Duhdawtnak Cakuat

Duhdawtnak Cakuat

Duhdawtmi Ka Rual:

Na dam ttha maw? Himi ca ka lo kuatnak san cu ziangtluk in ka lo duhdawt ih, ziangtluk in ka lo sunsak timi ka lo sim duh ruangah a si. Mizansun ih na rualpipawl thawi’ nan veivah lai kha ka lo hmu. Ka hnen khal ah na rat ve ruahsannak thawn sunvu in ka lo hngak. Simlam a nai tikah, na hman mi ni khat cemter lawk ding in nitlak ka lo tuahsak, ih na hahdam theinak ding ah zilthli dai thiang ka lo pe. Cu thluh in ka lo hngak. Asinan na ra dah lo. Si ko, ka thin cu a na zet, asinan ka lo duhdawt lai thotho. Ziangahtile na rualpi ka si ruangah a si.

Mizan ih na ihthah lai khal ka lo hmu. Na cal run dai ka duh ruangah na lukham le na hmai run tlet ding in thlapi ka vanter. Cuihnu ah thu kan reltlang thei lohli duh in ka lo hngak sal lala. Na hrangah laksawng tampi ka nei.

Asinan zinglam ah na qhang tlai ih, ni khat hrangah na hmanhmawh ciamco. Ka mithlipawl cu ruahpi lakah an tla ve. Tuini ah na riah a siat hmel zet. Nangmahte’n na um a har zet. Khavek dinhmun kha ka theihthiam ve ruangah na tuarnak in ka thin a natter ve zet. Ka rualpipawl in in thlauthla in ka thin in natter ve ttheu, asinan ka lo duhdawt. Ka lo duhdawt thu hi hrampi hring a phah aw mi hmun daireh ih na um lai khal ahkhan lo sim ngah ka tum. Thinghnahpawl le thingkungpawl ah ka lo duhdawt thu hi dimte’n ka rel, pangparpawl ih rawng mawinak pawl ah ka tarlang. Tlang par ihsin a rung luang mi tiva awn pawl ah ka au ih, vatepawl ih sak ding khal ah duhdawtnak hlapawl ka pe. Nitleu hlum thawn ka lo tuam ih, na hawp mi thli khal ah rimhmui ka thlah.

Ka lo duhdawtnak hi tifinriatpawl hnak in a thuk sawn ih na qulhainak asilole na tumbik hnak khal in a tum sawn. Vancung ah kumkhua timi kan hmang tlang ding. Leitlun cu ziangtluk in a har timi ka thei. Ka thei taktak (ziangahtile ka rak um dah ve) ih, ka lo bawm duh. Ka Pa khal in a lo bawm duh ve.

Ka Pa khal a lo bawm duhtu a si ti na theih ka duh. I ko aw, I dil aw, I be aw. Cumi cu nangmai’ thutluknak tuah ding mi a si. Ka lo hril zo, curuangah ka lo hngak ding.....Ziangahtile ka lo duhdawt ruangah a si.

Na Rualpi,

Jesuh

Sirhsan: Christian Life Stories ih “Dear Friend” a remdan ih leh-her mi a si.