Thilmak Tuahtu Pathian

Thilmak Tuahtu Pathian

Midang cun tu ih ka nundam lainak san hi Pathian Kut Cak ruangah a si, thilmak hi a um thei taktak timi langtertu minung ka si in ti ttheu. Ka hmin cu Brian Boyle a si ih, ka thuanthu cu a hnuailam vek hin a si.

2004 kum ih sang tlawng (high school) ka ttheh hnu thla malte ah, vei khat cu ti-leuh ka cinh-nak ihsin inn ah ka tlung. Lamzin ah ka mawttaw cu mahte thilri thle thla thei ci truck mawttaw pi thawn nasa zet in kan pah aw.

Kan cangsualnak rapthlak cun ka awm le lung an tlekter thluh. Ka hnak-ruh, liang-ruh le kawng-ruh an ruai, ka cuap an kuai, ka kaileng le ka thin khal hmun tinkim an siat, ka la (spleen) le thinhnit (gallbladder) an thlong, ka thisen zatek 60 a suak, ka kehlam liang thahri nasa zet in an siat ih, thla hnih lenglo cu lungcimit zianghman thei lo in America ram, Maryland ramkulh, Cheverly khawpi ih Prince Georges Zato ah cet thawi' nunter cop ka si.

Kan cangsual lai thuhla cinken mi ka nei lo ih, kan cangsual hlan ni malte khal zianghman ka cing nawn lo. Kan pahawk hnu thuhla ka cinken hmaisa bik mi cu thilbawm var tumpi sungih ka um thu a si. Ka kehlam ah mipa nauhak pakhat a to ih, ka vorhlam ah mipa le nunau nauhak tampi an to (mipa le nunau nauhak pawl ka tinak san cu keimai' kum rual hrawng vekih ka hmuh hai ruangah a si). Cumi cu tuini tiang hman ah ka thinlung mitthlam ah fiangte'n an lang lai. Cutawk ih ka umnak san cu ka thei lo. Cutawk hmun ih a hmaisa bik kherkher ah ziangruangah ka thleng ti khal ka thei lo.

Cutawk ih ka to rei deuhdeuh rual in ka kiangkap cu ka hmu fiang thei sinsin. Ka kehlam ih totu mipa nauhak cun cell phone a nei ih, mi pakhatkhat kawhsak ka duh le duh lo i sut. Kei cun, "Aw, ka nu le pa in kawhsak in, ka duhdawt hai thu in simsak thei pei maw?" ka ti. Ka cinken mi neta deuh cu zato ihkhun ih ka hung tthangharh lai a si. Cangvai thei lo lawlaw ka si ih, ka kiangkap ah cet thilri tam liailiai an um ti ka hmu. Ka nunnak i runtu siivailam thilri cangvai rero pawl lak ahcun ka nu le pa cun sup aw thei lo ih ttap le raak rero phah in, an ttah an cawlh can tete ah ka hung damtthat sal ding thu in sim rero ti ka thei.

Cumi hlante ah kha cun neta bik thutthennak hmai ih din ding hngaktu mi ding tlar lakah ka ding tiah ka rak ruat. Asinan ka tikcu a kim hrih lo a si ding. Ziangahtile malte a rei hnu ah ka hung nung sal. Himi hi ka tuarnak a thoknak fang a si lai.

Tuamhlawm hleicenak pindan (intensive care unit) ih ka um lai ah vei riat ka thi lawk. Ka lungcimit ihsi ka hung harhfim hnu khal ah ka ttong thei lo ih, zohman ka pehtlaih thei lo. Ka nundam asile ka pindan ihsin leng-tohkham (wheelchair) thawn ka suak ding ih, cuti a si lo ahcun ruak tuamnak thawn ka suak ding tiah an ruat. Thil ttha lam hman ah leng-tohkham thawi' suah ding hnakih zia-um deuh a um lo hrimhrim. Ka hriamhma bese tuk pawl le ka khel-ruh ruai thluh ruangah ke ih feh sal ding cu thil cang thei lo lawlaw ah an ruat. Ti-leuh sal ding phei cu, suangtuah thil men ah a cang. Ka taksa vek thotho in ka sunmang khal an kuairuai thluh ve. Asinan, Pathian in ka hrangah khawkhannak a nei ti ka theih ruangah ka bei a dong lo. 

Lungcimit in thla hnih, zaikhuainak (operation) vei 14, thisen thun vei 36, thisen thenfainak vei 13 pawl ka paltlang hnu cun ka taksa khing cu pound 100 a tla. Cumi hnu lawng ah Baltimore khawpi ih tundinawksalnak hmun ah ka feh thei thlang. Keimahte'n ttong, rawl ei, feh, tidai bual thei ding in a thok ihsin ka zir sal a ttul. Cuvek vanduainak pawl ka paltlang hnu khal ah Waldorf khawpi ah a leng mina dinhmun in ka tuamhlawmawk a ttul hrih.

