Bel Milem le Rulhreng

Bel Milem le Rulhreng
(Daniel Bung 14)

1 Siangpahrang Astyages cu a pupa pawl hnenih a feh hnu ah, a siangpahrangram cu Persia mi Cyrus in a run uk.

2 Daniel cu siangpahrang ih tthianrual a si ih Siangpahrang ih Rualpi pawl hmuahhmuah hnakin upat sunlawih a hlawh sawn.

3 Babylon mi pawl in Bel timi milem pakhat an nei ih, ni tinte'n sangvut ttha han ruk, tuu sawmli le sabitti bel ruk an pe ringring.

4 Siangpahrang in a ttihzah ih ni tinte'n be ding in a feh; asinan Daniel cun amai Pathian lawng a bia.

5 Siangpahrang in, "Ziangruangah Bel hi na be lo?" tiah a sut tikah, Daniel cun, "Kut ih tuah mi milem pawl cu ka be lo, van le lei sersiamtu le nunnak nei hmuahhmuah uktu Pathian nung lawng ka bia," tiah a sawn.

6 Cutikah siangpahrang in, "Bel hi pathian nung ah na ruat lo maw? Ni tin ih a ei le in mi tamzia hi na hmu lo maw?" tiah a sut peh.

7 Daniel cu a hni. Cule, "Bum in um hlah aw, maw siangpahrang, a sunglam ah tlak le a lenglam ah dar men a si khi; zianghman a ei a in dah lo," tiah a sim.

8 Cutikah siangpahrang cu a thin a heng ih, a puithiam pawl a kawh hnu ah, "Himi tirawl pawl eitu hi zo a si ti in sim thei lo ahcun, nan thi ding.

9 Asinan Bel in a ei ti nan langter thei ahcun, Bel a mualphoh ruangah Daniel hi a thi pei," tiah a sim. Daniel cun siangpahrang hnenah, "Na sim vekin si ko seh!" tiah a sim.

10 Bel ih puithiam sawmsarih an um ih, cumi ah an nupi le fanau pawl siar tel an si lo. Cule siangpahrang cu Daniel thawn Bel ih biakttheng ah an feh.

11 Bel ih puithiam pawl cun, "Nan mithmuh ah kannih cu kan suak ding. Maw Siangpahrang, rawl cu timtuah awla sabitti timlam aw; cu thluh in sangka khar awla na zunghruk thawn tacik khen aw.

12 Thaizing na ra kir tikah Bel in a rak ei lo ti na hmuh ahcun, kannih kan thi ding; cuti a si lo ahcun thuphan in puh ruangah Daniel cu a thi pei," an ti.

13 An thin a buai lo, ziangahtile cabuai hnuai ah zin thup an tuah ih cutawk ihsi ra lut in rawl cu an ra ei ringring ttheu.

14 An suah hnu ah siangpahrang cun Bel ih hmai ah rawl cu a ret. Culai ah Daniel in a siahhlawh pawl cu vutcam tthenkhat va la ding in a fial hai ih, biakttheng pumpuluk ah an phulh darh thluh. Cumi lai ah siangpahrang lawng a um. Cu thluh in a leng ah an suak ih, sangka an khar hnu ah siangpahrang ih zunghruk thawn tacik an khen ih, an ttiak hai.

15 Puithiam pawl cu an tidan kel vekin zan ah, an nupi le fanau pawl thawn, an ra lut ih ziangtinkim an ei an in thluh.

16 A thaizing zingpit te ah, siangpahrang cu Daniel thawn an ra.

17 Siangpahrang in, "Daniel, tacik pawl an siat maw?" tiah a sut. Daniel in, "Maw siangpahrang, siatsuah an si lo," tiah a sawn.

18 Sangka a on ngah vete'n, siangpahrang in cabuai cu a zoh ih ring zet in, "Na ropi a si, Maw Bel; nangmah ahhin bumawknak timi a um lo a si," tiah a au.

19 Asinan Daniel cu a hni ih siangpahrang cu a sung ah lut lo ding in a kham. Cun, "Zial hi zoh awla zo ih keneh pawl an si ti ruat hnik aw," a ti.

20 Siangpahrang cun, "Pacang, nupinu, le nauhak pawl ih keneh pawl ka hmu!" tiah a sim.

21 Siangpahrang cu a thin a ling ih puithiam pawl, an nupi pawl, le an fanau pawl cu a kaihkhih hai. Annih in cabuai parih um mi ei ding ah an ra lut ttheunak sangka thup cu an hmuh.

