15 October, 2013

American Bezaipu Ropi Robert Frost

American Bezaipu Ropi 

ROBERT FROST




Robert Lee Frost (March 26, 1874 – January 29, 1963) hi American bezaipu asinan a kutsuak hi America ih sutsuah a si hlan ah England ah sutsuah hmaisat a si. Thingtlang khawte lam hringnun (rural life) thuhla kengkawh dik zet ih a tarlangnakpawl le American ttong tualleng (colloquial) a herhawithiamnak ruangah fak a hlawh-zet-tu bezaipu a si. A kutsuak tampi cu zabi kul thok tir ih New England hmunram sung thingtlang khawte ah hram an bun aw (New England hi Amerika Dingkhawm Ram nisuah-saklam ih um mi hmunram a si ih, himi hmunram sungah Maine, New Hampshire, Vermont, Massachusetts, Rhode Island, le Connecticut timi ramkulh paruk an um). New England sung thingtlang khawte nun hi zatlang nun le khawruahphunglam thufun (philosophical themes) hnok zet pawl phosuah tarlangnak ah a hmang. Zabi 20 sung American bezaipu lak ih hminthangbik le ngaisan hlawhbik pakhat a si vek in, a dam lai khal ah upatpek sunlawihnak tam zet a ngah. America ih calailam laksawng thupibik pakhat a si mi Pulitzer Biazai Laksawng (Pulitzer Prize for Poetry)khal vei li tiang a ngah. America in malte lawng a neih mi “senpi aiawhtu calailam minung, thiamzunglam zirthlurhnak bulhram ti theih deuhthaw” (“public literary figure, almost an artistic institution) a si. A kutsuak bezaipawl ruangah America ih rammipi (civil) sunlawihnak sangbik a si mi Congressional Gold Medal (Tlangsuakbu Sui Tacik) khal 1960 kum ah hlan a si.

Nunthuanthu
Kum Hmaisalam pawl
Robert Frost hi California ramkulh, San Francisco khawpi ah thuthang palai William Prescott Frost, Jr., le Isabelle Moodie tei’ fapa si ding in a suak. A nu hi Scottish hrin a si ih, a pai’ lam ih a pu cu 1634 kum ah Wolfrana longpi thawn New Hampshire ramkulh ih ra fehtu England rammi Nicholas Frost a si.

Frost ih pa hi a tir ahcun tlawngsaya a si ih lehhnu ah San Francisco Evening Bulletin thuthangca (lehhnu ah San Francisco Examiner thawn an kom aw) ih zohfeltu a ttuan. A pa hi khawpi siahkhongtu hrilawknak ah a zuam ve dah nan a hlawhsam. 1885 May 5 ih Frost pa a thih hnu cun an innsang cu Massachusetts ramkulh ih Lawrence khawpi ah an tthawn. Frost ih pu William Frost, Sr., New England ih patrialnak cetzung hohatu in an innsang cu a zohkhen hai. Frost cu 1892 kum ah Lawrence Sang Tlawng (High School) in tlawng a ttheh. Frost ih nu cun Swedenborgian (New Church ti khal in an ko ih an Pathianthu pomdan hi a danglam deuh) kawhhran a zom ih Frost khal cutawk kawhhran ah tihnimnak a tuahter. Asinan a upat hnu ah cui’ kawhhran cu a suahsan sal.

Frost hi thingtlang khawte nun thuhla a tarlangnakpawl ruangah theih a hlawh zet nan a tthanlennak ngaingai cu khawpi ah a si ih, a bezai hmaisabik cu tlawnginn ih suah mi mekazin ah a suah mi a si. Darthmouth College ah thla hnih sung a kai. Hitawk ah Theta Delta Chi pawlkom (phunsangtlawng tlawngtapawl sihkhawmawknak pawlkom pakhat) sungah laklut a si man. Asinan inn ah a tlung sal ih hna phunphun a ttuan. Nuncan mawi zirhtu nei lo nauhakpawl ca zirhtu a nu a bawm, thuthangca a zuar, cetzung ah hna a ttuan. Asinan a ttuan mi pawl ah a thinlung a um lo ruangah nuam a ti thei lo. A thinlung cun biazai khawvel ih tlan lut a duh ringring.

