Susanna (Daniel 13)

Susanna
(Daniel Bung 13)

1 Babylon ram ah Joakim timi pa a rak um ih,

2 nunau mawi le Pathian ttihzahtu Susanna, Hilkiah ih fanu, cu nupi ah a tthi.

3 Susanna ih nu le pa khal mi dingfel an si ih an fanu cu Moses ih dan vekin an kaihruai.

4 Joakim cu mi neinung zet a si ih a inn kiang ah hmuan pakhat a nei.  Jew pawl hmuahhmuah ih ttihzah bik mi a si ruangah a hnenah bawmnak an ra dil ttheu.

5 Cumi kum ah mipi Jew mipi hruaitu pahnih cu thutthentu ah hril an si. Cumi thutthentu pawl cu Bawipa in, “Babylon ihsin daan ngaihthahnak a ra, a ratnak hmun cu thutthentu dinhmun ih Jew mipi uktu ding upa pawl hnen ihsin a si,” tiah a rak sim mi an si.

6 Jew mipi hmuahhmuah in an thubuai an thlennak thutthentu pahnih cun Joakim ih inn an pal leuhleuh.

7 Sundir ih mipi an tlun tikah Susanna cu lamleng ding in a pasal ih hmuan ah a feh ttheu.

8 Upa pawl in ni tinte’n lamleng ding in hmuan ah a feh ti an hmuh tikah, an cakhiarnak a suak thok.

9 An ruahnak cu lamzin pial ah an fehpi; an mit khal van lam thlir lo ding in an dawnkham hrim ih, an thinlung khal ah thutthennak dik an ret nawn lo.

10 An pahnih in Susanna cu an iit nan, an buainak cu pakhat le pakhat an sim aw lo;

11 Ziangahtile Susanna co ngah duh ih an thinlung cakhiarnak phuansuah ding cu an ning a zak.

12 Ni khat hnu ni khat hiarhal zet in Susanna cu an zoh ttheu.

13 Ni khat cu, “Inn ah kan tin thlang pei, suncaw ei can a si,” an ti aw. Curuangah lamzin dangdang pan in an tthek aw.

14 Asinan an pahnih in an ra kir ih an umnak kel ah an thleng sal veve. An ra kirnak san an sutawk tikah an cakhiarnak cu an phuang veve ih, Susanna amah lawng a um can remcang hawl ding in an lung a kim.

15 Ni khat cu can remcang an rak bawh lai ah, Susanna cu, a ti dan kel vekin hmuan sungah a ra lut. Nikhua a sat ruangah hmuan sungih bualawk a duh ih, hnenum pahnih lawng a hruai.

16 Amah bih ih rak relhtu upa pahnih lo bak cu hmuan sungah midang zohman an um lo.

17 Susanna cun, “Hriak le sahpian va la uhla, ka bualawk sung cu hmuan sangka pawl run khar uh,” tiah a hnenum pawl cu a fial hai.

18 A fial vekin an tuah; hmuan sangka pawl an khar ih hmuan sir sangka ihsin Susanna ih fial mi va la ding ah an suak. Hmuan sungah upa pawl an relh ti an thei lo.

19 Hnenum pawl an suah vete’n, putar pahnih cu an tho ih Susanna pan in an va tlan.

20 Cule, “Zoh hnik, hmuan sangka pawl khar an si, zohman in in hmu thei lo ih, kannih in nangmah kan lo duh. Curuangah kan duhdan in thlun mai awla, kanmah thawn it aw.

21 In el asile, na hnenum pawl hmun dang ih na fehternak san cu tlangval no thawn hitawk ih nan um tlang ruangah a si ti kan hmuh thu kan phuang ding,” an ti.

22 Susanna cu, “Thang thawn awk pumhlum ka si hi. Nan duhdan ka lo thlun ahcun, ka hrangah thihnak a si ding; ka lo thlun lo khal ah, nan thuneihnak ihsin ka luat thei cuang lo.

23 Asinan nan duhdan thlun lo in nan thuneihnak hnuai ih tlak cu Bawipai’ hmai ih sual hnak cun ka hrangah a ttha sawn,” tiah a aihram.

