Mi Hmuahhmuah in Sunmang An Nei

Mi Hmuahhmuah in Sunmang An Nei

Kan dunglam kum tawkfang ahkhan thlanglam bialtthen (county) ah mipi pawl senpi tthansohnak thuhla tawlrelpi ding in ttuanvo ka la. Ka tumtah mi cu mi hmuahhmuah in mahte todelhawk theinak thazang kan nei thluh timi langter ding le cumi thazang nunsuahter ding kha a si. Cumi bialtthen ih senpi tthansohnak a tawlreltu pawl hnenah, hrinhnam dangdang le innsang dinhmun dangdang ih minung pawl bur khat ih in kawhkhawm sak ding ah ka dil. Cui mi bur cu Zirtawp (Tlawngkai Ni Nga) tinte'n nazi pathum sung tonkhawmnak ka neihpi hai ttheu ding. Ka ttulhai ding mi a si ruangah paisa maltakte khal ka dil cih hai.

Cui mi bur lakih mi hmuahhmuah pakhat cio ih ka cibai ttheh vetei' ka ttong mi cu, "Na sunmang ziang an si ti theih ka duh," timi a si. An zate'n mi mumal lo deuh zoh in in zoh hai.

"Sunmang? Sunmang kan nei lo."

Kei cun, "Asile, nan nauhak lai ah ziang a cang? Tuah duh mi thil pakhatkhat na rak nei ko lo maw?" ka ti.

Nupinu pakhat in, "Sunmang thawn ziang na tuah thei ding ti ka thei lo. Zinghnam pawl in ka fanau pawl an siatsuah thluh zik thlang," a ti.

Kei in, "Ehei! Ttih a va nung ve. Si hlah, zinghnam le na fanau pawl ah buainak naza zet na nei a si cu. Cumi cu ziangtin kan bawm aw thei ding?" tiah ka sut.

"Ka sangka ah pop-ong tampi an um ruangah sangka phar thar pakhat ka bun sehla a ngah ko."

Cutikah, "Hitawk ahhin sangka phar bun thiam nan um maw?" tiah ka sut hai.

An lak ih pacang pakhat in, "Kan dunglam reipi ahkhan hivek hi ka rak tuah dah nan tu ahcun dung ka sip nasa zo. Asinan ka zuam hnik pei cu," a ti.

Nupinu ih sangka phar bun a paih ding ahcun dawr ih sangka phar va leinak ding daih paisa mallai cu ka neih thu ka sim. "Na tuah thei ding ah na ruat ko maw?"

"Aw, ka zuam ding."

A hmai zarh ih kan tokhawm sal tikah nupinu hnen ah, "Na sangka cu nan bun zo maw?" tiah ka sut.

"Aw, bun zo e," tiah i sawn.

"Cuti a si ahcun sunmang cu kan man thok thei thlang, a si ko lo sawm?" Hni suamsi in i zoh.

Cu ttheh ah sangka bunsaktu cu, "Ziangtin na ruat?" tiah ka sut.

Anih cun, "Um, si ko, thil hlim-um zet a si. Tu ahcun ka thinlung a zangkhai sawt ngaingai," tiah i sawn.

Cumi cun cui' mi bur cu sunmang man thok ding in a bawm. Himi hlawhtlinnak fatakte vek ih lang mi hin sunmang man hi thil atthlak a si lo zia cui' mi bur cu a theihter. Himi karbak fatakte pawl hin mipi cu thil pakhatkhat cu a cangsuak thei taktak a si timi a hmuhter ih, a ruatter fawn.

Cu thluh ah midang pawl kha an sunmang thuhla ka sut thok. Nupi pakhat cun sungttuan si ding in beiseinak a neih ringring thu a rel. Kei in, "Cuti asile, na lamzin ah ziang in an lo dawnkham?" tiah ka sut. (Himi hi ka thusuhnak neta deuh a si ringring).

Anih cun, "Fa paruk ka nei. Ka um lo sungih anmah rak fingkhawitu ding ka nei lo," a ti.

"Kan hawlsuak pei," ka ti hnu ah, "Hitawk ahhin himi nu in tualsung college ih training a kai sung ah zarh khat ah ni khat maw, ni hnih si maw a fa paruk rak fingkhawi theitu ding kan um maw?" tiah ka sut.

Nupinu pakhat in, "Kei khal in fa ka nei ko. Asinan ka fingkhawi sak thei ding," a ti.

"Asile, cutin kan ruahman ding," ka ti. Ruahmannak cu kan tuah fel ih nupinu cu tlawng a kai.

Mi hmuahhmuah in thil pakhatkhat cu an hmusuak. Sangka buntu pacang cu inn thilri tuahtthatu (handyman) ah a hung cang. Nauhak rak fingkhawitu nu cu license ngah nauhak fingkhawitu ah a hung cang. Zarh 12 sungah an zate'n senpi tthansohnak ihsin ka thlah liam thluh thei. Hivek hi vei khat lawng ka tuah lo. Vei tampi ka tuah hlawhtling zo.

#Chicken Soup for the Soul - Virginia Satir ih ngan mi "Everybody Has A Dream."