Tuahsak Thei mi Um Sun

Tuahsak Thei mi Um Sun

Thilri retnak ih ka thilri ka ret hnu ah ka tonak ding tohkham ah ka to. Reipi kan zuang ding. "Siar ding ttha cabu ka neih cu lungawi um tak si. Malte ka itthat duak khal a si thei," tiah ka ruat.

Vanzam a pawhsuah hlan te ah ralkap pawl an rung lut vualvo ih tohkham lawng hmuahhmuah an rung luah khat thluh. In kulh thluh ah a cang. Titi thunuam rel ding in, "Khuilam nan pan tum?" tiah ka kiang nai bik ih totu ralkap cu ka sut. Anih cun, "Great Lakes Ralkap Vanzam Hmunkhuarnak ah. Cutawk ah zarh hnih sung zir-cinh-nak hleice kan nei ding. Cu thluh ah Iraq ah ral kan va do ding," tiah i sawn.

Nazi pakhat hrawng kan zuan hnu ah, dollar nga in suncaw fun lei a theih thu an run than. Chicago thlennak ding nazi tampi a duh lai ih, can cemternak ah a ttha ding ti'n suncaw fun cu lei ka tum.

Ka paisabawm ka vun lak zawng ah, ka kiang ih ralkap in a rualpi hnenah suncaw fun lei a tum le tum lo a sut awn ka thei. A rualpi cun, "Lei lo ding. Suncaw fun khat hrangah dollar nga cu a khung tuk. Chicago kan thlen tiang ka hngak men ding," a ti. Ka kiangih ralkap khal cun a lungkim ve.

Ralkap dang pawl ka zoh kual hai. Zohman in suncaw an lei lo. Vanzam dunglam ah ka va feh ih, vanzam hnattuantu hnenah dollar 50 ca pe phah in, "Ralkap zate hrangah suncaw run tuah aw," ka ti. Hnattuantu nu cun ka kut i kai ih, hnget zet in i rek. A mitthli tla phah in, "Ka fapa hi Iraq ah ral a do ve. Himi hi amai' hrangih na tuah mi vek deuhthaw a si," tiah lungawithu i sim.

Cu thluh ah suncaw fun pahra keng in ralkap pawl tonak ah a ra feh ih a pe hai. Cu thluh ah ka tonak kiang ah ra ding in, "Ziangmi na duh sawn – caw sa maw ar sa?" tiah i sut. I sut mi mangbang phah in, "Ar sa," tiah ka sawn.

Cu thluh ah vanzam hmailam ah a va feh ih, minute khat rei hnu ah, mi neinung pawl tonak ihta zanriah kheng keng in a ra kir. Cule mi neinung rawl cu, "Himi hi nangmai' hrangah," tiah i pe. Rawl kan ei thluh ah vanzam dunglam ih zunram thiarnak pindan ah ka va feh. Lamzin ah mi pakhat in i rak dinter.

"Na tuah mi ka rak hmu. Kei khal ka tel duh ve. Himi hi la aw," i ti. Dollar kulhluan-nga i pe. Ka tonak ih ka ra kir hnu rei lo te ah vanzam captain a ra suak ih tohkham nambat a zoh phah vivo. Keimah i hawl lo ding ka beisei zet. Asinan keimai' tonak lam kap lawng a zoh vivo. Ka tonak zawn a thlen tikah hni siamsi phah in, "Lo cibai ka duh," tiah a kut i san.

Ka tohkham taikhap ka phelh lohli ih ding phah in captain cu ka cibai. Captain cun aw ring zet in, "Ralkap ka rak ttuan dah ih, ralkap vanzam khaltu ka rak si. Vei khat ah mi pakhat in suncaw i leih dah. Cui' zawnruahnak cu ka hngilh thei lo mi thil pakhat a si," tiah i sim. Vanzam totu zate'n an za an beng hluarhlo awn ka theih tikah ka ning a zak zet.

Lehhnu deuh ah ka ke hit ti reh ding in vanzam hmailam ah ka veivak. Ka tohkham hmailam tlar ruknak hrawng ih totu pacang pakhat cun cibai ding in a kut i san. Ka kut ah dollar kulhluan-nga a ret ta.

Chicago ih kan ttum tikah ka thilri ka la ih vanzam ihsin ka ttum tum. Vanzam sangka sunglam ah mi pakhat in i rak dinter ih ka angki zalte ah thil pakhat a san. Cu thluh ah zianghman ttong lo in a feh liam. Dollar kulhluan-nga lala!

Vanzam kerawn terminal ah ralkap pawl cu an fehnak ding hrangah an hngak aw khawm ti ka hmu. An hnenah ka va feh ih dollar sawmsarih-nga ka va pe hai. "Nan hmunkhuarnak nan thlen hlan tawkfang sung a lo daih ding. Sandwich ei can hrawng a si ko. Pathian in lo thlawsuah hai hram seh," tiah ka sim hai.

Mino ralkap pahra cu an khualtlawnpi pawl ih duhdawtnak le upatnak co in an fehsuak. Manhlap zet ih ka mawttaw umnak ka pan lai ah, himdamtei' an ra kir sal theinak ding ah thla ka cam sak phah hai. Himi ralkap pawl hin an nun pumhlum in kan ram hrangah an pe. Kei cun rawl vei hnih lawng ka do thei hai. Ka tuahsak mi cu a tenau tuk a bang.

Hram: Pravs J ih "A Heartfelt Realization."