22 Annih cu siangpahrang in a that ih, Bel cu Daniel kut ah a ap. Daniel cun Bel le a biakttheng cu a siatsuah.

23 Babylon mi pawl in an biak mi rulhreng ropi pakhat a rak um.

24 Siangpahrang in Daniel hnenah, "Himi hi pathian nung a si ti na el thei lo ding, curuangah be aw," tiah a sim.

25 Asinan Daniel in, "Kei cun Bawipa ka Pathian ka bia, ziangahtile anih cu Pathian nung a si.

26 Maw siangpahrang, siannak i pe awla himi rulhreng hi nam simaw, funghreu simaw tel lo in ka that ding," tiah a sawn. Siangpahrang in, "Siannak ka lo pe," tiah a sim.

27 Cu thluh ah Daniel in kattaya tthenkhat, sathau le samphang a la; cumi pawl cu a suan rawi ih sang ah a tuah hai. Sang pawl cu rulhreng ih kaa ah a barh ih, rulhreng in a ei hai tikah, a puakdarh thluh. Daniel in, "Himi hi na biak mi a si hi," a ti.

28 Babylon mi pawl in cumi an theih tikah, an thin a heng ih siangpahrang cu an dokalh. Annih cun, "Siangpahrang cu Jew ah a cang zo; Bel a siatsuah zo, rulhreng a that ih, puithiam pawl a that hai," an ti.

29 Siangpahrang hnenah an feh ih, "Daniel kha kan kut ah in pe aw, in pek lo ahcun nangmah le na innsang kan lo that ding," tiah an normawh.

30 Sualralnak thawi' hrinhro a tong ti a hmuhawk tikah, siangpahrang in lo theih lo dinhmun in Daniel cu an kut ah a pe hai.

31 Annih in Daniel cu kiosa puk ah an hlon ih, cutawk ah ni ruk sung a um.

32 Puk sungah kiosa pasarih an um. Ni tinte'n rannung ruak pahnih le tuu pahnih an pe ringring nan, tu ahcun Daniel an ei theinak ding ah, zianghman an pe lo hrim.

33 Profet Habakkuk cu Judea ah a um. Kheng pakhat ah sang tthenkhat a retkhawm ih a suan mi buber thawn, lo sungih fang attu pawl va pe ding ah a feh.

34 Culai ah Bawipa ih vancungmi pakhat in, "Na neih mi rawl kha Babylon ram ah kiosa puk sungih a um mi Daniel va pe aw," tiah a sim.

35 Asinan Habakkuk in, "Bawipa, Babylon cu ka hmu dah lo ih, puk umnak khal ka theih ual lo!" a ti.

36 Bawipa ih vancungmi cun a lu in a kaih ih, a samtuk in a thiar; thli tluk ih cak in a fehpi ih, Babylon ram ih puk tlun ah a va tthum.

37 Habakkuk in, "Daniel, Daniel, Pathian ih a lo kuat mi rawl hi rak la aw," tiah a auh.

38 Daniel in, "Maw Pathian, nang cun i cingkeng, nangmah a lo duhdawttu cu na ngaihthah lo a si hi," a ti. 

39 Cutin Daniel cun rawl a ei, asinan Pathian ih vancungmi in Habakkuk cu voi le khat ah a umnak hmun kel ah a thiar thleng lohli.

40 A ni sarihnak ah siangpahrang cu Daniel ttah ding in a ra. Puk a ra thleng ih a vun zoh tikah, a sungih rak to lai Daniel cu a hmu.

41 Cutikah siangpahrang cun ring zet in, "Na ropi a si, Maw Bawipa, Daniel ih Pathian, nangmah lo cu Pathian dang an um lo!" tiah a au.

42 Daniel cu puk sung ihsin a suahter ih, Daniel siatsuah duhtu pawl cu puk sungah a hlon hai. Annih cu amai mithmuh rori ahcun kiosa pawl in camkhat te ah an rak ei thluh hai.

Daniel cabu ih himi bung hi Greek ttong le leh sawng mi ttong pawl lawng in a um. Asinan Hebru simaw, Aramaic simaw ih ngan hmaisat mi khal a si thei men. Hebru-Aramaic ttong ih ngan mi Daniel cabu ah himi bung hi a tel dah lo. Herbru Bible khal ah a tel dah lo. Protestant ih Cathianghlim cuailung (canon) ahcun himi bung hi hlon a si. Asinan Catholic Kawhhran cun thawtkhum mi nganca pawl lakah tlaitluan in a telh. Kawhhran hmaisa in Bible ih a rak hman mi Septuagint ahcun himi bung hi a tel ve. Kan theihnak kautertu pakhat a si thei ding beisei ih run tarlang mi a si.

Hram: New American Bible (revised edition) ttansan in, King James Bible thawn zoh ttawm phah ih leh mi a si.