Pitlin Hnu Kumpawl
1894 kum ah a bezai “My Butterfly. An Elegy” (Ka Phengphehlep. Tleizun Fing Khat) timi cu $15 (tuini $ 398 thawn an tluk aw) in a zuar khawng. New York Independent in a lei ih 1894 November 8 edition ah an suah. Cui’ a hlawhtlinnak ruangah a thinlung ah uanawknak khal a lut deuh ih Elinor Miriam White hnenah neihawk a dil. Asinan an neihawk hlan ih college (St. Lawrence Phunsangtlawng) ttheh ta a duh ruangah hridai sau deuh thluah in a rak el (demurred). Curuangah Frost cu Virginia ramkulh ih Great Dismal Swamp(Cirhpi) ah khawconnak (excursion) a feh ih a ra tlun hnu in Elinor cu neihawk a dil lala. Himi ttum ahcun tlawng a rak ttheh zo ruangah Elinor cun a lungkimpi ih Massachussets ramkulh, Lawrence khawpi ah 1895 December 19 ah an nei aw.

Frost cu 1897 ihsin 1899 tiang Harvard Phunsangtlawng ah a kai leh nan damlonak ruangah a cawl sal. A pu in a thih zawngte ah Robert le Elinor cu New Hampshire ramkulh ih Derry khua ah loram (farm) pakhat a leih hai. Cui’ loram cu Frost cun kum kua sung a thlo. Himi can ah zingpit cu cangan can ah a hmang. Himi can ih a ngan mi bezai tampi cu bezai hminthang zetzet ah an hung cang. A netnak ahcun loram ttuan cu a hlawhtlinpi thei lo ti a theifiang aw ih New Hampshire ih Pinkerton Academy tlawng ah 1906 ihsin 1911 tiang English zirhtu a ttuan. Cuihnu khal ah New Hampshire ramkulh Plymouth khawpi ih New Hampshire Normal School (tu ahcun Plymouth Ramkulh Phunsangtlawng) ah zirhtu a ttuan lala.

1912 kum ah Frost cu a innsang hruai in Great Britain ah a vai ih, London khawpi kiang Beaconsfield khawpi tenau ah an um. A hmai kum ah a bezai bu hmaisabik “A Boy’s Will” a suah. England ahhin tthianrual ttha tthenkhat a sar. Cumipawl lak ah Edward Thomas (Dymock Bezaipupawl timi bezaipu hlawmkhawm sungtel), T.E. Hulme, le Ezra Pound tivek khal an tel. Pound hi American rammi lakah Frost ih kutsuak thlirsalnak ttha zet tuahtu hmaisabik a rung si leh nan, Pound in Frost ih American awphawi thawi’ ngan mi bezai kha amai’ duhdan ih herhawi a tum ruangah, lehhnu lam ahcun Frost cu Pound parah a thin a nat phah. Frost hin England ram ih amai’ sanzul (contemporary) bezaipu tampi cu a tong asilole tthianrual ah a tuah hai. A hleice in a bezai bu pahnih a suah hnu (1913 ah A Boy’s Will, 1914 ah North of Boston) ah bezaipu tampi a tong hai.

1914 kum ih Leitlun Ralbuai Ttumkhatnak a suah ruangah Frost cu 1915 ah America ah kir sal in New Hampshire ih Franconia khua ah hmuanram pakhat a lei. Cutawkah ca a ngan, ca a zirh. Himi hmuanram hi Frost tei’ sungkua in 1938 tiang in tthalcaan an hmannak hmun a rung si. Tuini ahcun The Frost Place tiah kilkhawi a si ih, thil-hlun-inn (museum) le biazai tonrelkhawmnak (poetry conference) hmun ah an hmang. 1916-20, 1923-24, le 1927-1938 kumpawl ah Frost hin Massachusetts ramkulh ih Amherst College ah English a zirh.A tlawngtapawl cu ttongsuahmi English ttong (spoken English language) ah  awnpawl (sounds) le awphawipawl (intonations) a phunphun ih an fehdan kha theifiang le ngaihsak thiam ding in a kaihruai hai. Amah Frost cun ttong tualleng a naihniamdan (colloquial approach to language) cu “theihzung ih awn” (the sound of sense) tiah a ko.

1924 kum ah a bezai bu New Hampshire: A Poem with Notes and Grace Notes thawn Pulitzer Laksawng a ngah. Pulitzer Laksawng hi 1931 kum ah Colletcted Poems in siseh, 1937 kum ah A Further Range in siseh, 1943 kum ah A Witness Tree in siseh, a ngah bet hai.

