20 March, 2016

Naute Lem Pathum

Naute Lem Pathum

Siangpahrang fapa zirhtu mifim putar in siangpahrang fapa hnenah naute lem fate pathum a pe. Siangpahrang fapa cu a lung a hmui lemlo.

"Naute lem lamlam i pek cu, nunau ah i ruat maw si?" a ti.

Mifim putar cun, "Hmailam can ih siangpahrang ttuantu ding hrangah laksawng ka pek mi a si kha. Tthate'n zoh awla, naute lem pakhat cio ih hna ah ong pakhat cio an um ti na hmu ding," tiah a sim.

Cu thluh in mifim putar cun hridai pakhat pe ih, "Naute lem pakhat cio ih hna kua ah hridai hi thul aw," a ti.

Thinlung hnok deuh phah in, siangpahrang fapa cun naute lem pakhat cu a la ih a hna kua ah hridai a thul. Hridai cu naute lem ih khatlam hna ihsin a ra suak. Mifim putar cun, "Himi hi minung ci khat hmuhsaknak a si. An hnenih na sim mi pohpoh cu an khatlam hna ihsin a suak kir sal. Zianghman khawl mi an nei lo," tiah a sim.

Siangpahrang fapa cun naute lem pahnihnak ih hna ah hridai a thul sal. Hridai cu naute lem ih kaa ihsin a ra suak. Mifim putar cun, "Himi hi minung ci hnihnak a si. Na sim mi pohpoh kha, mi hmuahhmuah a va sim ve thluh," tiah a sim.

Siangpahrang fapa cun naute lem pathumnak a la ih a hna kua ah hridai a thul lala. Tui ttum ahcun hridai cu a ra suak sal nawn lo. Cutikah mifim putar cun, "Himi hi minung ci thumnak a si. Na sim mi pohpoh cu a sung ah a khum thluh. A suak kir sal dah lo," tiah a sim.

Siangpahrang fapa cun, "Ziangvek minung a tthabik?" tiah a sut. 

Mifim putar cun zianghman ttong lo in naute lem dang pakhat a pe sal. Siangpahrang fapa in naute lem palinak ih hna kua ah hridai a vun thul lut ih, a khatlam hna ihsin hridai cu a ra suak sal.

Mifim putar cun, "Thul sal aw," a ti.

Siangpahrang fapa cun a thul sal tikah, hridai cu a kaa ihsin a ra suak sal. A vei thumnak a thul tikah a ra suak sal nawn lo.

Mifim putar cun, "Himi hi minung tthabik a si. Rinsan tlak si a duhtu cun ngai lo ding can, daitei' um ding can, le ttongsuah ding can pawl a theihthiam a ttul," tiah a sim.

Hram: Theih lo mi cangantu ih "The Three Dolls."


No comments: