Sulhnu Fangtu

Sulhnu Fangtu

Kei hi ka nauhak lai ihsin thla le khawsia tivek țih lemlo, thlahrang a um an tinak inn țhing khal feh țheu ngam ka si. Ziangahtile thla le khawsia hi an um lo cu ka ti lo nan Pathian zumtu cu in țihțhaih le siatsuah ngam ka zum lo. Thlahrang a um an tinak hmun ih ka feh can khal ah zianghman ka hmu dah lo.

Asinan vei khat cu hngilh theih nawn lo ding mi thil ka tong.

Lai lam ahcun vainim an hung pum thok ahkhin hramlak thawn a nai mi loram neitu cu thlam ah kan riak țheu. Zan ah ngal, savom, sakuh le zan ih rawl hawl ramsa pawl in vainim ra ei lo ding in kan kil ih, sun ah rit kan kil țheu.

Vei khat cu vainim kil tikcu ah lo ih riak ding in ka pok. Kan lo cu khawtaw zin ah a si. Ni tlak rual ah inn ihsin ka suak.

Kan khawhnar ka thlen tikah ka thinlung ah inn lam ih kir ding in simtu nei vek khin ka um. Khawhnar lungdawl ah ka to lawk. Kan khua ka hun zoh sal ih ziangah simaw ka lung a leng ciamco.

Ziang dang a si zik lo ti'n ka feh sal. Ka feh hlat man hlan ah zin sir țhilcang rul lak ihsin mi pakhat in i bihthup rero vekin ka thei. Ka ding ih ka kiangkap țhilcang rul cu țhate'n ka zoh vivo. Ni a liam cuarco nan khua a thim lo ruangah minung um sehla cun ka hmu ko ding. Asinan zianghman ka hmu lo.

Ka ngaih cu a țha deuh lo nan ka feh peh sal. Tawkfang sung cu awn-au zianghman a um lo. Thli khal a hrang lo. Vate riahnak pan tikcu asinan vate zuang le ai khal an um lo.

Zin kel pathum hrawng ka feh ih a palinak kel ka kel lai ah keimai lam hoi in thli a hung hrang huho ih, mi pakhat in a taksa thawn ka taksa i hrut ngah vekin ka thei. Zin bi tuk ah manhlap zet ih pialawk vek deuh khi a si. Cu țheh vete'n thli cu a reh reprep lala.

Ka rel zo vekin ningțih nei ka si lo ruangah țih cu ka țih lo. Asinan pupa san ihsin thlarau a um zumtu miphun kan si ih, a hleice in mithi zik lole thi pekte an um tikah an thlarau a veivak tiah rel a si țheu. Kannih Khrihfa cun kan thih vete'n kan thlarau cu Pathian hnenah a feh cih tiah kan zum. Asinan pupa san ihsi zumnak hi hngilh le hlon a har zet ih, Khrihfa si cing in thih zik le thih hnu ah thlarau a veivak țheu timi zumtu khal tampi kan um.

Kan khua ka vun ruat ih mina besia le mithi pekte kan um lo. Inn sawmli khua kan si ih mi dam lo menmen kan um hman ah kan thei aw thluh. Curuangah ka ton mi thil hi minung thlarau a si ka zum lo. Ka ngaihbel men a si ding ti'n ka feh peh vivo.

Loram thlen zawng ah tiva pakhat a um ih kham sang zetzet an um. Hlan lai ahcun khawsia an um an rak ti țheu. Zan ah khawse farvang an um hluahhlo țheu an ti. Asinan Khrihfa kan si hnu cun cuvek a um nawn lo. Nauhak pawl hman in khawse tamnak bik an rak timi kham hnuai tili ah siau an thlak țheu men.

Cutawk kham kiang ih ka feh lai ah ka dunglam hla deuh ihsin kekar awn vek ka thei. Ka ning a țih lo ka ti vek nan, rualpi ka nei ding ti ka vun ruat ih ka hna a ngam deuh ko. Lo ih riak tum ve a um a si ding, ka rak hngak phah ding ti'n nuamnaite'n ka feh.

Asinan i run dawi man lohli lo. A kekar awn cu nai deuhdeuh vekin ka thei nan ka hnenih rung thlen ti a nei lo. Curuangah kham sang zetzet umnak lan ih zin kel pakhat ah cawl in ka rak hngak lawlaw. Asinan rung thlen ti a nei cuang lo. Mi feh awn vek khal ka thei nawn lo. Ramsa veivak awn ka theih sual a si ding ti'n ka feh sal.

Tu ahcun khua a thim thlang. Lo ka thlen zawng ah zin tlunlam hramlak sungah mi pakhat na tuar ih ai rero awn vek ka hun thei ih ka cawl thutthi. Ramtawi cangsual an um si kei maw ti'n ka ngai fiang tum. Asinan ai awn cu a um nawn lo. Ka hnathlam ih thil theih sual mi a si ding ti'n ka feh sal. Kar li-nga hrawng ka feh ah na tuar ai awn vek cu ka thei lala. Ka ding thutthi ih ka ngai țha sal. Asinan a reh lala.

Curuangah, "Saklam ah harsatnak tong nan um maw? Hinah lo bawm theitu ka um. Bom nan țul le i run kut-auh uh," ka hun ti.

Ka țong cem rual ah na nawn in thli a hrang huho ih thinghnah an awn surso. I run kut-auhtu an um le um lo hngak in malte ka ding lawk. Asinan ziang thawmvang hman a um nawn lo. Vei khat ka hun auh sal. Ka țong cem rual ah thli a hrang huho lala.

Tawkfang ka hngak ih ziang thawmvang hman a um cuang lo ruangah ka feh sal. Malte sung ka feh ih lo thlennak ding zin kel ka thlen zawng ah lo taw ih tivapi ral khatlam tlang ihsin "Kuu-khah" timi au awn ka thei.

Cui' cin cun ka ngaih a țha nawn lo. Kan khua ah mina besia le thi pekte kan um lo ruangah i hnaihnoktu cu minung thlarau a si ka zum lo. Khawsia in i țihthaih a si ka zum deuh. Cumi ka ruat tikah ka tlawmla.

Pathian fa ka si, zumtu ka si ruangah khawsia vek men ih i tihțhaih cu ka zumnak a mal tuk a si ding ti'n ka ruat ih ka thiam aw lo zet fawn. Thlam ka thlen vete'n thlacam ih bible siar lohli ka tum.

(Peh lai ding)