Ziangruangah Mu in Arte A Thiar Ttheu?

African Thuanthu Roling (33):

Ziangruangah Mu in Arte A Thiar Ttheu?

Vei khat lai ahhin Ni in Mu hnenah, "Sumpai mallai ka ttul. Zangfahte'n i cawih hram aw. Rei lo te ah ka lo rul sal ding," a ti. Mu cun Ni cu sumpai a cawih. Zarh khat a liam. Thla khat a liam. Asinan Ni cun paisa a rul sal cuang lo. A netnak ahcun Mu cun Ni cu leiba va cawh a tum.

Van sangpi ih Ni a um lai ah a hung feh ih, "Leiba rulh ding mallai i nei ti na cing lai maw?" a hung ti.

Ni cun, "Aw, thei e. Asinan tu ahcun van ah ka um ih ka paisa cu inn ah a um. Inn ih ka um can ah ra awla leiba cu ka lo pe ding," a ti.

Mu khal in, "Awle," a ti ih a tlung.

A thaizing ah Mu cu Ni hnenah a va feh nan a tlai tuk. Ni cu van ah a rak kai zo. Mu cu Ni ih inn ah vei tampi a feh rero nan Ni cu inn ah a rak um dah lo.

Ni khat cu Ni ih inn lam a pan lai ah a rualpi Arcang a tong. Arcang cun, "Ziangruangah ni tin rori Ni hnenah na feh?" tiah a sut.

Mu cun, "Reipi liam zo ahkhan sumpai mallai ka cawih ih i rul sal hrih lo. Van ih a kai hnu cun inn ah a paisa a vung lak thei lo thu i sim. A inn ah ka tong ngah dah fawn lo," a ti.

Arcang in, "Ka lo bawm thei. Ka hnenah riak aw. Ni hnakin ka tho zing sawn ringring. Zingpitte'n ka lo tthang ding ih Ni hnenah va feh lohli in na paisa cu na ngah sal thei ding," a ti.

Curuangah Mu cu Arcang hnenah a riak. Zingpit ah Arcang cun, "Ti-ti-i-ik! Ti-ti-i-ik! Tho thlang aw, Mu! Ni hnenah va tlan lohli aw! Tu ahcun inn ah a um. Van ah a kai hrih lo!" a ti.
Mu cu a tho ih Arcang hnenah lungawithu sim in Ni hnenah a va feh.

Ni cu inn ah a rak um. A ihthat lai.

Mu cun, "Zing ttha, Ni! Na thawh a cu thlang. Ka paisa ngah sal ding in ka ra thleng a si hi!" a ti.

Ni cun, "Zing ttha. Tuvek zingpit tuk ah ra ding in zo in a lo sim?" tiah a rak sut.

Mu cun a sawn lo.

Asinan Ni in, "Na paisa ngah sal na duh ahcun, zing tuk ih lo ratertu hi i sim tengteng a ttul," a ti.

Cutikah Mu cun, "I ratertu cu Arcang a si," a ti.

Ni cu a thin a heng zet ih, "Tu ahcun ka leiba cu Arcang in a tesinfa hmang in lo kuan seh! Tu ihsin Arcang ih fa hmuahhmuah cu na ta an si!" a ti.

Curuangah cumi ni ihsin Mu in arte pawl a thiar ttheu.

Hram: Why does the hawk carry off chickens? – African Folktale.