Siangpahrangnu Ropi Elizabeth II

Siangpahrangnu Ropi Elizabeth II

Ni tla cawk lo ram ih siangpahrangnu rak si dah, tuini khal ah ram tampi uk le hliahkhuh lai tu, leitlun siangpahrang hmuahhmuah lakih ropibik pakhat a si mi Siangpahrangnu Elizabeth II hi a hmin pum cu Elizabeth Alexandra Mary a si ih, zungpom ttongkam cun “Elizabeth II, by the Grace of God, of the United Kingdom of Great Britain and Northern Ireland and of her other realms and territories Queen, Head of the Commonwealth, Defender of the Faith” (Elizabeth II, Pathian Lainatnak zarin, Britain Ropi Siangpahrangram Dingkhawm le Saklam Ireland le a uk mi hmunram dang le ramrihuap dang pawl ih Siangpahrangnu, Neihsiahzomkhawm Ram pawl ih Lu, Zumnak Humhualtu) ti a si.

Siangpahrangnu ropi hi 1926 kum April thla 21 ahkhan England ram ih London khawlipi ah a suak. 1952 February 6 ihsin Britain Ropi Siangpahrangram Dingkhawm le Saklam Ireland ih siangpahrangnu a ttuan thok.

Tuan Nun (Early Life)

Elizabeth hi York khawpi lal (duke) Albert le a nupi Lady Elizabeth Bowes-Lyon ih fanu upa sawn a si. Siangpahrang George V ih fapa nauta deuh ih fa a si ruangah a nauhak lai ahcun siangpahrang tohkham luah theinak ding lamzin a nei hrot lo. Asinan a paseu Edward VIII (lehhnu ih Windsor khawpi lal rung si sal) in 1936 December 11 siangpahrang tohkham suahsan in a nau a toter tikah Elizabeth ih pa cu Siangpahrang George VI ah a hung cang. Curuangah Elizabeth ih hrang khal ah siangpahrang tohkham run luah leh theinak ding lamzin a ong aw.

Elizabeth hi fimthiamnak zirnak lam ah a nu in a kaihruai. A nu in Elizabeth tei’ unau cu inn ih ca zirhtu Marion Crawford hnenah a ap hai. Elizabeth hin lehhnuih Eton College hotu sang rung si leh sal C.H.K. Marten hnen ihsi khal in sanphung (history) bulhram a zirh ngah. Zirhtu dangdang hnen ihsin awnmawi le ttong lam fimthiamnak khal a ngah hai. Leitlun Ralbuai Ttumhnihnak lai ahcun Elizabeth le a nau Margaret Rose cun vanzam ih donak nasa zet tuartu London cu lo theih lo in an suahsan a ttul phah ih, an nu le pa tel lo in Scotland ram ih Balmoral Ralbuk le, Royal Lodge, Windsor, le Windsor Ralbuk tivek ah himdamte’n can an hmang.

1947 kum tir ah Siangpahrang Fanu Elizabeth cu a pa siangpahrang le a nu siangpahrangnu thawn Thlangta Africa ah an tlawng. An ra tlun tikah a hlavang deuh ih a tupa ban a si mi Royal Navy (British Tidai Ralkapbu) ih Lieutenant Philip Mountbatten thawi’ hamawknak an tuah thu thansuah a si. Philip Mountbatten hi a hlan ah Greece le Denmark ih Siangpahrang Fapa Philip (British siangpahrang aiawh ih Greece le Denmark uktu) a rak si. 1947 November 20 ah Westminster Abbey biakinnpi ah an nei aw. An neihawk ni siimlam ah siangpahrang in in moneitu (mopa) cu Edinburgh khawpi lal (duke of Edinburgh), Merioneth hmunram lal (earl of Merioneth), le Greenwich aiawh lal (Baron Greenwich) sinak pawl a pe. An nupa cu London khawlipi ih Clarence House ah an ceng. An fapa hmaisabik Prince Charles (Charles Philip Arthur George) cu 1948 November 14 ahkhan Buckingham Siangpahranginn ah a suak.

