Christmas Can ih Komawksalnak
Christmas can ahhin hmun tin ih minung pawl cu, leitlun ih a
theihdah mi thilmak ropibik thuhla a thar ih tep sal ding in, mai kawhhran cio
ah an khawm aw ttheu. Asinan rel sal ka duh bik mi thuanthu cu thilmak ti theih ciah a si lo.
Cui' thuanthu cu pastor kum no zet pakhat hnenih thleng mi a
si. Cui' pastor ih biakinn cu a hlun zet. Tui hlan reipi ahcun an biakinn cu a
rak hlung (mipi an tam) zet. Cui' biakinn pulpit ihsin mi hminthang pawl in thu
an sim ih, a biakttheng hmai ah thla an rak cam. Mi lian le rethei ti um lo in
an khawm aw ih, cui' biakinn khal mawi zet ih an rak sak mi a si. Asinan tu
ahcun khawpi sungih cui' biakinn umnak hmun hrangah can ttha pawl an liam thluh
zo. Biakinn cu a siat nasa zet thlang. Asinan pastor le a nupi kum no cun an
biakinn sia parah an zumnak an hngat lai. Rong hnihnak fung, sobul le zumnak
thawi' an ttan ahcun biakinn cu an tuah ttha sal thei ding tiah an zum.
Curuangah an nupa in hna an ttuan thok.
Asinan December thla nelam ah thlipi nasa zet pakhat cu tiva
horkuam hrut in a hrang. Thlipi ih hmual natnak bik cun biakinn cu a nuai. Thli
le ruah ih nuainak ruangah biakinn sung biakttheng dung zawn ciah ih phar cu a
erhawknak a kok ih a pop. Pastor le a nupi cun riahse zet in hnawmbal cu an
phiat fai. Asinan phar ong cu an thup hlo thei lo. Pastor cun phar ong cu a zoh
cuahco lawk nan, "Na duhnak kim hram seh!" ti'n a thinlung a kilkhawi
thei sal.
Asinan a nupi cu a ttap: "Christmas thlennak ding ni
hnih lawng a duh thlang si!"
Cumi ni siimlam ah pastor tei' nupa cu thinlung phurnak nei
lo zet cingte'n, mino pawlkom sumhawlnak hrangih tuah mi lilam (auction) puai
ah an va feh. Lilam phuangtu in thilri bawm pakhat a ong ih, a sung ihsin
sui-le-saiho rong ih cei mi cabuai khuh puan pakhat a hun phorh. Thilri picang
zet pakhat a si ih, pii 15 zikte a sau. Asinan hlan lai thilri a si. Tuini ah
zo in cuvek thilri an hmang nawn ding? Phur hrot lo ih a man lanawknak mallai a
um. Cumi laifang ah pastor cun ruahnak ropi pakhat a vun ruatsuak. Curuangah
puan cu dollar ruk le cent (pia) sawmnga in a lei.
Cabuai khuh puan cu biakinn ah a keng ih biakttheng dung ih
phar ong umnak zawn ah a pharh. A pop a khuh thei thluh. Sui le saiho rong
thawn mawi zet ih ttelh mi a si ruangah, a tleu mawi zet cun biakkhawmnak
hruaitu pawl tonak hmun khal a tlet serhso fawn. Hlawhtlinnak ropi zet a si.
Curuangah lungawi zet in Christmas sermon timtuah ding ah a tin.
Christmas hmuah ni sundir hlan deuh ah pastor cu biakinn ah
a va feh ih sangka a ong. Culai ah bus hngahnak hmun ah khawsik lakih ding rero
nunau pakhat a hei hmu.
"Minute 40 hlan ahcun bus a ra thleng sal lo
ding!" ti a ruatsuak. Curuangah nunau cu biakinn sung ih khua a hlum deuh
ding ruangah ra lut ding in a hei ko.
Cu nu cun pastor tei' khua ih mi neinung innsang pakhat
hrangah an fanau kilkhawitu ttuan ding ih tonsuhnak (interview) nei ding in
khawpi ihsi ra mi a si thu, asinan a hlawhsam thu a sim. Ralbuai ruangih
beuhawltu (refugee) a si ruangah, English a thiam fumfe lo.