24 Cu thluh ah Susanna cu a au ih, putar pahnih khal in amah an auh ve,

25 Cule an lakih pakhat cu hmuan sangka pawl ong ding in a va tlan.

26 Inn sungih minung paw in hmuan ih au-aw pawl an theih tikah, Susanna ziang a cang ti zoh ding in hmuan sir sangka ihsin an va tlan lut lohli.

27 Putar pawl ih sualpuhnak pawl an theih tikah, siahhlawh pawl cu an ning a zak zet, ziangahtile Susanna ih thuhla ah cuvek thil rel a rak si dah lo.

28 A thaisun, mipi pawl a pasal Joakim hnenih an rat tikah, daan ttihzahnak um lo bembem in Susanna parih thihnak thlenter a duhtu, putar depde pahnih khal an ra ve.

29 Mipi hmaiah hitin thupek an tuah: “Hilkiah ih fanu, Joakim ih nupi, Susanna kha rak hruai uh.” An va hruai tikah,

30 A nu le pa, a fanau pawl le a sungkha pawl hmuahhmuah thawn an ra.

31 Mi nunciam zet le mawi zet Susanna cun a hmai a khuh.

32 Asinan daan pahbaltu pawl cun, a mawinak thawn an hiarnak riamter ding ah, a hmaikhuh ong ding in thu an pe.

33 Susanna ih sungkhat pawl le a thlirtu hmuahhmuah cu an ttap rero.

34 Mipi laifang ahcun putar pahnih cu an tho ih Susanna ih lu parah an kut an suang.

35 Susanna cun ttap phah in van a hun zoh, ziangahtile a thinlung pumhlum in Bawipa ah a hngat.

36 Putar pawl cun, “Hmuan sungih kanmah lawng kan veivah lai ah, himi nu hi siahhlawh nunau pahnih thawn an rung lut ih, hmuan sangka an khar hnu ah siahhlawh nunau pawl cu hmun dang ah a fehter hai.

37 Cutawk ih a rak relh mi tlangval no pakhat a ra ih an it tlang.

38 Kan umnak hmuan kel ihsin cuvek dan ngaihthahnak kan hmuh tikah, anmah pan in kan va tlan.

39 An it tlang lai kan va hmu nan, mipa cu kan kai thei lo; ziangahtile kannih hnakih a cah sawn ruangah, sangka a ong ih a tlan hlo.

40 Cu thluh ah himi nu hi kan kai ih tlangval no cu zo a si tiah kan sut,

41 Asinan in sim duh lo. Himi hi a dikzia kan theihpi,” tiah an sim. Annih cu upa le Jew mipi ih thutthentu an si ruangah, a ra suak khawmtu pawl in an sim mi cu an zum: curuangah thihter si ding in mawh an phurh.

42 Asinan Susanna cu ring zet in a qqap: “Kumkhaw Pathian, thuh mi theitu le thil ziangkim an ra cansuah hlan ihsi rak theitu na si:

43 Dik lo zet in sualmawh in puh ti na thei. Hi mipa pawl ih mawh in phurhnak thil pawl hi pakhat hman ka tuah lo cing in, tu ahcun ka thi thlang ding a si hi.”

44 Bawipa in a thlacamnak cu a thei.

45 Thah ding ih an hruai lai ah, Pathian in Daniel timi suakthuan pakhat ih thlarau thianghlim cu a kaitho ih,

46 Anih cun, “Hi nunau ih thisen thu ah sualnak nei lo ka si,” tiah ringpi’n a au.

47 Mipi hmuahhmuah  amai lam ah an her ih, “Na sim mi cu ziang a si?” tiah an sut.

48 Anih cu an laifang ah a ding ih, “Ziangzoinak um lo le fiangternak felfai um lo ih Israel fanu pakhat mawh phurhter ding khawp in, nannih Israel mi pawl hi, mi aa maw nan si?

49 Thutthennak hmun ah kir uh, ziangahtile hi nu hi dik lo zet in an phiarsawm a si,” a ti.

50 Cutin mipi hmuahhmuah cu manhlap zet in an kir lohli. Upa pawl cun Daniel hnenah, “Ra aw, Pathian in kum upa ttihzah phu sinak a lo pek ruang ah, kan hnenah ra to awla thuhla in sim hai aw,” tiah an sawm.

