Nunui' hnenih Cakuat
Duhdawtmi Nunu,
Tu ahcun vancungram ah ka um zo. Na fanu te si ding ka rak duh tuk lawmam. Ziang thil a cang ti hi ka theithiam ciah lo. Nunnak nei ka si ve ti ka theihawk thok ahcun ka mang a bang zet. Khawthim lak ah ka um nan, umnak hmun nuam a si. Kutzung le kezung pawl ka nei ti ka hmu. Ka tthanlen vivo rual in ka mawi vivo. Asinan ka umnak hmun ihsin suak ding ah ka man hrih lo. Cuti'n, ka can tam sawn cu thuruatnak le itthatnak ah ka hmang.
Nang le kei karlak ah pehtlaihawknak hleice a um ti hi nunnak ka neih pek hman ah ka theithiam zo. A cancan ah na ttap ti ka thei ih, ka rak ttap ve. A cancan ah na au, ka kiaurak ih, cu thluh ah na ttap. Papa in a lo auh ve lai khal ka thei. Ka riah a sia. Na thin a dam lohli ding ka rak ruahsan. Ziangruangah na ttap tam zet timi kha ka mang a bang. Ni khat tla cu sunvu deuhthaw in na ttap. Na hrangah ka thin a na zet. Ziangruangah na aipuang lo timi kha ka ruatsuak thei lo.
Cule, mi ni ahkhan thil rapthlak a thleng. Ka umnak hmun nuam le hlum sungah ttih a nung zet mi mikei a rung lut. Ka ttih tuk ih, ka kiaurak nan, nang cun vei khat hman i bawm tum lo. I thei dah lo lawlaw tla a si ding. "Nunu, zangfahte'n i bawm aw! Nunu, i bawm aw!" ti ih ka ttah rero lai ahcun mikei cu a rung nai deuhdeuh. Ttihphannak in i khuh thluh. Ka thazang neih hmuahhmuah cem tiang in ka ttap.
Cu thluh ah mikei cun ka kut pahnih a la. A na tuk, a sim dan hman ka thiam lo. Asinan mikei cu a cawl cuang lo. Cawl ding ih zangfah ka dil nasatzia kha! Ka ke i run kaih lai ah tla cun ttihphannak maksak thawn ka kiaurak. Natnak nasa bik tuar rero phah cun, ka thi zik cuahco. Na hmel ka hmu ngah dah nawn lo ding ih, i duhdawt thu i sim mi khal ka thei ngah dah lo ding ti ka theithiam.
Na mitthli hmuahhmuah kha hulter thluh ka duh. Na lungawiternak ding ah tuah tum mi tampi ka nei. Asinan tu ahcun ka tuah thei nawn lo. Ka sunmang hmuahhmuah an kuai thluh. Natnak siakha le ttihphannak rapthlak ka tuar ko nan, na fanu ka si thei lo ding ruangih ka thinnatnak kha a na ka ti bik mi sawn a si.
Asinan tu ahcun a ttangkai nawn lo, ziangahtile natnak nasa zet tuar in ka thi thlang ding. Na parih thil rapthlak an tuah mi kha ziangvek a si ding ti cu ka ruat thiam. Ka lo duhdawt ti hi ka thih hlan ah lo sim ta ka duh nan, na theihthiam ding mi ttongfang ka polsuak thei lo. A rei hlan ah, ttong theinak ding thaw ka nei nawn lo cih fawn. Ka thi thlang. Tlunlam ah ka kaiso ti ka thei. Vancungmi tum zet pakhat in hmun mawi zet ah i thiar. Ka ttap rero lai ko nan, taksa natnak ka tuar mi cu a um nawn lo.
Vancungmi cun hmun ropi zet pakhat ah i hruai. Cu thluh cun ka ai a puang. Vancungmi hnenah i thattu kha ziang a si ti ih ka sut tikah anih cun, "Nauthlaknak" tiah i sawn. Ka riah a sia, ziangahtile ziangvek natnak le tuarnak a si ti ka thei. "Nauthlaknak" hi ziang a si ti cu ka thei lo. Mikei ih hmin a si ka zum.
Ka lo duhdawt thu le ziangtluk in na fanu si ka duh timi lo theihter ding in ca ka lo kuat mi a si. Nungdam ding in nasate'n ka ttang. Nun ka duh. Ruahsannak ka nei. Asinan mikei kha a cak tuk ih ka nungdam khawsuak thei lo. Ka kut le ke pawl a zuk ih, a netnak ahcun ka ruangpum in i zuk thluh. Nun thei ngaihnak a um lo. Nangmah thawn um tlang ding ah ka zuam nasa zet timi lo theihter ka duh. Thih ka duh lo.
Nunu "Nauthlaknak" timi mikei lakah ralring hram aw maw. Nunu, ka lo duhdawt. Ka tuar mi vek natnak na tuar ding ka duh lo lawlaw. Zangfahte'n ralring hram aw.
Duhdawtnak thawn,
Na Fanu Te
Hram: www.moralstories.com
No comments:
Post a Comment