Ngakaitu le Khuavang Thuanthu (a peh)

Arabian Zan 1001:

(12) Ngakaitu le Khuavang Thuanthu (a peh)

Rawlsuangtu cun nga cu a kholhfai hnu ah, thirbel sungah siti thawn a kiau. Khatlam kap an hmin thlang a zum tikah nga pawl cu an ling a let hai. Asinan an ling a let ngah man fangfang. Coka phar a ong aw ih fala tleirawl mawi zet pakhat a rung lut.  Fala tleirawl cu pangpar zuk a um mi Egypt pat-nal hnipuan mawi thawn a thuam aw, hnakhaih a khaih, tikeplung var ih tuah mi tthi a orh, ruby thawi' cei mi sui faute  pawl a khih ih, myrtle kung ih tuah mi funghreu pakhat a keng. (myrtle = hnah ngil le rimhmui pangpar var a nei mi thingkung te ci khat).

Rawlsuangtu cu a mang a bang tuk lawmam ih cangvai thei nawn lo in a rak zoh cuahco. Fala tleirawl cun thirbel umnak a va pan. A funghreu thawn nga pakhat a tawh hnu ah, "Nga, nga, na ttuanvo na ttuan maw?" tiah a sut. Nga cun zianghman a sawn lo. Fala tleirawl cun a sut non sal. Cutikah nga zate'n an lu an hun tung ih fiang zet in, "Aw, aw. Na siar ahcun, kan siar ve. Na leiba na kuan ahcun, kan leiba kan kuan ve. Na zuan ahcun, kan neh ih, kan di a riam," tiah an sawn.

Nga pawl an ttong thluh tikah fala cun thirbel cu a linglet in ret. Cu thluh ah phar ong sungah a lut ih, phar ong cu amah kel in a phit aw sal.

Rawlsuangtu cu a thlaphan lung-aatnak ihsi a hung harhfim tikah vutcam sungih a tla mi nga pawl a va thur. Asinan meihol vekin an rak ut dum thluh ih, siangpahrang pek ding ci an si nawn lo. Curuangah riahse zet in a ttap.

"Aw! Siangpahrang hnenah ziang ka sim thlang ding? Ka parah a thin a heng ding. Ka rel mi a zum lo ding ti ka thei fawn!"

Rawlsuangtu a ttah rero lai ah khawnbawlpi a ra ih nga pawl an hmin le hmin lo a ra sut. Rawlsuangtu cun thilthleng pawl a rak sim tikah khawnbawlpi cu a mang a bang zet. Ngakaitu a kawhter lohli ih, a ra thlen tikah, "Ngakaitu, na rak ken dah mi nga vek ciahciah kha pali in rak keng sal aw. Cangsualnak pakhat a um ruangah nga pawl kha Siangpahrang hnenih pek theih lo ah an cang," tiah a sim.

Ngakaitu cun Khuavang ih a sim mi thuhla cu a rel lo. Lamzin hlat tuknak puhmawh in cumi ni ahcun a rak ken sal thei lo ding thu a sim ih, a thaisun ah rak keng ding in a tiamkam.

Ngakaitu cu zan ah tili ah a va feh. A sur a vorh ih a hlan ih a awk mi vek ciahciah, rong dangdang nei nga pali a awk lala. Cu thluh ah a kir lohli ih khawnbawlpi hnenah a va pe.

Khawnbawlpi cun nga pawl cu coka ah a keng ih, rawlsuangtu thawn sangka an kharhkhumawk hnu ah rawlsuangtu cu nga a kiauter. Khatlam kap an hmin ih khatlam a vun leh tikah, coka phar a ong aw, fala tleirawl a ra suak, nga pawl cu a sut mi kel a sut sal ih, nga pawl khal in a kel in an sawn sal. Cu thluh ah thirbel a linglehter ta ih a hlo sal.

Khawnbawlpi cu mangbangnak in a khat. "Thilthleng hmuahhmuah hi Siangpahrang hnenah ka sim ding," a ti ih, a va sim taktak fawn.

