Nui' Ni

Nui’ Ni (Mother’s Day)

Naute a piansuah caante ah, Nu khal a piangsuak ve. - Rajneesh

Jew pawl ih thufim ah, “Pathian cun hmun tin ih a um thei lo ruangah a aiawhtu ding ah nu a sersiam,” tiah a um. Himi thufim hi kan Khristian thurin thawn rem aw lemlo vekin lang hmansehla nui’ sunlawizia a phorhsuak fuh nasa. Nu an sunlawizia, duh an nunzia, an poimawhzia, tivek thuhla khal mifim mithiam tampi in bezai an phuah, ca an ngan, hla an phuah in, an sim an phuang ttheu. Leitlun minung in kan lungawi caan ah siseh, kan riahsiat caan ah siseh, kan lunglen caan ah siseh, kan salsuah tambik mi ttongfang cu “Nu” timi hi a si. Mai’ Nu a duhdawtlotu cu a thinlung sungah duhdawtnak zilthli fim a leng dah lo tinak a si. Curuangah Jill Bennett khalin, “A nu a duhdawtlotu cu nupi/pasal ah va tthi hlah, huatnak thawn net a lo kharpi ding,” a rak ti.

Kan theih lar emem mi ttongkam pakhat cu D. L. Moody ih ttong mi, “Ka nu vek hlir hi mi hmuahhmuah in nei hai sehla leitlun ahhin thawnginn a ttul lo ding nan,” ti hi a si. “Nui’ nau-sepnak kut in leitlun a uk,” tivek le, “Nu i pe hnik uh, anmah hmangin leitlun ka thleng danglam ding,” tivek ttongkam pawl hi ziangruangah mifim pawl in an rak ttong ti cu kan thei ttheh ko ding. R. W. Emerson in hitin a simfiang: “Minung pawl cu an Nu pawl ih sersuahdan ih um an si,” tiah. Minung hringnun hrangah Nu hi an poimawh zet ih, cui’ an poimawhnak tak cu an sunlawinak khal a si cih. H.W. Beecher in, “Nui’ thinlung cu nauhak ih tlawnginn a si,” a rak ti. Nui’ ttang sung ngaingai ih kan um caan hi rei lo te vekin lang ttheu hmansehla a tang lai mi kan hringnun hmuahhmuah ih pianzia hmelhmang rung um thoknak a si ih a poimawh zet. Nu cun a kut ih in pom nawn lo hnu khalah a thinlung in in cawi ringring a si.

Cutluk ih a khungkhai mi ttuanvo ttuansuak thei dingah minung ih tumtahnak zaran men in a ngah lo. Curuangah Sersiamtu in nui’ pum sung ih nau a um vete’n cem thei lo mi a duhdawtnak kha nui' thinlung ah a tuhlut ve si awmtak a si. James Joyce phei cun, “Hi leitlun rimse hiamhiam lakah zianghman hi rinsan tlak an um lo, nui’ duhdawtnak lo cu!” a rak ti hngehnge. Nu cu fa le pawl hrangah a cem thei lo mi ngaidamnak neitu an si fawn. Jew pawl thufim in, “Nu cun a fate in a relsuah thiam lo mi khal a theithiam,” a ti bangin kan retheih zonzaihnak phunkim in theihthiampi ttheu. Kan lungawinak in ttawmpi in kan riahsiatnak in tuarpi ttheu. T. De Witt Talmage ih ttongkam hi a dik tuk lawmam: “Nu cu kan hriamhma pawl le kan thlaphannak pawl kan khawlkhawmnak ban (bank) a si,” a rak ti. Ziangahtile, “Nu timi cu nauhak te pawl ih hmur le thinlung in Pathian an kawhnak hmin a si,” ruangah a si (W. M. Thackeray).

Curuangah te le fa pawl in Nu sunlawih ding hi kan ttuanvo thupi zet a si. Nui’ duhdawtnak le an lamhruainak hmuthiamtu kan si a ttul rual in cumi parih lungawinak cang thiamtu kan si khal a poimawh. Sarah Malin cun a nui’ hnenah, “Nu, pom ka ttul caan tinte’n na tang cu a ong aw ringring. Zirh ka ttul caan ah na mitmen nemte cun in khuahkhirh ttheu. Na thazang le na duhdawtnak in zuannak ding thla le zuandan in zirh,” tiah lungawithu a rak sim. Cubangin Abraham Lincoln khal in, “Ka nui’ thla in camsaknak in ka dung in i thlun ringring. Ka dam sung in ka hnenah in cencilh. Ka sinak le ka si thei lai mi hmuahhmuah hi ka nui’ hnen ihsin ka ngah mi, sam cawk rual lo leiba a si,” a rak ti ve.