Nunau cu biakinn sung tohkham ah a to ih, hlum ding ih a kut
nuai rero phah in a cawl. Tawkfang ah a lu a kun ih thla a cam. Cu thluh ah,
phar ong khuh ttha ding in pastor in sui-le-saiho rong cabuai khuh puan a remh
rero lai cu a hun zoh. A ding thutthi ih khawmhruaitu pawl tonak hmun lam ah a
hung kai. Cabuai khuh puan cu a zoh. Pastor cun hni-no phah in thlipi in
biakinn a siatsuah thu a sim. Asinan pastor ih ttong cu a ngai hmel lo. Puan cu
a vun ttham ih a kutzung karlak ah a vun ther.
"Keimai puan a si hi!" a ti. "Rawl ei puai
hrangih ka hman mi puan a si!"
Puan zim pakhat a hun khai ih, a par ih um mi hminkhen tawi cu
pastor a hmuh. Pastor cu a mang a bang zet. Nunau cun, "Brussels ah ka
pasal in keimai hrang rori ih a hleice in i tuahsak mi a si! Hivek hi a dang a
um thei lo ding!" tiah a sim bet.
Cumi hnu minute malte sung cu thinlung sa hiamhiam in thu an
rel tlang. Nunau cun Austria ram, Vienna khawpi ih suak a si thu, a pasal thawn
Nazi pawl an dodal ruangah an ram suahsan ding ih an ruatcat thu a sim. Midang
pawl in a dangdangtei' fehsuak ding in thuron an pe. Anih cu a pasal in
Switzerland ram ih thleng mi tlangleng parah a thlah. Ramri khatlam ih an
innsang thilri pawl a kuat thleng thluh thei vete'n a pasal cun ra fin ding in
ruahmannak an tuah.
Asinan a pasal cu a hmu sal nawn lo. Lehhnu ahcun a pasal cu Nazi
pawl ih mi thahnak thawnginn sungah a thih thu a thei.
"Amah tel lo ih ka rak fehsuak kha ka ti sual mi a si
ti'n ka ruat ringring. Tuini tiang ka vahvaihnak san khal hi cumi ruangih
hremnak ka tuar mi tla a si thei men," tiah nunau cun a sim.
Pastor cun a theitawk in a hnem ih, cumi puan khal la ding in
a sim. Asinan a la duh lo. A feh can a kim tikah a feh liam.
Christmas Hmuan Zan a hung thlen tikah cabuai khuh puan cu
hlawhtlinnak ropi zet a si ding ti a fiang vivo. A mawi theibik ih lang ding in
sathaufar tleu pawl thawn thiam zet in an ceibawl.
Biakkhawmnak an ttheh tikah pastor cu sangka ah a ding.
Biakinn cu mawi an ti zet thu mi tampi in pastor hnenah an sim. Asinan pacang
hmelfang tlaitluang pakhat cu ruat buai mi nei vekin a um. Cu pa cu kum
sawmli-nga hrawng a si ih, an tualsung ih nahzi siat tuahtthatu a si.
Cu pa cun pastor hnenah aw ring lemlo in, "A mak ka ti
zet. Kan dunglam kum tampi ahkhan Pathian ih a cawlh hahdamter zo mi ka nu pi
in hivek puan pakhat hi a nei," a ti. Cu thluh ah hni-no phah in,
"Vienna ih kan inn ahcun, bishop zanriah ei kan sawm can lawng ah ka nupi
in hivek puan hi cabuai khuhnak ah a hmang ttheu," tiah a sim bet.
Cumi a theih tikah pastor cu a mang a bang zet. Nahzi siat
tuahtu cu cumi ni thotho zinglam ah biakinn sungih a ra mi nunau pakhat thu a
sim.
Nahzi tuahtu cun thinlung buai zet in pastor ih ban a pawk
thutthi ih, "A cang thei ding maw? A nungdam lai maw?" a ti.
An pahnih in cui' nunau tonsuhnak rak tuahtu innsang cu an va
hawl ngah. Cu thluh ah pastor ih mawttaw thawn khawpi lam an pan. Cutin,
Christmas Ni a thlen tikah Christmas Puai tampi hmang tlang lo in, thinlung
rethei zet ih a rak tthentthek aw mi nahzi tuahtu le a nupi cu an kom aw thei
sal.
Himi thuanthu a theitu hmuahhmuah hrangah, biakinn phar pop ko
ih a rak nuaitu thlipi ih lungawiza tumtahnak cu a langfiang zo. Himi hi minung
pawl cun thilmak a si an ti. Asinan amai camher (season) a si ve hrimhrim ti
sehla na lung a kim thotho cu ka zum.
-
No comments:
Post a Comment