Long Hnattuan Sindbad ih Khualtlawn Vei Nganak

Arabian Zan 1001:

(19) Long Hnattuan Sindbad ih Khualtlawn Vei Nganak

Khavek thil pawl ka tong dah cing khal in, daitei' um men cu ka di a riam thei cuang lo. Hahdamtei' um men ih nomnak cu ka ning mai ih, thlengawknak le zuamsuahnak tuah ka hiar sal. Curuangah ka poksuak sal. Asinan tui ttum cu keimai' saksuah mi tangphawlong thawn a si. Ka tangphawlong cu long cawlhhmun nai bik ah ka ret. Keimai tangphawlong thawn ka fehnak san cu ka hril mi long cawlhhmun pohpoh ih cawlh thei ka duh ih, ka cam duh zatzat cam ka duh ruangah a si. Asinan tangphawlong khat ih keimai thilri hlir phurh cu ka tum hran cuang lo. Curuangahi thlun ve hai ding in ram dangdang ih sumdawng tampi khal ka sawm hai.

Thli a hran tthat hmaisabik ah kan poksuak ih, reipi kan feh hnu ah tipithuanthum sungih tikulh pakhat ah kan thleng. Cumi tikulh cu zohman ih kan theih lo mi a si ih, minung khal an um lo. Asinan va hliakhlai kan tum. Tikulh parih hlapi kan feh man hlan ah mura tii pakhat kan hmu. Ka rak hmuh dah mi tluk ih tum thotho a si ih, a keuh zik thlang ti a fiang. Ziangahtile a fate ih hmur in a tii hawng a cuk cop zo. Tham lo ding in ka theipatawp suah in ka dawn rero hai nan, i thluntu sumdawng pawl cun an hreitlung thawn mura tii cu an cek kuai ih, a sungih mura fa no cu an thah. Cu thluh ah meisa an muah ih, mura fa no sa cu can in an rawh. Kei cu thinphang zet in ka ding cuarci ringring.

Vanduainak kotu an ei-in an ei thluh fangfang ti ah, kan tlunlam ihsin phentlam tumpi pahnih in in run khuh thim khumkho. Ka long hotu cun a tontehnak ihsin ziang a si ti a theithiam cih ih, mura fa no ih nu le pa an rat thu in rak auh ciamco. A rang thei bik in tangphawlong ih kai ding ah in fial. Tangphawlong ah kan kai lohli ih, long puanzar kan pharh. Asinan kan fehsuah man hlan ah mura pahnih cu ramh tuar mi an bu umnak ah an thleng ih, an helkual rero. An fa no a parh darh thluh ti an hmuh tikah ttihnung zet in an ai ciamco. Kannih cu kan feh ih malte sung cu kan hmu hai nawn lo lawk. Cutikah kan luat zo tiah kan hna a ngam. Asinan kan tangphawlong tlun ah an ra zuang ti kan hmu lohli sal. An pahnih in kanmah dennak ding ah an tin thawn lungto tumpi an thiar veve ti kan hmu. Thaw hman thaw ngam lo, dai khepkhep in malte sung kan um lawk. Cu thluh ah mura pakhat cun a thiar mi lungto cu a run thlak. Asinan long khaltu in kan tangphawlong cu nasa zet in khatlam ih a herh vukvi man ruangah lungto cu kan kiangte ih tidai sungah a tla. Lungto tumpi in tidai a tthekdarh suaisi ih tipithuanthum tawdeng hman kan hmu ban zikte.

Kan thaw vei khat kan suah man fang ti ah, mura dang pakhat cun lungto a run thlak sal ih, kan tangphawlong vanduai ih laifang ah a rung tla. Kan tangphawlong cu thingphel thawng tampi ah a tthekdarh aw thluh ih, a phurh mi pawl thawn tipithuanthum ah kan darh zelzel thluh. Kei khal tidai sungah ka thleng ve nan, vantthatnak ah, hriamhma ka tuar lo. Cu thluh ah, ka kut khatlam thawn thingtan pakhat ka pawk ih, ka kut khatlam thawn tidai leuh phah in tidai tlun ah ka phuanawkter. Cutin tifawn ih hruainak ka thlun vivo ih tikulh pakhat ah ka thleng. Tikulh kap cu lungto kham hrap ttentten a si nan, himdamte'n ka kaisuak thei ih, cawl ding in hrampi hring parah hlon aw tulto. 