Thinsau zet ih fanau pawl kaihhruai lam ah nu tluktu an um lo. Nu cun fanau sualral zet an neih khal ah thinsaute’n an tthat leh ding caan an hngak ttentto thei. Augustine a pianthar theinak dingah a nu Monica in kum 25 sung lai thla a rak camsak ringring. Curuangah Oliver Wendell Holmes in, “Par lai an cuai, duhdawtnak khal a vuai, rualtthatawknak thinghnah khal an ttil; Nui’ ruahsannak thuthup lawng a cuai dah lo,” tiah a rak ti. Cumi ruahsannak thuthup, beidong thei ve lo, cun minung hringnun a cawisang ttheu. Nui’ thinlung sungih ruahsannak thuthup cu a fa le thawi’ an pehzomawknak cat dah lo ihsin a fanau pawl hnenah a luanglut ttheu a si.

Mi pakhat cun, “Minung cun a ngaizawng cu a duh bik, a nupi cu a thiamtawk ih ttha bik in a duhdawt ih, a nu cu a ttul bik mi le a duhdawt rei bik mi a si,” a rak ti. Cumi ruangah nui’ ruahsannak thuthup cu fanau pawl in ziangtik ni ah simaw cun famkimter leh duhnak an run nei sal theu. Curuangah Nu hi minung nunram remtthatu tthabik an sinak a si. Curuangah a si ding, Chinese canganthiam Lin Yutang in, “Nunau pawl canvo hmuahhmuah lakah Nu si theinak hi a ropi bik a si,” a rak ti.

Cutivek ih sunlawihtlak Nu pawl sunlawihnak Ni hi ziangtin a ra suak ti vun zoh kir sal sehla. Hlansan Greek pawl cun Greek thuanthu sungih an khuavang pathian tampi ih nu Rhea sunlawihnak ah tthal-tir tinte’n puai an rak tuah ttheu. Rhea hi Greek khuavang pathian pawl cithlahtu, khuavang pathian cungcuang pawl lakih pakhat a simi, Cronus ih nupi a si. Roman pawl khal in Khrih suah hlan kum 250 hrawngah an pathiannu Cybele sunlawihnak puai cu tthal-tir ah an tuah ttheu. Cui puai cu Hilaria tiah an ko. Khristian pawl khal in Ni-serh 40 (Lent- Thosal Puai hlan ni 40 sung) ih Cawlhni vei linak ah Hnahkhat Mary (Virgin Mary) sunlawihnak an rak tuah ttheu. Himi pawl zoh tikah Nu sunlawihnak timi hi minung pawl thinlung ah hlan laipi ihsin umter duhnak a rak um zo si in a lang. Tui ni ih kan hmandan thawn a bang aw lo deuh ti thu men a si.

Tuini ih kan hman mi Nu pawl sunlawihnak pianhmang in hmuihmel a rung neihnak hmaisabik cu England ah a si. 1600 kum pawl ah Ni-serh 40 ih Cawlhni vei linak ah Hnahkhat Mary upatnak thlacam khawm an nei ttheu. Cumi ttheh in nauhak pawl in anmai’ nu cio upat-sunlawihnak laksawng le pangpar an pe hai.

Khatlam ah, Nui’ Ni hi cozah nipini ih cang dingin a rak zuam hmaisabiktu cu Julia Ward Howe a si. Anih hi United States (America) ram, New York khawpi ah 1819, May 27 ah a suak. Julia hi bezai nganthiam, canganthiam le zatlangnun hrangih cangvaihnak lam uar mi a si ih "Battle Hymn of Republic" timi hla hminthang phuahtu khal a si. Nu pawl sunlawih an ttulzia thuhla a ngan in a simphuang rero ttheu. Nui’ Ni hi cozah nipi si dingih a rak zuamthawknak cu 1872 kum ah a si. Anih cun Nui’ Ni hi June 2 si dingin a rak hril. A ni a hril mi cu  hlawhsam nan a ruahnak cu a darhzai vivo. Julia hi October 17, 1910 ah a thi.

Leitlun ram tampi in kan hman ttawm mi Nui’ Ni, May zarh hnihnak nipini run norsuaktu cu Anna Jarvis a si. Anna hin a dam sung hmuahhmuah ah pasal-fanau a nei lo nan leitlun mipi pawl in amah sunlawihnak ah Nui’ Ni ih Nu (The Mother of Mother’s Day) tiah an ko. Nui’ Ni tuahsuak dingin Anna rak thawtkhumtu cu a nu Mrs. Anna Marie Reeves Jarvis a si. A nu in Nu pawl sunlawihnak Ni um ding a duh thu, le mi pakhatkhat in cumi um dingin run zuam hai sehla ti a ruahsan thu, a thlacamnak ih a telhmi cu kum 12 mi Anna cun a rak thei. Cumi cu a hung upat hnu khalah a hngilh thei lo. Anna hi unau hleikhat lakih a pakuanak si dingin West Virginia ramkulh, Taylor County hmun ih Webster khua ah May 1, 1864 ah a rak suak. A pa cu Granville Jarvis a si.

