Nui’ Ni Kan Hmandan Tthenkhat Hi!

Nui’ Ni Kan Hmandan Tthenkhat Hi!

Kan ram ih Nui’ Ni kan hman dan qhenkhat hi saduh an that lo ttheu. Nui’ Ni hi “Nupi le Pasal Ni” rong kai deuh in simaw, “Nupawl Nunsimnak Ni” rong kai deuh tivek in simaw, a hmangtu tla kan um in a lang. Nui’ Ni a rak thoknak kan zoh asile Nui’ Ni hi nupawl sunlawihnak ding ni lawng a si ih, thil dang a keng tel lo. Nu cu nu tthatthum an si lawng ah sunlawih tlak an si ding tinak a si lo. Nu tthatthum siseh, nu tthatthum hran lo khal siseh, Nu an si hnuhnu cun sunlawih tlak minung an si zo.

Cun, Nui’ Ni ih nui’ sunlawizia kan rel dan tthenkhat ruang khal ah mi tthenkhat in Nui’ Ni hman an duh lo phah. Nui’ sunlawizia kan rel tikah mi an duhdawt thiamnak le kan hrangih an taimaknak le tuarnak pawl kan rel mi hi thil sual cu si lo hmansehla, in hringtu Nu an sinak hrimhrim ahhin sunlawih tlak sunlawinak a um zo timi hi kan hngilh pang ding phan a um. Nu in a hrin lawng hring man in mual a liam san mi pawl ih hrang khal ah Nu hi sunlawih tlak mi sunglawi a si thotho zia kan hrelh pang ttheu.

Nu in fa le pawl an duhdawt thiam zia hlir kan rel tikah, san le vang phunphun ruangih Nu in a rak zohkhen remcang lo mi minung pawl hrangah Nui’ Ni hi lungngainak ni ah a cang pang thei. Taktak ahcun hi leilung ni eng le Bawipai’ tthatnak tep thei ding in thla kua sung an pum sungih in rak cawm nun le natnak tuar ih in hrinsuah mi lawng khal ah hin Nu cu sunlawih tlak le cawisan tlak an si zo ih, himi hi Nui’ Ni ah kan hngilh lo a ttul hrimhrim mi khal a si.

Tuini ih a ra suaktu hmuahhmuah lakah ‘Nu’ nei lo pakhat hman kan um lo. Kum upabik siseh, nautabik siseh, Nu kan nei thluh. In hringtu kan suahsemnak Nu cu a nungdam lai khal a si thei, mual in liamsan zo khal a si thei. Nu in mual a liamsan zo mi pawl khal hin Nui’ Ni hi kan hman a ttha. Ziangahtile mual in liamsan zo a si hman ah Nu cu sunlawih thotho an phu a si. Nui’ Ni rung cangsuak ding ih rak tawlreltu, Nui’ Ni ih Nu (Mother of Mother’s Day) tiah an kawh ttheu mi Anna Jarvis khal in Nui’ Ni cangsuak ding ih a tawlrel ngah ah a nu in mual a liam san ve zo. Anih cun, “Ka nu a um nawn lo ih, ka thin nat luartertu men ah a cang ding,” tivek lam a ruat ve lo. A nu cu nungdam khal sehla, mualliam zo khal sehla, sunlawih tlak a si hrimhrim ti a thei.

Nitlaklam ram tampi ahcun, Nui’ Ni hmannak service an tuah tikah Nu in mual a liamsan zo mi nunau pawl in pangpar var an ton, mipa pawl in an angki ah an kilh. Nu nungdam lai a neitu nunau pawl in pangpar sen an ton, mipa pawl in an angki ah an kilh. Nui’ Ni ih hman ding pangpar ah Anna Jarvis in a rak hril mi cu a nui’ duhbik mi carnation pangpar a si. Asinan pangpar dang khal hman theih an si ko.

Cun kawhhran tthenkhat cun fa nei hrih lo an si khalle, pasal nei zo hmuahhmuah cu Nui’ Ni ah sunlawihnak an pek thu khal theih ding a um. Himi hi Nui’ Ni ih sullam thawn a mil lo. Nui’ Ni ih sunlawih ding mi cu fa a nei zo tu Nu lawng an si. Himi ah mi tthenkhat in fa nei thei lo Nu pawl hrangah tuar a har pang ding titu tla kan um thei. Asinan fa a nei theilotu nu khal in Nui’ Ni ahhin sunlawih ding mi a nei thotho. Ziangahtile anih khal a Nu ih fa a si ve. Nui’ Ni ah amai’ sunlawinak ding maw a ruat ding, a nui’ sunlawinak sawn, timi cu amai’ bulpak lungput ah a tthum aw ding. A nu sunlawih ding hnakin amah a sunlawi thei lo mi sawn in a thinlung a luahkhat ahcun ziangawk ti ttha maw! Nui’ Ni cangsuak ding ih rak tuahtu Anna Jarvis rori khal kha a dam sung ah pasal khal a nei lo ih, fa khal a nei lo. A nu sunlawih ding sawn in a thinlung a luah.

Kan lam ahhin Nui’ Ni siseh, Pai’ Ni siseh kawhhran theihpi in kan hmang ttheu. Kawhhran in simaw, mibulpak in simaw Nu siseh, Pa siseh sunlawihnak thilpek tivek kan pe ttheu. Asinan CE Department asilole Sunday School Nauhakpawl in caan an la dah lemlo. Miphun dangpawl tidan thawn kan tidan a bangaw lo deuh in a lang. Kan tlin lo ruangah tla  a  si thei. Nauhak te pawl in Nu le Pa kha sunlawih in thilpek (pangpar, thilri tivek) pe ve hai sehla, caan ziangziang simaw tla luah ve hai sehla,  a ttha ding a bang.

Ram dang le hnam dang tidan ahcun, Nui’ Ni siseh, Pai’ Ni siseh, fa le pawl in an Nu asilole an Pa an sunlawih ni, an nu le pai’ pual ih rawl eikhawmnak an tuah ni asilole laksawng phunphun an leih ni, an pek ni a si deuh. Fa le pawl in  nu le pai’ hnenih lungawithu an sim ni a si deuh. Nui’ Ni/ Pai’ Ni ih mai’ nu le pai’ hnen thleng remcang thiam lo pawl hman in an nu le pai’ hnenah card mawi zetzet  asilole thilpek an kuat ttheu a si. Kawhhran khal in a hleice in service a nei ding cu a si ko. Asinan cumi in fa le pawl ih ttuanvo kha a sawng a si lo ih, a ai a awh khal a si fawn lo. A si lo bikin CE Department in pangpar tal timtuah sehla a tthat a zum um. Ziangahtile kan kawhhran cio sungih a nautabik pawl ihsin Nu sunlawih thiam a ttul zia kan zirh thok lawng ah san rei daih tiang in Nu sunlawihnak thlaici kan tuh tinak a si ding.

San a tthangso vivo ih kan theihfimnak tla karhzai in leitlun miphun tthangso pawl tidan tthenkhat kan cawng vivo. Asinan ca kan siar kauhlonak, thil hliakhlainak cang kan thiamlonak tivek hin butlak kua sungah in kharhkhum sal can a um ttheu. Ziang a va si khalle, tthansoh lam kan pan thotho a si ruangah a lungawi um in ruat hrih sehla. Himi cahram hi leitlun miphun picang pawl in Nui’ Ni an hman dan ka theih ve dan le kan ram ih kan hman dan tthenkhat talhtonnak a si ih, keimai’ bulpak hmuhdan a si ruangah a ttulsam mi a um lai pang asile rak hliakhlai bet hai ding ah zangfah ka lo dil.