Ka hung harhfim deuh hnu ah ka thlennak hmun cu ka hliakhlai. Cutikah hmuan nuam zet pakhat ih thleng vekin ka ruat aw. Hmun tinkim ah thingkung an um ih pangpar le rah phunphun an nei. Thingkung pawl ih phenthlam ahcun tivate fim riahri zet pakhat a luang kual rero. Zan a rung thlen tikah hmun kerkawm rem nuam zet pakhat ah thaw zet in ka itthat. Asinan hmunram danglam ah keimahte ka um timi in vei hnihkhat cu i tthangharhter ih, ralringte'n kiangkap ka zoh ttheu. Inn ah hahdamte'n um sehla tiah thinlung tak in saduh ka that fawn. Hmansehla zing ni tleu in raltthatnak i pe sal ih, thingkung pawl lakah cun ka veivak sal. Asinan ziang mi ka hmu ding timi thinphannak tthenkhat cu ka nei ringring. Tikulh parih khuimawcin ka feh vivo tikah, tiva kap ih a rak to mi putar elkun ttawnttai te pakhat ka hmu. A tir ahcun keimah vekin tangphawlong siat ruangih hitawk ah a thleng mi ah ka ruat lawk. Curuangah ka va cibai ih nel zet in ka va bia. Asinan anih cun lu sut lawng in i sawn.

Cutawk ah ziang a tuah ti ih ka sut tikah, tiva khatlam ral ih thingthei va lawh a duh thu zaizir in i theihter. A umdan ah ka zaang ih ka pawk a duh bang. A kum le ttawnttaihnak ka lainat ruangah ka paw ih, tiva ka tanpi hnu ah, tiva kap ih a ttum olsam ding in ka kun. Asinan leilung ih ttum lo in (tu ih ka ruat hman ah ka hnih a suak lai!), putar calcau zet si ding ih ka rak ruat mi cu, ka liang parah a hung khir vukvi ih, a ke pahnih thawn fek zet in ka hngawng i rek. I rek na tuk ih, ttihphannak in i ciahneh tuk fawn ruangah lungcimit in leilung ah ka ril. Ka hung fimharh sal hnu khal ah ka ralpa cu a umnak kel ah a rak um. Asinan ka thaw thaw thei ding in malte cu i thlah deuh. Ka fimharh sal ti a hmuh tikah a ke pahnih thawn thawn thiam zet in i sirh ton rero ih, hranhram in i fehter. Cutin, thingthei thaw bikbik hril ih a lawh rero theinak ding ah kei cun pai ttuatto in ka liang ah ka pu ringring. Cutin sunvute'n putar cu ka liang-pu-sung-suan ringring. Zan a thlen tikah ka caurau tuk ih thi thlepthlep in ka it. Asinan putar ttihnung cun a ke thawn ka hngawng cu in rek ringring thotho. Zingpit khua a van vete'n ka tthangharh lai hlanlo a kedil thawn i sirh ciamco ringring. Cutin, thinlung retheihnak le tuarnatnak thawn har ti fualfo cing in ka ke ka kar thok lala ttheu.

Ni khat cu uumthawl rah ro tampi a thlai aw mi thingkung pakhat kiang ihsin ka feh ngah. Uumthawl pakhat cu ka la ih a sungih a mu le manrang pawl ka phorh. Cu thluh ah hmun tin ih a um mi sabit rah tampi cu uumthawl sungah ka sawr. Uumthawl a khah tikah thing ttek pakhat ah ka tun ta. Ni malte a rei hnu ah, putar huat um zet thiar phah in, uumthawl ka retnak kiang ihsin ka feh ih uumthawl cu ka la. Cu thluh ah sabitti ttha zet cu diriam kuahko in vei khat ka vun in. Sabitti cu a ttha in ka tha a tharter zet. Curuangah ka phurh-thil fihnungza hman hngilh in, hla ka sak ih ka khir ka zuang.

Ka in mi ih hmual neihzia le ni dang hnakih zangkhai in amah ka pu thei thlang ti cu putar siava khal cun a hmu cih mai. Curuangah a kut ttawl ttengtti thawn uumthawl cu a la ih, ralringte'n a vun tep lawk. Cu thluh ah for khat hman tang nawn lo'n a dawk thluh. Sabitti cu a tha a ttha zet ih, uumthawl khal a tum fawn ruangah, anih khal hla a sak thok ve. A rei hlan ah, a ke siava thawn i rektar hnget nawn lo ti ka thei. Cutikah ka tha neih hmuah suah in leilung ah ka hlon tupti. Vei khat hman a tthawn thei nawn lo. Putar hrokhrawl ka cinfel thei cu ka lung a awi tuk lawmam ih, tipithuanthum kap lam ah khirzuang phah in ka vung suk. Tipikap ka thlen tikah, vantthatnak sangbik ruangah, an tangphawlong cawlhter in tikulh parih thingthei thaw zetzet ei ding le tidai khai ding ih ratu khualtlawng pawl ka hmu hai.

