Kan Ttul Thluh Ko Lo Maw?

Kan Ttul Thluh Ko Lo Maw?

Dawr tumpi hmai ah ding in ka mawttaw ka hnul rero. Mawttaw kholhnak ihsin ka ra thleng ciah ih, hnattuan feh ding in ka nupi ka hngak phah. Mawttaw retkhawmnak hmun ihsin ka umnak lam pan ih ra mi pakhat cu kan senpihlawm in mi vakvai ti ih kan ruah ding mi hmuihmel keng a si. 

Amah zoh men ihsin mawttaw nei lo, inn nei lo, thuamhnaw thiangfai nei lo, le sumpai nei lo a si ti theih a theih cih. Can tampi ah na tirhsian zet cang a um ding rual in, hnaihnoktu neih na duh lo cang khal a um ttheu ko ding. Cumi ttum cu ka hrang ahcun hnaihnoktu neih ka duh lo laifang a si.

"Paisa i dil lo kei cu maw," tiah ka ruat. I dil lo tho. A ra feh ih bus cawlhnak kiang, zinpi kiang ih tuah mi thirtluan parah a ra to. Asinan bus to man pek ding daih paisa hman a neih hmel lo.

Minute malte rei hnu ah a run ttong, "Na mawttaw cu a mawi zet ual," ti'n. A ttophnok zet nan a aw ahcun zahumnak awn a um. A khabe hmul sau hraw hrephrep cu a hmai hlumtertu men hnakin sullam an nei tam.

"Lungawi" tiah ka sawn ih, ka mawttaw cu ka hnul peh. Hna ka ttuan lai ah cutawk ahcun daite'n a to. Paisa i dil hmang ding ti ih ka ruah mi asinan dil ti i nei ta lo. Kan karlak ih awn-ai a um lo rei vivo rual in ka sunglam ihsin, "Bomnak a ttul le ttul lo sut aw," titu nei in ka thei aw. "Aw" a ti ding ti ka fiang ko nan, ka sunglam ih au-aw cu a tak ih canter in, "Bom ttulnak na nei maw?" tiah ka sut.

Anih cun, ka hrang ih hngilh theih rual si nawn lo ttongkam, a tluangtlam nan a ropi zet mi ttongfang paruk hmang in i sawn. Vei tamsawn cu mi ropi pawl hnenah fimnak kan hawl ttheu. Zirnak sangsawn le hlawhtlinnak sangsawn neitupawl hnen ihsin fimnak ngah kan beisei. Kei khal in cu pai' hnen ihsin kut bawrhbah i rak san ding bak cu ruahsan mi ka nei lo. Cu pa cun ka thin i tthongtu ttongfang paruk a run ttong: "Kan Ttul Thluh Ko Lo Maw?"

Cui ttongfang paruk in ziandawng hleihnih thun theih meithal kah vek ih i kah hlan ahcun, lamzin par ih mi vakvai men hnak cun ka cungcuang in thil ka ti thei, ka hlawhtling in ka thupi deuh, tiah ka rak ruat aw. Asinan bomnak cu "Kan Ttul Thluh Ko Lo Maw?" 

Kei khal in bomnak ka ttul. Bus to man asilole ihthahnak hmun hrang ahcun bom ka ttul lo men thei. Asinan bom cu ka ttul thotho. Ka paisabawm ka pur ih bus to man lawng si lo in rawl hlum-sa leinak ding le ni khat sung beunak ding man daih ka pe. Tu tiang in cui' ttongfang paruk cu an dik ringring lai.

Source: "Don't We All" – Christian Life Stories