Sumdawngpa le Khuavang

Arabian Zan1001:

(2) Sumdawngpa le Khuavang

Vei khat lai ahhin khawlipi pakhat ah sumdawng milian tontaw a rak um. Innsang duhnungza a nei ih, a nun ih ttulhai mi ziangkim khal a nei thluh. Vei tampi cu siangpahrangram dang pawl ah va tlawng in a sumtuahnak a kauter vivo ih, rualpi le hnattuanpi thar dangdang khal a tuah vivo.

Vei khat cu hmun hlapi ih um mi khawpi pakhat ah feh a tum. Cutawk khawpi ih feh ding in nelrawn ramcar pakhat paltlang a ttul ruangah inn ihsin zingte'n a pok. Lamzin ih ei ding ah tidai, tthulhfaupi rah (dates) le lamcaw ro tthenkhat a keng. A fehnak khawpi ih a thlen tikah hlawhtling  zet in sum a tuah ta. Cu thluh ah inn thlen ding hngakhlap zet in a tlung sal.

Sundir ih nelrawn lamzin a zawh ruangah a cau zet. Oasis cirh pakhat a hmu ih a va pan. Cirhti thawn a hmai a phiah, tidai a in ih, tum kung pakhat hnuai hnem ah cawl ding in a to. A ken mi tthulhfaupi rah tthenkhat a phorh ih a ei phah. Tthulhfaupi rah ei phah cun umhar phen ah a kiangkap cu lungto thawn a deng kual rero. Beunak ttha deuh hmuh beisei in khaw dang a tang phah rero fawn. A netnak ahcun cirhti umnak ah a feh sal ih a kut a va kholh.

Cumi ciah ah amah pan ih ra tlan ciamcotu hmel ttihnung zet nei khuavang tumpi a hmu thutthi. Khuavang cun a lu tlun ah mi sat man cia in ralnam tleu zohzo a thlir cia fawn. Rei lo te ah khuavang cu sumdawngpa ih hmai ah a ra thleng ih, "Na thihnak ding a nai. Ka fapa na thah ngam ruangah ka lo that ding," tiah ring dumdo in a ra ttong.

Sumdawngpa cun mangbang zet in, "Ziangtinmaw! Na fapa ka that e?" tiah ttihnak aw tthia thawn a sut. Cutikah khuavang cun, "Si. Lungto na den lai ahkhan ka fapa ih lu ah na ngah ih a thi," a ti.

Sumdawngpa cun, "Poi ka ti zet, ka pu. Na fapa tuahmawh ka tum mi a si lo. Zangfah lainatnak nei hram aw!" tiah ngaidam a dil.

Khuavanga cun, "Zangfah na dilnak cu ka ngai lamlam lo ding. Ka fapa vekin na thih a ttul. Tu ah ka lo that cih ding," ti phah in sumdawngpa cu leilung ah a dirh thluk. Cu thluh ah sumdawngpa sat ding in a kut a hun thlir.

Sumdawngpa cun, "Ka pu, na tuah duh mi cu na tuah thei ko. Asinan ka saduhthah netabik cu i tuahter ta hram aw," tiah a dil.

Khuavang in, "Aw, na saduhthah netabik cu ziang a si?" tiah a sut.

"A netabik hrangah khawlipi ih ka nufa pawl i va tonter ta hram aw. Khawlipi ah ka feh ding, ka leiba pawl le tawlrel ttul mi pawl ka va cingfel ta ding, ka innsang hmailam hrangah sumpai ka tawlrel ta ding ih, ka thih hnu ih vancungram ka thlen theinak ding ah mi rethei pawl ka va bawm ta ding."

"Ehei! Na dil mi cu a va tam ve. Cumi tuahnak ah ziangtluk na rei ding?"

"A malbik in kum khat cu ka ttul ding, ka pu. Tuini ihsin kum khat a kim ni ciah ah hitawk hmun ciahciah ahhin ka ra lo tong ding tiah sia ka sam. Cumi can ah na fapa hrangih phuba la ding in i that thei."

Khuavang cun a vun ruat nguaingo ta hnu ah, "Asinan tuini ihsi thla hleihnih a kim ni ciah ih na ra kirsal lo a si ahcun, na hrangah thihnak rapthlak sawn ka ruahman ti hi cingkeng aw," a ti.