Ka luatsuahnak thuhla an theih tikah an mang a bang zet ih, "Tipithuanthum Putar ih kut ah na tang a si cu. Midang a rek that vek ih a lo rek that ve lo cu vanneihnak ropi ngaingai a si. Ziangahtile an liang ah to in an hngawng a rek ngah mi pohpoh cu a rek that lanta thluh. Amai' sualralnak ruangah himi tikulh hi a hmin a thang zet. Hitawk ih ratu sumdawng le long hnattuan rengreng cun an rualpi hnen ihsin a pak in an suakvak ngam lo," tiah in sim. Tawkfang kan biakawk hnu ah an tangphawlong ah in hruai ih, long hotu cun lainat zet in i rak dongsong. Rei lo te ah kan fehsuak ih ni tampi a rei hnu ah khawpi kau le hnianghnar si ding ih lang mi pakhat ah kan thleng. An inn pawl cu lungto ih sak mi hlir an si. Cutawk ah kan cawl. Cule, llamzin ih ka nel zet mi sumdawng pakhat in tipikap ah i hruai ih, sumdawng mikhual pawl hrangah a hranpa ih an ret mi khualbuk pakhat i hmuh. Cu thluh ah dip tumpi pakhat i pe ih, dip tumpi kengtu midang umkhawm pawl i hmuh hai.

Anih cun, "Anmah khi thlun awla, an tuah vekin va tuah ve aw. Asinan anmah thawi' hlo aw lo ding in ralring aw. Ziangahtile nangmah lawng na tan pang ahcun na nun hrangah a ttihnung ding," tiah i sim.

Cu thluh ah lamcaw i pe ih, i mangttha ta. Kei cu ka rualpi thar pawl thawn kan poksuak. A rei hlan ah, kan ken mi dip thawn ung rah phur ding ih feh kan si ti ka thei mai. Asinan ung kung pawl ka hmuh tikah, an sang vengveng ih, an kung a hreu in an nal fawn. Ziangtin ung rah kan lo thei ding ti a ngaihnak ka thei lo. Ungkung par ahcun zawng pawl, a tum a te ci tintian in, an um khelkhel. Zawng pawl cu zuanzang zet in ung kung pakhat le pakhat ah an kat kual rero. Zo kan si ti theih an duh a bang ih, kan va thlen cu hnoksak an ti a si hmang. Ka rualpi pawl cun lungto an sar ih zawng pawl cu an hun den ciamco. Kei cu ka mang a bang zet lawk. Ziangahtile an umnak a sang tuk ih den nat theih an si hmel cuang lo. Asinan rei lo te ah a san le vang ka thei sal ih, kei khal in phur zet in ka hun deng ve hai. Zawng pawl in lungto ih kan den cu an ngaih loruangah in thungrulhnak ah ung rah an lo ih, thinheng le hngirtteu mithmai thawn, in run deng ve. Cutin rei lo te sungah kan dip khat in ung rah kan la ngah. Cuti ih tuah lo cun ung rah ngah thei dan ding kalhmang dang zianghman a um lo.

Kan phurh thei tawk kan ngah hnu ah khawpi ah kan tlung. Cutawk ah ka rualpi sumdawng cun ka ung rah cu in lei ih, ka ram ih tlun theinak daih paisa ka neih tiang, va phur peh vivo hrih ding in ruahnak i pe. Kei khal in ka tuah ih, a rei hlan ah sumpai awmang tawk ka khawl ngah. Cumi can ah fehsuah a tumtu sumdawng tangphawlong pakhat a um ti ka thei ih, ka rualpi cu mangttha in tangphawlong cu ka thlun. Ung rah tampi ka phur cih ih, a hmaisa ah hnakphek umnak tikulh pawl ah an feh. Cu thluh ah thing rimhmui tthabik umnak Comari tikulh kan thleng. Comari tikulh ahcun mipa pawl in sabitti an in lo. Cumi cu thleng le hrial theih lo mi daan a si. Cutawk ah ka ung rah pawl cu hnakphek le thing rimhmui tthattha thawn ka thleng ih, sumdawng tthenkhat thawn tikeplung khal kan hawl. Ka rawih mi tidai sung luh thiam pawl an van a ttha zet ih rei lo te ah tikeplung tampi ka ngah. Ka ngah mi tikeplung pawl cu an tum zet ih an himdam thluh fawn. Cumi hlawnthil pawl thawn Baghdad ah ka ra tlung. Ka tikeplung pawl cu sumpai tampi ah ka zuar ih, ka sumpai tthen hra tthen khat cu mi rethei pawl ka pe. Cu thluh cun ka hnattuan ka cawlhsan ih ka neihsiah hlawnthil ih i pek mi nomnak phunphun ka cen.

A thuanthu rel a ttheh tikah Sindbad in Hindbad cu sui tangka za khat pe leh ding in a siahhlawh pawl a fial hai. Cu thluh in mikhual pawl cu an tin ih, a thaisun ah an ra kir sal. Puai an tuah thluh hnu ah Sindbad in a khualtlawn vei ruknak thuhla cu a hnuailam vekin a sim thok hai.