Duat hrangih Telephone

Duat hrangih Telephone

Cumi mina pindan (ward) ka thlen ni ihsin ka hmai zawn ihkhun ih um nupa tuak khat cu dim tete'n thukam an el aw rero ti ka hmu. Mina a si mi a nupi in tlun a duh. A pasal in um hrih a duh.

Nurse hnen ihsin cui' ihkhun ih mina cu a thluak ah bol a um thu ka thei. Khensa (cancer) si theinak ding a tam tiah in sim.

Catlak phahphah ih an elawknak ttongkam ihsin khawte pakhat ih lothlotu innsang pakhat cu ka mitthlam ah nuamtete'n a hung lang fiang vivo. Nunau cu kum 46 a si. Fa pahnih an nei ih an fanu cu kan dung kum ah phun hra a ong. An fapa cu Sang Tlawng (High School) a kai lai. Loram ekah (acre) 12, vok paruk le caw pakhat an nei. Cumi cu an innsang ih neih mi hmuahhmuah a si.

Zato (hospital) varanda ah card thun ih phone theih mi telephone pakhat a um.  Kan umnak pindan thawn a hla tuk lo. Tulai ahcun kutkaih phone a tam thlang ruangah card thun cop ih hman mi cui telephone cu mipi in an hmang tuk nawn lo. Zato hnuaita dot ah phone card zuarnak dawr a um. Siimlam tinte'n mina kiltu mipa cun cui' telephone thawn an khua ih an inn a fawn ringring.

Cu pai' phone biak awn cu a ring zet. Pindan sangka a khar ta ciamciam hman ah pindan sung ihsin a aw cu fiang zet in theih a theih thotho lai.

Cu pa cun ni tinte'n phone a biak tikah caw rawl na pe zo maw, vok rawl na pe zo maw, hruang sangka na khar maw, thaisun tlawng na kai ding ruangah siim tuk tiang ca zoh hlah, ti'n a fapa cu thu suh le cah a thleithlak rero ttheu. A netnak ahcun, "Na nu cu nat thupipa a nei lo. Tuihnu ni thum-li ah kan ra tlung ding," timi ttongkam thawn net a khar ringring.

Zato an thlen hnu ni linak ah mina ih lu cu zai (operation tuah) ding in zato cun a timlam. An zai ding ni ah mipa pakhat le nunau pakhat cu mina ihkhun kiangah an ra thleng ve. Ka zoh dan ah mina ih u veve an si hmel. A ra thlengtu nunau cun mina ih kut cu a kai ko nan, mina ih mit cu a pasal ih mithmai a zohnak ihsin a tthawn lo lawlaw.

Hngilh-sii an pek zawng ah mina cun a pasal ih kut dir phah in, "Papi, zainak ihkhun par ihsi ka ra ttum sal thei lo asile kan hmuancar ih hramlak ah in phum awla a tawk zo. A dang zianghman tuah a ttul lo. Paisa cem a ttul lo sokhaw maw. Tui ttum vei khat te cu ka thu in ngaisak aw maw," tiah aw tthia derdo in a cah. A biang ah mitthli an rung luang thla zuizo fawn.

"Um, cuvek cu phang duh aw hlah," ti'n a pasal cun a sawn.

Ti fimvar zet tthenkhat mina thahri sungih an vung lut vete'n mina ih mittlang pawl an niam thla vivo. A pasal khal a mithmai ih thahri pawl an dir rin aw.

Nurse in mina cu ihkhun thawn a nor. Mina ih pasal le mina ih u pahnih khal in an thlun.

Malte a rei tikah mina ih pasal cu a pu (mina ih ttapa) in pindan sungah a rak dir phei. Mina ih pasal cu a to. Cu thluh in a ding. A to sal lala. A kut khatlam thawn ihkhun kil zim cu hnget zet in a pawk.

"Ka pu, Sungte an zai mi hi a hlawhtling thei ko ti aw?" tiah nunau ih ttapa cu zoh phah in a sut. A mithmai ahcun bawmtu nei lo in thanau zet ih um nauhak pakhat ih hmelhmang an lang.

"Sibawi in zianghman a cang lo ding a ti cun a cang lo ding si mai. Hnangamte'n um aw," tiah a pu cun mina ih pasal cu a hnem.

Minit kul a rei tikah mina ih pasal cu pindan leng ah a suak. Malte a rei tikah a pu in a rak dir phei sal. Pindan leng ih suak sal, rak dir phei aw sal in vei nga-ruk lai an um rero. Cu thluh lawng ah minung pawl ih kulh vialvial mi mina ihkhun cu pindan sungah a ra thleng.

Mina ih lu cu hmatuamnak var thawn an ttawn. A mithmai cu a raam diadia. A mit sin dan cu itthat menmen vek a si.

Mina cu manhlap zet ih a um a rem sak hnu ah, mina ih pasal cu a leng ah a va suak. Malte a rei tikah thil fun pakhat thawn a ra kir. Ni dang ahcun sang ro pathum hrawng thawi' nung ve ttheu mentu mina ih pasal cun tui ttum ahcun pauh-sii (sang-hlawm-nem) tampi a run lei.

