Zangzel pawl hrang Thazang Laknak (2)

Zangzel pawl hrang Thazang Laknak (2)

Mino zangzel pawl hrang zethel zet ih ruat ding ah Hong Kong milian tontaw Li Kar Shin ih ttongkam pawl run tarlang bet sehla:

#Laireltu

Ttongkam kam khat cu na ttongsuah hlan ahcun cui’ ttongkam neitu bawi na si; na ttongsuah hnu cun cui’ ttongkam ih sal na si zo.

#Hrilnak

A netnak ahcun na zum dan vek in na si taktak ko. Ziangahtile leitlun ahhin ttongfang ttihnungbik pahnih an um. Pakhat cu lungruhnak a si ih, a dang pakhat cu taimaknak a si. Mi taima cu amah le mah a thlengawkter ih, mi lungruh cun amai’ hualvan (destiny) a thlengawkter.

#Nahsiknak le Uarnak

Mi dang hnak in malte lawng an hleitling a si ahcun an lo nahsik ding. Annih hnak in a let tampi ih na hleitling a si ahcun an lo uar ding.

#Hnih-no Netabik (The Last Smile)

Zo hman tluk thei lo ding vekih na ruahawk tik khal ah na tha nauter hlah. Mi zaran pakhat men na si ve timi kha cingkeng aw. Mi an hnih huahho na hmuh tik khal ah leitlun ah nangmah lawng na riah a sia ah ruat aw hlah. Taktak ahcun mi dang pawl cu nang hnak in umawkter an thiam mi sawn a si. Bawmtu na neih lo can ah na duh ahcun ttap ko aw. Asinan na ttah ttheh hnu cu na tha sal seh. Ziangkim in sungral ttheh khal awla, na hnih-no cu hlovaiter hlah aw.

#Lungngainak

Mi pakhat cu a lungngainak ihsin a lungput umtudan le hmailam ih a hlawhtlinnak ding san le niam hisap a theih. Khatlam in kan sim asile, buainak tenau pawl cu can heu ih ruat har an ttul lo, buainak picang taktak pawl an si fawn len, ruat har men in zianghman a tthahnem cuang lo. Can malte sungih buainak na cinfel thei ahcun ziangkim hi ruahpi tak zet a sur hnu ih a thiang mi nikhua vek in an mawi-nuam ding.

#Hlawhltlinnak le Tthansohnak

Na hlawhtling lo tla a si thei ko, asinan tthansoh cu na tthansoh tengteng a ttul. Na hlawhtlinnak ding cu lo hnaihnoktu an um thei, asinan na tthansohnak cu zo hman in an lo hnaihnok thei lo ding.

#Delhritnak (Pressure) le Normawhnak

A lenglam ih ra mi thazung ruangah a kuai mi arti cu rawl bar khat ah a cang, asinan a sunglam ihsi ra suak mi thazung ruangih a kuai mi arti cun nunnak pakhat a suahter. Minung nun khal cuvek a si. A lenglam ih ra mi thazung cu delhrittu an si ih, a sunglam ihsi ra suak mi thazung cu tthenlennak a si. A lenglam thazung ih a lo kuaiter ding na hngak cuahco men ahcun midang ih rawl bar khat ah na cang tengteng ding. Nangmah le nangmah rinsan aw in nangmahte’n a sunglam ihsin na pahsuak thei ahcun na nun tthanlennak cu nunnak thar pakhat hung piangsuak sal thawn a bang aw tin a hmu ding.

Hram: Naing Suan (Irrawady) – Ralring: Zangzel pawl khal An Hlawhtling Thei (Nun Hlawhtlinnaklam Cahram – 16)