ih thiar thla lo in, barrel thawn pulley (thilri khaisohnak/lakthlaknak hridai hrangih hman mi lengte) hmang ih lakthlak ka tum. Pulley cu innpi kiangah a um cia.

Hridai zim khatlam cu leilung ih ka ttawn tthat hnu ah, diphun ah ka hung kai ih barrel cu la in a sungah tlakrawh pawl ka ret. Cu thluh ah ka vung ttum ih hridai zim cu ka vung phelh. Tlakrawh pawl nuamtetei' an rung ttum theinak ding ah hridai cu fekte'n ka pawk.

Hmaisa ih ca ka lo kuat mi ahkhan kei cu pound 135 ih rit ka si thu ka rel zo. Cutikah, pound 500 luan tlakrawh cun pound 135 rit ka taksa cu tlun ah i phih vukvi. Rin lo paral ih i khaisoh ruangah hridai thlahnak cang khal ka thiam lawk lo. Inn phar sir ihsin cak zet in ka kaiso zurzo ti cu rel hman a ttul lo ding. A dot thumnak kiang ka thlen tikah ka kaisoh tluk ih cak in a rung tla thla mi barrel thawn kan tong aw. Cui' kan tonawk ruangah, hmaisa ih ka tarlang zo bang in, luruh khing, liangruh kiak le taksa pilh hriamhma pawl ka ngah.

Cu thluh hnu khal ah tlunlam ah a hlan vek thotho in ka kaiso zurzo. Ka vorhlam kutzung cang hnih tiang pulley sungih an lut ngah lawng ah ka kaisoh zurzo cu a tawp. Vantthat thlak zet in, himi cin ahcun ka ruahnak a hung fimvar ih hridai cu thlah lo ih pawknak cang ka thiam. Asinan ka lung a hung fim zar ah a na ka tuar mi cu a mak in a mak ve thung. Asinan ka kut zung pawl pulley sungih an lut rual deuhthaw ah barrel khal cun leilung a vun dai ih, tlakrawh ih sawh nat tuk ruangah barrel tawphah a phong. 

Cutikah tlakrawh ih delh nawn lo mi barrel cu a khing a rit nawn lo. Pound 50 hrawng fang a si ding. Kei cu pound 135 ka si fawn. Cuti cun, na suangtuah thei ko ding. Inn phar sir ihsi cun rang zet in ka tla thla lala. Inn dot thumnak kiang ka thlen tikah a hung kaiso mi barrel thawn kan tong aw lala. Himi ruangah ka kemit ruh khatlam khatlam in an khing, ka ha an kiak, ka ke le hnuailam taksa hmun tintian ah hriamhma tampi an um. Hitawk ihsi cun ka hualvan a thleng aw deuh a bang. Barrel thawi' kan tonawknak cun ka tlak thlak dan a muangter deuh. Curuangah tlakrawh peng aw khawm lakih ka vung tlak tikah ka zaangruh pathum lawng an ruai phah.

Asinan a netabik hi cu lo sim khal ka lo hmaisong zet. Tlakrawh peng aw khawm lak ahcun natnak tuar in, tthawn thei lo in ka um ih ka dinhmun ka vun hngilh sal. Curuangah ka kaih mi hridai cu ka thlah pang. Cutin, barrel kawlawng ka zawn ciahciah ih a rung tlak zurzo lai cu ka rak zoh. Himi ruangah ka ke pahnih an kiak.

Ka rel mi thuhla hin thuhla nan zingzoinak a lo bawm thei ka beisei.


11 February, 2016

Leitlun ih Smart Bik


Leitlun ih Smart Bik



Sibawi, danthiam, nauhakpa te le pastor pakhat cu Nipini siimlam ah bulpak vanzam te pakhat thawn an zuang. Vei le khat ah vanzam ih engine a siat thutthi. Vanzam khaltu cun a theitawk in a zuam rero nan a ngah nawn lo. Vanzam cu a tla thla thok. A netnak ahcun vanzam khaltu cun parachute pakhat a la ih mi dang khal an dawp thlak a tthat ding thu a sim. Anih cu a dawp thla cih.

Vanduai thlak zet in, parachute pathum lawng a um kherkher.

Sibawi cun parachute pakhat a cuh ih, "Kei cu sibawi ka si, nunnak tampi ka runsuak, curuangah ka nun tengteng a ttul," ti phah in a dawp thla cih.

Danthiam khal in, "Kei hi danthiam ka si ih, danthiam pawl hi leitlun ih minung smart bik kan si. Nun ka phu hrimhrim," ti phah in parachute pakhat a la ih a dawp thla ve.

