Nauhak Cepoh Hlah

Nauhak Cepoh Hlah

Nauhak cepoh timi cu pitling pawl in nauhak ih thinlung tlaitluan thianghlimnak sirhsan in nauhak kha ttih ding, thil dik lo tuah ngah ding, ttap ding ih tuah hrim tinak a si. Cuvek ih tuah tikah pitling cu an hlim nan nauhak hrangah ningzahnak, thinharnak, beidongnak pawl a thlenter.

2008 January 2 zan ah Bejing TV line ih program pakhat ka zoh. Cumi ahcun Hebe khawpi ihsi ra mi faphir panga an sawm. Faphir cu mipa 4 le nunau pakhat an si ih, kum 4 nauhak harhdam zet an si hai. An pangate’n studio sungah an umkhawm hlethli. Tawhawk le thukam elawk tivek a um lo. An mithmai khal a pan siamsi ruangah ka mit in la zet. Lunglut zet in ka zoh hai.

Program kaitu ih thusuhnak hmaisabik cu, “Nan lakah zo in mi hek a hmang bik?” ti a si. Cumi thusuhnak an theih tikah an panga in an thluak a buai. A tir ahcun pakhat le pakhat khih aw in an puh aw cio. Lehhnu ah a dang pakhat ih khih mi zawn thlun in an khih ve. A netnak ahcun nauhak pakhat hnenah an kutzung a thleng thluh. Cui nauhak cu mi hek hmang bik ah a cang. Mi hek hmangbik ti ih puh tuartu nauhak cu a um a nuam lo. Amah le mah mi ttha lo pakhat vekin a thei aw ih um dan khal a thiam nawn lo. A thin khal a phang.

Program kaitu ih thusuhnak pahnihnak cu, “Zo ha midang thawi hmang bik?” ti a si. Nauhak pawl cun pakhat le pakhat an khih aw ton ciamco lala. Pakhat le pakhat an sinak an rel sak aw. A netnak ahcun an kutzung cu mi pakhat lawng hnenah a finkhawm aw lala. “Mi thawi hmangbik” ti ih khih tuar mi nauhak cu a ning khal a zak ih, ttih khal a ttih. 

Program kaitu cun thusuhnak pathumnak a sut sal. Tui ttum ahcun, “Zo ha pa ih thawi tuar tambik?” ti a si. Nauhak pawl cu anhai phah in an khih aw ton ciamco lala. A netnak ih puh a tuartu nauhak pakhat cu a um dan a lai thluh. A mithmai khal ah rel lang hman theih lo mi ningzahnak an um.

Nauhak pawl ih umtudan ruangah program kaitu le mipi cu an hni vualvo rero. A hnilotu cu cui’ nauhak panga lawng an si. An karlak ih um mi pakhat le pakhat duhdawt lainatawknak cu tawhthai a tuar zo. Mipi hmai ah hminsiatnak tacik khen an tuar zo. Donsang par an kai thok ih an thathawhnak le thinlung zangkhainak khal a um nawn lo. An thinlung a buai ih ziang tuah ding ti khal an thei nawn lo.

Cu thluh ah program kaitu cun zalte mawi zet pakhat a rak la ih, “Zalte pakhat lawng a um. Zo ka pe ding?” tiah a sut hai. Nauhak pawl cu zalte cun a hip zet. An zoh dan ah co duhnak mitmeng an tel. An thinlung no zet cun cui’ zalte cu ngah a duhter ko ding. Asinan mitu te ahkhan hminsiat tacik khen an tuar zo ruangah ttha deuh ih cangvaih an duh thlang fawn. A tir ahcun pakhatkhat pe ding in an rel. Zohman in keimah i pe aw, an ti ngam lo. A netnak ah an upabik nu pe ding in thutluknak an tuah. An unu cun zalte a ngah ruangah a lung a awi. A dang pali ih ruahsannak nei nawn lo mithmai cu theih a theih zet. Cumi a hmuh tikah an unu cu a um thiam nawn lo ih, kam feh phah in zalte cu a nautabik pa a pe. Cumi cu zohman ih rak zum cia lo mi a si. Program kaitu in a fak rero lai ah an unu cu a ttap cih. Nasa zet in a ttap. Program kaitu in ziangah na ttap ti ih a sut mi khal sawn thei nawn lo  khop in nasate’n a ttap.