Siangpahrang Tohkham Luahsohnak

1951 kum tthal can ah Siagpahrang George VI ih harhdamnak cu bese zet in a tlaniam. Curuangah Siangpahrang Fanu Elizabeth cun Trooping the Colour le rampi huap cangvaihnak phunphun ah a ai a awh. October 7 ah Elizabeth le a pasal cu Canada le Washington, D.C. ah hlawhtlinnak nasa zet ngah khual an tlawng. England ram ih Christmas an hman hnu ah an nupa in 1952 kum January thla ah Australia le New Zealand an tlawng. Asinan Kenya ram Sagana an thlen lai, 1952 kum February thla ni 6 ah siangpahrang a thi timi thuthang an thei. Cumi ruangah siangpahrangnu si thlang Elizabeth cu England ah a kir lohli. A uknak thoklam thla thum sung, a pai’ hrangih lungngai riahsiat can hleice ih phuan mi, cu lunglen khawharnak thawn a hmang liam. Asinan Clarence House ihsi Buckingham Siangpahrang innpi ah tthal can ah a tthawn ih, cumi ihsin thuneitu siangpahrang ih ttuanvo pawl ttuan thok in, Tlangsuakbu onsaknak khal 1952 November 4 ah a nei. Siangpahrang lukhum hlannak puai cu 1953 June 2 ah Westminster Abbey biakinn pi ah neih a si.

1953 November thla ah siangpahrangnu le a pasal Edinburgh khawpi lal cun thla ruk sung Neihsiahzomkhawm ram pawl (Commonwealth = British Kumpiram sungih rak tel dah mi ram pawl zomkhawmawknak pawlkom a si ih, himi sungih teltu ram pawl cun British siangpahrangnu hi an ram siangpahrangnu ah an cohlang. Ram 36 an um) an tlawng. Himi an tlawn ttum ah Australia le New Zealand khal an fang tel ih, British siangpahrang ttuan lai tu rori in himi ram pahnih a tlawn vei khatnak a si. 1957 kum khal ah rampi aiawh in Europe khawmualpi ih ram tampi an tlawn hnu ah Canada le Amerika Dingkhawm Ram khal an tlawng. 1961 kum ahcun kum 50 sungah British siangpahrang lakih India tlawng hmaisabik a si ih, Thlangta America (1968 kum ah) le Persian Tipikel ram pawl  (1979 kum ah) ih British siangpahrang tlawng hmaisabik khal a si. 1977 kum ih a siangpahrang ttuan kum Ngun Jubilee ah Commonwealth ram 36 hruaitu pawl an ra tel hai ih, Britain le Saklam Ireland pumpuluk fan kual pi in, Thlangta Pacific le Australia siseh, Canada le Caribbean lam ah siseh a tlawng.

Siangpahrangnu Elizabeth II a hung si hnu in a fapa Charles cu a ro luahtu ding ah a hril. Siangpahrang Fapa Charles cu 1958 July 26 ah Wales siangpahrang fapa (siangpahrang run ttuan leh tu ding an hlan ttheu mi thuneihnak – Wales ram uktu) ah phuansuah a si. Siangpahrangnu ih fa dang pawl cu Siangpahrang Fanu Anne (Anne Elizabeth Alice Louise), 1950 August 15 ih suak; Siangpahrang fapa Andrew (Andrew Alberth Christian Edward), 1960 February 19 ih suak, 1986 kum ihsin York khawpi lal ah ret a si; Siangpahrang Fapa Edward (Edward Anthony Richard Louis), 1964 March 10 ih suak pawl an si. Siangpahrangnu ih tu hmaisabik (Siangpahrang Fanu Anne ih fapa) cu 1977 November 15 ah a suak.