Kum sawmli le pahnih sung - 1921 ihsin 1963 tiang – tthalcaan le thlatang tir (fall) tinte’n Frost cu Vermont ramkulh, Ripton tlangmual ih um Middlebury College ih Bread Loaf  English Tlawng ah zirhtu a ttuan ringring. Frost hi himi tlawng ih tthansohnak le canganlam zirnak program-pawl tthansohnak hrangih ttuantu thupi ah ruat a si. Middlebury College hin tu ahcun Ripton tlangmual ih hmuanram cu amai’ bulta ah nei in a kilkhawi ih Bread Loaf tlawnginn hmuanri kiangah phunpihuap sanphunglam mual (national historic site) a tuah. 1921 ah Frost cun Ann Arbor khawpi ih Michigan Phunsangtlawng ah zirhtu hna a ttuan. 1927 tiang a ttuan ih Amherst ah a kir sal. Michigan Phunsangtlawng ih zirhtu a ttuan lai ah Phunsangtlawng cun dam sung ih Calailam Sungtel (Fellow in Letters) sinak (upat sunlawihnak a si ih, honorary doctorate vek a si) a hlan. Ann Arbor ih a cennak hmun cu Michigan ih The Henry Ford Museum in Dearborn in a lei ih, tu ahcun misenpi tlawntheinak mual a si mi Greenfield Village ah a ret.

1940 kum ah Frost cun Florida ramkulh ih South Miami ah ekah 5 a kau mi leiram a lei ihPencil Pines tiah hmin a pe. A tang lai mi a dam sung hmuah in thlatang can cu cutawk hmun ah a hmang ttheu lanta. Frost hin Massachusetts ramkulh, Cambridge khawpi ih Brewster Lamzin khal ah inn pakhat a nei. Cui’ inn cu tuini ahcun National Historic Register (Phunpihuap Sanphunglam Hminsinngankhumnak Zung) kut ah ret a si.

Harvard Phunsangtlawng ih 1965 kum tlawngta hlun cazin sungah Frost hin Harvard ihsin upatpeknak zircawilu (honorary degree) a rak ngah dah tiah tarlang a si. Frost hi college ihsin zircawilu a ngahsuak dah lo nan upatpeknak zircawilu 40 lenglo a ngah. Cumi lakah Princeton, Oxford le Cambridge phunsangtlawngpawl khal an tel ih, Darthmouth College ihsin upatpeknak zircawilu pahnih tiang ngahtu umsun khal a si. A dam lai rori ah Virginia ramkulh, Fairfax khua ih Robert Frost Lailak Tlawng, Massachusetts ramkulh Lawrence khawpi ih Robert L. Frost Tlawng, le Amherst College ih calaibuuk picangbik pawl cu amai’ hmin bun in tuah an si zo.

1960 kum ah United States ih Tlangsuakbu Sui Tacik (Congressional Gold Medal) a ngah.

1961 January 20 ah Ramhotu John F. Kennedy in ramhotu ttuanvo laknak (inauguration) a neih ttum ih a bezai hminthang “The Gift Outright” a siar lai ah Frost cu kum 86 mi a si. A lehhnu kum hnih, 1963 January 29 ah, zun thawhnak zin ih bol um natnak in Boston khawpi ah a thi. A ruak cu Vermont ramkulh, Bennington khua ih Bennington Thlanmual Hlun ah an phum. A khanca (epitaph) ah a bezai “The Lesson for Today” (1942) ih catlang netabik a si mi “I had a lover’s quarrel with the world” timi tarlang a si.

Frost ih kutnganca le thilri tthenkhat cu Massachusetts ramkulh, Amherst khawpi, Jones Calaibuuk ih Special Collections Department (Thuhla Thupi Kilkhawinak) ah kilkhawi an si. Bezai a rak ngannak cahnah, cakuatpawl, zukpawl, awthun mi pawl, video tape pawl le a dangdang an tel. Amherst College khal ah a cahnah tthenkhat an kilkhawi. A thilri tambik cu Darthmouth ah an kilkhawi.

Bulpak Nunram
Robert Frost ih bulpak nunram cu lungngainak le sunralnak ih a ciahpiah. 1885 kum, Frost kum 11 mi a si lai ah, a pa cu ttibi natnak (tuberculosis/TB) in a thi ih, an innsang cu dollar fang riat lawng nei in an rung tang. Frost ih nu cu 1900 kum ah khensa (cancer) nat in a thi fawn. 1920 kum ah a naunu Jeanie cu thinlunglam buainak neitupawl retnak zato (mental hospital) ih ret ttul dinhmun ah a thleng ih, a lehhnu kum kua ah cui’ zato ahcun a thi. Thinlung buai natnak hi Frost tei’ innsang ah a thleng ttheu ti theih a si. Ziangahtile amah Frost le a nu khal in beidongnak ruangih thinlunglam buainak an rak tuar dah ih, a fanu Irma khal 1947 kum ah thinlung buai zato ih ret a ttul phah ruangah a si. Frost ih nupi Elinor khal in beidongnak nasa zet a tuar fawn.