51 Asinan anih cun, “Himi mi pahnih hi pakhat le pakhat hlapi ah tthentthek uhla, ka zoihnit hai ding,” ati.

52 Hmun dangdang ih an tthentthek thluh ah, pakhattu a ko ih hitin a sim: “Tar tiang ih tthatlonak tthanlenpitu! Na sualnak hlun pawl phuanlang can a kim thlang:

53 Bawipa in, ‘Sualnak nei lo le mi dingfel cu nan that lo pei,’ a ti cing in dantatnak dik lo pawl na tuah, sualnak nei lo mawh na phurh ih, sualnak neitu na luatter.  

54 Tu ah, asile, mit ih hmutu na si ahcun, ziang thingkung hnuai ih an um tlang lai saw nan hmuh ti in sim aw.”

55 Anih cun, “Mastic* kung hnuai ah,” tiah a sawn. Cutikah Daniel in, “Thuphan langsar na per mi hi na lu man daih a si, ziangahtile Pathian ih vancungmi cun Pathian hnen ihsin thutthennak a ngah zo ih hmun hnih ah a lo thlek ding,” a ti.

56 Khatlam kap ih a umter hnu ah, a dang pakhat rak hruai ding in thu a pe. Daniel cun, “Judah si lo in, Kanaan ih tefa sawn a si mi nang hi, mawinak in a lo thlemthlu zo ih, cakhiarnak in na thinlung a pialter zo a si.

57 Israel fanu pawl parih na cangvaihdan cu hitin a si ih, ttihphannak ruangah an pum an lo pe; asinan Judah ih fanu cun daan na ngaihthahnak cu a rak zawiawi men lo.

58 Tu ah, asile, an pahnih an um tlang lai cu ziang thingkung hnuai ah na va phawk.”

59 Anih cun, “Sasaw kung pakhat hnuai ah,” a ti. Cutikah Daniel cun, “Thuphan langsar na per mi hi na lu man daih a si; ziangahtile Pathian ih vancungmi cun nan pahnih ih lo siatsuah ding ah, hmun hnih ih na ruangpum lo thlek ding in a lo hngak a si,” a ti.

60 A ra suaktu mipi zate'n, amah ih ruahsannak hngattu runhimtu Pathian thangtthat in ringpi’n an au.

61 An tho ih putar pahnih cu an kai, ziangahtile Daniel ih lairelnak ah theihpitu dik lo an si thu anmai ttongkam lala thawn a lang zo. An venghnen parih an rak ruahman mi hualvan hmaton ding in mawh an phurh:

62 Moses ih daan vekin thah an si. Curuangah cumi ni ah sual nei lo thisen cu zuah a si.

63 Hilkiah le a nupi cun, Susanna ih pasal Joakim le an sungkhat hmuahhmuah thawn, an fanu Susanna ih hrangah Pathian an thangtthat, ziangahtile ningzahnak ding thil lak ihsin sualnak nei lo a si ti hmuhsuah a si.

64 Cumi ni ihsin Daniel cu Jew mipi lakah nasa zet in a hmin a thang.

*Mastic kung hi thingkung te ci khat a si ih, thling rimhmui a neih ruangah an cing ttheu.

Daniel cabu ih himi bung hi Greek ttong le leh sawng mi ttong pawl lawng in a um. Asinan Hebru simaw, Aramaic simaw ih ngan hmaisat mi khal a si thei men. Hebru-Aramaic ttong ih ngan mi Daniel cabu ah himi bung hi a tel dah lo. Herbru Bible khal ah a tel dah lo. Protestant ih Cathianghlim cuailung (canon) ahcun himi bung hi hlon a si. Asinan Catholic Kawhhran cun thawtkhum mi nganca pawl lakah tlaitluan in a telh. Kawhhran hmaisa in Bible ih a rak hman mi Septuagint ahcun himi bung hi a tel ve. Kan theihnak kautertu pakhat a si thei ding beisei ih run tarlang mi a si.

Hram: New American Bible (revised edition) ttansan in, King James Bible thawn zoh ttawm phah ih leh mi a si.