Khuilam Kan Hoi Ding?

Khuilam Kan Hoi Ding? 

Ka dam lo ruangah, le ka damlonak in a hngong tel mi harsatnak phunphun ruangah siseh, kan ram dinhmun tlasia ruangah siseh, thinhar beidong can a tam thei nasa. 

Innsang nun le miphun huap hrangih ruahsannak phunphun cu khawthim lakah lamzin an hlo cupco țheu. 

Thilri man a kai zutzo, sumpai ra lut ding um lo dinhmun ahcun thin a har duh zet. 

Ka dam tuk hrih lo tikah, hna hi ka țuan thei ceu ih, ka hlawh hi kan khop lo nasa. Tui' thla khal, fangfai man kai zutzo țih in fangfai dip hnih kan lei khawl cia thawn, thla hrek ah ka hlawh a cem. 

Asinan, thaisun ah kan paisa a cem ding ih, tipsun ah ziangtin kan nung ding kan ti rero lai ah, zan mang hman ih ka ruah ban lo thlawsuah kan dong. Ram dang ih um naunute pakhat in Pathian hna a țuannak ah ti'n paisa in kuat. 

Ka ruat rero ahhin a mak ka ti tuk! Kan paisa a cem ti hi kanmah nupa si lo, minung dang zohman in an thei lo. Zokhal kan sim lo. A theitu dang um sun cu Pathian lawng a si. 

Zato (Sizung) ah, paisa kan nei nawn lo ih thaisun cu kan tlung mai ding kan ti lai khal ah, amai' minung pawl hmangih in bawm țheutu Pathian thotho kha a si. 

Hivek thu ka ruah tikah Saam 121 hi ka thinlung ah a lang ringring. 

Israel mi pawl cu Pathian be ding in Jerusalem ah an feh țheu. An fehnak lam tluan ah rukru le suamhmang siseh, kiosa le thil țihnung lak ihsin siseh, an him theinak ding ah thla an cam țheu. 

Sal an tan lai, leitlun hmun za kip ih an thlen hnu khal ah Zion Tlang lam hoi in thla an cam țheu ti kan hmu. Daniel tla cu Zion Tlang umnak Jerusalem lam hoi in ni khat ah vei thum thla a cam țheu. Ziangahtile Israel Pathian cu Zion Tlang ah a um ti'n an zum (Isaiah 8:18; Saam 74:2). Zion Tlang hngilh ding cu an siang hrimhrim lo. 

Saam 121 ih "Khualtlawng Thlacam Zaihla" a si ih, Jerusalem lam pan ih khual a tlawngtu pawl in an sak mi zaihla khal a si. Tui san ahcun sangka phar ah an tar ih, khual an tlawn zik ah an samh ta, an ra tlun khal ah, inn sung luh hlan ah an samh ta țheu. 

Leitlun ah khualtlawng in kan rung ih, Van khawpi lam kan pannak lamzin hrang khal ih kan sak thei mi zaihla a si fawn. 

Zion Tlang cu David in Pathian ih thukam kuang a retnak hmun, Siangpahrang Solomon in temple a dinnak hmun a si ih, Jerusalem khawpi ih hmuihmel khal a si. Ziangahtile tlang pawng a si ih a langsar cuang. 

Zion Tlang timi an sunsak zia cu, amah a tlang pawng te lawng si lo in, Jerusalem khawpi aiawhtu ah si seh, Israel ram aiawhtu ah khal ah si seh, an hmang țheu. 

Kannih zumtu hrangah cun, kan thinlung Pathian lam ih a hoi can, zumnak mit in Pathian kan thlir can hi Zion tlang lam kan hoi can a si. Kan thinlung hi leitlun ah si lo in, amah Pathian lam kan hoih ahcun, Pathian in kan țul mi leitlun thil cu in pe țheu. 

Leitlun pumcawmnak phunphun ah cangvai in kan buai zet can ah Pathian hi kan hngilh can a um țheu. Zion Tlang lam hoi ding kan mang lo țheu. 

Asinan in bawm theitu le in mang ringringtu cu amah Pathian a si ih, amai' lam kan hoi tinte'n anih cun in cohlang, in bawm ih in cawisang țheu a si. 

Saam 121

1 Tlangpar khi ka hei cuan;

Khui in so bomnak ka hnenah a rat ding? 

2 Keimah bomnak cu Bawipa ih hnen ihsin a ra;

Lei le van tuahtu Bawipa ih hnen in. 

3 Amah cun a lo bahter lo ding.

A lo humtu cu a itthat lo ding. 

4 Israel mi humtu cu a itthat dah lo; A sing khal a sing dah lo. 

5 Bawipa in a lo kilveng ding;

Nangmah lo hum dingah na kiangah a um. 

6 Sun ah ni in a lo siatsuah lo dingih,

Zan ah thlapi khalin a lo tuahmawh lo ding. 

7 Țihphannak hmuahhmuah ihsin, Bawipa in a lo hum ding.

Thlaphang lo tein a lo humhim ding. 

8 Bawipa cun na suah le na luh ah a lo kilveng ding;

Atu le kumkhua in.

Zuk: Zion Tlang, tui' san ih an zuk mi pawl.