Ka Duhdawtmi Nupi

Ka Duhdawtmi Nupi

Khami ni siimlam kha cu ka dam sung in ka hngilh thei nawn lo ding. Ni dang bang ih lehpannak thuthang ka zoh lai ah, ka nupi cu bual-inn ihsin a ra suak ih, "Duat, ka ke ah ziangtin simaw khuavang hminsin dum pakhat a hung um," i ti.

Kei hi siivailam theihfimnak ah ka tlasam zet. Nunau pawl cu thil tenau tete thupi zet ih buaipi an  hman ttheu ruangah ka rak ngaihsak lo.

Kan nupa cu kan lungput a rualrem aw, remdaihnak a um ti theih a si. Ka hnattuan dinhmun a kaisan hnu cun ka nupi in innsang hnattuan cu a zate'n a phur thluh. Ka hnattuan cu tu le tu caan hleifuan ttuan a ttul ttheu. Khual tlawn a ttul leuhleuh fawn. Vei hnihkhat cu thla khat lai tla khual tlawn a ttul. Khualtlawng hmuahhmuah in inn ih tangtu innsang, fanau pawl an ruathar ttheu. Asinan kei cu ka zangkhai zet. Ziangahtile kum tar pawl le fa le pawl cu ka nupi in felfaite'n a rak kilkhawi ding ti ka thei. Taktak ahcun ka nupi uartu hi keimah in uartu tluk in an tam ve. Midang pawl in ka nupi cu zianghman ruat har ttul nei lo, inn le mawttaw nei ih thilri nei famkim, pasal duhdawttu tiah an hmu. Taktak khal ah, romantic duhdawtnak tivek cu kan theithiam hran lo nan kan innsang cu a nuam ko.

Ka nupi cu sii company ih hna a ttuan dah ruangah ziangtizawng khal in kei hnak cun siivailam theihfimnak a nei ttha ti ding a si. Tu vekin rin lo pi ah, zaa le thak fawn lo in, vun parih a hung suak mi khuavang hminsin dum cu thil pakhatkhat a cang thei ti a thei. Cutin zato ih a va hmuhawk tikah vun cancer a rak si. Cui thula cun kan zate'n kan thin a phangter. Amah thlun in zato tthabikbik pawl ah kan va cekfel. Zato hmuahhmuah in an hmuhsuah mi a bang aw thluh. Sibawi hminthang pakhat cun hivek cancer hi thihnak a thlen mi zatek 90 a si, vun cancer lakih siavabik pakhat a si, tiah in sim.

A rei hlan ah sibawi pawl ih rak hisap vek in a ke, a ban le dunglam ah khuavang hminsin dum an suak peh vivo. A taksa ruangpum siseh, thinlung siseh, an ttawnttai vivo.

Ka cinban tawk ahcun ka nupi hi a dam lo phahphah nan a na bese dah lemlo. Tu ahcun hnattuan lo ih um thei lo cu mina ihkhun parah daiziarte'n a it ringring thlang.

A umlonak kan inn cu a reh reprep. Coka khal ah tisa, tikhu an um lo ih, innsang bungrua khal leikhu ah kai miammiam thlang. Tui hlan ih rak tleu mawi mi hmun, a lenglam ihsi ka ra thlen tinte'n hmun him nuam a si mi cu tu ahcun theihthiam um lo khop in a thleng aw.

Innsang thilri tampi cu ka rak tuangtim thiam lo. Rawl suan ding, tisang suan ding khal ka hrangah a rak harsa zet. Ka tuah mi coffee le ka suan mi khoh-suai cu anih ih suan mi thaw cun an thawtnak a dang. Tui hlan ah ol zet ih i pek lohli ttheu mi ni tin hman mi thilri pawl khal tu ahcun ziangtlukin hawl hman sehla ka hmu thei nawn lo.

Zato a kai ni ihsin ka hnatuan ihsin cawlh ka la. Sunsun zanzan in a cang thei tawk in a kiang ah ka um. Tui can lawng ah inn pakhat um lo sehla, cui inn ah lainatnak neitu innsangnu um lo sehla cun pasal in ziangtluk in paisa hawl khal sehla, ziangtluk in hminthang khal sehla, thil ziangkim hi a kawlawng men an rak si ti ka theithiam.

A nat a besiat vivo laifang ah ka rualpi pakhat in khawpi pakhat ah vun cancer tuamhlawm thiam hleice sibawi pakhat a um thu i sim. Hivek nat hi cui' sibawi in a tuamhlawm dam dah a ti. Asinan a tuamhlawm man a khung ding, vei khat tuamhlawm ah thla thum a rei ding a ti. Cumi thuhla ka sim tikah ka nupi cun natnak ih a delhkilh rero cing in ttongkam pakhat fiang zet in a hun ttong.

