Kiosa ih Zanriah

African Thuanthu Roling (7):

Kiosa ih Zanriah

Vei khat lai ah, Tlangmual Pasarih umnak hmun ah ramsa pawl ih an duh zet mi hmunram pakhat a um. Cutawk hmun cu tidai a thiang ih hrampi khal an hring ttha. Asinan cutawk ahcun kiosa cakvak zet pakhat a um. Cui kiosa cun ni tinte'n ramsa pahnih lole pathum a deh ringring.

Ni khat cu kiosa hnenah ramsa pawl an va feh khawm ih, "Ngainat mi Kiosa, Tlangmual Pasarih ah sunvute'n tlan rero ih ramtawih hi na hrang khal ah a ttha lo. Ni tinte'n na zanriah hrangah ramsa pakhat kan lo kuat ringring sawn pei," an ti.

Kiosa khal in, "A ttha. Asinan tu rori ihsin in pek thok a ttul. Ka ril a rawng zo. Zanriah cu ni tinte'n ka ngah tengteng khal a ttul hokhaw aw! Ni tin ih in kuat lo a si ahcun, ka duh zatzat in ka lo deh hluahhlo ding si ko!" a ti hai.

Ramsa pawl cun, "Ngainat mi Kiosa, in deh thluh hram hlah. Ni tinte'n ramsa pakhat kan lo kuat ringring ding," an ti.

Cu thluh ah ramsa pawl cun camcawh fung an zuk. Cumi ni ih kiosa zanriah ding cu zukneng a si. Ni dang khal ah ni tinte'n ramsa pakhat an kuat ringring.

Asinan ramsa pawl cu an ai a puang thei lo. Pakhat cio in, "Aw, thaizing cu keimai' can a thleng thlang ding!" tiah an ruat hai.

Ni khat cu Sabek ih can a thleng. Asinan Sabek cu a riah a se lo. Mithmai pante'n a um ih, "Boruak a ttha ko, a ttha tuk ko lo maw? Ttih hlah uh! Kiosa in i ei lo ding!" a ti.

Cu thluh ah Sabek cu tiva ah a vung feh ih tidai sung ah a dawp. Cu thluh in ciarbek lakah a talpawlok ciamco. Kiosa hnen ahcun bal biarbiar in a va feh.

Kiosa in a rak hmuh tikah a thin a heng tuk ih, "Khavek ramsa borhbah kha ka zanriah ah ka duh lo," a rak ti. Sabek cun, "Ngainat mi Kiosa, kei cu na zanriah si ding ih ra ka si lo. Kei hnakih tum sabek pakhat rak hruai ih ra ka si. Asinan lamzin ah kiosa dang pakhat kan tong ih a zanriah ding ah i lon si lawm," a ti.

"Tlangmual Pasarih ahhin kiosa dang a um maw?" tiah kiosa cun thinheng zet in a sut.

Sabek cun, "Aw. Um e. A tum ih a cakvak zet. Nang hnakin a cakvak ding ka zum," a ti.

Kiosa cu a thin a heng deuhdeuh ih, "Cui kiosa cu i hmuh hnik!" a ti.

Sabek khal in, "Awle. Ka va feh pei," a ti ih tikhur tumpi pakhat umnak ah a hruai.

Sabek cun tikhur cu vun zoh phah in, "Zoh hnik! Khinah a um ih sabek khal a hnenah a um lai," a ti.

Kiosa cun tikhur a vun zoh tikah amah le sabek ih hmuithlam cu tidai sungah a vun hmu. Cuvete'n vung sual ding in a dawp thla ih, a hung kir sal nawn lo.

Ramsa pawl cu an lung a awi zet. An khir an zuang, an lam ciamco ih Sabek parah an lung a awi hngin. 
Hram: Dinner of the Lion – African Folktale.