Arabian Zan pawl
(1) Sheherazade le Shahriar
Kum tamngaipi liam zo ah khan, siangpahrangram kaupi pakhat a rak um. Cumi siangpahrangram cu Persia ihsin China tiang a pharhdarh aw. China ramri ihsin Ganges tivapi a luannak India ram tiang a thleng. Cumi siangpahrangram neinung zet a din thok lam kum zali sung cu thlah-sin siangpahrang (dynasty) in an uk.
Cui siangpahrangram cu lainatnak thinlung neitu siangpahrang dingfel le ram ukhruai thiam zet pakhat ih san ah dinhmun sangbik a thleng. Cumi siangpahrang cun Shahriar le Shahzaman timi fapa pahnih a nei. An unau in an duhdawt aw zet. Kum tawkfang a rei tikah siangpahrang dingfel cu a thi ih a fapa upa sawn Shahriar in siangpahrang a run ttuan. Siangpahrang thar Shahriar cun a nau Shahzaman cu Persian Kumpiram ih hmunram kau zet uktu siangpahrang ah a tuah ve.
A can a kim tikah Sultan Shahriar cun fala mawi zet Sultana timi cu nupi ah a tthi. Sultan Shahriar cun a nupi cu hril hleice mi hlawnthil mankhung phunphun thawn a thuam. Amai' nunnak hnakin Sultana cu a duh sawn. Asinan kum tawkfang a rei tikah a nupi Sultana cu a parah a rinum lo ti a run thei. Sultana cu ttangttawm sualnak tuah hmang zet nunau a rak si. Sultan Shahriar cu a pa vekih siangpahrang dingfel a si ruangah a nupi rinum lo khal cu anmai' ram dan vek in thih dantatnak a pe. A nupi Sultana thahnak rapthlak tawlreltu ding ah a Khawnbawlpa (Wazir) a fial.
A nupi thah a si hnu ah Sultan Shahriar cu ni tampi sung a nupi zuun ngai in a um. Khatlam ah a nupi parih a ning a nat tuk ruangah, leitlun ih nunau hmuahhmuah cu mi rinum lo hlir an si tiah a ruat fawn. Curuangah phuba la ding in cindan sualral zet pakhat a tuah thok. Ni tinte'n nupi thar a tthi ih a thaizing ah a thahter ringring. A nupi thattu ding ah Wazir cu a fial ringring fawn. Wazir cun siangpahrang thupek a el ngam fawn lo ruangah nuam ti lo zet in thupek cu a thlun ttheu. Sultan Shahriar ih siangpahrangram sung mipi hmuahhmuah khal himi thu ah an thin a heng ih an riah khal a sia.
Ni khat cu Wazir ih fanu upa sawn Sheherazade in a pai' hnenah, "Papa, Sultan ih tuah mi thil sualral hi zohman in an ngaih lo. Himi hi ka tawpter thei ding tiah ka ruat," ti'n a sim.
Wazir cun, "Ka duat, na tuah thei ahcun mangbangza a si ding! Nunau hmuahhmuah lawng hman si lo in, khawpi sungih mipi hmuahhmuah na parah an lung a awi ding. Asinan ziangtin na tuah tum?" tiah a sut.
"Sultan hi pasal ah ka nei ding," tiah Sheherazade cun a sim. Cutikah Wazir cu a thin a phu dukdi. A mitthli khal an rung luang cih fawn. Mitthli tla phah in, "Ka duat fanu, nan neihawk hnu a thaizing ah ziangvek hualvan in a lo hngak ding ti cu na theih kha. Ka kut rori ih ka fanu thah ding cu a cang thei lo," tiah a sim.
Asinan Sheherazade cun a thu a tthin duh cuang lo. Sultan thawi' neihawk a tum hnget thotho ruangah Wazir cun thinlung rethei zet cing in a lungkimpi. Curuangah Wazir cu Sultan hnenah a va feh ih a fanu in amah Sultan neih a duh thu a va sim. Sultan khal a mang a bang zet. Asinan Sheherazade cu fala mawi zet a si ti a theih ruangah neihawk ding cu a lung a kim.
A thaisun ah Sultan cun puai ropi zet tuah in Sheherazade cu nupi ah a tthi. Tthitumnak laksawng ding ah, a naunu Dinarzade in siangpahrang innpi ih amah ra umpi ding in Sheherazade in a pa Wazir a dil. Zan a rung thlen tikah Sheherazade in a naunu Dinarzade hnenah, "Ka duat naunu, tuizan cu ka hnenih na riah theinak ding ah Sultan ka dil ding. Zing khua a van hlan te ah i tthang awla thuanthu sim i dil aw. Cumi thluh ah ka khawkhannak ka tuah thok ding," tiah a cah.
Cutikah Dinarzade cun, "Asinan, cumi thawn nan nunnak cu ziangtin na run thei ding?" tiah a sut.
Sheherazade cun hni siamsi phah in, "Hngak hrih awla rak zoh mai aw," a ti.
Sultan a ra thlen tikah Sheherazade in, "Siangpahrang Bawipa, tuizan hi ka nun ih zan netabik a si. Curuangah ka hnenah ka duhdawt mi naunu Dinarzade hi riakter ve hram ding ah ka lo dil," a ti.
A dilnak cu Sultan in a lungkimpi. Zingpit khua a van zawng ah Dinarzade cun Sheherazade cu a tthang ih, "Duhdawt mi ka u, na theih mi thuanthu ngai nuam zet pawl lakih pakhat te in a netnak ah in sim ta thei pei maw?" tiah a sut.
Sultan cun thatho zet in, "Thuanthu maw?" a rak ti vukvi.
Sheherazade in, "Aw. Thuanthu tampi ka thei. Ka rothil netabik hrangah zangfahte'n thuanthu pakhatte'n i relter ta hram aw," a ti.
Sultan cun a lung a kim.
Cumi ihsin Sheherazade cun thuanthu a sim thok ih, zan thawng khat le zan khat tiang a sim peh vivo. A rel mi thuanthu pawl cu thinlung an hip neh tuk ruangah Sultan cun a nupi cu a that siang lo. Ziangahtile neta ah ziangtin thuanthu a feh vivo ding ti theih a duh ringring ruangah a si.
Curuangah nunau fimvar Sheherazade cun a thuanthu rel cu a thok.
No comments:
Post a Comment