Thluak Fimnak Hmuahhmuah thawn Thok Aw

Thluak Fimnak Hmuahhmuah Thawn Thok Aw

Rukru hminthang putar pakhat ih fapa in a pai’ hnenah rukruk dan thuthup zirh ding in a dil. Curuangah zan khat cu rukru hminthang putar cun a fapa cu inn tumpi pakhat sungih thilri ru ding in a hruai.

Inntektei’ sung an ihthah thluh tikah a fapa cu awn-ai nei lo te’n a hruai vivo ih, hnipuan retnak bizu pakhat umnak pindan a kawhhmuh. Cui’ bizu ih hnipuan va ru ding in a fapa cu a fial.

A fapa in bizu a va pan lai ah rukru hminthang cun sangka cu a khar thutthi. A fapa cu inn sungah a tan ta ih amah cu inn leng ah suak in, inn hmailam sangkapi cu ring zet in a king. Cutikah inntekte an tthangharh. Asinan amah cu zohman ih an hmuh hlan ah a tlan hlo.

Nazi tam nawn a rei hnu ah a fapa cu cau hnianghniang in inn ah a ra thleng. Cule, thinheng zet in, “Ka pa, ziangah pindan sungah i kharhkhum? In kaih ngah phang in beidong mai sehla cun ka luat lo nasa ding. Ka thluk fimnak hmuahhmuah ka hman hnu lawng ah ka suak ngah fang,” a ti.

Cutikah rukru hminthang putar cun, “Ka fapa, rukruk dan zirlai pakhatnak na zir ngah zo,” tiah a sim.

Rukru hman in an thluak fimnak hmuahhmuah an hman mi hi zirlai pakhatnak lawng a si ahcun, thiamnak ttha pawl ngah le thiam ding cun thluak fimnak hmuahhmuah hman cu a ttul ti a fiang. Daithlang huahho men ih umtu cun hlawhtlinnak ngaingai ngah a theih lo. Mi daithlang pawl cu, thil ttha le picang cu rel hlah, rukru ding hman ah an tling lo tinak a si.

Thluak fimnak, thazang, taimaknak, thinsaunak le dungsip lo thinlung na kom khawm lawng ah hlawhtlinnak ngaingai na ngah ding.

Ngantu theih lo mi “Learning the Hard Way.”