Culai ah unau pathumnak mi virvat pa te in, “Unu in nautabik hi a tthabik ih a ruat ruangah a ttap mi si,” tiah a run ttong. A simfiangnak cun mipi cu a hnihter vualvo.

Cutin, cui program cun nauhak pawl a ttahter ih hlei ah, thuphan tiang a relter. Nauhak pawl ih thinlung thlaphang ding in, hnokbuai ding in a tuah hnu ah program kaitu cun zalte dang pali a va la ih pakhat cio in a pe. Cumi lawng ah nauhak pawl cu an hni thei fang.

Himi program ih tumtah mi hi ziang a si? An sut mi thuhla pawl le an tarlang mi pawl hin ziangvek tumtahnak an nei? Ka ruat thiam lo lawlaw. Ka zoh thei nawn lo ruangah TV ka phit ih a leng ah ka suak. Cuti lo ahcun keimah khal riahsia in ka ttap pang thei.

Himi ca ka ngan phah ahhin Tuluk ram ih fimthiamnak lam mithiam, khawruahphung mithiam, canganthiam pakhat a si mi Tao Xingzhi ih bezai pakhat ka vun mangsuak. Cui bezai cu sullam a nei thuk tuk. Nauhak a fingkhawitu pitling pawl in himi bezai hi tthatei’ hminsin a ttha.

Nauhak, nauhak, a te ti’n mitin in an rel

Nauhak hi a pumrua a te nan a thinlung a te lo

Nauhak hi a te ti ih na ruat ahcun

Nangmah kha nauhak hnak ih te sawn na si.

Pitling pawl in nauhak pawl va cepoh hi a nuam tiah an ruat. Nauhak ih thinlung buai ding ih kan cepoh mi men a si, malte a ttap ding, malte a hni ding ih a cem mai, tiah an ruat. Asinan hivek ih tuah mi hin nauhak kha thinlung hriamhma a neihter. Hivek ih tuah mi hi nauhak pawl hrangah thil hlim-um a si lo lawlaw ih, lunglutza khal a si lo lawlaw. Cuihlei ah himdamte’n ka um timi thinlung nei thei nawn lo ding in, zah tonglotu vek ih ruat aw ding in a tuah a si. Nauhak in amah le mah a upatawknak thinlung a va siatsuah ih, minung pawl thawi’ pehtlaihawk can ah ttihphannak nei sinsin ding in, midang pawl va rinsan ngam lo ding in a tuah. Curuangah hivek thil ton can ah a fingkhawitu in a mawi zawngte’n donkham a ttul. Himi hi thil tenau men a si lo. Nauhak fingkhawinak ah thil tenau tivek a um lo. Pitling mit ih thil tenau hi nauhak hrangah thil thupi zetzet an si ruangah a si. Nauhak pawl thawi’ lehawk can khal ah nuncan zirhawknak lam kha kutkaih ah hman ding a si. Cepoh tuar ringring nauhak cun nuncan sambaunak a nei ttheu a si.

Hminsin: Fimthiamnaklam Mithiam, Fimthiamnaklam Zungbawi, tu fang ah Innsang Fimthiamnaklam Zirhliahtu le Sutrawntu a ttuan rero lai mi ‘Yin Jian Li’ ih “Nu Ttha cu Saya Ttha hnakin A Cungcuang” timi cabu sungih cahram pakhat, Nine Nine Sanay ih a leh mi, lehsawng mi a si.