Mi Lungawi

African Thuanthu Roling (11):

Mi Lungawi

Kum tampi liam zo ahkhan Sakta Africa ram ah lal pakhat a rak um. A neinung zet ih nupi tampi le fanau tampi khal a nei. Asinan lungawinak a nei lo. Amahte'n, "Ziangkim ka nei thluh. Asinan ka neih mi in ka lung an awiter cuang lo. Lungawi thei ding in ziang ka tuah a ttul pei? Ka va thei lo ve aw!" tiah a ruat.

Vei khat cu thinheng zet in, "Ziangruangah ka lung a awi thei lo? Lungawi ding in ziang ka tuah a ttul?" tiah a siahhlawh pawl a sut.

A siahhlawh pakhat in, "Maw, ka Lalpa! Van khi hun zoh hnik! Thlapi le arsi pawl ih mawizia khi! Hun zoh awla hringnun hi ziangtluk in a ttha ti na hmu ding. Cumi cun na lung a awiter ding," a ti.

Lalpa cun, "Lamlam ah, lamlam ah! Thlapi le arsi pawl ka zoh cun ka thin a heng. Ziangahtile ka hung lak thei lo mi an si!" tiah thinheng zet in a sawn.

A siahhlawh dang pakhat in, "Maw, ka Lalpa! Awnmawi teh hi ziang a bang? Awnmawi cun minung lung a awiter. Zingpit ihsin zan tiang awnmawi kan lo tum sak ding ih, awnmawi cun na lung a awiter ding," a ti ve.  

Lalpa ih mithmai cu thinhengnak thawn a sen remrem deuhdeuh men.

"Lamlam in, ka duh lamlam lo! Ruahnak atthlak a si cu. Awnmawi cu a ttha ko e. Asinan zingpit ihsi zan tiang, ni khat hnu ni khat ngai ringring ding maw? Ngah lo lawlaw! A ngaihnak a um lo si mai!"

Curuangah a siahhlawh pawl cu hmun dang ah an feh thluh. Lalpa cu a pindan ropi ahcun thinheng zet in a to. Tawkfang ah a siahhlawh pakhat a ra kir sal ih upatnak thawn a lu a kun hnu ah, "Maw, ka Lalpa, na lung awiter theitu ding pakhat ka lo sim thei ding ka zum," a ti.

Lalpa cun, "Ziangmi a si?" tiah a sut.

Siahhlawh cun, "Tuah a olsam zet. Mi lungawi pakhat na hawl ding ih a angki phelhter in nangmah in na hruh ding. Cutikah a lungawinak cu na taksa sungah an lut ding ih amah vekin na lung a awi ve ding," a ti.

Lalpa cun, "Na ruahnak cu ka duhzawng a si," a ti. A ram sungih mi lungawi hawl ding in a ralkap pawl a thlah hai. Ralkap pawl cu hmun tinkim ah an feh. Mi lungawi hawl hmuh ding cu a rak ol lo zet.  Asinan ni khat ahcun khawteberek pakhat ah, "Leitlun ih mi lungawi bik ka si," titu pakhat an va tong ngah.
Cu pa cu mi rethei a si. Asinan mithmai pante thawn hla a sak thei ringring. Ralkap pawl cun cu pa cu an lalpai' hnenah an hruai. Lalpa cun, "A netkhawt ahcun mi lungawi ka si thei thlang ding a si hi!" a ti ih a angki a hlit cih.

Cu thluh ah, "Mi lungawipa cu run hruai uh!" a ti. Pindan sangka a ong aw ih, mi fatakte, dum ngelngi zet cu mithmai pan siamsite'n a rung lut.

Lalpa cun, "Ra aw, ka rual. Na angki hlit aw," a ti. Mi lungawipa cu hni siamsi phah in a ra nai vivo. A ra thlen nai tikah Lalpa cun ziang a hmu ti na thei maw?

Mi lungawi, leitlun ih mi lungawi bik cun, angki a rak nei lo!

Hram: The Happy Man – African Folktale.