Siangpahrang khal in thuhla umdan a theih tikah mak a ti zet. Amah rori ih hmuh khal a duh. Curuangah ngakaitu a ko sal ih, nga pali rak keng sal ding ah a fial. Ngakaitu cun ni thum sung can pe ding in a dil ih, siangpahrang khal in a pe. Cu thluh ah ngakaitu cu tili ah a feh ih rong dangdang nei nga pali a va kai sal. Siangpahrang in nga pali a rak hmuh tikah a lung a awi zet ih, ngakaitu cu sui tangka za li a pe bet.

Siangpahrang cun nga cu amai pindan ah a kenter hai ih, a suannak ding ih ttul mi hmuahhmuah khal a lakter hai.

Cu thluh ah a khawnbawlpi thawn pindan sungah an kharhkhum aw. Khawnbawlpi in nga pawl cu a kiau. Khatlam kap an hmin ih khatlam kap a her hai tikah, pindan phar a ong aw lala. Asinan himi ttum ahcun fala tleirawl si lo in vun rong dum salpa pakhat a ra lut. Salpa cu a sang tthiautthiau zet ih, a kut ah rong hring nei funghreu tumpi pakhat a keng fawn. A funghreu thawn nga pawl a tawh hnu ah, aw raap-um zet thawn, "Nga, nga, nan ttuanvo nan ttuan maw?" tiah a sut hai. Cutikah nga pawl cun an lu an tung ih, "Aw, aw. Na siar ahcun, kan siar ve. Na leiba na sam ahcun kan leiba kan sam ve. Na zuan ahcun, kan neh ih, kan di a riam," tiah an sawn.

Vun dum salpa cun thirbel cu pindan laifang ah a linglet ih a thal. Cutikah nga pawl cu meihol ah an cang. Cu thluh ah hngalhngawng zet in phar ong ah a lut ih, phar ong khal a pit cih sal.

Siangpahrang cun, "Himi ka hmuh zo hnuhnu cun ka ummen thei nawn lo. Himi nga pawl hin ka theihfiang a ttul mi thilmak an hmuhsak a si," a ti.

Cu thluh in ngakaitu a ko ih, "Ngakaitu, na rak ken mi nga pawl hin ka thin helh an kamter mi a um. Khuitawk ihsin na ngah mi an si?" tiah a sut.

Ngakaitu cun, "Siangpahrang bawipa, khimi tlangmual pawl ih khatlam ral ahkhin tlangpawng pali an um ih, cumi tlangpawng pali ih laifang ah tili a um. Cutawk tili ihta ka kaih mi an si," tiah a sim.

Siangpahrang in, "Cumi tili cu na thei maw?" tiah a khawnbawlpi a sut.

Khawnbawlpi cun, "Thei lo. Khimi tlangmual sehvel ah vei tampi ram ka tawi dah nan, ka rak thei ngah dah lo lawlaw,' tiah a sim.

Ngakaitu in nazi pathum sung feh fang a si thu a sim tikah, siangpahrang cun a milai pawl cu poksuak cih ding in an tim a tuahter lohli ih, ngakaitu in hmai a hruai hai. 

Tlangmual an kai hnu ah a khatlam liam ahcun ngakaitu ih rak sim mi vek ciah tili cu an hmu. Tidai a fim riahriah zet ruangah a sungih vak rero mi nga ci li cu fiangte'n an hmu thei. Tawkfang sung nga le tili an zoh rero hnu ah siangpahrang cun tili kap ih riahbuk sam ding in a milai pawl cu a fial.

Zan a rung thlen tikah siangpahrang cun a khawnbawlpi a ko ih, "Himi thilmak hi ka cinfel a ttul. Keimahte'n ka fehsuak ding ih, ka riahbuk ah nang rak um aw. Thaizing ih ka tlangbawi pawl an rat tikah ka nuamsam lo ih ka ton thei hai lo ding thu rak sim aw. Ka ra kir sal tiang in cutin rak tuah aw," tiah a fial.

Khawnbawlpi in feh lo ding in a lem rero nan a tthahnem lo. Siangpahrang cun a siangpahrang korfual a hlit ih, a ralnam a pai hnu in, riahbuk ih minung hmuahhmuah an reh reprep laifang ah amahte'n a poksuak.