1905 ah Anna ih nu a thi. Fanu duhnung Anna cun a nui’ sunmang cu a hngilh lo. Cuti’n Nui’ Ni um suak dingin a zuam. Mipi hnenih simphuan lawng duhtawk lo in cozah thuneitu pawl hnen khalah ca tampi a kuat. Nui’ Ni cu cozah theihpi mi si thei dingin a rualpi pawl thawn an zuam. Amah Anna khalin 1908, May 10 ah West Virginia, Grafton khawpi ih Andrews Methodist Episcopal kawhhran ah nu pawl sunlawihnak ah ti’n, a nui’ duh bik mi Carnations pangpar (ေဇာ္မႊားပန္း) 500 a kuat. A hmai kum ah Carnations pangpar 10,000 a kuat lala. Anna cun Carnations pangpar cun nui’ duhdawtnak thianghlim a hmuhsak tiah a ti.

Anna cu bawmtu dangdang a nei vivo. Nui’ Ni thuhla khal a darhzai vivo ih, 1911 hrawng ahcun US ih ramkulh tampi ah Nui’ Ni an hmang zo. Cutin, May 8, 1914 ah US President Woodrow Wilson in May Zarh Hnihnak Cawlhni cu Nui’ Ni si dingin nemhngetnak hminsen a kar. Carnations pangpar khal Nui’ Ni ih hman hleice mi pangpar (official flower) ah a rung cang. A tlangpi in Carnations pangpar rong sen cu Nu nungdam lai hrang, a var cu Nu mualliam zo hrangah an hmang deuh. Nu nungdam lai pawl in Carnations pangpar sen cu an lu ah an ton, an kor zalte ah an thiat ih, an nu pawl Carnations pangpar an pe ttheu. Nu mualliam zo pawl in Carnations pangpar var cu an lu ah an ton, an kor zalte ah an thiat ih, a tthen cun khawmnak ah an keng ttheu. Asinan himi hi a tlangpithu deuh in a si. Nui’ Ni ih hman hleice mi pangpar dang pawl cu rong cawhrawi pangpar tom, daffodils, rose, tulip, freesia, pot chrysanthemums, iris, lily, ioliage plants tipawl an si. Miss Anna hi kum 84 dam in, 1948, November 24 ah a thi.

Nui’ Ni hmandan hi bang aw lo tete khal a um. Tui’ kan hman ni vek, May Cawlh Hnihnak hi U.S, Australia, Belgium, Brazil, Canada, Denmark, Finland, Germany, Greece, India, Italy, Japan, New Zealand, Singapore, Turkey tivek le ram dangdang ah an hmang. South Africa ram tam sawn le Bahrain, Malaysia, Oman, Pakistan, Qatar, Saudi Arabia le U.A. E ram pawl cun May 10 ah an hmang. Cun, Albania (March 8), Russia (November 28), Poland (May 26), Indonesia (December 22), Egypt (March 21), Norway (February 13) tivek ih hmang khal an um ih, Thailand ahcun Siangpahrangnu Sirikit Kitiyakara ih suahcam August 12, Sweden cun May Cawlhni neta bik, Norway cun February Cawlhni Vei Hnihnak tivek khal in an hmang. Austria, Hong Kong, Netherlands, Taiwan, Hungary, Portugal, South Africa, Spain pawl ah May Cawlhni Vei Khatnak ah an hmang fawn. Cu lo khal hman ni danglam tete an um phah.

Tu ah Nui’ Ni hi leitlun ram 46 lenglo in cozah theihpi in an hmang. A ni cu a va bangawk lo hman ah Nu sunlawihnak ni a si ruangah an sunglawi ttheh ko. Sunlawihtlak sunlawihnak cang thiam hi fim phunkhat a si kan ti ttheu kha.

Kan lam ahhin Nui’ Ni siseh, Pai’ Ni siseh kawhhran theihpi in kan hmang ttheu. Kawhhran in simaw, mibulpak in simaw Nu siseh, Pa siseh sunlawihnak thilpek tivek kan pe ttheu. Asinan CE Department asilole Sunday School Nauhak pawl in caan an la dah lemlo. Miphun dang pawl tidan thawn kan tidan a bang aw lo deuh in a lang. Kan tlin lo ruangah tla  a  si thei. Nauhak te pawl in Nu le Pa kha sunlawih in thilpek (pangpar, thilri tivek) pe ve hai sehla, caan ziangziang simaw tla luah ve hai sehla,  a ttha ding a bang. Ram dang le hnam dang tidan ahcun, Nui’ Ni siseh, Pai’ Ni siseh, fa le pawl in an Nu asilole an Pa an sunlawih ni, an nu le pai’ pual ih rawl-eikhawmnak an tuah ni asilole laksawng phunphun an leih ni, an pek ni a si deuh. Fa le pawl in  nu le pai’ hnenih lungawithu an sim ni a si deuh. Nui’ Ni/ Pai’ Ni ih mai’ nu le pai’ hnen thleng remcang thiam lo pawl hman in an nu le pai’ hnenah card mawi zetzet  asilole thilpek an kuat ttheu a si. Kawhhran khal in a hleice in service a nei ding cu a si ko. Asinan cumi in fa le pawl ih ttuanvo kha a sawng a si lo, a ai a awh khal a si fawn lo. A si lo bikin CE Department in pangpar tal timtuah sehla a tthat a zum um. Sunlawihdan kalhmang theih tla hi fim phunkhat thotho cu a si ve fawn.

Siang Lian Uk Kianghrol
25.4.2011