Ngakaitu le Khuavang Thuanthu

Arabian Zan 1001:

(11) Ngakaitu le Khuavang Thuanthu (a peh)

Ngakaitu in, "Greek siangpahrang in sibawi ih nunnak rak zuah sehla cun, amah khal a thi lo ding. Nang khal hi cuvek thotho na si. Tu ahcun tipithuanthum sungah ka lo hlon thlang ding," tiah Khuavang cu a sim.

Cutikah Khuavang in, "Ka rual, cuvek thil sualral cu tuah hram hlah. Ateca parih Imma in a tuah vek cun i tuah ve hram hlah," tiah zangfah a dil.

"Imma in Ateca cu ziangtin a tuah?"

"Himi thawl sungih kharhkhum tuar phah hin ka rel thei ding ah maw na ruat? I suakter awla, mi neinung ah ka lo tuah ding."

Retheih nawn lo ding thuhla a theih mi cun ngakaitu ih thinlung cu a neh zet.

"Na ttong vekih tuah taktak ding in thu i tiamkam ahcun thawl sin hi ka ong ding. Na ttongkam cu na phatsan ngam lo ding ka zum."

Khuavang cun sesam in thu a tiamkam ih, ngakaitu in thawl sin cu a on sak. Meikhu vekin a hung suak sal lala ih, a pianhmang pangai a hun neih hnu ah, amah rak kharhkhumnak thawl cu tipithuanthum sungah a sit pet vurvo. Cumi a hmuh tikah ngakaitu cu a thin a phang zet. Asinan Khuavang cun hni phah in, "Ttih hlah, ka lo hrinhronak le ka thutiam ka phatsan lo ding thu langternak ah ka tuah men a si kha. Na sur kha la awla i thlun aw," a ti.

Khuavang cu hmai ah a feh ih, ngakaitu cun ringhlel deuh cing in a thlun. Khawpi ih khatlam ah an feh ih, tlang pakhat an kai hnu ah, phairawn kau diaidiai pi ah an suk thla. Cumi phairawn ahcun tlawngpawng pali ih kulh mi tili tumpi pakhat a um.

Tili kiang an thlen tikah Khuavang in, "Na sur kha vorh awla nga vun kai aw," tiah ngakaitu cu a fial.

Ngakaitu cun Khuavang ih fial vekin a tuah. Tili sungih nga tampi a hmuh ruangah nga tampi a awk ding khal a zum. A mang a bang mi cu tili sungah nga dangdang ci li an um mi a si. Nga tthenkhat cu a var an si, a tthenkhat cu a sen an si, a tthenkhat cu tangphaw (blue) an si ih, a tthenkhat cu aihre rong an si. Cumi nga ci li sungih pakhat cio a awk ngah kherkher fawn. A hmuh dah lo mi nga an si ruangah a sunsak zet. Cumi nga pawl zuarnak in paisa tampi a ngah ding ruang khal ah a lung a awi zet fawn.

"Himi nga pawl hi Siangpahrang hnenah va pe awla, na dam sungih na rak neih dah mi paisa hmuahhmuah hnak ih tam a lo pe ding. Ni tinte'n himi tili ah na ra thei. Asinan ni khat ah vei khat bak na sur vorh lo ding in ralring aw. Vei khat lenglam na vorh ahcun siatsuahnak pakhatkhat na tong ding. Ka lo sim mi tthate'n na thlun ahcun na hlawhtling ding."

Cumi a ttong thluh ah Khuavang cun a ke thawn leilung a sirh ih leilung cu a ong aw. Leilung ong sungih a vung lut hloh hnu cun leilung cu a phit aw sal lohli.

Ngakaitu cun Khuavang ih sim mi cu a tum ruangah, a sur a vorh bet nawn lo. Cutin, khawpi sungih siangpahrang inn ah a kaih mi nga pawl va zuar ding in a feh. 

Siangpahrang in ngakaitu ih pek mi nga pawl a hmuh tikah a mang a bang zet. Lunglut zet in pakhat hnu pakhat reipi a zoh vivo hnu ah, "Nga pawl hi la awla Greek Kumpi (Emperor of Greeks) ih i kuat mi rawlsuangtu fimvar zet kha va pe aw. An mawi vek in a thawt khal an thaw ding ka zum," tiah a khawnbawl pakhatnak a fial.

Khawnbawl in nga cu a keng ih, "Himi hi Siangpahrang an pek mi nga pali an si. Nangmah ih suan a duh," tiah rawlsuangtu cu a va sim.

Siangpahrang hnenih khawnbawl a va kir tikah, ngakaitu cu sui tangka za li pe ding ah siangpahrang in a rak fial. Sumpai cu zatzat rak nei dah lo ngakaitu cun a dinhmun cu a taktak a si ding hman a zum thei lo riangri. A innsang ih ttulhai mi pawl a lei lohli ih, sumpai dang khal tthate'n a hmang.

Tu ahcun, nga pali an kionak hmun coka lam ah kan kir sal pei. Ziangahtile cutawk ah thilthleng mangbang thlak zetzet an um.

Hmunsin: Imma le Ateca thuanthu hi a relsal theitu an um nawn lo ruangah kan mi a si.