Thla malte sung leng-tohkham ka hman hnu ah naute feh zir vekin feh ka zir thok. Ka feh thei sal hman cu thilmak a si. Asinan feh lawng men si lo, a tlan ih tlan thei tiang ka tum. Sibawi pawl ih an rel mi a dik lo a si ti langter ka duh. Cumi ka tuah thei hnu ah, tili ih tidai va leuh sal ka duh fawn. Ka cuap cekfelnak malte kan tuah hnu ah zarh khat ah maltete tidai ka leuh thei thok.

Cangsualnak ka ton hlan ah tumtah mi pathum ka rak nei. College kai ding, ti-leuh team ih tel ding, le ironman triathlon (ti-leuh, thirleng-to le tlan zuamawknak pathum kop) ih tel ding pawl an si. Ka ti-leuh cinh pi mi ka rual ttha Sam Fleming thawn thla malte sung maltete ih ti-leuh ka cinh sal hnu ah, ka hriamhma pawl hi ka sunmang dawnkhamtu ah cangter lo ding in thutluknak ka tuah. Cumi hnu thla ruk ahcun St. Mary College ih tlawngta thar ka si ih, ti-leuh team khal ah ka tel thok.

Hiti ih rel men le thuhla umdan tarlang zuatzo men ahcun ziangkim hi olsam zet le maltetei' famkim vivo mai tla an bang. Asinan thutak sawn cu a olsam lo timi a si. Tuihlan khal ah a olsam lo ih, tu khal ah a olsam cuang lo. Tuarnatnak le riahsiatnak cu a tak rori ih tuar rero a si ih, can ttha ah siseh, can siava ah siseh, ka lamzin tluan in thlun ringring. Ihkhun ah it in, luanglu cuan cuahco in, pastor in na ttongkam netabik a hngak ti hun hmuh lai ih na nun ding ruahsan a um nawn lo ti hun theihsuah cu boruak hahdam a si lo hrimhrim.

Keimahte'n ziangruangah ka parah hivek a thleng ti vei tampi ka ruat rero ttheu. Nauhak ttha ka si ringring, tlawnginn khal ah ca thiam lam ka si ih, biakinn ah ka khawm aw ringring fawn. Ziangruangah hivek thil rapthlak hi ka parah a thleng? Ziangruangah Pathian in hivek hi a thlenter siang? Ni tampi sung cu a san le vang ka ruat rero.

Ka ruat vivo tikah thu pakhat ka ruatsuak puppi. Ka hmailam thuhla ka suangtuah kual vivo mi le rinhlelhnak thinlung thawi' ka tuah mi thusuhnak pawl cun thusuhnak dang pakhat a suakter. Cui thusuhnak cu, ziangruangah runsuah ka si, timi a si. Cumi hnu cun thusuhnak dang zianghman ka nei nawn lo. Ka nun ih tumtah mi netabik ziang a si ti ka thei. Sibawi pawl in tuihnu kum 50 nundam thei ding ruahsannak na nei in timi sungah, ni khat vivo cu a ttha theibik ih hmang in, midang pawl ih nun le zumnak ah thathawhnak um thei ding in le ruahsannak neihter ding in ka hmang.

Pathian ih nunter sal mi ka si ruangah, vei tampi ahcun 'Lazarus vek' tiah in ti ttheu. Cumi hlei ah midang nun le ruahsannak tharthawhter thei sinsin ding in, kan dung thla malte ahkhan Michigan ih tuah mi Steelhead 70.3 half-ironman tlanzuamawknak ah ka tel khawsuak thei. Cuihlei ah 2007 Ford Ironman World Championship ah tel in siang ih mipi thinlung thathotertu ding ah ka thuanthu le tlanzuam dan pawl cu lehpannak lam thathotertu media hrangah an la. Cumi cu December 1 ah NBC ih Ironman tlanzuamawknak thuhla tarlangnak ah an thlahsuak.

Ka thuanthu cu damsuahsalnak le kel awh ding ih kirsalnak thuhla a si. Asinan cumi lawng ka duh tawk lo. Leitlun ah a tthalam ih hmual nei ding khal in tuah ka duh. Ka nun ni khat vivo hi a ttha theibik ih hmansuah ka tum. Ka zuamnak le taimaknak pawl hmang in minung pawl kha an sunmang beidong san dah lo ding ih tharthawh le thawtkhum ka duh. Ziangvek boruak siava a si hman ah Pathian an zumnak cawlhsan lo ding khal in tharthawh le thawtkhum ka duh. Ziangahtile thil ziangkim hi san le vang nei ih thleng mi an si.

#Brian Boyle ih "Miracles Happen – True Story."