Hmuihmel Langdan le Ttuantheinak

Hmuihmel Langdan le Ttuantheinak

(Himi ca ngantu Yang Lan hi Tuluk ram ih TV programme kaitu hminthang, thuthang palai hminthang, Talk Show kaihruaitu hminthang a si).

1995 kum Thlatang ahkhan hnattuan hawl hmu thei lo sehla cun beidong thinhar in mai’ khua le ram ih tlun men bak cu hril ding dang ka rak nei lo ding.

Ziangahtile hnon ka tong lala. Tonsuhnak in tuahtu ih mithmai zoh in ka thinhengnak puakkuaiter thluh ka hiarl. Ka hmuihmel umtudan le ka zirsuahnak an mil aw lo a ti hnu cun ziang thu dang hman i sut bet nawn lo.

Ka ceiawkdan cu lu kun in ka vun zoh. Ka hnipuan hruhdan ruangah a si ti a lang. Cumi zoh in I ngainep a rak si. Ka tuahttuan theinak hmang in I ngainepnak cu ka tthiatbal thei tiah ka tiamkam ngam. Asinan ka tuahttuan theizia langter theinak canvo ka rak ngah lo.

Ka inntek nu Selena cu dan nei khimkhuah zet, mi rorum, damkum lailak hrawng a si. Zan nazi 12 kim hlan ih ka ih a ttul tiah I bikhiah. Minute hra sungah bualawk ttheh ding, hnipuan felfaitei’ hruh lo cun a mileng pindan ah lut lo ding, a coka mawi zet ah kei ih Tuluk rawl suan lo ding, a mikhualpawl an ra len can ah hmursen si ka hnih a ttul tivek tiang in a bikhiah thluh.

Selena vek ih dan nei khungkhai English nunau hi ka hua zet. Asinan inn santupawl lakah Selena hi inntek tthabik a si tiah mi tin in an sim.

Khuitawk zawn ah a ttha ti ka hmu ngah thei lo. Vun rel men sehla, hnattuan hawl ih tonsuhnak ka feh can, hlawhsam ih ka ra tlun tinte’n coka ah ei ding zianghman a rak um dah lo. Inn tlun pindan ka kai ih thawmvang ka neihcun a ihnak pindan sangka ah ding in aw ring zet in I kawk ciamco ttheu.

Ka lu ka kholh thluh in ihkhun par ah ka to ih, thuthangca siar phah in a leng ihsi ka rak lei mi sang ka ei. Himi khal hi Selena ih dan pahbalnak thotho a si. Inn tlun ah zamrang zet in a hung tlan so ih, ka thuthangca le sang cu I laksak. Cun, “Nang hi Tuluk nunau hnuaihnung zet na rak si hi. Ka innihsin suak aw,” tiah English ttong in I kawk.

Zan-ih hnipuan parah kor hlum hruh in, sam khal tom man lo’n inn sung ihsin ka tlansuak.

Camibuai result ttha, tuahttuannak ttha thawn kum 25 sung nehnak thantar ka rak tar thei. Zohman in cindan nei lo mi hnuaihnung in ti dah lo.

Kan rethei lo. Asinan ka nu in “tuahttuan theinak, thiamtlinnak” lawng hi a thupibik mi a si tiah kum 25 sung rori ka nu in I rak sim ringring. Hmuihmel zoh ih minung hril hi hitawk ram ahcun thil dikdawh a si timi hi ka theithiam thei lo. Himi cu ka rak hman zo mi kum 25 sung nunnak in hmuhsuamnak a si ko.

Thin tawi zet in coffee dawr pakhat ah ka tlan lut. Nikhua a dai tuk ih, ka ril a rawng tuk fawn.

Coffee dawr ahcun minung an tam laitak a si. Dawr hnattuan pakhat in danglam ti mithmai thawi’ I zoh phah in hmun awl pakht I kawhhmuh. Cumi cu dawr ih hmun awl umsun a si. Ka hmai zawn ah English nu pakhat a to. Amah zohdan ah Selena hnakih mi khirhkhan a si hmel. Siangpahrangnu Elizabeth vekih zah-um tthengttheng in a to. Ka zan-ih hnipuan phor hliaphliap hnuai ih lehnak kedam cu ka hnuk kir vukvi. Cun a sikat hnuai ih taksa-kop mawza (ngalzel) le kedil sang kedam mawi zet cu ka zoh. A kum a upa zo cing in hivek kedam thawn mawi le mi hip thei ding in a thuam aw thei lai.

