Tikulh Dum pawl ih Siangpahrang Mino

Arabian Zan 1001:

(13) Tikulh Dum pawl ih Siangpahrang Mino

Sultan Siangpahrang bawipa, ka pa cu himi ram ih Siangpahrang Mahmoud a si. Himi ram hi Tikulh Dum pawl tiah an rak ko. Ziangahtile tlangpawng fate pali khi hlanlai ahcun tikulh an rak si. kan ram ih khawlipi cu tu ih tili tumpi umnak ahhin a um. Ka thuanthu ka lo sim tikah ziangtivekin hivek ih thlengawknak a rung um ti na thei ding.

Ka pa cu kum sawmruk le paruk a si ah a thi ih, kei in a ro ka run co. Ka duhdawt zet mi ka tunu cu nupi ah ka tthi. Anih khal in i duhdawt zet ve ding ah ka rak ruat.

Asinan siimlam vei khat cu itthat ngaingai lo ih ka molhmeh lai ah ka nupi ih hnen-um pahnih in ka thlan in zap. Annih cun ka itthat ngaingai ah an ruat ih thu an rel. Pakhattu in, "Kan pi in kan pu a duhdawt nawn lo mi hi kan pu zangfah a um tuk! Kan pi hi dawithiam a si fawn ih, kan pu hi that thei sehla thah hman a duh ding ka zum," a ti.

An rel mi a dik le dik lo ka zingzoi tikah, rei lo te ah, a dikzia ka run hmu mai. A ngainatbik mi salpa thawn sualmawhnak nasa zet an tuah ruangah a salpa cu thi dengmang ko in hriamhma ka baih. Cutikah kum hnih sung a salpa a ttahnak ding le a zuun tuar ih a aihramnak ding ah, hmuan sungah Mitthli Siangpahrang Inn sak ding in ka nupi cun zangfah i dil.

Can a liam ih, a netnak ahcun a salpa hrangih a lungngainak cu bansan thlang ding ah ka dil. Ziangahtile a salpa cu ttong thei lo, cangvai thei lo si hman sehla, a dawithiamnak hmang in nung ringring ding in a tuah. Cutikah thinheng zet in i zoh ih, dawi ttongkam tthenkhat i samhkhum. Cuvete'n tu ih i hmuh vek hin a hrek minung, a hrek lungto ah ka cang cih.

Cu thluh ah dawithiamnu cun minung tamzetnak le a tthangso zet mi ka khawlipi cu, tu ih na hmuh mi tili le phairawn tthing reprep ah hin a canter. Rong ci li a nei mi nga pawl khi khawlipi sungih a um mi miphun ci li an si. Tlangpawng pali khi ka siangpahrangram hmin putu tikulh pali an si. Dawithiamnu cun himi hmuahhmuah hi ka harsatnak luarkaiter ding ih a tuah mi an si thu i sim. Cumi lawng hman a si lo. Ni tinte'n a ra ih naa vun thawi' tuah mi vuakfung thawn i ra vaw ttheu.

A thuanthu lungngaiza a rel thluh tikah siangpahrang mino cu mitthli rualriat thawn a um lala. Sultan siangpahrang cu siangpahrang mino ih thuanthu in a neh zet.

Sultan Siangpahrang cun, "Cui' nunau hrokhrawl ih umnak, le nung ding ih a tuah mi le a zuun a tuar mi milai siava ih umnak cu i sim aw," tiah a sut.

Siangpahrang mino cun, "Dawithiamnu ih umnak cu ka thei lo. Asinan keimah i vuak hnu in, zinglam nisuah zawng tinte'n, a ttong thei thlang maw timi zoh ding ah, a salpa cu a va pan ringring ttheu," tiah a sim.

Sultan Siangpahrang cun, "Siangpahrang vanduai, na phuba ka lo samsak theinak ding ah ka ti thei tawk in ka zuam ding," a ti.

Cutin phuba an lak dan ding cu siangpahrang mino thawn an relkhawm ih, a thaisun ah tuah thok ding in an lung a kim tlang. Cu thluh in Sultan Siangpahrang cu a cawl hahdam ih, siangpahrang mino khal ruahsannak nei in a hlipar deuh. A thaizing ah Sultan Siangpahrang cu a tho ih, hmuan sungih vun dum salpa a umnak siangpahrang inn ah a va feh. A thlen tikah a nam a phawi ih, malte lawng a tang mi salpa ih nunnak cu a cemter hnu ah, a ruak cu tikhur sungah a thlak. Cu thluh in salpa a ihnak inkhun ah it in, dawithiamnu a rak hngak.

Dawithiamnu cu siangpahrang mino hnenah a feh ih vei za khat a va vaw ta.

Cu thluh in hriamhma tuartu a salpa a um ti ih a ruah mi pindan ah a feh. A taktak ahcun Sultan Siangpahrang sawn a rak um thlang.

