Kiosa le Caw Pathum

Kiosa le Caw Pathum

Hrampi no le hring tthattha umnak ah Caw Eng, Caw Dum le Caw Rang cu lungawite'n an um tlang hai. An umnak hmun cu nuam an ti zet ih, can tam sawn ahcun rawl an hawl tlang hai ttheu.

Ni khat cu cutawk hmun ah kiosa pakhat a ra ih caw pathum cu a hmu. Kiosa cun, "Hitawk hi hmun ttha a si. Hinah ka um ding ih ka rawl ah caw pawl hi ka ei ding.  An pathum cun reipi in daih ding," tiah a ruat.

A thaisun ah caw pakhat a deh  tum nan, caw dang pahnih in an rualpi an rak hum ruangah an sual aw ciamco hai ih, kiosa cu hriamhma tuar in, thih phang ah a tlan sal. Kiosa cun, "A va zia lo ve aw! In that dengmang a si si. Himi caw pathum an ttan tlang sung ahcun rawl bar khat hman ka ngah lo ding. Thil pakhatkhat ka tuah a ttul," tiah a ruat.

Curuangah a thaisun ah caw pawl umnak ah a va feh ih, "Zangfahte'n rak ngai hram uh. Mizansun kha nan rualpi be ding ih feh ka si ih, anih cun ka deh ding ah a rak ruat. Curuangah nan pathum in in do ih in that dengmang. Taktak ahcun hitawk ahhin remawknak duh ih ra mi ka si," tiah a sim hai.

Asinan Caw Rang in, "Ka itthat lai ah deh i tum mi a si kha. Thuphan na per ih, kan lo zum cuang lo ding," a rak ti.

Asinan Kiosa cun, "Si lo. Ka lo deh tum lo. Lo sim duh mi thuhla ka neih ruangah ka ra lo pan mi si lawm," a ti. Cutikah Caw Eng in, "Ziang thu maw na rel duh?" tiah a sut.

"Hitawk hmun hi ka hmuh vete'n ka duh cih. Hitawk ah in umter ve uhla, kei in nan ral pawl lak ihsin ka lo hum ding. Cumi cu rem nan ti maw timi lo sut ka duh."

Caw pawl cu anmahte thu an rel lawk hnu ah, "Hitawk ah na um thei ko. Asinan kan kiangnai tuk ahcun ra aw hlah. Hitawk ih na um kan lo siang ding ih, nang in in humhim ve ding," tiah Kiosa cu an sim sal.

Cutikah Kiosa cun, "Awle, in ttih hlah uh. Ramsa te pawl ka deh ding ih, nannih cu ka lo tuahmawh lo ding," a ti ve.

Cutin ni tawkfang sung Kiosa cu a um. Ni khat ah, Caw Rang cu Caw Dum le Caw Eng thawn a hlatnak deuh ah rawl a ei rero ti a hmu. Cutikah caw pahnih hnenah a feh ih, "Hitawk hmun hi hmun nuam zet a si tiah ka ruat. Asinan khimi caw thau in hrampi tthattha a ei vivo ahcun hmun ttha lo ah a cang leh ding ka zum. Nannih hnakin a ei tam tuk cuang. A hmul rong khal nannih thawn nan dang aw. Kannih cu kan thim ih anih cu a var. Nan pahnih hrangih hrampi daihcang a um theinak ding ah, deh in siang uh," tiah a va ti.

Caw pahnih cu tawkfang sung an ronawk hnu ah an rualpi Caw Rang cu Kiosa ih deh an siang. Curuangah Kiosa in Caw Rang cu a deh. Caw Rang ih sa cun can tawkfang sung a daih.

Ni dang lala ah caw pahnih cu hmun dangdang ah rawl an ei ti a hmu sal. Curuangah Caw Eng hnenah a feh ih, "Na bulpak rualpi si ka duh. Asinan a hmaisa ah rualpi ttha na sinak na langter ta a ttul," a va ti. Caw Eng cun, "Ziangtin ka langter ding?" tiah a rak sut.

Cutikah Kiosa in, "Can tawkfang sung thu ka ruat rero tikah, nang le kei hi kan bang aw zet. Ka rong le na rong an bang aw. Caw Dum khi ka deh i siang awla, hitawk hmun nuam hi rong bang aw a si mi kan pahnih hrang lawng ah a cang thlang ding," a ti.

Caw Eng cun a lung a kim ih Kiosa in Caw Dum cu a deh. A ril a rawn sal hlan sung cu nuam a ti zet. Asinan a ril a rawn sal tikah Caw Eng hnenah a va feh ih, "Ka rualpi ttha bik na si ih, kei khal na rualpi ttha bik ka si. Tu ahhin, na rualpi ttha bik cu a ril a rawng ih, nangmai' sa lo bak cu ei ding dang a nei lo. Curuangah ka ril a rawn luar tuk hlan ih deh tuar ding in rak tiar aw cia aw," a ti.

Caw Eng cun amahte'n Kiosa lak ihsin a hum aw thei lo ding ti a thei. Curuangah a hualvan cu a pom ih, "Tu ahcun Caw Rang na deh ni ahkhan deh ka rak si ve zo ti ka thei thlang," tiah Kiosa cu a sim.

Hram: A fable from Afghanistan told by A. Naweed Aryan, Fables and Folktales of the World, Told by the students of  152-1 Written Communication, Spring 2009, English Language Program, Kansas State University.