Pastor cun nauhakpa cu a zoh ih, "Ka fapa, kei cu reipi ka nungdam zo ih, ka nun khal a kimcang zo. Nang cu na no lai ih na hmailam ah nunnak ding can tampi na nei. A tang mi parachute kha la awla, hahdamte'n vung nung aw," a ti.

Nauhakpa cun parachute cu pastor hnenah a pe sal ih, "Thinphang hlah pastor. Leitlun ih mi smart bik in parachute si lo in ka bag sawn si lawm a lak," tiah a sawn.

16 January, 2016

Nupi/Pasal Dawr

Nupi/Pasal Dawr
(Thinheng Awi Lo)

New York khawlipi ih an on thar mi dawr pakhat ih hmin cu "Pasal Dawr" ti a si. Cutawkih nunaupawl an feh tikah an thlun ttul mi dan pawl khal dawr luhnak sangka ah an ngan.

An ngan mi dan cu "Himi dawr ahhin vei khat lawng rat sian na si. Himi dawr hi dot ruk a um ih a tlunta dot vivo ih mipapawl man khal a sang vivo. Na duh mi dot ihta na duh mi mipa na hril thei. A hnuaita dot ih na duhzawng a um hrih lo asile a tlunta dot ah na kai bet thei. Asinan na luhzonak dot ah vei khat hman lut sal sian a si lo," ti a si.

Ni khat ah nunau pakhat cu cumi dawr ah pasal hawl ding in a va feh. Dawr dot khatnak sangka tlun ahcun "Hitawk ih mipapawl cu hnattuan kutkaih an nei," timi a ngan aw.

"Mak lo emai," a ti ih dot hnihnak ah a hung kai. Dot hnihnak sangka tlun ahcun, "Hitawk ih mipapawl cu hnattuan kutkaih an nei ih, nauhak khal an duat thiam," timi a rak ngan aw.

"A zia-um ko," ti phah in dot thumnak ah a hung kai bet. Dot thumnak sangka tlun ahcun, "Hitawk ih mipapawl cu hnattuan kutkaih an nei ih, nauhak an duat thiam ih tlun ah, an hmel a ttha," timi a rak ngan aw.

Nunau cun a lung a hmui zet thlang nan, a parah ziang an um bet lai ding timi theih duh ah a kai bet. Dot linak ahcun, "Hitawk ih mipapawl cu hnattuan an nei, nauhak an duat thiam ih, an hmel a tthat hlei ah, innsang hnattuan khal mi an bawm," timi a rak ngan aw. 

Nunau cun a lungkim zawng a si thlang ko nan, a tlunta dot ah a ttha deuh a um lai ding timi beiseinak thawn a kai bet. Dot nganak ahcun, "Hitawk ih mipapawl cu hnattuan an nei ih nauhak khal an duat thiam. An hmel a ttha ih innsang hnattuan mi an bom ih hleiah, duhdawtnak thawn duat zet ih mi zohkhen an thiam," timi a ngan aw.

Nunau cun cutawk ih mipapawl cu a lung a kim ih hril a duh thlang ko nan, a tlun ih a ttha sinsin ding mi mipapawl a vun ruat tikah, a hung kaiso bet hrih.

A dot ruknak a hung thlen tikah sangka tlun ahcun, "Nang hi himi dot ih hung thlengtu 3261496012 nak nunau na si. Hitawk ah pasal kan zuar lo. Hitawk hmun cu nunaupawl ih duhamnak silhkhah thluh a theihlozia langternak hmun a si. Kan dawr tha na ra pek ruangah kan lung a awi," timi a rak ngan aw.

Nunaupawl in an ngaih lo pang a phan ruangah dawr neitu cun cumi kiang ah "Nupi Dawr" khal a ong.

Cumi dawr ih dot khatnak ahcun "sex" ngainatu nunaupawl an um.

Dot hnihnak ahcun "sex" ngaina fawn, paisa nei fawn nunaupawl an um.

A dot thumnak, dot linak, dot nganak le dot ruknak cu zohman an thlen dah hrih lo ruangah ziang an um ti theih a si hrih lo.

Credit: www.funny2.com


30 October, 2015

Nupi Thawn Bawhlung Sit Zoh


Nupi Thawn Bawhlung Sit Zoh












Nupi: Ziang team pawl si lek?

Pasal: Arsenal le Manchester United.

Nupi: A ttha tuk. Arsenal ka ttan.

Pasal: Arsenal cu team ttha si ngai si lawm, Duat.

Nupi: Drogba a tel maw?

