Duhdawtnak ih Hmual

Duhdawtnak ih Hmual

Kan dung zarh ahkhan Chattanooga khawpi ah kumcam nei ih tuah ttheu mi "Mipa Tonkhawmawknak" kan nei. Cutawk ih thawhhlam kan ei lai ah zatlanglam mithiam (sociologist) hminthang Tony Campolo in thuanthu pakhat a rel. A rel mi thuanthu cu rel sal ding ih dil rero mi ah a cang. A hleice in "Mipa Tonkhawmawknak" ni ahhin rel ding ih dil a hlawh hleice. A rel mi thuanthu cu hitin a si.

Jean Thompson timi tlawng saya-nu pakhat a rak um. Tlawng kai ni hmaisabik ah a hoha mi phun nga tlawngta pawl hmai ah ding in thuphan pakhat a sim. A tlawngta pawl zoh phah in an zate'n bangrepte'n a duhdawt hai ih, bangrante'n a zohkhen hai ding thu a sim. Cumi cu tlawng saya tamsawn ih rel ttheu mi thuphan a si ve ko. Asinan cumi cu tui ttum sapbai ahcun a cang thei lo sinsin. Ziangahtile a hmai zawn, tohkham tlar thumnak ah tlu deuh tliaitliai ih totu cu Teddy Stoddard timi nauhakpa a si ruangah a si.

Kan dung kum ihsin Mrs. Thompson in Teddy cu a rak hminsin zo. Teddy cu nauhak dang thawn tthate'n an lek tlang dah lo. A hnipuan khal an bal ih a taksa khal bualawkter ttul cia ringring in a um. Cuihleiah kawm nuam lo ci a si fawn.

Thil um dan zoh tikah, thla tam a liam hlan ah Teddy ih cahnah pawl ahcun cati sen pawr zet thawn 'X' tumpipi ngan in, cahnah zimlam ah a tum theibik ih 'F' ngan cu nuam a ti zawng tak si ding in a lang.

Teddy cu mithmai dur khiamkhiam ih um ttheu nauhak fatakte a si ruangah zohman in an kawm paih lo a bang. Mrs. Thompson cu Teddy tei' class zohkhentu a si ruangah a tlawngta pawl ih thuhla hminsinnak hlun pawl a zohfel a ttul. Cumi cu an tlawnginn hotu pawl in tlawng saya pawl ih tuah ding ah an phut mi a si. Nauhak pawl ih thuhla hminsinnak hlun pawl a zoh ttum ahcun, thuhla dangdang ruangah, Mrs. Thompson cun Teddy ih thuhla cu netabik ih zoh ding ah a ret. Asinan Teddy ih thuhla hminsinnak bu a vun on tikah a thin a phu dukdi.

Teddy ih phun khat saya cun, "Teddy cu nauhak thluak ttha, thuhla theih duh nei tam zet a si ih, hnih a man cia ringring. Felfaite'n hna a ttuan ih a nuncan ziaza a ttha fawn. A kiangih um nuam zet nauhak a si," tiah a ngan.

Teddy ih phun hnih saya cun, "Teddy hi tlawngta cuangmuar a si ih a tlawngkaipi pawl khal in an ngaina zet. Asinan a nu ih nat dam thei lo a neih mi hin a buaiter ih, innlam ih a nun cu talbuainak harsa zet a si tengteng ding," tiah a ngan.

A phun thum saya cun, "Teddy cu a taima zet lai. Asinan a nu ih thihnak hi a hrangah tuar a har tuk. A ttha theibik si ding in a zuam nan a pa in a ngaihsak hrot lo. Thil tthenkhat tawlrel a si lo ahcun a inn lam nun hin a rei hlan ah a tuahmawh ding," tiah a ngan.

A phun li saya cun, "Teddy cu a beidong zo ih tlawnginn khal ah phurnak a nei mumal nawn lo. Rualpi a nei tam lo ih a cancan ah class sungah a itthat. A khul a fung ih mi buaithlak pakhat ah a cang thei mi a si," tiah a ngan.

Tu ahcun Mrs. Thompson cun buainak ih bulhram cu a thei ngah zo. Asinan Christmas tlawng cawlh can a nai tuk zo fawn. Cuihleiah, tlawnginn hnattuan lam ih a buai tuk ruangah zianghman a mangngaih mumal lawk lo. Asinan Christmas tlawng cawlh hlan ni netabik ahcun Teddy Stoddard ngaihsak ding in thil pakhat in a run normawh. Cumi ni ahcun a tlawngta pawl cun laksawng an pe cio. Laksawng dang hmuahhmuah cu hri mawi zet le cahnah tleu zetzet ih tuam mi an si. Asinan Teddy ih pek mi laksawng cu ei-in khainak bag cehtan mi, cahnah rong uk rit zet kha fumfe lo zet ih ttawn mi a si.

