Phone Pakhat Si Ka Duh

Phone Pakhat Si Ka Duh

Tlawng sayama pakhat in zanriah khawh ah a tlawngta pawl ih inn-ca (homework) a cekfel. A pasal cu, a kiang ah phone thawn game a rak lek rero. Cumi cu amai' dan a si.

Inn-ca a netabik a cekfel lai ahcun sayama cu a mitthli a rung luang. A pasal in a hmuh tikah, "Nupi, ziang na cang? Ziangah na ttap?" tiah a sut.

Nupi: Mizansun ah ka tlawngta pawl "Ka Saduhthah" timi thulu thawn ca ka nganter.
Pasal: Cumi ruangah nang lamlam ziangah na ttap?
Nupi: Cabu netabik ka cekfel lai ah ka ttahhah a suak.
Pasal: Ziangvek si a ngan?
Nupi: Ka siar ding, rak ngai aw.

"Ka saduhthah vekin cang thei sehla phone pakhat si ka duh. Ka nu le pa in an phone cu an duh zet. An phone an ngaihsak tam ruangah keimah in ngaihsak thei lo can hman a um. Ka pa cu zung ihsin bang zet ih a ra tlun can khal ah phone hrangah cun a can a pe thei. Ka hrang ahcun can a nei lo. Hnattuan thupi a ttuan lai khal ah a phone a awn cun zamrangte'n a va kai lohli. Asinan hnattuan thupi an ttuan lai ih ka ttah ahcun in ngaihsak lo can khal a um. An phone thawn an lek. Keimah in lehpi lo. Phone thawn midang an biak lai ahcun ka rel mi a thupit khalle in ngaisak dah lo.

Curuangah phone pakhat si ka duh."

Cumi thuhla a ngai thluh tikah a pasal cun thin nuam lo zet in, "Zo ih ngan mi si?" tiah a sut.

A nupi cun, "Kanmai fapa ih ngan mi," tiah a sawn.

.........................

San thar thilri pawl hi an ttha ko. Asinan innsungsang kan pehtlaihawknak olsamtertu lawng an si a ttul. Kan thinlunglam pehzomawknak satcattu an si ahcun thil ttha lo ah an cang.

Nauhak cun an kiangkap ih cang mi ziangkim an hmu thluh ih, an tuar thluh. Cumi pawl cu an thinlung sungmuril thuk zet tiang ah a tangta ih, an nun ah hmual na zet an nei.

Na phone maw na fa ziang na hril ding?

Hram: S. Manikandan – True Humanist