Savun Hrihrual

African Thuanthu Roling (6):

Savun Hrihrual

Hlan laipi ahhin Africa ram ah ramtawipa pakhat a rak um. A hmin cu Ogalussa (Aw-ka-lu-sa) a si. Vei khat cu ramtawi ding in a feh ih, a nupi le a fapa panga cu lo ah hna ttuan in an feh. A nupi fanau cu siimlam ah an ra tlung. Asinan Ogalussa cu a ra tlung hrih lo. An rak hngak rero nan ra tlun ti a nei lo. Curuangah zanriah an rak ei san. Zan a rung thleng. Zing a rung thleng. Zan a rung thleng lala. Asinan Ogalussa cu a ra tlung hrih lo. Zarh khat a liam. Thla khat a liam. Cutikah Ogalussa ih nupi cun an fapa paruknak a run hring. An fapa paruknak ih hmin cu Puli a si.

Asinan Ogalussa cu a ra tlung hrih cuang lo. A nupi cu ni tinte'n lo ah hna a ttuan. A fapa pawl khal in an bawm phahphah. A fapa pawl cu hramlak ah ram an tawi phahphah fawn. Can tawkfang a rei tikah an sungkua cun Ogalussa cu an hngilh. An nauta bik Puli khal a feh thei thlang. Asinan a ttong thei hrih lo.

Can a liam ih ni khat cu Puli cun a kaa fatakte thawn a hun ttong. A ttong hmaisabik mi cu, "Ka pa khuiah a um?" timi a si.

A upabik khal in, "Kan pa hi khuiah a um?" a ti ve.

Upabik sangtu in, "Hramlak ah kan va hawl a ttul," a ti ve.

A pathumnak in, "A fehnak lamzin a um kha," a ti.

A palinak khal in, "Cumi zin kan zawt ding ih kan hmu tengteng ding," a ti ve.

A panganak cun, "Tu ah feh cih uh si!" a ti.

An meithal an la ih an panga in cumi zin cu an zawt vivo. Hlatakpi tiang an zawt vivo ih, a netnak ahcun Ogalussa ih ruh le a meithal hlunpi umnak hmun an va thleng.

A upabik cun, "A ruh pawl hi ke remkhawm thluh thei," a ti. Cu thluh in milai pakhat ih ruh umdan vek ciah in a remkhawm hai.

A pahnihnak cun, "A ruh hi vun thawn ka tuam thei," a ti ih a ruh tuamtu vun a umter.

A pathumnak khal in, "A ruangpum hi thisen ka neihter thei," a ti ih thisen a neihter.

A palinak khal in, "A thaw ka thawter thei," a ti. Malte sungah Ogalussa cun a thaw a hun thaw ih, an unau panganak cun ding thei ding in a tuah.

Ogalussa cu a hung ding ih a mit a hun meng. Cu thluh in, "Khuiah si ka meithal?" a ti. A fapa pawl cun a meithal hlunpi cu an pe ih inn ah an tlung tlang.

Inn an thlen tikah tidai a bual ih a sam a tan (Mithi Khua ihsi ra kir pawl cun an sam an tan tengteng a ttul). Cu thluh ah zanriah an ei ih, ni malte sung cu a cawl hahdam. An sungkua in an lungawi tlang zet. An venghnen pawl khal in an lungawipi. Ogalussa cun a venghnen pawl cu puai tuah a sawm ih cawpi pakhat a that. A nupi in puai hrangah sa a suang ih, Ogalussa cun cawpi mei thawn savun hrihrual pakhat a tuah. Hrihrual zim ah a thlaih bol tleu zetzet tthenkhat a thlaih ih a mawi zet.

Puai an tuah thok tikah mipi cu an hnipuan ttha bik hruh in an ra hai. Awnmawi tumthiam pawl in awnmawi an tum ih mipi cu hlasaktu le lamtu an um. An zate'n an nuam zet.

Ogalussa cun puai ih ratu pawl cu a savun hrihrual a hmuh hai. Savun hrihrual lakih mawi bik a si an ti cio. Mi tampi in anmah pe ding in an dil. Asinan zohman a pe lo.

Cu thluh ah mipi hnenah cun, "Can reipi liam zo ahkhan, ramtawi dingin hramlak ah ka feh ih kiosa cak zet in i rak deh.  Can reipi sung ka thi. Ka fapa pawl in ka ruh an ra hmu ih nunnak in neihter sal. Tu ahcun nan lakah ka um thei thlang. Ka fapa pawl parah ka lung a awi zet! Duhdawt mi rual le tla, ka neih mi savun hrihrual hi savun hrihrual hmuahhmuah lakih mawi bik a si nan ti. Asinan pakhat lawng ka nei. Curuangah ka fapa pawl lakah Mithi Khua ihsi ka ra kirsal theinak ding ih i bawmtu tthabik hnenah ka pe ding," tiah a sim.

Mipi hmuahhmuah cun, "Zo in a bawm ttha bik?" tiah an ruat rero. An ruat suak thei mai fawn lo.

A netnak ah Ogalussa cun, "Ka savun hrihrual hi kan naute Puli ka pek a ttul. A ttongsuah hmaisabik mi cu 'Ka pa khuiah a um?' ti a si. Amai' ruangih ka fapa pawl in hramlakih in ra hawl ruangah a parah ka lung a awi. Nan hnen le ka innsang hnen ih ka thlen sal thei ruangah Puli parah ka lung a awi," a ti.

Cu thluh ah a fapa nauhakte Puli cu a hnam. Mipi hmuahhmuah khal in, "Ogalussa, na ti dik!" an ti cio.

Cuvekin,  African minung pawl cun tuini tiang khal ah, "Minung pakhat cu na cinken sung ahcun a nung ringring a si," an ti ttheu.

Hram: A Whip Out Of The Tail of A Cow – African Folktales.