Glenna ih Tumtahnak Bu

Glenna ih Sunmang Bu

1977 kum ahcun fanu nauhak pathum neitu innsangnu pak (single mother) ka si (single mother – pasal tel lo ih fanau cawmtu). Fa le cawmnak, inn luah man, le mawttaw man kuan ding ka nei ih, ka sunmang tthenkhat alh-nun-ter sal khal a ttul.

Siimlam vei khat cu seminar pakhat ah ka kai ih, pacang pakhat in I×V = R Kalhmang timi a rel lai ka thei. [Fiangfelnak (Vividness) thawi' rawi mi Sungtuahnak (Imagination) cu a Taktak (Reality) ah an ra cang]. Thureltu cun kan thluak hin ttongfang si lo in zuk (picture) sawn in thu a ruat tiah a sim. Kan ngah duh mi kha kan thluak sungah fiangfel zet ih a zuk kan tuah thei ahcun, a taktak ah a ra cang ding, tiah a sim.

Cui thuhla cun ka thinlung ah sersuah duhnak pakhat a suahter. Bible sungah Bawipa in, "kan thinlung ih ttulsamnak pawl" in pe a timi thutak ka thei (Saam 37:4). "Minung ih nun cu a thinlung put vek in a si" (Thufim 23:7) timi khal ka thei. Ka thlacamnak cazin pawl cu zuk ih canter ding in ka ruatcat. "Ka thinlung ih ngah duh mi pawl" a tarlangtu, mekazin hlun pawl sungih zuk pawl ka cepthla ih ka khawlkhawm. Cui zuk pawl cu zukbawm mankhung zet pakhat ah ka remkhawm ih beiseinak nasa zet thawn ka hngak.

Zuk pawl cu cipciarte'n ka rem. Ka zuk pawl ahcun himi pawl an tel:

1. Mipa hmelttha pakhat

2. Mothuam hruh nunau pakhat le mipa thuam dum (tuxedo) hruhtu mipa pakhat

3. Pangpar tom pawl (kei hi ka romantic)

4. Diamond hlawnthil mawi (Pathian in David le Solomon a duhdawt ih, minung hmuahhmuah lakih mi lianbik pahnih an si, timi kha sirhsan ah ka hmang)

5. Caribbean tipi pawl tleu surhso sungih tikulh pakhat

6. Inn duhnung pakhat

7. Inn bungrua thar

8. Tunaite ah ttuanrian tumpi pakhat ih hotu sang (vice president) a hung situ nunau. (Nunau zungbawi nei lo company ah hna ka ttuan. Cumi company ih nunau hotu sang hmaisabik si ka duh)

A lehhnu zarh riat a rei tikah, California feh-cak lamzin pi ah ka hnattuan tawlrel ding in, zinglam nazi 10:30 ah mawttaw thawn ka feh. Vei le khat ah Cadillac mawttaw sen-le-var mawi zet in i run lan. Cui mawttaw cu a mawi ruangah ka zoh. Mawttaw khaltu cun i run zoh ih a hni-no. Kei khal ka rak hni-no ve, ziangahtile a tlaitluan in ka hni-no ringring. Tu ahcun harsatnak nasa zet ka tong thlang. Nang teh cuvek na tong dah maw? Amah zoh lo vekih umawkter ka tum. "Keimah maw? Ka lo zoh lo pi!" A lehhnu peng 15 sung i thlun. Thih hman ka phang thlang! Peng malte sung ka khal bet ih, anih khal peng malte sung a khal ve. Ka cawl ih, a cawl ve....a netnak ahcun pasal ah ka nei!

Tontiam kan tuah hmaisabik ih thaisun ah Jim cun rose pangpar dazin khat i rak kuat. Cu thluh ah paihzawng pakhat a nei ti ka hmu. A paihzawng cu diamond khawlkhawm a si. Diamond tumpipi pawl! Cui' diamond pawl thawn ceimawi ding mi pakhat a hawl rero. A ceimawi ding mi ahcun keimahte'n ka pum ka pe aw! Kum hnih sung hrawng tontiam kan tuah ttheu ih, Thawhttan zing tinte'n a ko sau zet a um mi rose pangpar sen pakhat le a duhdawtnak nganca ka ngah ringring.

Kan neihawk hlan thla thum duh ah Jim in, "Honeymoon fehnak ding hmun remcangbik pakhat ka hmu ngah. Caribbean tipithuanthum ih St. John Tikulh ah kan feh ding," i ti. Hni phah in, "Cuvek cu a ruat hman ka ruat dah lo," tiah ka sawn.

Ka zuk bu cu Jim thawi kan neihawk kum khat kim zik tiang in ka rellang lo. Kum khat a kim zik tikah inn thar duhnung zet pakhat ah kan tthawn. Cui inn ahcun zuk ih ka rak suangtuah mi bungrua mawi zetzet an um. (Jim cu nisuahlam bungrua tthabik pawl zuartu West Coast ih hnattuan a rak si). Kah-ta-phuatphin, kan neihawknak cu Calaifornia ramkulh ih, Laguna Tipikap ah a si ih, mothuam le mipa thuam dum khal a tak ah an rung cang. Ka sunmang bu ka tuah hnu thla riat ah, ka hnattuannak company ih minung thazunghram (human resources) ih hotu sang ah ka hung cang.

Himi hi lasi thuanthu a bangnak zawn tla a um. Asinan a tak rori ih a thleng mi an si. Kan neihawk hnu ihsin Jim thawn 'zuk bu' tampi kan tuah. Pathian cun kan zumnak kalhmang thazang cak zet kan tarlang mi pawl hmang in kan nun ah hna a run ttuan ih, thlawsuah malza in sawm.

Na nun ih hmun tinkim ah ziang na duh timi thutluknak tuah aw. Cumi cu fiangfel zet in suangtuah aw. Cu thluh in na tumtahnak bu kha a takah cang ding ih cangvainak thawn na ngah duh mi kha tawlrel aw.  Himi kalhmang tluangtlam hmang in na ruahnak pawl kha hmuh-tham theih thil taktak ah canter aw. A cang thei lo mi sunmang a um lo. Cu thluh in, Pathian cun a fa le pawl thinlung ih a duh mi pe ding ah in tiamkam a si timi kha cingkeng aw.

Glenna Salsbury – " Glenna's Goal Book" from Chicken Soup for the Soul