Zohtthim Tlak Kum 9 Nauhak

Zohtthim Tlak Kum 9 Nauhak

Mahte ukawktheinak nei mi pawlkom pakhat in Hramthok Tlawng pakhat ah Tsunami tuartu pawl rawl zem ding in mizan ih a ruahman mi ah ttuanvo ka nei ve. Ei-in la ding in minung tampi a tlar in an ding thliangthliang. Cumi lakah T-shirt le bawngbi tawi lawng hruhtu kum 9 mi nauhak pakhat khal a tel ve kha ka hmu ngah. Nikhua a dai tuk lawmam fawn. Cui' nauhak cu mi ding tlar ih netabik ah rawl dong ding in a ding ngiaungi. A mai can a thlen tikah ei-in zianghman a tang nawn lo ding ti ka phang. Curuangah amah va be ding in ka va pan.

Cui nauhak cun tlawnginn ih taksa sawizoinak lam an zir rero lai ah ling a hnin ih tsunami tisuar pi a ra thleng tiah i sim. Tsunami a ra thlen lai ah tlawnginn kiang ih hna rak ttuantu a pa cu tlawnginn lam pan in a ra tlan. Tlawnginn dot thumnak varanda ihsin, tlawnginn lam pan ih ratu a pa cu tilian nasa zet in a mawttaw thawn a fen liam lai a rak hmu. A papa cu nun khawsuah dan ding a um lo tluk a si tiah i sim.

'Na nunu teh?' ti ih ka sut tikah an innsang cu tifinriat kap ih um an si ruangah a nunu le a naupa te khal luatsuah theinak ding a um lo tiah i sim fawn. A sungkhat laina pawl thuhla ka sut tikah zamrangte'n khatlam a hoi vukvi ih a mitthli rung luang mi cu a hnul lohli.

A khua a sik tuk ti ka hmuh ruangah ka coat angki ka phelh ih ka sinter. Ka zanriah hrangih ka ngah mi ei-in ihsin a tang lai mi cu ka zalte ihsin ka phorh ih ka pe. "Na can a thlen tikah rawl a tang nawn lo ding ti ka phang. Himi rawl hi ka ngah mi ka covo a si. Kei cu ka ei zo. Nangmah in ei aw," ka ti. Nauhak te cun rawl cu a lak hnu ah a el kunter phah in lungawithu i sim. Cu thluh cun rawl cu a ei lohli ding ah ka ruat. Asinan ka ruah vek a si lo. Rawl cu mi ding tlar thliangthliang pawl ih hmailam ah a va fehpi ih, rawl an zemnak thingkuang tumpi sungah a va ret hnu ah a dinnak zawn ah a ra kir sal.

Ka mang a bang tuk ih, ziangah na ei lo, tiah ka sut. Anih cun, "Kei hnakih rilrawng tampi an um thei. Khitawk ih ka va ret ruangah ei-in a ttultu pawl bangrante'n an zem thei ding," tiah i sawn.

I sonnak ka theih tikah khatlam ka hoi ih midang hmuh lo ding in ka ttap. Hivek in siatnak rapthlak lakih harsatnak a tongtu kum 9 mi, phun thum tlawngta pakhat hnen ihsin hivek zirhnak ka ngah ding ti ih a ruat in ka rak ruat ban lo. Kum 9 mi Japanese tlawngta pakhat hnen ihsin pekhlanawknak cu ziang a si timi zirhnak thin tthawng zet pakhat ka ngah riai.

A tlun ih thil thleng taktak thuhla hi Japan ram ah um in, palik pakhat a ttuantu Vietnam mi Ha Minh Thanh in Vietnam ram ih a rualpi hnenah a kuat mi ca ihsin laksuah mi a si.

A thuhla kimcang siar na duh asile http://newamericamedia.org/2011/03/letter-from-fukushima-a-vietnamese-japanese-police-officers-account.php ah siar theih a si.

Credit: Salone, from Lwin Pyin