San Thar Ukawknak

Siangpahrangnu Elizabeth II hin san thlengawk vivo dan mil ih ram uk a ttulzia a thei lohli. Tthimnak ah 1970 kum ah siangpahrang sungkua ih ni tin nun hman dan cu TV ah suah a siansak in, 1978 kum khal ah a unaunui’ innsang tthenawknak cu a ngaihhna a thiamsak. Asinan 1990 kum pawl ahcun siangpahrang sungkua in ngenngiarnak tam zet an tong. Siangpahrang Fapa Charles le a nupi Diana, Princess of Wales an tthenawk vekin, Siangpahrang Fapa Andrew le a nupi Sarah, York khawpi lalnu, khal an tthen aw. Cuihleiah Anne le a pasal an tthen aw ih, siangpahrang sungkua cennak Windsor Ralbuk meisa in a kang fawn. Himi caan hi rampi a tlaksiat lai a si fawn ih, siangpahrang sungkua ih nuntu khawdak dan ah soiselnak a pung vivo. Curuangah 1992 kum ah Siangpahrangnu Elizabeth II cun, amah bulpak cu a luat ko nan, a bulpak sumlut hrangih siah pe ve ding in a lung a kim. Charles le mipi duh hlawh zet Diana ih tthenawknak (1996) ruangah siangpahrang sungkua somdawltu an mal phah vivo fawn. 1997 kum ih Diana a thih ttum ah siangpahrangnu Elizabeth II in Buckingham Siangpahrang Innpi ih rampi thantar ban hrek tthum ih tar ding a el lawk ttum ah soiselnak cu a luar sinsin. San thlengawknak mil vivo ih uknak a tuah mi hnuthlurh in siangpahrangnu cun mipi hmai ih a lang dan ah khungkhai lo le hlan cindan thlun tuk lo ding in a rem aw. Himi a zuamnak pawl hi hlawhtlin mi le hlawhsam mi an cokrawi aw.

2002 kum ah Elizabeth cun siangpahrang a ttuan kum 50 kimnak Sui Jubilee a tuah. Commonwealth ram pawl ah himi Sui Jubilee lomnak puai an tuah hai ih, London khawlipi khal ah ni tampi sung puai phunphun an tuah. Himi Sui Jubilee hi Elizabeth ih nu a le unaunu kum tir lam ih an rak thihnak in khuimawcin cu a banghekter. Zabi 21-nak kum sawmbi hmaisabik a rung thok tikah mipi in siangpahrang sungkua an cohlannak a rung tth sal. 2005 kum ih Siangpahrang Fapa Charles in Camilla Parker Bowles a tthit mi hman British mipi lakah ttawmpitu a ngah zet. 2011 April thla ah Siangpahrangnu Elizabeth II cun siangpahrang sungkua cu Prince William of Wales, Charles le Diana ih fapa upa sawn, le Catherine Middleton an neihawknak puai a hman pi. 2011 kum May thla ahcun British sanphung sungih siangpahrang tuan rei lam ah George III a run hleih. British siangpahrang ttuan reibik cu siangpahrangnu Victoria a si. May thla thotho ahhin Elizabeth cu Ireland ram ah a tlawng. British siangpahrang lakih Irish hrilhoturam (republic) tlawng hmaisabiktu a si ih, 1911 kum ihsin Ireland leilung pal hmaisabik British Siangpahrang khal a si. 2012 kum ah Elizabeth in siangpahrang a ttuan kum 60-nak hrangah Diamond Jubilee a tuah.

Siangpahrangnu Elizabeth hi siangpahrang a ttuan dan ah tluangtlamte ih cangvai ttheu, cozah hnattuannak ah thinlung pe zet ih ngaihventu tiah theih a hlawh. Amah bulpak ah rang to paih zet, rang ngaina zet a si. Tlan zuamawknak ih hman ci rang tampi a vulh ih, rang tlan zuamawk puai khal vei tampi feh ttheu in, America Dingkhawm Ram ih Kentucky rang vulhnak hmuan khal ah a feh ringring. A neih mi sumpai le a kut sungih um mi neihsiah pawl ruangah leitlun ih nunau neinungbik pakhat khal a si.

"Elizabeth II." Encyclopædia Britannica. Encyclopædia Britannica Ultimate Reference Suite.  Chicago: Encyclopædia Britannica, 2015.