Buddha ih Nunthuanthu (viii) - Thluakfimvarnak Ngah Hnu

Buddha ih Nunthuanthu (viii)

Thluakfimvarnak Ngah Hnu (The Post-Enlightenment Period)

Buddha cun a rei hlan ah kaithlun tam sinsin a hip, a cancan ahcun zirhtu dang pawl tla, anmah thluntupawl thawn, an hmuhruahdan a thlengawkter hai. Curuangah a hminthannak cu a darh thok. Buddha ih pa in a fapa cu siangpahrang fapa sinak ropi hnong ih a fehsuah ahkhan va thihlo lo in buddha ah a cang sawn ti a theih tikah, Kapilavastu ih an inn ah rat lung ding ih kotu dingah a zonzon in palai pakua tiang a thlah. Asinan palai pakua cun sawmnak thucah cu Buddha sim lo in, Buddha ih kaithlunpawl sawn an va zom ih, arhat ah an va cang sawn hai. Palai pahranak cun Buddha cu khawlipi ih tlung ding in a va lem (palai pahranak khal hi arhat ah a cang thotho). Buddha cu sawmnak vekin amai' suahsemnak khawlipi ih a tlun tikah hrinhnam upapawl (clan elders) in zahpahnak um lo in an rak hmuak. Cutikah Buddha cu thli lak ah a khaikang so aw ih, a taksa ruangpum ihsin meisa le tidai a rual in a suahter. Cumi an hmuh cun a sungkhat vuavang pawl in an ttihzah upat. A sungkhat vuavang pawl cun Buddha cu suncaw ei ding ih an sawm a ttul ti an theih lo ruangah, Buddha cu a pai' siangpahranginn ah feh lo in inn khat hnu inn khat feh in rawl a khong vivo. Cumi cun a pa cu a ning a natter, asinan Buddha cun cumi cu a rak liam zo mi buddhapawl khal ih tidan a si thu a simfiang.

A nupi Yashodhara cu a um lo sung hmuahhmuah a rak rinum. Asinan Buddha hmuak ding in a leng ah a suah lo ding thu, a thianhlim tlamtlinnak a cohlanzia langter ding in Buddha sawn a hnen ih a feh a ttul thu a sim. Buddha khal in cutin a tuah. Himi zawn ah run tarlang tam zet mi thlirmual pakhat a um leh. Cumi cu Buddha ih hmai ah Yashodhara a kun lai le a ke par ih a lu a ret lai zuk a si. Yashodhara khal a netnak ahcun sakhawlam serhranawknak ah a lut ih, arhat ah a cang. An fapa kum sarih mi Rahula khal a pai' hnenah ro dil ding ah a thlah. Cutikah Buddha cun Rahula cu phungki si ding in a rak ordained. Cumi cun Buddha ih pa cu thinphang mangbang in a umter. Buddha ih hnenah siangpahrang fapa (tupa) kum no in leitlun a hnon a hmuh ih a tuarnak natsatzia a sim. Curuangah hmailam can ahcun fapa ordained ding cu a nu le pa ih siannak lawng in siter ding ah a dil. Buddha khal in a lungkim ih, cumi cu phungki khawvel hrangih cindan kalhmang (monastic order) pawl lakih pakhat si ding ah a tuah.