Europe ram ih rawldawr level sang tampi cun hnipuan hruhdan a felfai lo ahcun dawr ih luh an siang lo. Himi dawr ih luh in siannak khal hi kor hlum mankhung ka hruh ruangah a si ka zum. Ka thinhengnak cu malte sung ka vun hnuk dai ih, “Coffee no khat in aw….ka lungawi,” tiah ka cah.

Dawr hnattuan cu a feh. Ka hmai zawn ih to nu cun I zoh lo. Asinan cahnah pakhat ah ca a ngan ih I rak pe. Cahnah par ahcun English cafang kutngan mawi zet thawn hitin a ngan.

“Na kehlam zawn dunglam ih a kel zawn ah thiarawknak pindan a um.”

Ka lu tung in amah cu ka zoh sal. Anih cun mawihmang le nunnem hmel zet cetcangdan thawn coffee a in rero. Ka lam vei khat te hman a rak zoh lo. Ka umdan a ippik zia cu ziangvek ttongfang ih tarlang ding ti khal ka thiam lo. Zah ka kai lo khal hi thil si ding a rak si ko tiah ka tuar hmaisabiknak a si.

Thli ih a hranh mi ka sampawl cu an hnok. Ka hnar kiang ah sang them tete an bet fawn. Ka kor hlum cu a man a mal lo mi si hman sehla ka zan-ih hnipuan cu a hlun tuk zo. Keimah le keimah ka ngaih aw lo thok. Hivek thuamawkdan hin keimah le keimah ziangtluk in ka zah aw lo ti a langter, cun, midang ka zahlonak khal ah a cang tiah ka ruat. Sun ih tonsuhnak ka feh lai ah duhdah zet ih ka rak thuamawk kha ka vun mangsuak. Khami khal kha manager dinhmun sang pakhat ka zohlonak ah a rak cang a si lo maw?

Ka tonak tohkham ih ka ra kir sal ahcun cu nu cu a rak um nawn lo. A nem zet mi cabuai khuh parih um cahnah parah kutngan mawi zet in English catuan pakhat a rak ngan bet kha ka hmu.

“Nunau pakhat dinhmun in na felfai,mawihmang le nunnem a ttul. Himi hi nunaupawl ih zahumnak a si.”

Coffee dawr tokham ihsin a tlan deuhthaw in ka ra tlansuak. Selena cu mileng pindan ah to in I rak hngak. I hmuh vete’n can bikhiah luan, nazi 12 le minute 10, ih ka tlun ruangah thaizing ah hrampi at ka bom a tul thu I rak sim. A sim mi cu ka cohlang ih, amah khal ngaithiam ka dil.

Selena in thil ttangkai tampi I rak zirh ti ka theithiam thok.

Zan nazi 12 hlan i’ ih hin a thaisun hrangah thazang a tlingter.

Hnipuan hruhdan felfainak in midangpawl ih zah ka kai phah.

Kedam sang, hmursen-sii hnihnak hin mi pitling ih ngai aw pawl ih bomnak I ngahter.

Mah le mah rinsanawknak ka nei kimcang vivo in ka thei. Ka thiamtling maw thiamtling lo, ka tuah thei maw thei l o tivekpawl ka bulpak hminsinbu (CV) zoh in thutluknak tuah tivek ka ttul in ka hai nawn lo.

Tonsuhnak ka feh netabik cu ceiawknak thilri mankhungpawl zuardarhtu company hminthang pakhat ah a si. Felfai le mawihmang zet ih ka thuamawknak in ka hmat a tamter. Cui company ih thuneitu nu cun, “Na fimvar in na tling zet. Kan company ihsin ka lo hmuak,” tiah I sim.

Cu nu cu coffee dawr ih ka rak ton mi nu a si ding ti hi ka rak zum ban lo lawlaw. Anih cu ceiawknak thilri zuardarhnak lam ah siangpahrang pakhat dinhmun ih hminthang a rak si.

Anih cun I cinken hmel lo nan, “Ka lung a awi tuk. Nunau pakhat dinhmun in na felfai, mawihmang le nunem a ttul timi ttongkam pakhat ruangah ka lung a awi tuk,” tiah lungawithu ka sim.

Si e. Nangmah lala hman in na ngaisan lo zawng a si mi thuamawkdan thawi’ na um ahcun na sunglam ih um mi thiamtlinnak hmuhsuah ding thu ah zohman in ttuanvo an la lo ding. Ttuanvo latu ding cu nangmah na si.

“Nunau pakhat dinhmun in na felfai, mawihmang le nunem a ttul. Himi hi nunaupawl ih zahumnak a si,” timi ttongkam hi lehhnu khal ah ka cingkeng ringring.

Ngantu: Yang Lan (from Nine Nine Sanay's Facebook)