Lungawinak Thuthup

Lungawi Aipuannak Thuthup

Vei khat lai ahhin Thangte, Sangte le Luaite timi unau thum an rak um. An unau thum in hramlak ih deuthlam inn pakhat ah an um. Mi tlaitluang le taima an si thluh. Ni tinte'n hramlak ah an feh ih thing an hau. Thing an hau mi cu bazar ah an zuar ttheu. Cuti'n nunkhua an sa.

Asinan an unau thum in an lung a ngai ih an hngir a tteu ringring. An nun a rethei lo nan an ai a puang thei lo. Ngah duh mi thil pakhatkhat an nei ringring.

Ni khat cu an unau thum in an hau mi thing pu phah ih an tlun lai ah, mit thuk khemkhem pitar el kun pakhat in dip pakhat a phurh lai an tong. Lainat zawnruahnak neitu an si ruangah zangfakza pitar ih thilri cu an phurh sak. Pitar cun lungawithu a sim hai ih, a dip sung ahcun hramlak ih a lawh mi epal pawl an um thu a sim. An put mi thing le pitar ih epal an phurh kop ruangah pitar ih inn an thlen tikah an cau zet.

Cui' pitar cu mi menmen a rak si lo. Dawithiam maksak a rak si. Unau thum in lainat zawnruahnak thawn an bom ruangah a lung a awi ih, anmah bom thei mi a neih le neih lo a sut hai. Cutikah Thangte cun, "Kan ai a puang thei dah lo. Cumi cu kan thin hartertu bik a si," tiah a sim. Cutikah pitar cun ziangmi in an ai a puangter ding ti a sut sal.

Thangte cun, "Siahhlawh tam zet a um mi inn ropi nei sehla, cumi cun ka ai a puangter ding. Thil dang ttulsam mi ka nei lo," tiah a sim.

Sangte khal in, "Kumvoi ttha zet neih theinak ding loram kaupi nei sehla ka ai a puang ding. Cuvek ka neih ahcun thinhar ttul lo in ka neinung thei ding," a ti.

Luaite khal in, "Nupi mawi zet in ka ai a puangter ding. Ni tinte'n inn ka ra tlun tinte'n, a mithmai duhnungza in ka thin a nuamter ding ih, ka riahsiatnak pawl ka hngilh ding," a ti ve.

Pitar cun, "A ngah ko. Cumi in a lo aipuangter ding a si ahcun, keimah vek bawmtu nei lo mi rethei nan bom ruangah, nan ngah a phu a si. Inn ah tlung uhla, nan saduhthah vek ciahciah cu nan ngah cio ding," tiah a sim.

Unau thum cu an mang a bang zet. Ziangahtile pitar ih dawithiamnak an thei lo. Asinan inn ih an tlun tikah, an deuthlam inn kiang ahcun inn ropi zet, sangka kiltu nei, le inn leng ihsi mi hmuaktu siahhlawh tam zet um mi an hmu. Siahhlawh pawl cun Thangte cu an rak hmuak. A khatlam malte hlatnak ah loram kau diaidiai a um. Hlawhfa pakhat a ra ih cui' loram cu Sangte ihta a si thu a ra sim. Culai fang ah nunau mawi zet pakhat in Luaite a ra pan ih, mawi zet ih hni siamsi phah in, amah cu Luaite ih nupi a si thu a ra sim. Unau thum cun mak an ti rual in, an lung a awi zet ih, an nundan thar cun an nung thok.

Ni a liam vivo ih kum khat a kim. Asinan thil umdan cu an danglam thlang. Thangte cun inn ropi demdem neih cu a ning. A zangzel a suak ih, a siahhlawh pawl khal inn kilkhawi tthat dan ding a tawlrelpi paih nawn lo. A loram kiangih inn nuam zet saktu Sangte khal in, loram ttuan le thlaici tuh leuhleuh cu phur rit zet a si ti a hmu. Luaite khal in a nupi thawi' an nun cu thil zaran men ah a ruat thlang ih, a nupi ih duat le tuamhlawm khal nuam a ti hran nawn lo. Cuti'n, an ai a puang lo lala.

Ni khat cu an unau thum in an tong aw ih pitar hnenah va feh ding in an relcat. Thangte in, "Kan saduhthah pawl a tak ih canter theinak dawi a nei. Asinan tu ahcun kan ai a puang nawn lo lala. Curuangah bomnak kan va dil a ttul. Aipuannak ngah thei dan thuthup in sim theitu ding cu amah lawng a si," a ti.

Cuti'n pitar hnenah an va feh. Pitar cu rawl a rak suang lai. An cibai hnu ah an umdan cio cu an sim hai. "Ziangtin kan ai a puang sal thei ding timi in sim hram aw," tiah Thangte cun zangfah a dil.

Pitar cun, "Nan aipuannak cu nanmai kut sungah a um thluh. Zoh hnik uhla, saduh nan that ih pek nan si tikah nan ai a puang. Asinan aipuannak timi hi thil thupi zet pakhat tel lo cun, rei a daih lo. Cui thil thupi zet cu – diriamnak (content) a si. A tir ahcun nan ai a puang lawk nan, nan di a riam taktak lo (lole) nan thin a thi taktak lo. Curuangah lungngainak le ninnak timi in a lo do neh ih nan riah a se sal. Diriam nun nei ding ih nan zir ngah hnu lawng ah, lungawi aipuannak ih rah hi nan tep taktak thei ding," tiah a sim hai.

Cutikah an unau thum cun an tuah sual mi an thei ih an tlung. Vei khat lai ih ngah an rak duh duahdo mi thil, a tak ih an neih ngah cu mi vanttha an si zia an theisuak. Thangte cun inn ropi neitu a si cu a lung a awi ih, tthate'n a kilkhawi thok. Sangte khal in kumvoi ttha a neih theinak ding ah taima zet in lo a thlo. Luaite khal in a nupi hmelttha ih inn lam tuang a timnak le amai' hrangih a pumpekawknak pawl a sunlawizia a hmu.

Lungawi aipuannak le diriamnak (thinthihnak) hi a khuah (kop) ih feh ding an si ti an theih ringring thlang ruangah, an don mi thlawsuah ah an lung a awi ih, thlawsuah dang khal an beisei nawn lo. Curuangah dam sungin lungawi aipuangte'n an um lanta.

Hram: Ngantu theih lo mi "The Secret of Happiness."