Thil Ttha Tuah Hi Zongsang A Theih

Thil Ttha Tuah Hi Zongsang A Theih Zet

Duhdawtmi rual le tla, mi rilrawng pawl hrangih duhdawtnak sangka ongtertu thilthleng ka ton mi ka lo hlawm duh. Tuini cu zinglam ihsin ka nuamsam lo deuh nan, Bombay thlanglam deng ah ka feh ttul tengteng mi lairel (meeting) a um fawn ruangah ka tunu in i fehpi.

Nazi paruk sung rawl ei lo in kan feh. Kan lairel a cem vete'n ka tunu cu ka va tong. Anih cun mit bial lengleng in i zoh ih, a kut thawn a pum dom phah in a ril a rawn thu i sim. Tlun zin ah ziang a ei duh ti ka sut ih, "Mc Donalds Arsa Burger" tiah i sawn lohli.

Burger lawng cun ka rilrawn a rehter thei lo ding ruangah suncaw remcang deuh kan ei ding ih, siimlam ah burger cu ka leih leh ding thu ka sim. A lung a kim ruangah "Arsa Danpauh" kan ei. Kan feh sal zik ih mawttaw kan thlen rual ah "McDonalds teh kha!?" tiah i sut lohli.

Kei cun hmun dang ah kan lei thei thotho thu sim phah in, tuini hrangih ka tuah tengteng ttul mi pakhat ka tuah hmaisa ta ding tiah ka sim (Ni khat ah tuah tengteng ding mi panga ka ret ttheu). Ka tuah ttul mi cu ziang a si ti i sut tikah, mi rilrawng pawl rawl va pek ding a si thu ka sim. Anih khal in a lung a kim ih, "Cumi hnu ah McDonalds lam ah kan feh ding," a ti. Kan ttheh vete'n kan feh ding tiah ka tiamkam. Anih khal in a pocket money Rs. 100 thawn mi rilrawng panga rawl a do ding thu i tiamkam ve.

Cu thluh ah, rawl leinak neitu pawl in mi rilrawng pawl rawl an pek ttheunak hmun "Mahim" timi ah kan feh. Mawttaw ihsin kan ttum ih rawl kan va pe hai. Ka tunu cun mi panga rawl a pek lai ah, rawl petu hngakih umtu mi rilrawng dang pawl parah a mit a fu. Curuangah daite'n a paisa Rs. 500 a phorh ih, rawl tuahtu hnenah midang 25 hrangih rawl tuah bet ding in a sim.

Cu thluh ah ka kut in i kai ih mawttaw lam i panpi. A mitthli an luang. Ttong lo in daite'n tawkfang hrawng ka um ih, "Mc Donalds teh kha?" tiah a ti lala. Kei cun, "Si e. Tu ah kan feh cih pei," ka ti. Asinan mawttaw a cawlhter hnu ah i zoh ih, "Arsa burger pakhat ah Rs. 50/- a si ih, ka tat ding mi cheese ah Rs. 10/- a si. Curuangah Rs. 60/- i pe aw," i ti.

Ka zoh cuahci lawk. Asinan i dil lala. Curuangah ka paisabawm ka phorh ih Rs. 60/- cu ka pe. Mawttaw ihsin a ttum ih a va kir sal hnu ah minung pathum hrangah rawl a va lei sak ta. Mawttaw ih a ra kir sal tikah, "Tu ihsi cun Arsa Burger ei ding ih ka ruat tinte'n, minung pathum in rawl ttha an ei theinak a si ti ka thei thlang ding. Curuangah tuihnu cun "Mc Donalds" ah si lo in, hitawk ah ka ra thlang ding," tiah i sim.

Hram: www.moralstories.com