Buddha hin thluakfimvarnak kimcang a ngah hnu kum 45 sung a kaithlun mibur pakhat thawn nisuah-saklam India hmunram ah a tlawng vivo. An tlawnvahnak tinkim ah a ngaiduhtu hmuah hrangah dharma a zirh vivo. A cancan ahcun pawltthen (sect) dang pawl ih hruaitupawl thawn thucuhawknak (debate) an nei (himi ah, Buddhist nganca bulhram pawl ih tarlangdan ahcun Buddha in nehnak a co ringring) ih, zatlanglam mihlawm tin (all social classes) hnen ihsin dungthlun a ngah vivo. Mi tthen hnenah beu hawl zircinhdan (practice of refuge) a zirh; a tthen hnenah khambehnak panga (five precepts) a zirh (minung thah lo ding, rukruk lo ding, nupasinak hmansualnak ah hnawihnihawk lo ding, thuphan per lo ding, rittheihthil hman lo ding, timi pawl an si); cun, a tthen hnenah thutak hawl thlacam dan (practice of meditation) a zirh. Buddha thluntu tamsawn cun leitlun an hnong lo, hringnun zaran ah an tang ko. Innsang suahsan in a kaithlun si duhtupawl cun phungki zatlanghlawm a si mi sangha an zom. A nu-ei nuhmei Mahaprajapati le an pasalpawl phungki ih luttu nunaupawl ih dilnak ruangah Buddha cun minupawl hrang sakhawlam serhhranawknak cindan (order of nuns) khal a din. Phungkipawl cu khuavang pathianpawl le milaipawl hrang hlawknak a um theinak ding ah dharma zirh ding in a thlah hai. Amah Buddha khal in dharma cu a zirh ringring. Ni tin zan tin in ziangkim-hmu-thei mit (omniscient eye) thawn leitlun cu a thlir vivo ih, hlawknak a ngah theitu ding minung a zoh. Vei tampi cu hlawknak a ngahtheitu ding pawl hnenah a huham cungcuang hmang in a va tlawng ttheu.

A hmaisalam kumpawl ahcun Buddha le a kaithlun phungkipawl cu camher zate'n (all seasons) an veivak, asinan a netnak ahcun ruahtam camher sung cu hmun khat ih cam cindan an hmang ti a si (saklam India ahcun ruahtam camher hi July thla laili ihsin October thla laili tiang a si). Cumi ah anmah mikhualtu puipapawl (patrons) in beunak an sahsak ih, ruahtam camher cem can cu phungkipawl hnenih rawl le thilripawl (a hleice in phungki puan) pekhlan can hleice ah a rung cang. Cui an beunakpawl khal cu kum pum ih cennak hmun sakhawinn (monasteries) ah an rung cang fawn. Buddha in a can tam sawn a hmannak hmun le zirhhruainak (discourses) tam zet a simnak a si mi Shravasti (Savatthi) khawlipi ih Jetavana sakhawinn cu bank neitu milian Anathapindada (Pali: Anathapindika) in Buddha hnenih a pekhlan mi a si.

Buddha ih thuneihnak (authority) hi amai' dungthlunpawl lakh man ah zuam rual lo (unchallenged) cun a rak feh lo. Phungkipawl in tenren-hremawknak (asceticism) an neih a ttul zat dinhmun thuhla ah elbuaiawknak a rak suak. Tthimnak ah Buddha ih tupa Devadatta in phungkipawl cu sangka hren lo (mi luh-suah thei ringringnak) ah ceng in sa an ei dah lo ding ti ih thubur a tuah mi cu amah Buddha ih zirhhruainak hnak in kalhmang khungkhai sawn a si ih, cumi thluntu mibur khal an tam zet. Buddha in Devadatta cu amah run aiawhtu  si ding ih a hnon tikah Devadatta in vei thum tiang thah a tum. A hmaisabik ahcun Buddha hlonhlo ding ah mi phiarthattupawl a ruai. Neta ah Devadatta cun Buddha rial ding in lungpi pakhat a nor ril nan, cui lungpi cun Buddha ih kezung lawng a rawt ngah. Buddha pal thattu ding ah sai sual khal a thlah. Asinan sai cu Buddha ih hmai a thlen tikah a ding ih, Buddha ih ke hram ah a kun. Sakhawinn ih ceng phungkipawl lakah ekinn hmandan thubuai tenau thuhla ih remawklonak khal a suak fawn. Cui an buainak a rehter thei lo tikah, Buddha cu ruahtam camher ttum khat pumhlum in sai thawn hramlak ah a va cawl.