Thapeknak Awkam

Thapeknak Awkam

"Manager ka be thei pei maw?"
Ka rualpi in dawr hngaktunu (waitress) a sut thutthi ruangah mak ka ti zet. Pizza rawl dawr lar zet pakhat ih zanriah kan ei lai ah a si. Thil danglam ton mi zianghman kan neih lo ruangah ka rualnu Eileen cun ziang a tuah tum ti ka mang a bang.

Minute malte a rei hnu ah manager cu kan tonak cabuai ah a ra thleng. Dawrtu thinheng pakhat hnen ihsin phunzainak hmaton ding phan ruangih tthuktthun aw phah in, "Nan hrangah ziang tuah thei mi ka nei?" tiah a ra sut.

Ka rualnu Eileen cun, "Tuizan ih dawr hngaktu hi a felfai nasa ti lo sim ka duh mi lawng a si," tiah a ttong thok. Cu thluh ah dawr hngaktu in kan hrangih a tuah mi thil ttha pawl a rel vivo.

Manager cu a thawpi a suah ti a theih theih mai. A kiang ih ding dawr hngaktu khal a thawpi a suah ve. Kan pali in minute malte sung kan titi ih kan hni durdo. Eileen cun hnattuan zuam zet nunau pahnih hrangah ni lungawium a tuah sak ih, ka hrang khal ah thapeknak awkam ih tthatzia i theihter.

Kan ttongkam pawl hi vun ruat sehla, hnuk kir sal kan duh mi ttongkam an um ttheu ti a lang mai. Asinan, vantthat thlak zet in, hman ringring khal ih sual dah lo awkam tthenkhat an um ve. Cuvek cu duhdawtnak le somdawlawknak a pungzaitertu awkam pawl an si. A hnuai ah malte ka run tarlang:

"Na ti ttha nasa."
"Tu ahhin thla ka lo camsak ding aw?"
"Na rel mi khan i bawm zet."
"Keimah ka dik lo."
"In kaihhruainak parah ka lungawi."
"Ka lo dokalh pang maw?"
"Na ti dan cu ka uar nasa."
"Ziangtin ka lo bawm thei ding?"
"Zangfahte'n i ngaidam aw."
"Ka lo duhdawt lai."
"Pathian in ziangkim a lo tuahsak thei."
"Ka lo suang nasa."
"Na pitling vivo taktak a si hi."
"Zanriah ei ka lo sawm."
"Ka lo ngai."
"Na hrangah ka lung a awi tuk."
"Tuini hrangah thla ka lo camsak."
"A har zet ding a si kha. Sinan na ti khawsuak thei ih uar na um nasa."
"Ka lung a awi zet ding."

Nangmah in theih na duh mi awkam kha midang hrang khal ah hmang ve aw.

Sirhsan: Susan Maycinik ih "Encouraging Words."