Valentine Ni hrang Thuanthu Pakhat

Valentine Ni hrang Thuanthu Pakhat

Larry le Jo Ann cu nupa zaran an si. Zaran lamzin ih zaran inn ah an um. Nupa zaran dang pawl vek thotho in innsang cawmawknak le an fanau pawl hrangih thil dik tuah thei ding in an talbuai ve nasa.  Nupa zaran sinak dang pakhat khal an nei lai. Cumi cu thuhla tenau tete ih an elbuaiawk ttheu mi a si. An biakawknak tamsawn cu an neihawknak ah ziangmi thil dik lo a um ih, zo sawn mawhthluk ding a si, timi deuh hlir an si.

Asinan cumi cu thil maksak cungcuang a thlen ni hlan ah a si. Cumi ni ah Larry in, "Jo Ann, dawibur a um mi pawhdawh (drawer) ka nei ngah a si hi. Ka vun on tinte'n mawza le sunghruh hnipuan a kimte'n an rak um ringring. Kum hi zat sung na rak famkimter ringring mi ruangah na parah ka lung a awi," a ti.

Jo Ann cun a mitkharh tlun ihsin a pasal cu a zoh khuaukhi. "Ziang na duh, Larry?" ti'n a sut phah.

"Ziang duh dang nei lo e. Himi dawibur pawhdawh pawl hi ka ngaina zet ti ka lo theihter duh men mi si lawm."

Himi hi umtudan theihthiam harsa ih Larry a um can vei khatnak khal a si cuang lo. Curuangah Jo Ann cun cumi cu ni malte a rei tiang in a thinlung ihsin a hlon hlo men.

"Jo Ann, tui thla kan hnattuan ih check cazin dikte'n na rak ngan ruangah ka lung a awi. Vei 16 ah 15 rori na ti dik. Tahfung rori a si."

Jo Ann cun a theih mi ttongkam cu zum lo zet in, thuamhnaw a belhnak ihsin Larry cu a zoh. "Larry, check nambat ka ngan dik lo ruangah na phunzai ringring fawn, tu hmuah ah ziang ah na cawl?" tiah a sut.

"Ziang dang ruangah si lo e. Na zuamnak parah ka lung a awi ti ka lo theihter duh men si lawm."

Jo Ann cu a lu thing phah in thuamhnaw cu a belh sal. "Ziang a cang thlang si pei?" tiah amahte'n a phun sepso.

Asinan a thaisun ah Jo Ann in thilri-kim dawr ih check a ngan tikah, nambat dik a ngan maw ngan lo timi a zohfel sal.  "Khami check nambat ttukttak men cu ziangah ka vun ngaihsak ciamco?" tiah amahte'n a sut aw phah.

Cui thilthleng cu zianghman ih siar lo a tum. Asinan Larry ih umtudan danglamnak cu a tam sinsin. 

Siimlam vei khat cu, "Jo Ann, zanriah ropi zet a si. Na zuamnak pawl hi ka duh zet. Ziangahtile kan dunglam kum 15 sung ahkhan keimah le kan fanau pawl hrangah rawl vei 14,000 lenglo na timtuah zo ruangah a si," tiah Larry cun a sim.

Cu thluh in, "Alala, Jo Ann, kan inn cu a va felfai ve.  Hivek ih zoh rem ding hin nasate'n na rak ttuan a si hi.  Jo Ann, nangmah na si ruangah hin ka lung a awi. Nangmah thawn um tlang hi nuam ka ti taktak a si," a ti.

Jo Ann cu a thin a phang thlang. "A mi ziaunak khuimi ciah si pei? Mi a sawiselnak teh?" tiah a mang a bang.

A pasal pakhatkhat a cang thlang a si pei maw ti a phan thupnak cu kum 16 mi Shelly in a run nemhnget. Shelly cun, "Nunu, Papa hi a mumal lo thlang a si hi. Zoh na rem tuk i ti si cu! Himi makeup le hivek hnipuan ttophnop thawn ka um mi hman cutin a rel. Papa hi hivek a si lo sokhaw, Nunu. Thil dik lo pakhatkhat a um maw si?" tiah a sut.

Ziangvek thil dik lo cu um khal sehla, Larry cun a thilti cu a bansan cuang lo. Ni khat a thok in ni khat a cem tiang a tthalam ih thil zoh cu a tuah peh vivo.

Zarh dang a rung thleng vivo cun Jo Ann cun a koppi ih nungcang pangai lo pawl cu dan ah a neih deuh vivo thlang. Curuangah vei hnihkhat cu hngirtteu nawn in, "Ka lungawi" ti'n a sawn phah ttheu. Ngaihsak hrot lo ih a umsan men ringring thei cu a uang aw phah. Asinan ni khat cu thil pangai lo zet pakhat a thleng ih, anhai khop in a mang a bang. Cumi ni ah Larry in, "Cawlh can lo pek ka duh. Keimah in kheng pawl ka kholh ding. Curuangah zangfahte'n thirbel ihsin na kut kha la awla coka hi rak suahsan hrih aw," a ti.

(Reipi awn-ai lo in a um hnu ah)

"Ka lungawi, Larry. Ka lung a awi zet."

Tu ahcun Jo Ann ih kekar cu a zangkhai cuang, amahte a rinsanawknak khal a kaisang ih, vei le khat ah hla a sak hngerhngo phah. A rak neih dah mi lungngainak tampi cu a nei nawn lo lawlaw a bang thlang. "Larry ih nungcang thar hi ka ngaina sawn lam a si hi," tiah a ruat.

Ni khat dang leh ah thil thleng maksak cungcuang thleng bet lo sehla cun, hitawk hi thuanthu ih cemnak a si ding.  Tui ttum ahcun a ttongtu cu Jo Ann a si.

"Larry, hnattuan in himi kum zat sung in somdawlnak parah lungawithu lo sim ka duh. Himi parih ka lungawinak hi ka lo sim leh ding tiah ka rak ruat dah lo."

Jo Ann in a san le vang sim ding in ziangtluk in nor rero khal sehla Larry cun maksak zet ih a nungcang a thlengnak san cu a phuang duh dah lo. Curuangah hringnun ih thilmak pakhat ah a tang lanta ding a bang. Asinan cumi nun thlengawknak cu ka nun ih lungawinak thlentu pakhat a si.

I hmu thiam ko ti aw, keimah hi Jo Ann cu ka si.

Hram: Chicken Soup of the Teenage Soul sungah Deseret News ihta an lak mi, Jo Ann Larsen ih ngan mi "A Story for Valentine's Day" theihthiam ol ding zawng ih lehher mi a si.