"Duat, dam hramhram ka duh."

Taktak a si. Ziangtlukin kan rak duhdawt aw ti hi tuihlan ah ka rak thei lo. Asinan cumi ttongkam a hun ttong caan ciah ah kannih cu leitlun ih duhdawt aw bik, nupa si ding ih rembik, hivek ih kan neihawk ngah hi mi vantthabik kan si ti ka theisuak. A nun a ttul. Ka nunter tengteng a ttul. Nuamtete'n kan tar ding ih kan fa le pawl ih fa le pawl in "Pupu, Pipi" ti ih in kawh lai kan ngai tlang ding. Cumi sibawi thawi' tuamhlawm ding in thu ka thlu. Hnattuan ihsin ni rei daih cawlh ka lak tikah ka hnattuanpi pawl ih ttong sepso awn ka thei.

"Kei si sehla cun ka tuamhlawm duh nawn lo ding. A tuamhlawm man a tamtuk si. Tuamhlawm dam thei lo sehla paisa heu le thazang bangh lak a si ko."

Hivek ttongkam ttongtu pawl cu mai' naivaibik minung hi leitlun ihsin a suak thlang ding timi tuarnak an tuar dah lo ruangah a si ding. Hivek paisa men hin minung pakhat ih nunnak hrangah ruahsannak a pe thei ti khal an theih lo ruangah a si ding. Ziangtluk in cemliam tam ding khal si sehla, a nun thei ding ahcun inn zuar, mawttaw zuar in ka tuamhlawm thotho ding.

Cumi khawpi ih kan feh hlan ah a ttul mi ni tin hman ding thilri pawl ka va lei. Puai nikhua a nai thlang ruangah maw si ding, bazar le dawr pi pawl ah innsang zatei' fehkhawm in lungawi zet ih thil leitu pawl ka hmuh tikah kei cu lungawinak thawi' tthenhran mi vekin ka vun hmu aw. Aipuannak le hnih-no tivek cu ka nupi a dam lo thok ihsin kei thawi' pehpar aw lo an bang.

Ka nupi ih ngansak mi cazin vekin thilri tampi ka lei. Thilfun pawl khai in dawr lenglam ih ka suah tikah an rit zet. Kum hi zat liangluang innsang zate hrangih thilri leitu, fangfai dip khat, siti pung khat ziangzat man a si ti hman theilotu kei cun dawr ihsin inn tiang thilri rit zet pawl ziangtin a rak thiar ttheu ti ka rak thei lo. Inn pakhat ih bantlang cu keimah ah ka rak ruat aw. Natnak ih a tluk hnu lawng ah himi inn ahhin amah sawn hi a thupibik a rak si ti ka theithiam.

Kan va tuamhlawmawknak khawpi ahcun kan neihawk pek vek in lainat aw zet in ni kan hmang liam vivo. Thla thum sung cat lo in kan um tlang. Kan hni tlang, kan ttap tlang. Hivek in pakhat le pakhat thinlung hmun khat tei' kan biakawklonak kum ziangzat a rak rei zo ti hman ka cing nawn lo.

Kan tuamhlawm thla khatnak ah malte a hung zia-um. Vei hnihkhat cu a kut liangbah phah in pangpar hmuan ah lam kan leng tlang. Kan khua ih pangpar hmuan luhka ih kan rak tonawk hmaisabik thu tla kan rel sal. Kan zoh tlang hmaisabik mi "Last Fillings" zuknung thu tla kan rel. Hivek cu honeymoon caan ih rel ttheu mi an si. Tu vek caa ih cuvek pawl vun mansuah cu thin a na nguahngo. Kan neihawk hnu kum tampi cu tuvek in thu kan rel tlang tam dah lo.

Thla thum sungih thazang tlaniam vivo ka nupi cu ka zoh ngam lo. Tuamhlawm dan hleice pawl khal a hrangah an tthahnem lo. Cencerh hai khat vun hrawp ding hman ah a thazang tampi a ttang. A netnak ahcun "Kan tlung pei" i ti. Cutin ruahsannak um lo zet in kan tlung.

Inn kan thlen hnu ah ni khat hnu ni khat a thazang a mal vivo. Cancer nat nei pawl ih an ttihbik mi na tuarnak pawl a tuar rero. Zan ah a itthat thei dah lo. A natnak pawl tuar in a aihram. Naa rehternak sii pawl khal in an neh nawn lo. A aiawh ih tuar ka duh kuahko. A tuarnak cu ka zoh ngam hrimhrim lo.