Elinor le Robert Frost hin fanau paruk an nei: fapa Elliot (1896-1904, santen sungdok nat in a thi); fanu Lesley Frost Ballantine (1899-1983); fapa Carol (1902-1940, mahte that aw); fanu Irma (1903-1967); fanu Marjorie (1905-1934, nau neih nat in a thi); le fanu Elinor Bettina (1907, a suah hnu ni thum ah a thi) pawl an si. Lesley le Irma lawng hin a pa an damsuahpi. A dam sung hmuahhmuah thinlunglam harbuainak neitu Frost ih nupi Elinor cun 1937 kum ah khensa natnak a neih thu a theih hnu in thinlunglam beidongnak a nei luar sinsin ih 1938 kum ah a thi.

A Kutsuak (Work)
Ningkhawng le Fakselnaklam Khirhtonnak (Style and Critical Response)
Frost ih biazai fak-ttheu-tu, bezaipu le fakseltu Randall Jarrell cun hitin a ngan, “Robert Frost hi, Stevens le Eliot thawn, ka hrang ahcun himi kumzabi sungih American bezaipu ropibik a si. Frost ih cungcuannak hi cu zaran thil a lan(h). Mi zaran menmen pawl thuhla anih tluk ih ngan-ttha-tu an um hrih lo. A kutsuak sungih mangbangza dramatic monologue pawl (mi pakhat lawng in thuhla umtudan rel/simfiang vivo kalhmang ih ngan mi bezai) asilole thlirmual phosuah mi pawl (dramatic scenes) hi mi malte lawng in an neih thei mi theihfimnak (knowledge) ihsin a ra suak mi an si ih, cumipawl cu ttongsuahnak ngaingai ih hman mi awkhiahpawl (the rhythms of actual speech) thawn, a cancan ahcun thiamtlinnak cungcuang (absolute mastery) thawn, a ngan suah mi bezai an si,” ti’n. Cuihleiah Frost ih bezai sungah a lang mi thuhla ngai-khungkhai-nak (seriousness) le tlaitluannnak (honesty) thuhla ah, Frost hi bezai sungah minung ih tonteh mi thuhlapawl kau zet ih phosuahnak lam ah a thiam hleice tiah a fak bet.

Jarrel in Frost thawi’ pehpar ih a ngan mi hminsintlak le mi hliahkhuh thei zet essay-pawl lakah “Robert Frost ih Home Burial” (1962), himi essay ah Home Burial bezai cipciar zet ih a siarnak thuhla a tel; le “To The Laodiceans” (1952), himi essay ah cindan hlun a thlun tuk  ti in siseh, Modern asilole Modern phungthlun biazai a luhcilh lo ti in siseh, Frost a soiseltupawl lak ihsin Frost a humnak essay, tivekpawl an tel. Jarell hin Frost ih bezaipawl naihniamdan ding kalhmang tam zet a ngan ih, “Neither Out Too Far Nor In Too Deep” bezai cipciar zet ih a siarnak tivek cun casiartupawl le fakseltupawl kha Frost ih bezaipawl an hnokzia (kalhmang phunphun a hman tam zia) a theihter fawn.

Jarell in Frost ih bezaipawl lakih cuangmuar hleice tiah a hril mi pawl ah “The Witch of Coös," “Home Burial,” “A Servant to Servants,” “Directive,” “Neither Out Too Far Nor In Too Deep,” “Provide, Provide,” “Acquainted with the Night,” “After Apple Picking,” “Mending Wall,” “The Most of It,” “An Old Man’s Winter Night,” “To Earthward,” “Stopping by the Woods on a Snowy Evening,” “Spring Pools,” “The Lovely Shall Be Choosers,” “Design,” le “Desert Places,” tipawl an tel.