Tlangpawng pakhat ah a kai ih, cu thluh in phairawn kaupi a paltlang. A feh vivo ih, zing ni a suah rual ah a hmailam ih um mi inn tumpi pakhat a hmu. Inn tumpi kiang a thlen tikah ngil zet ih tuah mi rong dum nei marble lungto hmang ih dinsuah mi siangpahrang inn ropi maktara a si ti a hmu. Marble lungto pawl cu thlalang tluk ih ngil mi kahpathir thawn an tuam fawn. (Marble lungto hi khanlung tivek ih hman ttheu mi lungto ngil zet, a parih ca le zuk ttelh-ttial theih mi lungto a si).

A hrek a rak ong aw cia mi sangka a hmu ih, a va king nan sawntu a neih lo ruangah a sungah a lut. Ring zet ih mi ko rero phah in tualrawn ropi zet pakhat a paltlang nan zohman a hmu cuang lo.

Cu thluh in pindan kaupi pakhat ah a lut. Pindan zialphah cu puu-puan (silk) a si. Tohkham-zau le puan nem phah mi tohkham pawl khal Mecca khawpi ihsi rak phurh mi puanttelh mankhung thawn khuh an si. Pharthlaih puan pawl khal India ram ihsi ra mi sui le ngun pawl thawn a mawi theibik ih cei mi an si hai. Cu thluh ah pindan ropi pakhat ah a va thleng lala. Cumi pindan sung ahcun tiva te pakhat a um. Tiva te ih tidai cu sui kiosa lem pawl ih kaa ihsin a hung suak mi a si. Sui kiosa lem pawl ih kaa ihsin a suak mi tidai cu diamond le tikeplung pawl ah an cang ih, tidai irhsuak mi cun a mawi theibik ih cei mi diphun hlum-bial a hun dai ban zikte. Siangpahrang inn ih kil thum cu hmuan mawi zet pawl, tili fate pawl, le thingkung hramkung pawl in an kulh. Cutawk kiangkap ih um ringring ding ah sur thawn an khuh mi vate pawl khal in thinkung par ihsin hla an sak rero fawn.

Cumi tiang ah siangpahrang cun zohman a hmu hrih lo. Asinan tawkfang ah ningna zet ih ttah awn a thei. Ttah awn ahcun, "Aw, thi thei sehla ka va duh so! Nun bet ding duh thei nawn lo khop ih riahsia ka si hi maw!" ti ih aihram awn a tel.

A hualvan ruangih ttap rerotu cu siangpahrang cun a hawl. Tawkfang ah thuamhnaw mankhung zet thawn a thuam aw mi mino tuak zet pakhat a va hmu. Cu pa cu leilung parih hun mi siangpahrang tohkham parah a to. A mithmai cu a lung a ngai zet.

Siangpahrang cun mino cu a va pan ih, a hmai ah upatnak pe in a kun. Mino khal in a lu cu niam zet tiang in a kunter. Asinan a tonak ihsin a tho lo.

Mino cun, "Siangpahrang bawipa, ka thawh thei lo ruangah, na ngah ding ah a phu rori ti ka theih mi upat peknak ka lo tuah thei lo ih poi ka ti zet," tiah a sim.

Siangpahrang cun, "Upat mi mino, na tuahlonak san le vang ttha a um ding ti ka zum ko. Na beidonnak ttah awn ka rak theih ruangah, nangmah lo bawm ding ih ra ka si. Himi siangpahrang inn hi zo ih ta a si ih, ziangruangah a kawlawng rialrial?" tiah a sut.

Mino cun siangpahrang ih thusutnak cu sawn lo in a korfual a hlip ih, a tai ihsi hnuailam cu rong dum nei marble lungto a si timi kha siangpahrang a hmuhter.

Siangpahrang cu a thin a thir zet ih, a thuanthu sim ding ah mino cu a dil.

Mino cun, "Ka thuanthu lungngaiza hi lo sim ka hiar zet hrimhrim," tiah a sawn ih a thuanthu cu a sim thok.