Pasal: Anih cu himi team hnih ah a lek dah lo pi.

Nupi: Si maw? Khimi khi Chris Brown mawsi?

Pasal: Si lo e, Duat. Chamberlain si khi.

Nupi: Aw. Asinan an bang aw em si lawm. Asile Yellow Card an ngah tikah ziang a cang?

Pasal: Ralrin peknak a si khi.

Tawkfang ah Rooney in goal a thun.

Nupi: Goal! Chamberlain ih thun mi si maw?

Pasal: Si hlah. Rooney in Manchester United hrangah a thun.

Nupi: Aha! Ziangtin si thlang? Taktak ahcun Arsenal lam ih thun ding mi si nan.

Pasal: (Zianghman a ttong lo)

Nupi: Red Card an ngah tikah ziang a cang?

Pasal: Bualrawn sungah an lek ngah nawn lo.

Nupi: A leh ngah nawn lo ahcun Coah a va ttuan ding maw?

Pasal: Mmmm... si lo.

Nupi: Taktak ahcun trafic point thawn a bang aw. Yellow cu ralrinnak a pe. Red cu ttih a nung.

Pasal: Dik lawlaw si, Duat.

Nupi: Green Card teh ziang tinak maw?

Pasal: Green Card cu a um lo, Duat.

Nupi: Aw. Cuti maw? Arsenal hi World Cup ah champion hai sehla ka duh.

Pasal: Mmmm..

Nupi: Khitawk ih ding khi Mr. Bean a bang ti aw. Khimi khi zo si, U.

Pasal: Arsenal Coah Arsene Winger a si khi.

Nupi: Asile Manchester United Coach cu Manches Winger maw?

Cutikah pasal cun zianghman ttong lo in TV channel dang a tthawn.

Credit: Troll Football

09 December, 2014

Hni Uar-o Aw (47)


Hni Uar-o Aw (47)



Thuphuan 3:20
Pastor thar pakhat cu a hoha mi kawhhran mipipawl a vehvai vivo hai. Inn pakhat ahcun minung an um ti cu a theihtheih ko nan, sangka ra ongtu zohman an um lo. Curuangah a zalte sung ih a pai mi cahnah a la ih Thuphuan 3:20 timi a ngan hnu ah sangka ah tar ta in a tlung.

Nipini a ra thleng. Biakkhawmnak an tuah ih thilpek an lak tikah sangka ih a tarta mi cahnah kha thilpek khonnak bawm sung ah a rak thleng. Cui’ cahnah par ahcun Seemtirnak 3:10 timi ngan belh a si. Pastor cun a Bible a kau ih a vun siar.

Thuphuan 3:20 cu, “Ngai hnik, sangka hram ah ding in sangka ka king,” ti’n a thok ih Seemtirnak 3:10 cu, “Hmuan sung ihsin na aw ka thei nan taklawng ih um ka si ruangah thinphang in ka relh,” ti a si.

Cafangkom Hniksaknak (Spelling Test)

Patar pakhat a thi ih vancung sangka kiang a hung thleng. Sangka kiltu Mithiang Peter in cafangkom hniksaknak a pahtlangh thei lo ahcun vanram ih luh sian a si lo ding thu a rak sim. Cu thluh in Mithiang Peter in patar cu LOVE (duhdawtnak) timi cafangkhom a relter. Patar a si si ih, cafangkom har cu a ti thei lo pang ah ti'n olte a sut hrim mi a si. Patar cun, “L-O-V-E” ti’n diktei’ cafang a kom thei ruangah vanram ah a lut ngah.

A thaisun ah Mithiang Peter in anih cu poipeng dang a um ih hmun dang feh a ttul ruangah a hung thleng thar pawl cafangkom hniksaknak rak tuah ding in patar cu a fial. Vanram sangka kiang ih hung thleng hmaisabik cu kum 40 sung a rak pom mi a nupi a si ti a hmuh tikah patar cu a thir dukdi thei. “Vanram ihsin kan lo hmuak, duhdawtmi. Ka lo hmuh cu ka lung a va awi ve. Cafangkom hniksaknak na paltlangh thei vete’n kumkhua in kan um tlang ding. A va nuam zik ve aw. Khah, na man maw? Czechoslovakia timi cafangkom in sim thei kem?”

Kuh Luar
Haa kuh (poh) le ha kuh an tong aw. Pakhattu in, "Rualpa cu na ha a va fuh ve," a ti.