Ihkhun kiang ah a feh ih, "Duhdawt mi salpa, tuini teh na zia-um deuh maw? Kam khat te tal i hun be awla," a va ti.

Sultan Siangpahrang cun Ethiopian miphun pawl ih ttong awphawi cawng in, "Ziangtin ka zia-um thei ding? Na pasal ih ttah le nguk awn ruangah ka itthat thei dah lo pi," a rak ti.

Dawithiamnu cun, "Na ttong awn ka theih cu ka lung a awi tuk lawmam! Ka pasal khi a pianhmang kel nei sal ding in na duh maw?" tiah a sut.

Sultan Siangpahrang cun, "Duh e. A ttah awn ka theih nawnlonak ding ah zalennak pe lohli aw," a ti.

Dawithiam siangpahrangnu cu leng ah a va suak lohli ih tidai no khat a suak. Cu thluh in tidai parah dawi ttongkam a samh. Cutikah no sungih tidai cu meisa ih suan mi vekin an so hluahhlo. Cu thluh in tidai cu siangpahrang mino ih taksa ah a theh. Cuvete'n siangpahrang mino cun a pianhmang ngai a keng cih sal. Lungawi zet ih a um lai ah dawithiamnu cun, "Hitawk ihsin tlansuak lohli awla, ra kir nawn hrimhrim hlah. Cu lo ahcun ka lo that ding," a ti.

Curuangah siangpahrang mino cu hmun dang ah a va relh ih, Sultan Siangpahrang ih khawkhannak cem tiang hmu ding in a rak bih thup.

Dawithiamnu cu Mitthli Siangpahrang Inn ah a va kir sal ih, "Tu ahcun ka saduhthah cu ka kimter zo," tiah a sim.

Sultan Siangpahrang cun, "Na tuah mi hi ka damnak ding ah a tling tawk hrih lo. Zanttim tinte'n nga ih na canter mi milai hmuahhmuah in tili tlun ah an lu an hun suah ih, phuba laksaktu ngai in an ttap an rak. Zamrangte'n va feh awla, an pianhmang ngaingai vek va neihter sal hai aw," a rak ti.

Dawithiamnu cu a va feh lohli ih, tili tlun ah dawi ttongkam a va samh.

Cutikah nga pawl cu pacang, nupinu, nauhak tivek ah an hung cang sal. Inn le dawr pawl khal an hung um thluh sal. Tili kap ih riahbuk a rak samtu Sultan Siangpahrang ih milai pawl cun khawpi tum le mawi zet ih laifang ah an um thutthi ti an hmuh tikah an mang a bang zet.

Cumi a tuah ttheh vete'n dawithiamnu cu siangpahrang inn ah a kir lohli.

Cu thluh in, "Tu ah teh na zia-um thlang maw?" tiah a sut.

Sultan Siangpahrang cun, "I ra naih aw, naih deuh hrih," tiah a fial.

Dawithiamnu in a va naih tikah a tho vukvi ih, a nam thawn vei khat sat ah phel hnih ih phel ko in a rak sat.

Cu thluh ah a suak ih siangpahrang mino cu a va tong.

"Aipuang in um aw. Na ral sualral cu a thi zo."

Siangpahrang mino cun tu le tu lungawithu a sim non rero.

Sultan Siangpahrang cun, "Tu ahcun ka khawlipi ah ka kir thlang ding. Na ram thawn a rak nai aw zet ih ka lung a awi ngaingai," a ti.

Tikulh Dum pawl ih Siangpahrang cun, "Ka ram thawn an nai aw maw!" tiah mangbang zet in a ttong. "Na ram ihsin kum khat pumhlum feh ttul khop ih a hla mi a si ti na thei lo maw? Nazi malte sungih nan ra thlen theinak san cu dawi a tuar mi ram a si ruangah sawn a si. Asinan na ram thlen tiang in ka rak lo thlah ding."

"Ka tlun zin ih i telpi ahcun nuam ka ti zet ding. Fa ka neih lo ruangah, ka ro cotu ah ka lo tuah fawn ding."

Cutin Sultan Siangpahrang le Tikulh Dum pawl ih Siangpahrang cu an poksuak. Tikulh Dum pawl ih Siangpahrang in Sultan Siangpahrang cu laksawng tampi a phurhter.

A khawlipi a thlen hnu, a thaisun ah Sultan Siangpahrang cun a milai pawl a ko khawm ih a ton mi thil hmuahhmuah a sim hai. Siangpahrang mino cu a ro cotu ding ih tuah a tum thu khal a sim hai.

Cu thluh ah anmah le an dinhmun cio ih zir in laksawng a zem thluh hai.

Ngakaitu cu siangpahrang mino an hruai ngahnak ding ih thuhla umter hmaisabiktu a si ruangah, sumpai tampi a pe. Curuangah ngakaitu le a innsang cu an dam sung in lungawi aipuangte'n an rung um lanta.