2003 kum ah fakseltu Charles McGrath cun Frost ih biazai faksel thlirsalnakpawl ih an hmuitin mi hi kum a liam rual in a thleng aw vivo tiah a ngan (mipi lakih Frost hmuithlam khal a thleng aw vivo). “The Vicissitudes of Literary Reputation” (Calailam Hminthannak ih Lamzin Suk le So) timi cahram ah McGrath cun, “Robert Frost cu………1963 kum ih a thih lai ahkhan New England kiangkap minung ah ruah a si tlangpi. 1977 kum ah Lawrance Thompson ih nunthuanthu ahcun Frost ih biazai cu midang ih rak ruah dan hnakih a rak borhbah thu tarlang a si leh; lehhnu kum malte ahcun William H. Pritchard le Harold Bloom tivek fakseltupawl le bezaipu nauta deuh Joseph Brodsky tivek in an run cawisansalnak ruangah hung tungding aw sal in, tui can ahcun mi thin nuam lo le modern phungthlun (modernist) ngaihlotu dinhmun in a lang sal,” tiah a ngan.

The Norton Anthology of Modern Poetry cabu ih zohfeltu Richard Ellmann le Robert O’Clair cun Frost ih kalhmang cuangmuar le Edwin Arlington Robinson ih kutsuakpawl khaikhinnak an tuah. Ziangahtile annih pahnih hin an bezai tthumawknak ah New England hmunram an hman ttheu ruangah a si. Cumi ahcun Frost ih biazai cu “calailam hmuihmel mal deuh” (less literary) in an hmu ih, himi hi English le Irish cangantu Thomas Hardy le W.B. Yeats tivekpawl ih hliahkhuhnak ruangah a si thei tiah an ngan. Frost ih bezaipawl ahcun hlawhtling zet ih ttong tualleng (colloquial) hman mi hmuh ding a um ih, leilungpi ah a cambang (remain) ringring (thih hnu thlarau khawvel suangtuahnak tivek a tel lo tinak), amai’ san lai ih American biazai khawvel cun cang zalen (free verse) thlun tamsawn hmansehla anih cun cindan hlun sawn a thlun,” tiah an ngan. Frost hin kalhmang thlun mi nei hran lo ih ngan mi bezai (cang zalen) ngan cu “net um lo ih tennis leh vek” (like playing tennis without a net) a si tiah a sim mi ttongkam hi a hmin a thang ngaingai. Elbuaiawknak tam zet suaktertu a si. Cang zalen ngantupawl cun an hua zet ih, cang zalen ngantu mi tthen cun ‘net um lo ih tennis leh khal ah kalhmang mawi a um thotho’ tiah an ttang.

Frost ih bezai ningkhawng (style) thuhla thlirnak bawmtu dingih Poetry Foundation in a ruahman mi ca khal ah Frost ih kutsuakpawl cu “zabi 19 ih American biazai (cindanthlun bezai ruang-am a hman raungah) le modern phungthluk (idiom ttongkauseh le ni tin ih hman menmen mi ttongfangpawl a hmannak raungah) karlak lamzin pehawtertu” tiah tarlang a si. Frost cun “kalhmang nei mi bezai ruang-am sungih a kharhkhumawknak hin mah bulpak ih bezai ruang-am thar sersuahnak lam hnakin amai’ bezai sung thuhla (content) sawn hmuitin ttha thei ding ih a tuah ruangah siahsuahtu si lo in bawmtu a si sawn” tiah a zum thu khal an tarlang.

Bezai Thufunpawl (Themes)
Contemporary Literary Criticism (Sanzul Calai Fakselnak) cabu ah, zohfeltupawl cun “Frost ih kutsuak tthabik pawl cun, vandumkulh dang lam aw lo pakhat sungih mibulpak umkhawharnak (loneliness of the individual in an indifferent universe) kha tarlang phah in, umcannak (existence) thuhla ih thusuhnak bulhrampawl (fundamental questions) an phorhlang” tiah an ngan. Fakseltu T. K. Whipple khal in Frost ih kutsuakpawl ah a thimzawng ih thlirnak a tam thu sim phah in “a kutsuak tamsawn, a hleice in a cabu rorumbik North of Boston, ahcun Frost hin New England khawte nun ih dungkhar thim (dark background of life in rural New England) thuhla a ngaihsak ih, cui’ New England khawte nun ih siatralnak, le, can tampi ah, at-pumhlum-nak (total madness) sungih a tlak luh ttheu thupawl a tarlang” tiah a sim.