Sumdawngpa cun lungkimnak ah a lu a kun. Cu thluh ah manhlap zet in khawlipi a pan. Ni thum a feh hnu ah a inn a va thleng. Inn a thlen vete'n a innsang pawl a ko khawm ih nelrawn ih a ton mi thil pawl a sim. A innsang cun amah vun tthen ding cu an tuar thiam lo. Ninghang riahse zet in an ttap ciamco. Asinan kum khat a kim ahcun a thutiam cu a hlensuah hrimhrim a ttul thu a sim hai.

A thaizing ah, sumdawngpa cu zingte'n a tho ih a sumtuahnak lam cingfel ding in a buai zet. Danthiam pakhat a ruai ih roca a ngan ta. Sumdawng dang pawl a pek a ttul mi hmuahhmuah a pe thluh. Mi rethei le tlasam pawl hnenah hnipuan le sumpai pawl a pe. A innsang hrang khal ah can tampi a pe.

Tawkfang ah kum khat cu a rung kim. Sumdawngpa in nelrawn ih khuavang a ton ding ni hrangah khua a rung vang. A nupi le fanau pawl cu mitthli rualriat thawn a mang-ttha hai. Cu thluh ah mitthli tla rero phah in nelrawn lam a pan.

Nelrawn ih cirhti umnak a va thlen tikah khawsia a hmuh netnak hmun ciahciah ihsin khuavang cu a rak hngak. Thinkhur zet ih khuavang a rak hngak lai ahcun a umnak lam pan ih putar pakhat a rat kha a hmu. Putar cun zuknengnu pakhat a hruai. Putar cun sumdawngpa cu a ra pan ih, "Eheu, hitawk ah nangmah lawng ziang na tuah? Hitawk sehvel ih um mi khuavang na ttih lo mawsi?" tiah a sut.

Sumdawngpa cun putar cu a cibai hnu ah a thuanthu lungngaiza cu a sim. Putar cun khuavang hmuh ve a duh ruangah sumdawngpa thawi' rak hngak tlang a tum. Malte a rei hnu ah sumdawngpa cun putar pakhat a rat lai a hmu lala. Cumi putar cun uico dum pahnih a hruai. An hnenih uico hruaitu putar a ra thlen tikah, "Eheu, midang pawl! Sundir ni ling hnuai ah ziang thil in hitawk ah a lo toter?" tiah a sut hai.

Zuknengnu hruaitu putar in sumdawngpai' thuanthu lungngaiza cu a sim. Uico hruaitu putar cun malte sung a vun ruat lawk. Cu thluh in, "Kan unaupa le khuavang hrokhrawl tonawknak zoh ding in hinah ka um ve ding," a ti. Cu thluh in sumdawngpai' kiang ah a to ih khuavang a ra thlen ding an rak hngak. Nazi hrek a rei tikah putar dang pakhat a ra thleng lala. Anih khal in ziang an hngak ti a ra sut. Sumdawngpai' thuanthu le khuavang ih thuhla a theih tikah ziang a thleng ding ti zoh ding in an hnenah a to ve.

Minute malte a rei tikah ring zet in khua a ri durdo ih meikhu luailo sung ihsin khuavang cu an hmai ah a hung suak. Meiling vekih a sen mi a mit le a kut ih ralnam zoh tikah ziangtluk in a thin a heng ih, ziangtluk in sumdawngpa thah a hiar ti a lang. Sumdawngpa cu a pan cih ih leilung ah a hlon.

Cu thluh ah, "Na ra thleng thlang! Na nun netnak a thleng a si hi!" ti ih huk dumdo phah in sumdawngpa ih lu sat ding ah a kut cu tlunlam ah a thlir.

Putar pawl cu ttihphannak thawn an khur thluh ih, sumdawngpai' hualvan zoh in riahsia zet in an ttap. Cu thluh ah zuknengnu hruaitu putar cun, "Aw! Khuavang, na huham hmai ah ka lu ka kun a si. Ka lo dil mi hi i ngai hram aw," a ti.

Khuavang cun thinheng zet ttongkam thawn, "Ziang na duh, putar?" tiah a sut.

Putar cun, "Zangfahte'n ka thuanthu hi ngai hram aw. Sumdawngpai' thuanthu hnakih mangbangza le maksak sawn ih na ruat asile, sumdawngpai' nun tthen-thum tthen-khat na zuah ding," a ti.

Khuavang cu a thin a heng nan putar ih thuanthu cu theih a duh.

Curuangah zuknengnu hruaitu putar cun a thuanthu cu a rel thok.