A fek mi duhdawtnak

A fek mi duhdawtnak

Mizansun cu ka papa thawn pangpar hmuan ah kan feh. Ka papa le kei cu a liam zo mi kan can hmuahhmuah ah nai aw te'n kan nung. Taktak ahcun "Papai' fanu duatte" timi cazin ah tuini tiang in ka um lai. Zarh khat ah a malbik vei khat tal cu ka pasal le kan fanaupawl thawn pangpar hmuan ah ka pa kan tong ttheu. Nauhakpawl cu lek ding in kan thlah ih, kannih cu thuhla tinkim kan titi tlang ttheu.

Ka pasal thawn company pakhat ah hna kan ttuan tlang. Asinan bank lam harsatnak a thlen ruangah kan hnattuan kan hloh. Cam khat sung cu kan nunram a hung har cuarco. Inn san man, mawttawpawl hrang cemliam, nauhakpawl hrang cemliam, le thil dang ttul mamawh mi pawl in kan rak khawl mi sumpai zate'n an dawk thluh ruangah, cozah bombawinak tthenkhat tiang in kan lak a ttul phah. 

Cumi ni, pangpar hmuan ih kan to lai ahcun ka papa cun a jacket sungih ca-ik pakhat a hun phorh ih i pe. Ziang a si ti theih hiar zet ih ka zoh. Ka nu le pa hi milian an si lo. An dam sung in hnattuantu zaran men an si ve. Ca-ik cu ka ong ih a sungah ca pakhat a rak um.Ca cu bank ca a si. Ka papa cun cumi zoh ve phah in, "Duatte, harsatnak nan tong ti ka thei, asinan himi hi na thiamlonak ruangah a si lo. Na nu thawn kan ronawk hnu ah, tu ahhin na co ding mi ro lo pe cih mei sehla a ttha ding tiah kan ruat. Nan sungkua in kan lo duhdawt ih, rehter theih a si ahcun nan pahnih le kan tu pawl ih tuarnak hi hmuh kan duh lo," tiah in sim. 

Ka nu le pa in ka suahthlak ihsin ka hrangah sumpai an rak khawl ti ka rak thei lo lawlaw. Ka pa cun check pakhat, bank ca, le kutngan ca pakhat i pe. Check cu dollar 200,000 lenglo hrangah a si. Bank ca cu cui' paisapawl keimai' hmin ih tthawnnak ca a si ih, kutngan ca ahcun, "Ka fanu duatte cu ka ngaihsak ringring ding," timi a ngan aw.