Mina ih ttapa le unu cu tampi'n ei uh ti ih a pek hnu ah amah cun pauh-sii pahnih a la ih ti-sa thawn a dawk thlak khuatkho.

Cumi zan ahcun mina ih pasal cun a hngilh ruangah maw, thil dang ruangah si maw, ti cu ka thei lo.....an inn lam a phone lo.

Cumi zan cu mina pindan a tleu pempem ringring. Zanttim ih zun ka thawh tikah mina ih pasal cu mina ihkhun lu lam kap kiang ah a to ih, lungto milem pakhat vekih cang lo lawlaw in, a nupi ih mithmai a zoh cuahco rero ti ka hmu.

A thaisun sundir ah mina cu a hung harhfim. A ttong thei hrih lo nan mithmai pan siamsite'n a pasal a hun zoh. A pasal cun lungawi zet in a kut pahnih a cul sak rero. Cu thluh ah zato hnuai ah a vung ttum ih mutthai (sweet) a vung lei. Mutthai pawl cu sibawi cawlhnak pindan ah a va pe thul, keimah le kan kiangih mina le a kiltu pawl in pe thul. A kiangkap minung hmuahhmuah in a zem ciamco.

Mina ih dinhmun cu a tthat hmel zet. Oxygen bur an phelh ni ah mina cun tlun a ngen cih lala. A pasal in nauhak pakhat lem vek in a nupi cu cat lo in a lem rero. A hmuh dah mi le theih dah mi thil thar le danglam phunphun khal a nupi a sim ciamco.

Cumi thluh cun ziangkim in amah kel ah an cang. Siimlam tinte'n mina ih pasal cun varanda ih card thun cop ttul telephone thawn an inn lam a phone ringring sal. Cawl lo bang lo in a fapa cu thu a cah. A aw khal a rin kel in a ring thotho. A cah mi thuhla khal amah kel ringring an si ko. A ttongkam thuah aw ringring cu keimah hman in ka baihat (by-heart) zo.

Ni khat cu bual-inn (bathroom) ihsi ka ra suah lai ah mina ih pasal cu telephone a rak be rero lai. Aw ring zet thawn, "Caw kha ni khat rawl vei khat pek cun a ngah zo. Thlatang ih hna kan ttuanter lo ruangah malte a ril a rawn khal ah a poi lo. Vok kha cu tthate'n rawl rak pe aw. A khing a kim cun man ttha zet in kan zuar thei ding. Na nu cu a zia-um sawt zet. Sibawi in tuihnu ni thum-li ahcun nan tlung thei ding in ti," ti'n a au rero lala.

Mina ih pasal cun a rel duh mi a ttong rero. Kei cun mit tthep lo in ka rak zoh cuahco. Ka zoh phah ih ka vun hmuhsuah mi cu telephone ah card a thun lo timi a si.

Mina ih pasal in phone ret ih a lu a hun tun soh tikah mangbang zet ih ka rak zoh lai i hmu. Ka mehtok thawi' phone ka khih hnu lawng ah phone ah card a thun lo ti ka hmuh thu a thei a si hmang.

"Shhhuuu..." ti phah in mina ih pasal cun a hmur parah a mehtok a ret. Ttong awn lo ding ih i simnak a si.

"Pu Lian, tui ttum cu nan inn ih vok le caw na seherh nawn lo maw?" ti'n dimte'n ka sut.

"Operation man hrangah ka pu in vok le caw cu a zuarnak a reipi zo," tiah dim thektho ih i sim tikah, ka lei a cawngcot aw ih ka kut thawn mina pindan lam ka khih.

Cumi rual ciah ah ziangkim in ka vun theithiam. A pasal ih a phone mi cu khua ih an fa pahnih an rak si lo. Mina ihkhun parih a nupi a phone mi a rak si sawn. Ka lungthin a hung khur durdo. Amai' hrangah, a nupi hrangah, le an duhdawtnak hrangah a khur mi a si.

Leitlun ah hivek ih tuarpiawknak le theihthiampiawknak umtertu duhdawtnak dik timi hi a rak um lai ho maw! Romantic rim nam rose pangpar pawl, leitlun cem tiang daih ding thutiamkam pawl um lo hman sehla, an duhdawtnak cu ni le thla a tam sinsin rual in a funkhawm aw vivo ih, cui duhdawtnak cun a kop a rem mi, lungawi aipuannak a um mi, dam sung in a um tlang ding mi bantthuam pakhat a phun ngah zo. An karlak ah a thuk in a nem mi duhdawt lainatnak pawl cu ni tinte'n an nung ringring ih, leitlun ih a mawi le hmui bik mi duhdawtnak pangpar an parsuakter zo. Cui' duhdawtnak pangpar cu thil zaran le tluangtlamte a si ko nan, a rim hmui cun ruh le thlik sung tiang in a fangsuak thluh a si.

Ngantu: Zhu Sha (Readers, Vol. 15, 2007)

Lehnak: Nine Nine Sanay ih leh mi ihsin a rem dan ih leh-her mi a si.