Mrs. Thompson cun laksawng dang lakih cumi laksawng vun on cu a hreh deuh. A vun on tikah nauhak tthenkhat cu an hni vualvo ngaingai. A sung ahcun tuah cop lungmankhung thawi' cei mi faute (bracelet) a rak um. Lungmankhung lem tthenkhat an tla hlo zo fawn. Faute kiang ahcun cologne zihmui tthen li ih tthenkhat lawng a tang mi palang pakhat a um bet. Faute cu a mawi tuk lawlaw ti phah in nauhak pawl ih hnih awn cu a cawlhter vukvi. Faute cu a bun ih a ngel ah zihmui malte a kap.

   

Tlawng ttum a cu ih nauhak pawl cu aipuang zet in an tlan tlung vualvo. Asinan Teddy Stoddard cun midang hmuahhmuah an tlun tiang a hngak hnu ah, "Mrs. Thompson, tuini cu ka nui' rim vek ciah na nam," tiah a sim. Teddy a suah vete'n Mrs. Thompson cu a cabuai sirhsan ih tthilhtthuam in, cui' Christmas tlawng pih hlan ni netabik ahcun, a malbik in nazi pakhat sung hrawng cu a ttap. Cumi ni ihsin casiar, cangan le ttong zirh cu a cawlhsan. Cumi ai ah nauhak pawl a zirh thok hai. Cuihleiah an zate'n "Teddy" ti ih an kawh mi cu a hranpa in a ngaihven ringring.

Mrs. Thompson in a somdawl tikah Teddy ih thluak cu a hung nung sal a bang. Tha a pek tam sinsin rual in, Teddy cu a thiam cak thei sinsin. Camibuai thupi a um ni tinte'n Mrs. Thompson cun cologne zihmui hnih a hngilh dah lo. Kum a rung cem tikah Teddy cu nauhak felbik pakhat ah a hung cang. Cuihleiah nauhak zate'n bangrep ih duhdawt ding ah thutiamkam a rak tuahtu Mrs. Thompson ih 'ngainat hleice mi' ah a hung cang.

Kum khat a rei tikah Mrs. Thompson cun a sangka hnuai ah Teddy ih kuat mi ca pakhat a hmu. Cakuat ahcun bulhram tlawng (elementary school) ih a ton mi zirhtu hmuahhmuah lakah amah cu a ngainat bik mi a si thu a ngan aw.

Cakuat dang a ngah hlan ah kum ruk a rak liam. A kum ruknak ah Teddy cun an class ih a pathumnak si in sang tlawng (high school) a ttheh zo thu, amah cu a ngainat bik mi zirhtu a si lai thu, a rak ngan.

Kum li a liam hnu ah Mrs. Thompson cun cakuat dang pakhat a ngah sal. Cakuat ahcun Teddy cun harsatnak tampi tong hmansehla tlawng cu kai peh tengteng a tum thu, sunlawihnak sangbik thawi' phunsangtlawng ttheh a tum thu a ngan. Amah cu a ngainat bik mi zirhtu a si lai thotho thu a ngan fawn.

Kum li a liam lala tikah cakuat dang pakhat a ra thleng lala. Tui ttum ahcun Teddy cun bechelor degree a ngah hnu ah, malte zir peh bet ding ih thutluknak a tuah thu a ngan. Cakuat ahcun amah cu a ngainat bik mi zirhtu a si lai thu a ngan. Asinan tui ttum ahcun Teddy ih hmin cu a sau deuh. Cakuat hnuailam ahcun "Theodore F. Stoddard, M.D" timi hmin sign a um. (M.D = Doctor of Medicine/Sibawi)

Thuanthu cu a cem hrih lo. Cumi kum tthal can ah cakuat dang pakhat a ra thleng lala. Teddy cun fala pakhat a tong ih a nupi ding a si ti a theihfiang thu a ngan. A pa in kan dunglam kum hnih ih a thihsan zo ruangah a nupi neih puai ding thuhla ah buainak a neih thu, mopa ih nu a to ttheunak tohkham ah Mrs. Thompson in to a remti sak a beisei thu, a ngan.

Mrs. Thompson in Teddy ih nupi neih puai ah lungmankhung lem tampi a hlo zo mi faute kha a bun ding maw bun lo ding ti cu nangmahte'n vun hisap mai aw. Asinan cumi ni sunglawi ahcun Mrs. Thompson cu kan dunglam kum tampi liam zo ih Christmas tlawng cawlh hlan ni netabik ih a rim vek kha a nam tengteng ding timi cu thapawk khal ka ngam.

Hram: Roy Exum ih "The Last Day of School."