Pakhattu cun rang emem in, "Nang fawh," a rak ti ve.
Papa Thotho
Nauhak pakhat in an innsung zukbawm a zoh rero. Tawkfang ah, "Tit khal ttheltthel, sam kir deuh pacang hi zo saw?" tiah a nu a hei sut.

A nu in, "Na pa a si kha," a ti tikah nauhak cun, "Cuti a si ahcun tui' kanmah thawi' um tlang, cal ngolh putar, thau engeng teh hi zo saw?" tiah a sut bet.

Ka Lo Zoh Thei Ko
Clinic (si-khan) pakhat ah nunau mawi zet pakhat a ra ih, mi pakhat rak to hnenah, "Nau hrinter thiam sibawi na si maw?" tiah a sut. Cu pa cun, "Ka si lo. Asinan ka lo zohsak thei ve ko," a rak ti.

Myanmar Post and Telecommunication (MPT)
Sibawi in mina hnenah, "Thuthang sia le thuthang ttha lo sim ding ka nei," a ti.
"Ziangmi si?"
"Cekfelnak ih a langdan in nazi 24 sung lawng na nung thlang ding"
"Maw Pathian!"
"Thuthang sia cu himi thu lo sim ding in ka lo phone rero nan line a tthat lo ruangah tu lawng ah ka lo phone ngah."

Hni Uar-o Aw (46)


Hni Uar-o Aw (46)



Mumal Lo
A buhsah memmem ka ti kherkher lo, asinan 'na rualpa in na nupi a ihpi hokhaw' ti ih an sim tikah inn ah a tlan tlung vurvo ih a nupi ihpitu cu reipi a va zoh cuahco. A zoh ttheh hnu ah thinheng zetin a kir sal vurvo ih cui thu a simtupawl hnenah 'mi bum nan va paih lawmam ve, ka nupi ihpitu cu ka rualpa a si lo rengreng' ti'n a va suahsalh hai.

Mawng Piang ih U
A ze filawr cuangmuar cu ka ti hran lo, asinan zan khat cu a mang ah vok rawl a rak pe ih, a thaizan cu a itthat ngam nawn lo.

Hnar Sau Thang
A hnar a sau ziarziar kan ti cuang lo, asinan a mit umnak a thuk luartuk men.

Ler Cungcuang
A ler tuk lawmam aw kan ti cuang lo, asinan 'mipa ka duhdawt dah mi umsun na si' ti ih ca a kuat mi hi minung zahnih an kim thlang.

Khawm Dah Lo
A khawm dah lo lawlaw ti ding lawmam cu a si lo, asinan kum 60 a ti kum ih a va khawm ve tikah 'kan kawhhran upa lakah ka khawm hmaisat deuh lai ih ta pakhat hman an um nawn lo ih a poi deuh si," a ti thei hramhram.

Aa Thla!
A nikhua lo tuk ka ti hran cuang lo, asinan TV parah to in tohkham a rak zoh cuahco a si cu.

Rukru Ngawlvei
Rukruk a hmang luarkai tuk lawmam kan ti cuang lemlo, asinan a riltepeng aat dingin zaiawknak ihkhun ih an ihter hnu khal ah amah zaitu ding sibawi ih paisabawm a rak ru man thotho a si cu.

Pawhte Fual
Khai fala kha a pawhte a fual maksak ciamco ka ti hran lo, asinan bawli a hruh lo i piang in  kut pali nei ah an ruat sual  ringring ttheu.

Siniar
Khai fala kha a siniar luar thlang a si ka ti hran lo, asinan a suahcam (birthday) hman a kum a cem zo (expire) ti a si.

Zu Heh
Zu a hehdan cu luarkai mangkheng tak a si ka ti hran cuang lo, asinan kum khat sungah ni hnih lawng zu a in; ni khaw tthat ni le ni khaw siat ni ah.

Lu Pawr
A lu a tum tuk ka ti hran lo, asinan lukham ah kahpathir an hmangter cing in a kuar khepkhep ringring.

Ringhlel
Kha nu kha a mumal lo tuk cu ka ti hran lo, asinan sibawi in 'na rai a si hi' ti a sim tikah 'sibawi, cu cu ka fa a si thei ngai kem?' ti'n a sut ruaro.

Ttawl
Kha nu khal kha a ttawl ttengtteng ka ti ciamco lo, asinan a sir zawng ih a din tinte'n a sungkuapawl in a um lo ah an ruat ih rawl an ei san ringring.

Duat Lo
An sungkua in an duat lo lawlaw vun ti ding cu a si hran lo, asinan an inn a dawt thumnak ihsin a tla ih a thisen suak in an varanda a balhter ruangah nasate'n an vua a si cu.
.........................