Khatlam ah America ih calailam mekazin hminthangbik pakhat a si mi Poetry mekazin zohfeltu Harriet Monroe cun Frost ih kutsuakpawl ah New England minungpawl ih hmelhmang a tarlang mi ngaithupi in, “kan sanphung (history) ahhin amah vek ih cabu pakhat sungah Yankee thlarau a thunlut tthabiktu hi an um lo men thei” tiah a sim. Harriet Monroe cun Frost in a bezai tthumawknak hrangih khawtelam nun le loram (farm) nun a hman ttheu mi cu Harriet Monreo hin a duh zet ih, Frost cu “minung in khuarel (nature) fehdan parih a khirhkirnak (reaction) thuhla tarlangnak” hi a ngaihvenbik tiah a sim. Cuihleiah Frost ih tarlang mi thuanthu kalhmang ih feh bezaipawl ah cangtu nei bezaipawl (character-based poems) tampi cu hnihsuak ding zawng ih deusiahnaklam (satirical) an si ttheu nan, Frost hin “lainatnak rong a kai mi hnihsuak” (sympathetic humor) a hmang ringring tiah a sim fawn.

Robert Frost ih Cabupawl

Pulitzer Laksawng A Ngahnak Bezaibupawl

  • New Hampshire: A Poem With Notes and Grace Notes (ngah kum- 1924)
  • Collected Poems (ngah kum – 1931)
  • A Further Range (ngah kum – 1937)
  • A Witness Tree (ngah kum – 1943)

Bezai Lawrkhawmbu Pawl

Himi ah A hmaisa but hum ih bezaipawl hmuahhmuah leThe Runaway bezai an tel.
  • New Hampshire (Holt, 1923; Grant Richards, 1924)
  • Several Short Poems (Holt, 1924)
  • Selected Poems (Holt, 1928)
  • West-Running Brook (Holt, 1928? 1929)
  • The Lovely Shall Be Choosers,The Poetry Quartos, printed and illustrated by Paul Johnston (Random House, 1929)
  • Collected Poems of Robert Frost (Holt, 1930; Longmans, Green, 1930)
  • The Lone Striker (Knopf, 1933)
  • Selected Poems: Third Edition (Holt, 1934)
  • Three Poems (Baker Library, Dartmouth College, 1935)
  • The Gold Hesperidee (Bibliophile Press, 1935)
  • From Snow to Snow (Holt, 1936)
  • A Further Range (Holt, 1936; Cape, 1937)
  • Collected Poems of Robert Frost (Holt, 1939; Longmans, Green, 1939)
  • A Witness Tree (Holt, 1942; Cape, 1943)
  • Come In, and Other Poems (1943)
  • Steeple Bush (Holt, 1947)
  • Complete Poems of Robert Frost, 1949 (Holt, 1949; Cape, 1951)
  • Hard Not To Be King (House of Books, 1951)
  • Aforesaid (Holt, 1954)
  • A Remembrance Collection of New Poems (Holt, 1959)
  • You Come Too (Holt, 1959; Bodley Head, 1964)
  • In the Clearing (Holt Rinehart & Winston, 1962)
  • The Poetry of Robert Frost (New York, 1969)
  • A Further Range (published as Further Range in 1926, as New Poems by Holt, 1936; Cape, 1937)
  • What Fifty Said
  • Fire And Ice
  • A Drumlin Woodchuck

Thuanthucawnpawl (Plays)

  • A Way Out: A One Act Play (Harbor Press, 1929).
  • The Cow's in the Corn: A One Act Irish Play in Rhyme (Slide Mountain Press, 1929).
  • A Masque of Reason (Holt, 1945).
  • A Masque of Mercy (Holt, 1947).

Thutluang Kutsuakpawl (Prose Works)

  • The Letters of Robert Frost to Louis Untermeyer (Holt, Rinehart & Winston, 1963; Cape, 1964).
  • Robert Frost and John Bartlett: The Record of a Friendship, by Margaret Bartlett Anderson (Holt, Rinehart & Winston, 1963).
  • Selected Letters of Robert Frost (Holt, Rinehart & Winston, 1964).
  • Interviews with Robert Frost (Holt, Rinehart & Winston, 1966; Cape, 1967).
  • Family Letters of Robert and Elinor Frost (State University of New York Press, 1972).
  • Robert Frost and Sidney Cox: Forty Years of Friendship (University Press of New England, 1981).
  • The Notebooks of Robert Frost, edited by Robert Faggen (Harvard University Press, January 2007).

Cabuhlawm Lawrkhawmbupawl (Omnibus volumes)

Ttong Suahmi (Spoken Word)

 Ref: Wikipedia
Posted by at
Labels:

No comments:

Post a Comment

Subscribe to: Post Comments (Atom)