Ziangruangah Uico hi Minung Rualpi ah A Cang?

African Thuanthu Roling (34):

Ziangruangah Uico hi Minung ih Rualpi ah A Cang?

Hlanlai ahhin Sehal le Uico hi rualpi an rak si ih hramrul lakah an rak um. Ni tinte'n ram an tawi tlang. Siimlam ah an ra tlung ih rawl an ei tlang. Asinan ni khat cu an ramtawih an hlawhsam ih rilrawng zet in an ra tlung. Hrampi lak ahcun thli dai zet a hrang fawn.

Uico in, "Aw, khawsik le rilrawn tuar kop cu a va har ve!" a ti.

Sehal in, "Ihthat aw. Zinglam a ra thlen tikah ram kan tawi sal ding ih zukneng no kan kai ding si lawm," a ti.

Asinan Uico cu a itthat thei lo. Tawkfang ah hlapi ih um mi tleu sen pakhat a um.

"Sehal, khitawk ih tleu sen khi ziangmi si?" tiah a sut.

Sehal cun, "Khitawk ah khawte pakhat a um ih tleu sen khi pacang pakhat ih meisa a si," a ti.

Uico cun, "Meisa cu a hlum ih, hitawk cu khua a sik. Sehal, meisa na va cawng thei pei maw? Nang na ral a tthat zet kha!" a ti.

"Aih, aih, ka va cawng lo ding. Na duh ahcun nangmah na va cawng thei ko."

Uico cun minung pawl a ttih ruangah a va cawng ngam ve lo.

Asinan, "Meisa kiang ah sa ruh tthenkhat an um ding ti a fiang. Cumi cu ka ei thei. Meisa a hlum nuam tuk ding fawn!" tiah a ruat. A ril a rawng ih a khua a sik tuk fawn. A rilrawnnak le a khawsik cun a ttihhrutnak an hngilhter ih, "Meisa va cawng ding le saruh tthenkhat va thiar ding in khawte ah ka va feh ding. Ka ra kir lohli lo asile, zangfahte'n Ba-o, Ba-o ti'n ra ai aw! Cutikah na umnak ka thei ding ih ka kir sal tengteng a ttul ti khal ka thei ding," tiah Sehal cu a sim.
Cutin Uico cu khawte ah a va feh. Meisa kiang ah deuthlam pakhat a hmu. Deuthlam kiang ah sa ruh tthenkhat a hmu. Uico rilrawng hrangah sa ruh pawl cu an thaw zik tuk lawmam! Curuangah sa ruh umnak lam a va pan. Asinan deuthlam ihsin pacang pakhat a ra suak ih Uico cu a hmu. Uico cun a ttih tuk ih, "Zangfahte'n i that hram hlah aw! Uico rethei ka si ih meisa hlum ai ka duh. Ka khua a hlum cun hramrul lak ah ka kir sal ding," tiah ttap phah in a dil.

Pacang cun, "A ttha tuk. Meisa kiang ah na to thei. Asinan na khua a hlum ngah cun hramrul lakah na kir sal pei," a ti.

Uico cun lungawithu a sim ih meisa kiang ah a to. A lung a awi hngin. A khua a hung hlum ih, a hnar hnuai ah sa ruh tumpi a um fawn. Cui sa ruh cu a ei. Tawkfang ah pacang cu deuthlam ihsin a ra suak ih, "Na khua a hlum hrih lo maw?" tiah a ra sut.

Uico cun, "Hlum hrih lo," a ti. Ziangahtile hla tuk lo ah sa ruh dang a hmu ih ei bet a duh. A rei hlan ah pacang cun, "Na khua a hlum hrih lo maw?" tiah a ra sut sal.

Uico cun, "Zangfahte'n malte cu i umter hrih ko aw. Ka khua a hlum ngah ciah lo," a ti.

Tawkfang ah pacang cu Uico hnenah a ra. Uico cun pacang ih mit ah zoh phah in, "Tu ahcun ka khua a hlum thlang. Asinan hramrul lakih kir sal ka duh nawn lo. Khitawk ahcun khawsik le rilrawng ih ka um can a tampi. Zangfahte'n khaw sungah hin na hnenah i umter hram aw.  Hramrul le hramlak ih vate le ramsa na pel can ah ka lo bawm ding. Nang in ei ding ah sa ruh tthenkhat i pe ve ttheu ding," a ti.

Pacang cun, "Si ko. Ka hnenah na um thei," a ti.

Cumi ni ihsin Uico cu minung hnenah a um. Tu ahcun, zan ah Ba-o, Ba-o ti ih Sehal ai-awn na theih tikah, a hnenih kir sal ding in Uico a kawh mi a si ti na thei thlang. Asinan Uico in a sawn dah lo ih Sehal cu hramrul lakah amahte'n a um ringring.

Hram: Why is the dog a friend of man? –African Folktale.