A nat a zia-um caan vei hnihkhat ah innsang hnattuan phunphun in cah theu. Cumi caan lawng ah himi inn le sungkua hrangah ziangtluk in an khimkhuah, ziangtluk in a rak buai ti ka theithiam. Ka duh mi ei-in pawl khuimi dawr ah an u, ka hruh ttheu mi angki ziang nambat a si, ziang brand a si, khuimi dawr ah lei a theih tivek in sim. Mual a liam hlan ni thum ah hnipuan sopnak cet hmandan i zirh ta.

In liam san hlan ah keimah thawi' kan neihawk ngah hi a lungawi thu tla in sim ta. Kan va tuamhlawmawk caan thla thum cu a nun sungih a lungawibik can an si a ti. Ka hrang khal ah cumi thla thum cu caan man neibik an si. Thla thum sungah dinhmun kaisannak ding le sumpai pawl ka sungral ko nan, ka nupi thawi' kan um tlang ngah mi thawi khaikhin cun cu pawl cu thil hleifuan men ah an cang. Ka van a tthat ruangah ka duhdawt mi thawn nai aw zet le thinlung hmun khat te'n thla thum sung ka um ngah thei.

In liam san lai khal ah thinlung hngelhnget zet in a liam. "Nunu cu hmun dang ah feh in in rak hngak, kannih tla nunu tong ding in caan khatkhat ah kan feh leh ding," tiah ka fapa ka sim.

In liam san hnu cun innsang dang pawl lungawi aipuangtei' an veivah khal ka zoh ngam lo. Kan tonawk hmaisabiknak pangpar hmuan luhka hmai ih ka feh tinte'n, zuknung zung hmai ih ka feh tinte'n, kan bazar tlangnak dawrpi hmai ka feh tinte'n sup thei lo in ka mitthli an tla theu. Thil sopnak cet ka hman tinte'n, rawl ka suan tinte'n, ka fapa hnipuan ka thlengter caan tinte'n, hnattuan kan ban tlai ruangih khoh-suai suan ka ei zan tinte'n, zanttim ah hung tthanghoi in ka sir ih a lawng riahriah mi hmun awl ka hmuh tinte'n, ka ttap ttheu. A um lai ahcun cuvek ih sunlawizia ka rak thei lo, sunsak ding an sizia khal ka rak thei lo. A um nawn lo hnu lawng ah, vanpi a cim vek rori in ka thei.

Ka rak zoh dah mi zuknung pawl ah an duhdawt mi a thih ruangih mipa pawl an ttah tikah lemcawn mi menmen an si ti'n ka rak ruat. Asinan tu ahcun ka ttap thlang. Zin zir ih thisen hlutnak mawttaw ding ka hmuh tinte'n amah ka mangsuak. Thisen ka hlu ih, inn ka thlen sal tikah thisen tthatsalnak ding rawl i suansak ttheu. Ka fapa khal, "Kan inn ahhin paisa hawltu Papa hi a bangbik, a thupibik," tiah a sim ttheu. Taktak ahcun amah sawn kha mi thupibik a rak si. A um nawn lo hnu cun kan pafa in lungawinak timi kan thlah liam ve.

A thlanlung ah "Ka Duhdawtmi Nupi" ti'n ka ngan. Kei hi ka thinlung tuarnak ol zet ih tarlang pawl ka si lo. Kan ngaiawk lai khal ah ka "duhdawt" thu ka sim tuk lo. Tu ahcun cui "duhdawt" timi ttongfang cu thlanlung par lawng ah ka ngansak thei thlang. Nunau hmuahhmuah in "duhdawtmi an si thu" hi an duhdawt mi minung ih kaa ihsi ra suak mi lawng an ngai duh. A ruahsan caan, a harhdam caan ah ziangruangah si ka rak sim lo aw!

Tui caan ah innsang harhdam le nuam neitu mipa pawl ka lo cah duh mi a um. Nan nupi kha tthate'n duhdawt uh. Nan nupi hrangah caan malte ret hran uh. Nan hrangih a lo tuahsak mi kha ngaihthah hlah uh. Nan sunral hnu lawng ah an mawinak, an thatnak pamhmai hlah uh!

Nupi timi cu leitlun ah a lo duhdawtbiktu, a lo theithiambiktu a si. Nangmai hrangih ziangkim tlansan ngamtu a si. Ziangvek mipa, ziangvek nunau ih duhdawtnak thawn hman in nupa karlak duhdawtnak kha va khaikhin hlah uh tiah ka lo cah duh a si.

Link bulhram-- http://www.duwenzhang.com/…/jing…/jingdian/20070802/480.html

Nine Nine Sanay ih leh mi "Chit Zani" leh sawng mi a si.