Sunglawi Bawipa

Sunglawi Bawipa
(Precious Lord)

1932 kum ahkhan a si. Khami lai ah kum 32 ka si ih nupi ka neihnak a rei hrih lo. Ka nupi Nettie thawn Chicago khawpi thlanglam ih pindan fatakte pakhat ah kan um. August thla khawhlum zet simlam vei khat cu St. Louis khawpi ah ka feh a ttul. Cutawk ih tthangphawknak khawmpi ah hlasaktu ding ka si. Feh cu ka huam lo. Ziangahtile ka nupi Nettie ih nau neih ding thla a si thlang. Asinan St. Louis ihsin mi tampi in in rak hngak fawn. Curuangah ka nupi cu hnam phah in ka mangttha ta ih, kailawn ihsi ttum thla in kan mawttaw umnak ka pan. Cutin Michigan Tili ih zilthli thiang hawp phah in, Route 66 zawh in Chicago ka suahsan.

Asinan khawpi leng ka thlen tikah, ka pawhsuah zawng ih ka thinlung buai tuk ruangah ka awnmawi bawm ka hngilh ti ka theisuak. Curuangah ka kir sal. Nettie cu hahdamte'n a itthat ti ka va hmu. A ihkhun kiang ah tthuktthun zet ih ka um lai ahcun, thil pakhatkhat in ka nupi kiang ih um ding ah nasa zet in i fial vek in ka thei aw. Asinan feh lohli ka duh ih, Nettie hnaihnok ka duh fawn lo ruangah ka thinlung cu ka ngaihthah ih, ka awnmawi bawm keng in pindan ihsin daite'n ka suak sal.

A thaizan ahcun St. Louis khawpi thawhlum hiamhiam lakah mipi cun hla in sakter leuhleuh. Hla ka sak thluh ih ka to tikah thuthang petu nauhakpa cu Western Union thirhrica keng in ka hnenah a ra tlan. Ca-ik cu ka vun ong. Cahnah aihre parah ahcun TU CIAH AH NA NUPI A THI timi a rak ngan aw. Ka kiang ahcun mipi cu lungawi aipuang zet in hla an sak ih an za an beng. Asinan kei cu ttap awn lo ding in ka sup aw thei ceu. Telephone umnak ka pan ih inn lam ka ko. Telephone sung ihsi ka theih mi ttongkam umsun cu "Nettie a thi. Nettie a thi" timi lawnglawng a si.

In ka thlen sal tikah Nettie cun mipa naute a rak nei ti ka thei. Lungawinak le riahsiatnak ka tuar kop. Asinan cumi zan lala ah naute cun in thihsan lala. Nettie le kan fapate cu hmun khat ah ruakkuang pakhat in ka phum tlang. Cu thluh cun ka cem a si ko. Ni tampi sung keimahte'n ka kharhkhum aw. Pathian in ka parah thil dik lo a tuah in ka ruat. Amah riantu si khal ka paih nawn lo ih, thangtthat hla phuah khal ka paih nawn lo. Tuihlan ih ka rak tlanlen nel ememnak jazz awnmawi khawvel ih kirsal mai ka duh.

Asinan pindan thim khiamkhiam sungah riahsia zet ih keimahte ka um cuahco lai ahcun, St. Louis khawpi ih ka feh ni siimlam kha ka vun ruat sal. Khami siimlam ahkhan thil pakhatkhat in Nettie hnenih um ding ah i sim. Khami kha Pathian a si pei maw? Khami ni ahkhan ka thinlung kha Pathian lam rak hoih ttha deuh sehla cun, Nettie a thih lai ah a kiang ah ka um ngah ding. Cumi can ihsin Pathian ttongkam tthate'n ngai sinsin ding ah thutiam ka tuah.

Asinan ka lungngainak cu a reh hrih lo. Mi tinkim in ka parah an ttha hai. A hleice in ka ttulsam mi theitu vek a si mi ka rualpi Professor Frye cu ka parah a ttha hleice. A hmai Zarhteni siimlam ah kan venghnen ih awnmawi tlawng a si mi Madam Malone's Poro College ah i hruai. Tlawnginn cu awnau a reh reprep. Siimlam ni tleu cu tukvirh puanzar karlak ihsin an rung lut. Piano kiangah ka vung to ih, ka kut thawn piano key pawl ka vun hmet thok.

Culai ah thil pakhat ka parah a rung thleng ih, thin hahdamnak ka vun ngah. Pathian hnenah ka thleng ih Amah ka tham ngah thei vekin ka thei aw. Piano thawn awthlung pakhat ka tum rero a rak si. Ka tum mi awthlung cu tuihlan ih ka rak theih dah lo mi le ka tum dah lo mi a si. Cu thluh ah ttongfang pawl khal an umnak ding zawn ah an rung bun aw vivo.

"Sunglawi bawipa, ka kut i kai aw,
I hruai aw, i dingter aw!
Ka cau, ka ttawnttai
Hriamhma ka tuar, thlisia lakin,
Zanthim ihsin tleunak hmun ah i hruai aw
Ka kut i kai aw, Sunglawi Bawipa, inn ah i hruai aw."

Himi ttongfang pawl le awthlung cu Bawipa in i pek mi an si. Ka thlarau khal a tuamdam. Kan riahsiat bik can, Pathian thawn kan hlatawkbik can ih kan theih mi khi, kan kiangnai bik ih a um can, le in cakter sal ding ih in ngaihsakbik can a rak si ti ka theisuak. Curuangah amah in i hruai ih inn ah hahdamtei' i thlenpi ni tiang in Pathian hrangah paih zet le lungawi zet in ka nung sal.
.................................

Himi thuhla hi thilthleng taktak mi a si ih, himi riahsiatnak ruangah Thomas A. Dorsey in "Sunglawi Bawipa" timi hla a phuah mi a si. Lehhnu ah himi hla hi ttong 32 in an run let ih Rev. Martin Luther King Junior ih ngainatbik mi hla a si. Rev. Martin Luther King Junior ih ruak vuinak khal ah Mahalia Jackson in himi hla hi a sak hngehnge.

Hram: Thomas A. Dorsey ih "Precious Lord."